1 ታ ሸምፓቴ፥ መና ጎዳ ጋላታ!

ታ ኩመን አሳተዉ፥ አ ጌሻ ሱን ጋላታ።

2 ታ ሸምፓቴ፥ መና ጎዳ ጋላታ!

እ ነዉ ኦዳ ኬካተ ኡባ ዶጎፓ።

3 እ ነ ናጋራ ኡባ አቶ ጌ፤

እ ነ ሀርግያ ኡባፐ ኔና ፓ።

4 እ ኔና ዱፉዋን ገለናዳን አሼ፤

አገና ሲቁዋንነ ማሮታን ኔና አንጄ።

5 አርጋንዳን ኔን ያላጋና ማላ፥

እ ነ ደኡዋ ኡባን ኔና ሎኦባ ካልሴ።

6 መና ጎዳይ ናቀቴዳዋንቶ

ጽሎባ ኦነ ሱርያን ፕርዴ።

7 እ ባረ ኦግያ ሙሳ፥

ባረ ኦሱዋ እስራኤልያ አሳዉ ኤርሴዳ።

8 መና ጎዳይ ቃረትያዋነ ማርያዋ፤✝

እ ሀንቀታናዉ ኤሌለናዋነ

አገና ሲቁ ዳሩዋ።

9 እ ኡባ ገደ ሴረና፤ መናዉ ሀንቀተና።

10 እ ኑና ኑ ናጋራዳን ኦቤና፤

ኑ ኢታተዳን ኑዉ ዛርቤና።

11 ሳሉ ሳኣፐ ቂያዋዳን፥

መና ጎዳዉ ያይያዋንቶ አገና አ ሲቁ ዳራ።

12 አዋይ ዶልያሳፐ አዋይ ዉልያሳይ ሃክያዋዳን፥

መና ጎዳይ ኑ ባይዙዋ ኑፐ ሃሴ።

13 አዉ ባረ ናናቶ ቃረትያዋዳን፥

መና ጎዳይ ባረዉ ያይያዋንቶ ቃረቴ።

14 አያዉ ጎፐ፥ ኑን አያፐ መቴደንቶ እ ኤሬ፤

ኑን ቢታ ግድያዋ እ አኬኬ።

15 አሳ ግዶፐ፥ አ ደኡ ማታ ማላ፤

እ ባዙዋ ጪሻዳን ጪሼ፤

16 ጫርኩ አ ቦላ ጫርክና ዬዳ፤

እ ዶሌዳ ሳአይ ኤረተና።

17 ሽን መና ጎዳዉ ያይያዋንቶ፥

አገና አ ሲቁ መናፐ መና ጋካናሳ።

አ ጽሎተይካ ናኣ ናአዉ ጋካናሳ።

18 አ ጫቁዋ ናግያዋንቱሳነ

አ አዛዙዋ ፖላናዉ ሀሳይያዋንቱሳ።

19 መና ጎዳይ ሳሎቱዋን ባረ ካዉተ አራታ ኤሴዳ፤

አ ካዉተይ ኡባ ሞዴ።

20 ህንተኖ፥ አ ኪታንቻቶ፥

አ አዛዙዋ ፖልያ ዎልቃማቶ፥

እ ግያዋ ስስስያዋንቶ፥

መና ጎዳ ጋላትተ!

21 ህንተኖ ሳሉዋን ደእያ ምኖቶ፥

አ ሸንያ ኦያ ቆማቶ፥

መና ጎዳ ጋላትተ!

22 ህንተኖ፥

እ ሞድያ ሳኣ ኡባ መታቶ፥

ኡባይካ መና ጎዳ ጋላትተ!

ታ ሸምፓቴ፥ መና ጎዳ ጋላታ!