1 ଆନାଜି ଏର୍ଡରମ୍ମ ବନାଁୟ୍ବରନ୍ ତୁବ୍ତଜି ଆରି ଅଙ୍ଗା ଆଇଡଲ୍ମର୍ଜି ଜନୁରୁବରନ୍ ଇଡ୍ତଜି, ଆନିଞ୍ଜି ପନବ୍ରଡନ୍ ଞାଙ୍ତଜି । 2 ଆନିଞ୍ଜି ଜୁଆର୍ବଜଞ୍ଜିଆଡଙ୍ ଜୁରୁ ଜିନିସନ୍ ଅନ୍ତମ୍ ଆନେମ୍ମେ ଆସନ୍, କୋନ୍ରାସିଜଞ୍ଜି ଆନର୍ଜେ ଅଡ଼୍କୋନ୍ ରୁଜାୟ୍ଲେ, ଡୋଲେୟ୍ମରଞ୍ଜିଆଡଙ୍ ଆଜାଡ଼ି ପନ୍ସୁଆତିନ୍ ସିଲଡ୍ ଆବ୍ୟର୍ତଜି ଆରି ଡୁକମର୍ଞେଞ୍ଜି ଆତେ ରୁୟ୍ଲେ ପାଙ୍ତଜି । 3 ତିଆସନ୍ ପନବ୍ରଡନ୍ ଆତନିୟ୍ ଆଡିନ୍ନା ଡ ସଙାୟ୍ ଡେସାନ୍ ସିଲଡ୍ ଆଜିର୍ତାଞନ୍ ଆନସେଡ୍ ଡିନ୍ନାଇଙନ୍ ଆମ୍ୱେଞ୍ଜି ଇନି ଏଙ୍ଗାତନେ ? ଡନୋବନ୍ ଆଞନାଙ୍ ଆସନ୍ ଆମ୍ୱେଞ୍ଜି ଆନା ଆମଙ୍ ଏଜିର୍ତେ ? ଆରି ଅନର୍ଜେବେନ୍ ଅଙ୍ଗାଲୋଙ୍ ଏଡକୋତେ ? 4 ଆନିଞ୍ଜି ଆବଣ୍ତିମରଞ୍ଜି ତୁମ୍ ଆଜଙ୍ ଆଜାୟ୍ତା ଅବ୍ସନ୍ନାତଞ୍ଜି ଆରି ଆରବୁମରଞ୍ଜି ଆଜାୟ୍ତା ଗଲୋତଜି । କେନ୍ ଅଡ଼୍କୋନ୍ ଡେଏନ୍ଜନଙ୍ଡେନ୍ ପ୍ରବୁନ୍ ଆ ବନ୍ରାବ୍ ଅଃସୟୁଏ, ବନ୍ଡ ଆସିନ୍ ଆମ୍ମୁଙ୍ ଅନ୍ତମ୍ ପନବ୍ରଡନ୍ ଆସନ୍ ତେକ୍କେସିଲନ୍ ଡକୋ ।
ଇସ୍ୱରନ୍ ଆ ଅତିଆର ଅସୁର ରାଜା
5 ପ୍ରବୁନ୍ ବର୍ତନେ, "ଆୟ୍ ଅସୁରନ୍! ଆମନ୍ ବନ୍ଡ୍ରାବ୍ଞେନ୍ ଅନ୍ତମ୍ ଆପନବ୍ରଡ୍, ଆସିଲୋଙନ୍ ବନ୍ଡ୍ରାବ୍ଞେନ୍ ଅନ୍ତମ୍ ଆଡାଙ୍ଗୁ ଡକୋ । 6 ଅଙ୍ଗା ଆ ମନ୍ରାଜିଆଡଙ୍ ଞେନ୍ ବବ୍ରାବ୍ତିଞ୍ଜି, ତି ଏର୍ମଡ଼ିର୍ କେଜ୍ଜାନ୍ ଜୁରୁ ଜିନିସଞ୍ଜି ରୁୟ୍ଲେ ଆପନାଙ୍ ଆସନ୍, ଡ ମନ୍ରାଞ୍ଜିଆଡଙ୍ ତଙରନ୍ କାଡ୍ଡୋନ୍ ଅନ୍ତମ୍ ଆଞନାଡା ଆସନ୍ ଞେନ୍ ଆନିନ୍ଆଡଙ୍ ବାଞ୍ତାୟ୍ ।" 