Salmos 21

ጾኑዋ ድራዉ ጋላታ

ዛማረቱዋ ካፖ የጸቴዳ፥ ዳዊታ ማዝሙርያ

1 አቤት መና ጎዳዉ፥ ካቲ ነ ምኖተን ሀሹ ጌ፤

ኔን እሜዳ ጾኑዋን እ አያ ናሸቲ!

2 ኔን አ ዎዛና አሙዋ አዉ እማዳ፤

ቃይ እ ኔና ባረ እንጻርሳን ኦቼዳዋ ድጋባካ።

3 ኔን ሎኦ አንጁዋን አ ሞካሳ፤

ጌሻ ዎርቃ ካላቻ አ ሁጲያን ዎሳ።

4 ኔን ደኡዋ አዉ እማናዳን ኔና ዎሴዳ፤

አዉ ጮራ ላይነ አዱሳ ደኡዋ እማዳ።

5 ኔን ጾኑዋ እሜዳ ድራዉ፥

አ ቦንቹ ዳሬ፤ ግታተነ አንጋ አዉ እማዳ።

6 ኔን አዉ መና አንጁዋ እማሳ፤

ኔን እትፐ ደእያዋን አ ናሸቻሳ።

7 ካቲ መና ጎዳን አማነቴ።

ኡባፐ ቂያ ጾሳ ሎኦተ ድራዉ፥

እ ቃጸና።

8 ነ ኩሺ ነ ሞርከቱዋ ኡባ ኩቱታና፤

ነ ኡሸቻይ ኔና እጽያዋንታ ደማና።

9 ኔን ቆንጭያ ዎደ፥

ኡንቱንታ ጮጭያ ታማዳን ጹጋና።

መና ጎዳይ ባረ ሀንቁዋ ሱሉዋን ኡንቱንታ ምታና፤

አ ታማይካ ኡንቱንታ ም ይሳና።

10 ኔን ኡንቱንቱ ናናቱዋ ቢታፐ፥

ኡንቱንቱ ዘረካ አሳ ግዶፐ ይሳና።

11 ነ ሞርከቱ ነ ቦላ ሺቅኖነ

ኢታባ ማቀቲኖ፤ ሽን ፖልክኖ።

12 አያዉ ጎፐ፥ ኔን ኡንቱንታ ነ ዎንዳፍያ ፖን ዱካናዉ ባብሳና፤

ባብሳደ ጉየ ዛራደ ባቃትሳና።

13 አቤት መና ጎዳዉ፥ ነ ምኖተን ቁ ቁ ጋ፤

ነ ዎልቃ ድራዉ ነዉ ጋላታ ማዝሙርያ የጼቶ።