1 ୟୋଙ୍‌ ଅରିଏଲ୍‌*, ଅରିଏଲନ୍‌, ଦାଉଦନ୍‌ ଆ ଡରକୋନେ ଗଡ଼ା, ବବର୍ସେଙନ୍‌ କି ବବର୍ସେଙନ୍‌ ମାୟା, ପୁର୍ପୁର୍ରଞ୍ଜି ତରଙ୍‌ବୟ୍‌ ଜିରାୟ୍‌ତୋ, 2 ଏତ୍ତେଲ୍‌ଡେନ୍‌ ଞେନ୍‌ ଅରିଏଲନ୍‌ଆଡଙ୍‌ ଅବ୍‌ଡୁକତାୟ୍‌, ଏତ୍ତେଲ୍‌ଡେନ୍‌ ୟନେନ୍‌ ଡ ୟେୟେଡାନ୍‌ ଡେତେ ଆରି ତିଆତେ ଞେନ୍‌ ଆସନ୍‌ ଅରିଏଲନ୍‌ ଅନମଙନ୍‌ ଆଡ୍ରକୋନେ ଅନ୍ତମ୍‌ ଡେତେ । 3 ଆରି ଞେନ୍‌ ଅବ୍‌ୟର୍‌ୟର୍‌ ବିରୁଦଲୋଙ୍‌ନମ୍‌ ତମ୍ବୁସିଙନ୍‌ ତୁବ୍‌ତାୟ୍‌ ଆରି ଅଲ୍‌ଜୁଜ୍ଜେଲୋଙନ୍‌ ଆମନ୍‌ଆଡଙ୍‌ ଜିବାଡ୍‌ତାୟ୍‌; ଆରି ବିରୁଦଲୋଙ୍‌ନମ୍‌ ଅନବ୍‌ଗେଗେନ୍‌ ଆସନ୍‌ ତଙରନ୍‌ ଏସାୟ୍‌ତାୟ୍‌ । 4 ଏତ୍ତେଲ୍‌ଡେନ୍‌ ଆମନ୍‌ ଅବ୍‌ସନ୍ନାତନ୍‌ ଆରିଲବଲୋଙନ୍‌ ସିଲଡ୍‌ ବର୍ତନେ, ଆରଡ଼ି ଲବଲୋଙନ୍‌ ସିଲଡ୍‌ ବର୍ନେନମ୍‌ ସରୁଡମ୍‌ ସଡ୍ଡାତେ; ଆରି ତନେୟ୍‌ମରଞ୍ଜି ଅନ୍ତମ୍‌ ସର୍ରଙ୍‌ନମ୍‌ ଲବଲୋଙନ୍‌ ସିଲଡ୍‌ ଡୁଙ୍‌ତନାୟ୍‌ ଆରି ଆରଡ଼ି ଲବନ୍‌ ସିଲଡ୍‌ ବର୍ନେନମ୍‌ ଗୟେବ୍‌ଲଗୋ ଡୁଙ୍‌ତନାୟ୍‌ । 5 ବନ୍‌ଡ ବନେରାନମ୍‌ଜି ଆମନ୍‌ରାଜି ଅଡ଼୍‌କୋନ୍‌ ସନ୍ନା ଆରଡ଼ି ଲବନ୍‌ ଅନ୍ତମ୍‌ ଡେତଜି ଆରି ବରନ୍ତଙ୍‌ଡାନ୍‌ ଆମନ୍‌ରାଜି ଅଡ଼୍‌କୋନ୍‌ ଆପରାଙ୍‌ରିଙ୍‌ତେନ୍‌ ଆପୋନ୍‌ଲାସରନ୍‌ ଅନ୍ତମ୍‌ ଡେତଜି, ବରନିୟାବ୍‌ମଡ୍‌ ଏର୍‌ନବ୍‌ବୋମଙ୍‌ କେନ୍‌ ଆତେ ଗଟେତେ 6 ପ୍ରବୁନ୍‌ ଡଡ଼ୁମ୍‌ତିରନ୍‌, ତକର୍‌ଲନ୍‌, ସୋଡ଼ାସନଡ୍ଡାନ୍‌, ଗାବ୍‌ୟାର୍‌ରିଙନ୍‌, ରିଙ୍ଗେତିରନ୍‌ ଡ ଜୋମ୍‌ତୋଡ୍‌ ଆଉଲାଙ୍‌ତୋଡ୍‌ ବାତ୍ତେ ଆନିନ୍‌ ସରିନ୍‌ ଜିର୍ତାୟ୍‌; 7 ଆରି ଅଡ଼୍‌କୋ କେଜ୍ଜାନ୍‌ ଅଙ୍ଗା ଆମନ୍‌ରାଜି ଅରିଏଲନ୍‌ ଆ ବିରୁଦଲୋଙ୍‌ ଜୁଜ୍ଜେତଞ୍ଜି, ଆଗରାମ୍‌ଗାମ୍‌, ଅଙ୍ଗା ଆମନ୍‌ରାଜି ଆନିନ୍‌ଆଡଙ୍‌ ଡ ଆ ରଡୋ ମରେଲ୍‌ସିଙନ୍‌ ଆ ବିରୁଦଲୋଙ୍‌ ଅଲ୍‌ଜୁଜ୍ଜେଲନ୍‌ ଡଣ୍ତାୟ୍‌ତଜି, ତି ଅଡ଼୍‌କୋଞ୍ଜି ଗନୁମ୍‌ତେନ୍‌ ଅନ୍ତମ୍‌, ତଗଲନ୍‌ ଆତନାଲ୍‌ମଡ୍‌ ଅନ୍ତମ୍‌ ଡେତଜି । 8 ଆରି ଏଙ୍ଗାଲେ ଡୋଲୟ୍‌ମରନ୍‌ ଆ ଗନୁମ୍‌ତେବାନ୍‌ ଗାଗାତନାୟ୍‌ ଗାମ୍‌ଲେ ଗିୟ୍‌ତେ, ବନ୍‌ଡ ବାଡନିମଡ୍‌ ଆଡ୍ରୋତନ୍‌ ଆଡିଡ୍‌, ଆନିନ୍‌ ଆଡୋଲେୟ୍‌ ଡକୋତନ୍‌; ଅଡ଼େ ଏଙ୍ଗାଲେ ଇର୍ଗାଲ୍‌ମରନ୍‌ ଗାଡାତନାୟ୍‌ ଗାମ୍‌ଲେ ଆ ଗନୁମ୍‌ତେବାନ୍‌ ଗିୟ୍‌ତେ, ବନ୍‌ଡ ବାଡନିମଡ୍‌ ଆଡ୍ରୋନ୍‌ ଆଡିଡ୍‌, ଆନିନ୍‌ ବପ୍ପୁ ତଡ୍‌ ଡକୋତନ୍‌ ଆରି ଆନିନ୍‌ ଆଉର୍ଗାଲ୍‌ ଡକୋତନ୍‌, ସିଓନ ବରୁନ୍‌ ଆ ବିରୁଦଲୋଙ୍‌ ଆ ଜୁଜ୍ଜେମର୍‌ଜି ଅଡ଼୍‌କୋ କେଜ୍ଜାନ୍‌ ଆମନ୍‌ରାଜି ତି ଅନ୍ତମ୍‌ ଡେତଜି ।

9 ଆମ୍ୱେଞ୍ଜି ରିଙ୍‌ନାବା ଆରି ସାନ୍ନି ଡେବା; ତର୍ଡମ୍‌ ଅବ୍‌କାଡ଼ୁନାବା ଆରି କାଡ଼ୁମରନ୍‌ ଅନ୍ତମ୍‌ ଡେବା, ଆନିଞ୍ଜି ଆବନ୍ନୁଲ୍‌ଜି, ବନ୍‌ଡ ଦ୍ରାକ୍ୟାଡାଲୋଙନ୍‌ ତଡ୍‌; ଆନିଞ୍ଜି ରୋଡ଼େଙ୍‌ପାଡ଼େଙ୍‌ ଡେତଜି, ବନ୍‌ଡ ଅଲିଲୋଙନ୍‌ ତଡ୍‌ । 