1 ବନ୍‌ଡ ପୁର୍ବାନ୍‌ ଅଙ୍ଗା ଆ ଡେସା ବିକ୍କଡ଼ନ୍‌ ଡକୋଏନ୍‌, ତିଆତେ ଲୋଙଡ୍‌ଲେ ଆରି ଅଃଡ୍ଡକୋଏ । ପୁର୍ବାନ୍‌ ଆଡିଡ୍‌ ଆନିନ୍‌ ସବୁଲୁନ୍‌ ଡ ନପ୍ତାଲି ଡେସାନ୍‌ଆଡଙ୍‌ ଗନବ୍‌ରୟ୍‌ଡାନ୍‌ ଏମ୍ମେଏଞ୍ଜି, ବନ୍‌ଡ ତିକ୍କିଆଓୟୋଙ୍‌ ଆଡିଡ୍‌ ଆନିନ୍‌ ସମେଁୟ୍‌ଣ୍ଡ୍ରାନ୍‌ ଆରେଙ୍‌ ଆତୁୟା ଡ ଜର୍ଦନ ଅଲନ୍‌ ଆମିୟ୍‌ତାଲ୍‌ ଆକେଜ୍ଜାଜି ଗାଲିଲିନ୍‌ଆଡଙ୍‌ ମାନ୍ନେତଜି । 2 ଅଙ୍ଗା ଆକେଜ୍ଜା ଲୋଙଡ୍‌ଲୋଙନ୍‌ ତଙିୟ୍‌ଲଞ୍ଜି, ଆନିଞ୍ଜି ସୋଡ଼ା ସନ୍ନାଆରନ୍‌ ଗିଜେଞ୍ଜି; ଅଙ୍ଗା ଆମନ୍‌ରାଜି ରନବୁନ୍‌ ଆ ଲୋଙଡ୍‌ ଡେସାଲୋଙ୍‌ ଡକୋଲଞ୍ଜି, ଆମଙ୍‌ବାଞ୍ଜି ସନାଆରନ୍‌ ତୋରାଡ୍‌ତେ । 3 ଆମନ୍‌ ତି ଆଡେସା ଆମନ୍‌ରାଞ୍ଜିଆଡଙ୍‌ ଜବ୍ର ମନ୍‌ରା ଏମ୍ମେଲେ ଆସର୍ଡାଞ୍ଜି ଅବ୍‌ଗୋଗୋଜେନ୍‌; ଆନିଞ୍ଜି ଗଡ୍‌ଗଡ୍‌ନେ ବେଡ଼ାଇଙନ୍‌ ଆସର୍ଡା ଅନ୍ତମ୍‌ ସର୍ଡାତଞ୍ଜି, ଆରି ଜୁରୁ ଜିନିସନ୍‌ ଅଃବନ୍ତାଇଞନ୍‌ ଅନ୍ତମ୍‌ ଜବ୍ର ସର୍ଡାତଞ୍ଜି । 4 ଇନିଆସନ୍‌ଗାମେଣ୍ତେନ୍‌ ମିଦିଅନନ୍‌ ଆଡିନ୍ନା ଏଙ୍ଗାଲେ, ତି ଅନ୍ତମ୍‌ ଆମନ୍‌ ଆବିଡ଼ାରନ୍‌ ଅନ୍ତମ୍‌ ରାଙଞନ୍‌ ଡ ଆ ତାରଙନ୍‌ ଆବୁଡ଼ାର୍‌, ଆ ଜନୁରୁମରଞ୍ଜି ଆଡଣ୍ତ ଲବ୍‌ଗଡେନ୍‌ । 5 ଇନିଆସନ୍‌ଗାମେଣ୍ତେନ୍‌ ଅଲ୍‌ଜୁଜ୍ଜେଲୋଙନ୍‌ ଆରଲ୍‌ଜୁଜ୍ଜେତେଞ୍ଜି ଆସିପ୍ପାୟ୍‌ଜି ଆପାଣ୍ତୋୟ୍‌ଜି ଡ ମିଞାମନ୍‌ ଆଜାବ୍‌ଜାବନ୍‌ ଆସିନ୍‌ରିଜି ଅଡ଼୍‌କୋନ୍‌ ତଗୋନ୍‌ ଆସନ୍‌ ସରୟ୍‌ତୋଡ୍‌ଡଙନ୍‌ ଅନ୍ତମ୍‌ ଡେତେ । 6 ଇନିଆସନ୍‌ଗାମେଣ୍ତେନ୍‌ ଇନ୍‌ଲେଞ୍ଜି ଆସନ୍‌ ଅବୟ୍‌ ପସିଜନ୍‌ କନୋଡନ୍‌ ଡେଏନ୍‌, ଇନ୍‌ଲେଞ୍ଜି ଆସନ୍‌ ଅବୟ୍‌ ଓବ୍ବାସିଜନ୍‌ ତନିୟନ୍‌ ଡେଏନ୍‌ ଆରି ଆ ତାରଙ୍‌ଲୋଙନ୍‌ ସାସନନ୍‌ ଆବୁଡ଼ାର୍‌ ତନିୟନ୍‌ ଡେତେ; ଆରି ଆଞୁମନ୍‌ ସାରାନ୍ନିଆନ୍‌, ମନ୍ତ୍ରି, ବୋର୍ସା ଇସ୍ୱର, ଆଏଡ଼ର୍‌ ଆ ପ୍ପେୟ୍‌, ସୟୁ ରାଜାନ୍‌ ଡେତେ । 