Salmos 19

ጾሳይ ጽሎተ አዋ

ዛማረቱዋ ካፖ የጸቴዳ፥ ዳዊታ ማዝሙርያ።

1 ሳሎቱ ጾሳ ቦንቹዋ ሃሳዪኖነ

ሳሎቱዋ ጉፋን እ ባረ ኩሽያን ኦዳዋ አዋዬ።

2 እት ጋላሳይ የንኮ ጋላሳዉ ሄዋ ኦዴ፤

እት ቃማይካ የንኮ ቃማዉ ኤራተ ቆንጭሴ።

3 ሃሳይ ዎይ ቃላይ ባዋ፤

ኡንቱንቱ ኮሻይካ ስሰተና።

4 ግዶፐካ፥ ኡንቱንቱ ሃሳያ ኮሻይ ሳኣ ኡባን ላለቴዳ፤✝19:4 ሮመ 10:18

ኡንቱንቱ ቃላይካ ሳኣ ጋጻ ጋኬዳ።

ጾሳይ አዋይ ደእያ ሳኣ ሳሉዋን ጊግሴዳ።

5 ናሸቲደ ካረ ሶፐ ከስያ ምሽራዳን፥

ዎ ናስያዉ ጊጌዳ ዎንቻዳን፥

አዋይ ዎንታ ዎንታ ከሴ።

6 አዋይ እት ባጋ ሳሉዋ ጋጻፐ ሞኪደ፥

ሀራ ባጋ ሳሉዋ ጋጻ ጋካናስ ቤ፤

አ ሆኡዋፐ ጌምያዌ አያይነ ባዋ።

7 መና ጎዳ ህጊ ሱረ፤

ሸምፑዋ ዛሬ።

መና ጎዳይ ኦድያዌ አማነትያዋ፤

አኬካይ ፓጬዳዋንቶ ኤራተ እሜ።

8 መና ጎዳ ዎጋይ ልከ፤

ዎዛና ናሸቼ።

መና ጎዳ አዛዙ ጌሻ፤

ዎዛና ፖእሴ።

9 መና ጎዳዉ ያይያዌ ጌሻተ፤

ሄዌ መናዉካ ኤቂድ ደእያዋ።

መና ጎዳ ፕርዳይ ቱማነ ጽሉዋ።

10 ዎርቃፐነ ዋላክ ባይና ዎርቃፐ አደ ዶሰቴ፤

ኤሳፐነ ኤሳ እልሉዋፐ አ ማልኤ።

11 ቃይ ታና ነ ቆማ ናገታናዳን ዞሬ፤

ነ ህግያ ናጉ ዳሮ ጎኤ።

12 ባረ ሁጲያ ባላ ደምያዌ ኦኔ?

አቤት ጾሳዉ፥ ጌሜዳ ናጋራፐ ታና ጌሻ።

13 ቃይ ታን፥ ነ ቆማይ፥

ጻላን ናጋራ ኦናዳን፥

ኔን ታና ናጋ።

ታና ናጋራዉ ሞድሶፓ፤

ሄ ዎደ ታን ሱረ ግዳደ፥

ዎልቃማ ባይዙዋፐ ጌያና።

14 አቤት መና ጎዳዉ፥ ታ ዎጋ ዛላዉ፥

ታና ዎዜዳዎ፥

ታ ዶናፐ ከስያ ቃላይነ

ታ ዎዛና ቆፋይ ኔና ናሸችያዋ ግዶ።