10 ଇନିଆସନ୍‌ଗାମେଣ୍ତେନ୍‌ ପ୍ରବୁନ୍‌ ଆମ୍ୱେଞ୍ଜି ଆ ତୋଣ୍ତୋ ମାଡ ଡିମଡ୍ଡାନ୍‌ ଆପୁରାଡ଼ା ଆପ୍ପାୟେନ୍‌ ଆରି ପୁର୍ବାଃତେବର୍ନେମର୍‌ବେଞ୍ଜି ଅନ୍ତମ୍‌ ଆମଡନ୍‌ ଅଃପିମଡେ ଆରି ତନାଲ୍‌ମଡ୍‌ଗିୟ୍‌ମରଞ୍ଜି ଅନ୍ତମ୍‌ ଅବବ୍‌ବେନ୍‌ ଆନିନ୍‌ ୟୁମେନ୍‌ । 11 ଆରି ଅଡ଼୍‌କୋ ତନାଲ୍‌ମଡ୍‌ ଆମ୍ୱେଞ୍ଜି ଆସନ୍‌ ଆସିଲୁନ୍ ଆ ବଇ ଆବର୍ନେ ଅନ୍ତମ୍‌ ଡେଏନ୍‌, ଅନ୍ନିଙ୍‌ ଆ ଞଙ୍‌ତିୟ୍‌ମରନ୍‌ଆଡଙ୍‌ ତିଆତେ ତିୟ୍‌ଲେ ସାୟୁମ୍‌ଲେ କେନ୍‌ ଆତେ ପଡ଼େନାବା" ବନରନ୍‌ ଡେଏନ୍‌ ଡେନ୍‌, ଆନିନ୍‌ ଗାମ୍‌ତେ, କେନ୍‌ ଆତେ ଆସିଲ୍ଲୁ, ତିଆସନ୍‌ ଞେନ୍‌ ପଡ଼େଲନ୍‌ ଅଃରପ୍ତିଆୟ୍‌ । 12 ଆରି ତି ଆ ବଇ ଏର୍‌ଞଙ୍‌ନେନ୍‌ ଆମରାଆଡଙ୍‌ ତିୟ୍‌ଲେ, ସାୟୁମ୍‌ଲେ କେନ୍‌ ଆତେ ପଡ଼େନା ବନରନ୍‌ ଡେଏନ୍‌ ଡେନ୍‌, ଆନିନ୍‌ ଗାମ୍‌ତେ, ଞେନ୍‌ ଆପାଟମର୍‌ ତଡ୍‌ । 13 ଆରି ପ୍ରବୁନ୍‌ ବର୍ରନେ, "କେନ୍‌ ଆମନ୍‌ରାଜି ଅମଙ୍‌ଞେନ୍‌ ଅବ୍‌ଡମ୍‌ତଞ୍ଜି ଆରି ଆନିଞ୍ଜି ରମ୍ମଙ୍‌ ରମ୍ମଙ୍‌ ଆମୁକ୍କାଲୋଙ୍‌ ଡ ଆ ତଅଡ୍‌ଲୋଙ୍‌ ଡଅଙ୍‌ଞେନ୍‌ ମାନ୍ନେତଜି, ବନ୍‌ଡ ଆନିଞ୍ଜି ତର୍ଡମ୍‌ ତର୍ଡମ୍‌ ଆଉଗ୍ଗର୍‌ଲୋଙ୍‌ ଅମଙ୍‌ଞେନ୍‌ ସିଲଡ୍‌ ସଙାୟ୍‌ ଡକୋଜି ଆରି ବର୍ନେଲେନ୍‌ ଆସନ୍‌ ଅଙ୍ଗା ଆବନ୍ତଙ୍‌ଜି ଡକୋ, ତିଆତେ ମନ୍‌ରାନ୍‌ ଆମଙ୍‌ ସିଲଡ୍‌ ଞନଙ୍‌ ବନାୟଁନ୍‌ । 