7 ଡେଲୋଜନଙ୍ ଆନିଃୟମନ୍ ତିଅନ୍ତମ୍ ତଡ୍, ଅଡ଼େ ଆ ଉଗରନ୍ ତିଅନ୍ତମ୍ ଅଃନିୟମେ । ବନ୍ଡ ଅନବ୍ସେଡନ୍ ଆସନ୍ ଡ ଲାଙ୍ଲେଡ୍ କେଜ୍ଜାନ୍ଆଡଙ୍ ଅନବ୍ମୋସାନ୍ ଆସନ୍ ଆ ଉଗର୍ଲୋଙନ୍ ଡକୋ । 8 ଇନିଆସନ୍ଗାମେଣ୍ତେନ୍ ଆନିନ୍ ବର୍ତନେ, ସିପ୍ପାୟ୍ଞେଞ୍ଜି ଆସୋଡ଼ା ଅଡ଼୍କୋନ୍ ରାଜାଞ୍ଜିତଡ୍ ପଙ୍ ? 9 କଲ୍ନୋ ଗଡ଼ାନ୍ ପଙ୍ କର୍କମିସ୍ ଗଡ଼ାନ୍ ଅନ୍ତମ୍ତଡ୍, ଅମାତ୍ ଗଡ଼ାନ୍ ଅର୍ପଦ ଗଡ଼ାନ୍ ଅନ୍ତମ୍ତଡ୍, ସମରିଆନ୍ ଦମ୍ମେସକନ୍ ଅନ୍ତମ୍ତଡ୍ । 10 ଅଙ୍ଗା ଆକୋଙ୍ଡାୟ୍ଜି ଆ ରାଜ୍ୟ ଅଡ଼୍କୋନ୍ ଆରପ୍ପମ୍ତେଞ୍ଜି ଆମୁର୍ତିଜି ଜିରୁସାଲମ୍ ଡ ସମରିଆନ୍ ଆକୁଣ୍ଡାୟ୍ଜି ସିଲଡ୍ ମନଙ୍ ଡକୋଏନ୍, ତି ଅଡ଼୍କୋନ୍ କୋଙ୍ଡାୟ୍ପୁର୍ ରାଜ୍ୟଞ୍ଜି ଏଙ୍ଗାଲେ ଞେନ୍ ଲୁମ୍ଲାୟ୍ । 11 ଞେନ୍ ସମରିଆ ଡ ଆ କୁଣ୍ଡାୟ୍ଜି ଆଡଙ୍ ଏଙ୍ଗାଲେ ଅମେଲାୟ୍, ଜିରୁସାଲମ୍ ଡ ଆ କୁଣ୍ଡାୟ୍ଜି ଆଡଙ୍ ଇନି ତି ଅନ୍ତମ୍ ଅନମେଆୟ୍ ପଙ୍ ? 12 ତିଆସନ୍ କେନ୍ ଅନ୍ତମ୍ ଗଟେତେ ଡ, ସିଓନ ବରୁଲୋଙ୍ ଡ ଜିରୁସାଲମ୍ଲୋଙ୍ ପ୍ରବୁନ୍ ଅଡ଼୍କୋନ୍ ଆ କାବ୍ବାଡ଼ାନ୍ ଆସରାତ୍ତେନ୍ ଆଡିଡ୍ ଆନିନ୍ ବର୍ତନେ, ଅସୁର ରାଜା ଆ କଙ୍କ୍ରି ଉଗରନ୍ ଡ ଗନିୟ୍ଗିଜନ୍ ଞେନ୍ ପବ୍ରଡ୍ତାୟ୍ । 13 ଇନିଆସନ୍ଗାମେଣ୍ତେନ୍ ଅସୁରନ୍ ଆ ରାଜା ବର୍ତନେ, "ଅସିଞେନ୍ ଆ ରନପ୍ତି ବାତ୍ତେ ବୁଡ୍ଡିଞେନ୍ ବାତ୍ତେ କେନ୍ ଆକାବ୍ବାଡ଼ା ଲୁମେନ୍; ଆରି, ଞେନ୍ ଏର୍ଜାଡ଼ିକାନ୍ ଆକେଜ୍ଜା ଆସଣ୍ତି ସବ୍ଙାୟ୍ଲାୟ୍ ଆରି ଆତନର୍ତୁମ୍ ଆନର୍ଜେଞ୍ଜି ରୁୟ୍ଲେ ପାଙାୟ୍ଲାୟ୍, ଡ ରାଜା ତରଙ୍କୁମ୍କୁର୍ସିଲୋଙନ୍ ଆତଙ୍କୁମନ୍ ଆମନ୍ରାଜିଆଡଙ୍ ଅସିଞେନ୍ ଆ ରନପ୍ତି ବାତ୍ତେ ଜାୟ୍ତାନ୍ ଏମ୍ମେଲାଜି । 