14 ତିଆସନ୍‌ ଗିୟ୍‌ବା, ଞେନ୍‌ କେନ୍‌ ଆମନ୍‌ରାଜି ଆମଙ୍‌ଲୋଙ୍‌ ସିଲଡ୍‌ ଅବୟ୍‌ ସରାନ୍ନିଡାନ୍‌ ଆ କାବ୍ବାଡ଼ା, ଆଗରାମ୍‌ଗାମ୍‌ ସରାନ୍ନିଡାନ୍‌ ଡ ସାନ୍ନି କାବ୍ବାଡ଼ାନ୍‌ ଲୁମ୍‌ତାୟ୍‌, ଆରି ଗିଆନମରଞ୍ଜି ଆ ଗିଆନ ମୋସ୍ସାତେ ଆରି ବୁଡ୍ଡିମରଞ୍ଜି ଆ ବୁଡ୍ଡି ଅନବ୍‌ସସନ୍‌ ଡେତେ ।"

15 ଅଙ୍ଗା ଆମନ୍‌ରାଜି ପ୍ରବୁନ୍‌ ଆମଙ୍‌ ସିଲଡ୍‌ ତର୍ଡମ୍‌ ତର୍ଡମ୍‌ ଆକଡାଡ଼ି ଆସନ୍‌ ଏର୍‌ତଜିଗୋୟ୍‌ତଜି, ଆନିଞ୍ଜି ପନବ୍‌ରଡନ୍‌ ଆଅନ୍‌ ! ଆରି ଆନିଞ୍ଜି ଆଲୋଙଡ୍‌ଲୋଙନ୍‌ ରମ୍ମଙ୍‌ ରମ୍ମଙ୍‌ ଆ କାବ୍ବାଡ଼ା ଲୁମ୍‌ଲେ ବର୍ତଞ୍ଜି, ଇନ୍‌ଲେଞ୍ଜିଆଡଙ୍‌ ଆନା ଗିଜମ୍‌ ଆରି ଇନ୍‌ଲେଞ୍ଜିଆଡଙ୍‌ ଆନା ଅମ୍ମଡମ୍‌ । 16 ଆମ୍ୱେଞ୍ଜି ବର୍ନେନ୍‌ ଏସବ୍‌ଡିଡ୍‌ତେ ! କୁମ୍ବିଜନ୍‌ ପଙ୍‌ ଲବନ୍‌ ଅନ୍ତମ୍‌ ଡନିଡିନ୍‌ ଡେତେ ? "କେନ୍‌ ଆମନ୍‌ରା ଞେନ୍‌ଆଡଙ୍‌ ଅଃଗଡ଼େଲଙ୍‌ଲଙ୍‌ ପଙ୍‌ ? ଆତୁବ୍‌ତୁବନ୍‌ ଆ ଜିନସ ପଙ୍‌ ତନ୍‌ଡ୍ରୁବ୍‌ମରନ୍‌ ଆବର୍ନେ କେନ୍‌ଆତେ ବର୍ତନେ ?" 17 ଅସୋୟ୍‌ ଡିନ୍ନା ଆତିକି ଲିବାନୁନ୍‌ ଆଜ୍ରଅତେନ୍‌ ଆକୋତ୍ତା ଅନ୍ତମ୍‌ ଅଃଡେଏ, ଡ ଆଜ୍ରଅତେନ୍‌ ଆକୋତ୍ତା ରିଜାଲ ଗାମ୍‌ଲେ ଡନିଡିନ୍‌ ଅଃଡେଏ । 18 ଆରି ତି ଆଡିନ୍ନା ଆକାଲ୍ଲାମରନ୍‌ ବଇଲୋଙ୍‌ ଆବର୍ନେଜି ଅମ୍‌ଡଙ୍‌ତେ, ଆରି କାଡ଼ୁମରଞ୍ଜି ଆରି ମାଡ ଲୋଙଡ୍‌ଲୋଙନ୍‌ ଜାୟ୍‌ ଗିୟ୍‌ଲେ ରପ୍ତିତେ । 19 ଆରି ଲଗଡ୍‌ମରଞ୍ଜି ପ୍ରବୁନ୍‌ ଆମଙ୍‌ଲୋଙ୍‌ ରମ୍ମଙ୍‌ ରମ୍ମଙ୍‌ ସର୍ଡାତଞ୍ଜି ଆରି ମନ୍‌ରାଞ୍ଜି ଆମଙ୍‌ଲୋଙ୍‌ ଡକୋନ୍‌ ଆଡୋଲେୟ୍‌ମରଞ୍ଜି ଇସ୍ରାଏଲନ୍‌ ଆ ମଡ଼ିର୍‌ ଇସ୍ୱରନ୍‌ ଆମଙ୍‌ ମଅଁୟ୍‌ତଞ୍ଜି । 