14 ଅସିଞେନ୍ ଅନ୍ତିଡ୍ସିଙନ୍ ଆଞରାଙେନ୍ ଅନ୍ତମ୍, ପୁର୍ତିନ୍ ଆକେଜ୍ଜାଜି ଆନର୍ଜେ ଞେନ୍ ଞାଙ୍ଲାୟ୍ ଆରି ଆନ୍ନିଙ୍ ଏଙ୍ଗାଲେ ଆସନେଡନ୍ ଆରେସିମ୍ ତର୍ତୁମ୍ତେ, ତି ଅନ୍ତମ୍ ଞେନ୍ ସମ୍ପରା ପୁର୍ତ୍ତିନ୍ଆଡଙ୍ ତର୍ତୁଲାୟ୍; ଆରି, ଅବୟ୍ କାପ୍ପାନ୍ ଅନେଙନ୍ ଆସନ୍ ଅଡ଼େ ତଅଡନ୍ ଆନାଙ୍ତମ୍ ଅଡ଼େ ସିବ୍ ସିବ୍ ସିବ୍ ସିବ୍ ଅବ୍ସଡ୍ଡାନେନ୍ ଆସନ୍ ଆନ୍ନିଙ୍ ଅଡ୍ଡକୋଲୋ ।" 15 ଏଞ୍ଜୁମନ୍ ଇନି ଅଡାରାମରନ୍ଆଡଙ୍ ବିରୁଦଲେ ଗର୍ବଲନ୍ ରପ୍ତିଏ ପଙ୍ ? କର୍ତନ୍ ଇନି ଗଡ୍ରାମରନ୍ ବିରୁଦଡାଲେ ସୋଡ଼ା ଗାମ୍ଲେ ରପ୍ତିଏପଙ୍ ? ଆନାଜି ଡାଙ୍ଗୋନ୍ ତେକ୍କେତଜି ଡାଙ୍ଗୋନ୍ ଇନି ମନ୍ରାନ୍ଆଡଙ୍ ବର୍ରେ ରପ୍ତିଏ ପଙ୍ ? ଆନା ଅରାନ୍ତଡ୍ ଡାଙ୍ଗୋନ୍ ଇନି ଆନିନ୍ଆଡଙ୍ ଅବ୍ଡୋଏ ? 16 ତିଆସନ୍ ପ୍ରବୁ ପ୍ରବୁନ୍ ଆସୁକ୍କାନ୍ ଆମନ୍ରାଜି ଆମଙ୍ବା ରୋଗନ୍ ଆପ୍ପାୟ୍ତାୟ୍ ଆରି ରାଜାନ୍ ଆତନଙ୍କୁମ୍ କୁର୍ସିନ୍ ଆଜାୟ୍ତା ଆଡୁଡୁନ୍ ଆତଗୋଲୋଙ୍ ଜୋମ୍ତୋଡ୍ତେ । 17 ଆରି, ଇସ୍ରାଏଲନ୍ ଆସନାଆର୍ ତଗୋନ୍ ଅନ୍ତମ୍ ଡେତେ ଡ ଆ ଡରମ୍ମନ୍ ଆଉଲାଙ୍ତୋଡନ୍ ଅନ୍ତମ୍ ଡେତେ, ଆରି ତିଆତେ ଡୁଡୁଲେ ଆବଡିନ୍ନାନ୍ କାନ୍ତେସିନୁବନ୍ ଡ ଅବ୍ବାନୁବନ୍ ଅଡ଼୍କୋନ୍ ଜୋମ୍ତୁଡ୍ତେ । 18 ଏଙ୍ଗାଲେ ଅସୁନ୍ ବାତ୍ତେ ଆବରମ୍ତେନ୍ ଆମନ୍ରା ଆପରାନ୍ନା ଡ ଆନିନ୍ଆଡଙ୍ ଅସର୍ରେ ପାଙ୍ତେ ତି ଅନ୍ତମ୍ ଆନିନ୍ ଆ କିନ୍ରେଙନ୍ ଡ ଜେଲ୍ଜେଲ୍ ଲବନ୍ ଆମନନଙନ୍, କେନ୍ ଅଡ଼୍କୋନ୍ ଅବ୍ସେଡ୍ତେ । 19 ଆରି, ଲାଙ୍ଲେଡ୍ ଆ କିନ୍ରେଙ୍ ଆରାନୁବ୍ ଏତ୍ତେଲେ ଅସୋୟ୍ତେ ଡ, ଅବୟ୍ ପସିଜନ୍ ତିଆତେ ଗିୟ୍ଲେ ରପ୍ତିତେ ।