20 ଇନିଆସନ୍‌ଗାମେଣ୍ତେନ୍‌ ଅଃନିର୍‌ସୁୟମ୍‌ଡାଏଞ୍ଜି ଆମନ୍‌ରାଜି ଉଲ୍ଲୁତଜି, ନିଣ୍ତୟ୍‌ମରନ୍‌ ସତନେ ଆରି ଅଙ୍ଗା ଆମନ୍‌ରାଜି ଇର୍ସେନ୍‌ ଆସନ୍‌ ଜଗ୍ଗେଲେ ଡକୋତଞ୍ଜି, ଅଡ଼୍‌କୋଞ୍ଜି ଅସେଡେଞ୍ଜି । 21 ଆନିଞ୍ଜି ବର୍ନେଲୋଙନ୍‌ ମନ୍‌ରାନ୍‌ଆଡଙ୍‌ ଅବ୍‌ଡୋସାତଜି ଆରି ଗଡ଼ାନ୍‌ ଆଗ୍ରନ୍ନେଲୋଙ୍‌ ମନଙ୍‌ ପନ୍‌ସୁଆତିମରନ୍‌ ଆସନ୍‌ ଜନ୍ତାନ୍‌ ଡକ୍କୋତଜି; ଆରି କାଜ୍ଜାନ୍‌ନିୟ୍‌ ଡରମ୍ମମରନ୍‌ଆଡଙ୍‌ କଣ୍ତାୟ୍‌ ସାକିନ୍‌ ବାତ୍ତେ ଅବ୍‌ଡୋସାତଜି ।

22 ତିଆସନ୍‌ ଜାକୁବନ୍‌ ଆକେଜ୍ଜା ଆସନ୍‌ ଅବ୍ରାମନ୍‌ ଆ ତନାଣ୍ତେମର୍‌ ପ୍ରବୁନ୍‌ କେନ୍‌ ଆବର୍ନେ ବର୍ତନେ; "ନମି ସିଲଡ୍‌ ଜାକୁବନ୍‌ ଅଃଗରଜେ, ଆରି ଆମୁକାନ୍‌ ଅଃମୁସୁକାଏ । 23 ବନ୍‌ଡ ଅଙ୍ଗାଆଡିଡ୍‌ ଆନିନ୍‌ ଅସିଞେନ୍‌ ଆକାବ୍ବାଡ଼ା ଆଲନୁମ୍‌ ଅନ୍ତମ୍‌ ଆଅନଞ୍ଜିଆଡଙ୍‌ ଆମଙ୍‌ଲୋଙ୍‌ବେନ୍‌ ଏଗିୟ୍‌ତେ, ତିଆଡିଡ୍‌ ଆନିଞ୍ଜି ଅଞୁମ୍‌ଞେନ୍‌ ମଡ଼ିର୍‌ ଗାମ୍‌ଲେ ମାନେତଜି; ଓଓ, ଆନିଞ୍ଜି ଜାକୁବନ୍‌ ଆ ଡରମ୍ମମର୍‌ଆଡଙ୍‌ ମଡ଼ିର୍‌ ଗାମ୍‌ଲେ ମାନ୍ନେତଜି ଆରି ଇସ୍ରାଏଲନ୍‌ ଆ ଇସ୍ୱରଆଡଙ୍‌ ଗନୁଗୁ ପନେମେଙନ୍‌ ତିୟ୍‌ତଜି । 24 ଅଙ୍ଗା ଆମନ୍‌ରାଜି ଆଉଲ୍ଲୁ, ଆନିଞ୍ଜି ଜାୟ୍‌ ବୁଡ୍ଡିତଜି ଆରି ଡନୋସେମରଞ୍ଜି ଜନୁବାୟ୍‌ବରନ୍‌ ଞଙ୍‌ତଞ୍ଜି ।"