ଇସ୍ରାଏଲନ୍ ଲାଙ୍ଲେନ୍ନେ ଆୟର୍ନେ
20 ଆରି ତି ଆଡିନ୍ନା ଏତ୍ତେଲେ ଗଟେତେ ଡ, ଇସ୍ରାଏଲନ୍ ଲାଙ୍ଲେଡ୍ ଆମନ୍ରାଜି ଡ ଜାକୁବନ୍ ଆକେଜ୍ଜା ଡନୋବନ୍ ଆଡ୍ରେଏଞ୍ଜି ଆମନ୍ରାଜି ଆ ତନୁଡ୍ମରଞ୍ଜି ଆଉପ୍ରେଙ୍ ଆରି ଅଃନାସାନେଜି; ବନ୍ଡ ଆନିଞ୍ଜି ଆଜାଡ଼ିନ୍ ଇସ୍ରାଏଲନ୍ ଡରମ୍ମ ପ୍ରବୁନ୍ ଆଉପ୍ରେଙ୍ ଆସାତଞ୍ଜି । 21 ଲାଙ୍ଲେନ୍ନେ, ଆଗରାମ୍ଗାମ୍, ଲାଙ୍ଲେନ୍ନେ ଜାକୁବନ୍ ଆକେଜ୍ଜାମର୍ଜି, ରନପ୍ତି ଇସ୍ୱରନ୍ ଆମଙ୍ବା ୟରନ୍ ଜିର୍ତାଜି । 22 ଇନିଆସନ୍ଗାମେଣ୍ତେନ୍ ଇସ୍ରାଏଲମର୍ବେଞ୍ଜି ସମେଁୟ୍ଣ୍ଡ୍ରାନ୍ ଆଲକିୟ୍ ଅନ୍ତମ୍ ଡେଲୋଜନଙ୍ଡେନ୍ ଲାଙ୍ଲେନ୍ନେ ୟର୍ରନ୍ ଜିର୍ତାଜି; ଡରମ୍ମନ୍ ଗଗଡାନ୍ ଅନ୍ତମ୍ ଆଡନେଙ୍ଗା ଡେଏନ୍ । 23 ଇନିଆସନ୍ଗାମେଣ୍ତେନ୍ ପ୍ରବୁ ପ୍ରବୁନ୍ ସମ୍ପରା ପୁର୍ତିନ୍ ଆଗନବ୍ରି ଆ ରନସମ୍ ଗବ୍ଡେଲ୍ତେ ।
ପ୍ରବୁନ୍ ଆସରିଆନ୍ଜି ପବ୍ରଡ୍ତଜି
24 ତିଆସନ୍ ପ୍ରବୁ ପ୍ରବୁନ୍ ବର୍ତନେ, ଏ ସିଓନଲୋଙନ୍ ଆଡ୍ରକୋତଞ୍ଜି ମନ୍ରାଲେଞ୍ଜି, ମିସରଞ୍ଜି ଆର୍ଲୁମେଞ୍ଜି ଅନ୍ତମ୍ ଅସୁରିୟଞ୍ଜି ଡଅଙ୍ବେନ୍ ଡାଙ୍ଗୋନ୍ ବାତ୍ତେ ତିଡ୍ଲବେଣ୍ଡେନ୍ ଡ କିନ୍ଡୋଙ୍ବାବେନ୍ ଆ ଡାଙ୍ଗୋନ୍ ଅବ୍ଡୋଏନ୍ ଜନଙ୍ଡେନ୍, ତି ଆ ବିସୟ୍ଲୋଙ୍ ବତଙ୍ଡଙ୍ବେନ୍ । 25 ଇନିଆସନ୍ଗାମେଣ୍ତେନ୍ ଅସୋୟ୍ ଡିନ୍ନା ଆତିକି ବନ୍ଡ୍ରାବନ୍ ଡ ଆନବ୍ସେଡନ୍ ବରାବ୍ଞେନ୍ ଗଡେଲ୍ତେ । 26 ଇସ୍ୱରନ୍ ଓରେବ ଏରେଙ୍ବାନ୍ ମିଦିନିୟଞ୍ଜିଆଡଙ୍ ଞେନ୍ ଏଙ୍ଗାଲେ ତିଡ୍ଲାଜି । ଅସିରିଅଞ୍ଜି ନିୟ୍ ଏତ୍ତେଲେମା ଉସାଲ୍ ଲୁଆଡନ୍10:26 ଉସାଲ୍ଲୋଙନ୍ ଲଆଙନ୍ ମାୟ୍ଲେ ଆଗିଡ୍ଗିଡନ୍ ଆଲୁଆଡ୍ ବାତ୍ତେ ତିଡ୍ତାଜି ଆରି ମିସର୍ ଡେସାଲୋଙନ୍ ଏଙ୍ଗାଲେ ଲୁମେନ୍, ତି ଅନ୍ତମ୍ ସମେଁୟ୍ଣ୍ଡ୍ରାଲୋଙନ୍ ଡାଙ୍ଗୋନ୍ ତେକ୍କେତେ । 27 ଆରି, ତି ଆଡିନ୍ନାଲୋଙ୍ ତାରଙ୍ବେନ୍ ସିଲଡ୍ ଆ ରାଙଙନ୍ ଡ ଆବନ୍ରୋୟନ୍ ଅବବ୍ବେନ୍ ସିଲଡ୍ ସନବ୍ଙାଜନ୍ ଡେତେ, ଆରି ଅବିସେକନ୍ ଆଡ୍ରେତେନ୍ ଆସନ୍ ରାଙଙନ୍ ଗୁରୁଡ୍ଡେତେ ।
ତନିଡ୍ମର୍ରଞ୍ଜି ଜୁରୁଡେଞ୍ଜି
28 ଆନିନ୍ ଅୟାତ ଗଡ଼ାନ୍ ଜିର୍ରାୟ୍ ଆନିନ୍ ମିଗ୍ରୋଣଗଡ୍ ଜିରେନ୍ ଆନିନ୍ ମିକ୍ମସ୍ଲୋଙନ୍ ଆ ଜିନିସନ୍ ଡକ୍କୋଏନ୍ । 29 ଆନିଞ୍ଜି ଡାୟ୍ବୁରନ୍ ପଡ୍ଲେ ଜିରେଞ୍ଜି; ଆନିଞ୍ଜି ଗେବାଲୋଙନ୍ ଡକୋତଞ୍ଜି; ରାମାନ୍ ତକର୍ତେ; ସାଓଲନ୍ ରାଜାନ୍ ଗିବିଆ ଗଡ଼ାନ୍ ଜିରେଞ୍ଜି । 30 ଏ ଗଲିମନ୍ ଆ ଡାଙ୍ଗଡ଼ି, ଆମନ୍ ସର୍ରଙ୍ନମ୍ ବାତ୍ତେ ଆକ୍ରାନ୍ ବାବ୍ବାବା, ଏ ଲଇସ୍ ଡାଲୁଡା, ୟୋଙ୍ ଡୁକ୍କବୟ୍ ଅନାତୋତ୍, 31 ମଦମେନାନ୍ ଜିର୍ଜିରିୟ୍ମର୍ ଡେଏନ୍; ଗେବିମବାଜି ଜନିରନ୍ ଆସନ୍ ରୁକୁତଞ୍ଜି । 32 ଆନିନ୍ ଲଙେ ନୋବଲୋଙନ୍ ଡକୋତନେ; ଆନିନ୍ ସିଓନନ୍ ଆଡାଙ୍ଗଡ଼ି ଆ ବରୁ ଜିରୁସାଲମ୍ ଗଡ଼ାନ୍ ତାରିଆୟ୍ତେ । 33 ଗିଜା, ପ୍ରବୁ, ପ୍ରବୁନ୍ ଆନିଞ୍ଜିଆଡଙ୍ ବବରନ୍ତଙନ୍ ଅନ୍ତମ୍ କେଣ୍ତାରଞ୍ଜି ଅଡ଼୍କୋନ୍ ରଜାୟ୍ତେ; ଆରି, ଜବ୍ର ଡେଙ୍ଗାରାଞ୍ଜିଆତେ ଅନଡନ୍ ଡେତେ ଡ ଆମନରଙଞ୍ଜି ଅଡ଼୍କୋନ୍ ଅନବ୍ଜାୟ୍ତାନ୍ ଡେତେ । 34 ଆନିନ୍ ତାଙ୍ଗିଆନ୍ ବାତ୍ତେ ଜବ୍ର ସଡ୍ଡବନ୍ ଆକିନ୍ରେଙ୍ ଅଡ଼୍କୋନ୍ ଗଡ୍ଲେ ସେତ୍ତେ, ଆରି ଅବୟ୍ ଜବ୍ର ବୋର୍ସାମରନ୍ ବାତ୍ତେ ଲିବାନୋନ୍ ଗୁରୁଡ୍ଡେତେ ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)