7 ଆ ସାସନନ୍‌ ଆଗନୋଗୋୟ୍‌ ଡ ସନୟୁନ୍‌ ଆସଣ୍ତି ଅଃଡକୋଏ, ଆନିନ୍‌ ଦାଉଦନ୍‌ ଆ ତରଙ୍କୁମ୍‌କୁର୍ସିଲୋଙ୍‌ ଡ ଆ ରାଜ୍ୟଲୋଙନ୍‌ ଡକୋଡାଲନ୍‌ ଆଜାଡ଼ିପନ୍‌ସୁଆତିନ୍‌ ଡ ଡରମ୍ମନ୍‌ ବାତ୍ତେ ନମି ସିଲଡ୍‌ ଆଏଡ଼ର୍‌ ଡକୋତନ୍‌ ତିଆତେ ଗରିତେ ଆରିସସସସସ ଏର୍କିଡ୍‌କିଡ୍‌ନେନ୍‌ ଏମ୍ମେତେ । କେନ୍‌ଆତେ ପ୍ରବୁନ୍‌ ଆନୁୟୁବ୍‌ ଗବ୍‌ଡେଲ୍‌ତେ ।

8 ପ୍ରବୁନ୍‌ ଜାକୁବନ୍‌ ଆମଙ୍‌ ଅବୟ୍‌ ବର୍ନେନ୍‌ ଆପ୍ପାୟେନ୍‌ ଡ ତିଆତେ ଇସ୍ରାଏଲନ୍‌ ଆମଙ୍‌ବା ଗଲୋଏନ୍‌, 9 ଆରି ଅଡ଼୍‌କୋ ମନ୍‌ରାନ୍‌, ଇପ୍ରିଅମନ୍‌ ଡ ସମରିଆବାଜି ତୁମ୍‌ ତିଆତେ ଜନାତଜି; ଆନିଞ୍ଜି କଙ୍କ୍ରିନ୍‌ ଡ ଅବ୍‌ସୋଡ଼ାଲନ୍‌ ବର୍ତଞ୍ଜି, 10 ଇଟାନ୍‌ ବାତ୍ତେ ଆତୁବ୍‌ତୁବନ୍‌ ଆ ମେଡ଼ସିଙ୍‌ଜି ରିଡ଼ାଙାଜେନ୍‌, ବନ୍‌ଡ ଇନ୍‌ଲେଞ୍ଜି ଅରେଙନ୍‌ ବାତ୍ତେ ଏବାର୍‌ତୁବ୍‌ତାୟ୍‌ । ଡୁଲ୍ଲାନ୍‌ ଆସନ୍‌ ଲୁଆନୁବନ୍‌ ଅଡାୟ୍‌ଲନେ, ବନ୍‌ଡ ଇନ୍‌ଲେଞ୍ଜି ଏରସ ଅରାନ୍‌ ବାତ୍ତେ ଏବାର୍‌ତୁବ୍‌ତାୟ୍‌ । 11 ତିଆସନ୍‌ ପ୍ରବୁନ୍‌ ଆ ସଙ୍ଗତ୍ତାଲୋଙ୍‌ ରତ୍‌ସିନନ୍‌ ଆବିରୁଦମର୍‌ଜିଆଡଙ୍‌ ମବ୍‌ରଙ୍‌ତଜି ଆରି ଆବନେରାମରଞ୍ଜିଆଡଙ୍‌ ବବ୍‌ରାବ୍‌ତଜି । 12 ମୁକାଗଡ୍‌ ଅରାମିଅଞ୍ଜି ଡ ଆକୁଣ୍ଡୋଙ୍‌ଗଡଞ୍ଜି ପଲେସ୍ଟିଅଞ୍ଜି ଡକୋତଞ୍ଜି; ଆରି, ଆନିଞ୍ଜି ଜିର୍ରେ ଇସ୍ରାଏଲଞ୍ଜିଆଡଙ୍‌ ଅବ୍‌ନାରେଏଞ୍ଜି ଜନଙ୍‌ଡେନ୍‌ ପ୍ରବୁନ୍‌ ଆ ବନ୍‌ରାବ୍‌ ଅଃସୟୁଏ, ବନ୍‌ଡ ଆସିନ୍‌ ଆମ୍ମୁଙ୍‌ ଅନ୍ତମ୍‌ ପନବ୍‌ରଡନ୍‌ ଆସନ୍‌ ଉର୍ରାସିଲନ୍‌ ଡକୋ । 13 ଡେଲୋଜନଙ୍‌ ଅଙ୍ଗା ଆମନ୍‌ରାଜି ଇସ୍ରାଏଲଞ୍ଜିଆଡଙ୍‌ ତିଡେନ୍‌, ତି ଆମନ୍‌ରା ଆମଙ୍‌ବା ଆନିଞ୍ଜି ଅଃୟର୍ରନାଜି, କି ଆନିଞ୍ଜି ପ୍ରବୁନ୍‌ଆଡଙ୍‌ ଅଃସାୟ୍‌ଲଜି । 14 ତିଆସନ୍‌ ଆବଡିନ୍ନାନ୍‌ ଇସ୍ୱରନ୍‌ ଇସ୍ରାଏଲନ୍‌ ଆମଙ୍‌ସିଲଡ୍‌ ବାଗୁନ୍‌ ଅବବନ୍‌ ଡ ଆଲାନ୍‌, ଆରି ବାଗୁନ୍‌ ସିଣ୍ଡିନ୍‌ ଆକମ୍ବା ଡ କୁରିଙ୍‌ ଜିଙନ୍‌ ଗଡ୍‌ତେ । 15 ପାପୁର୍‌ମରନ୍‌ ଡ ସୋଡ଼ାଗଡ୍‌ମରନ୍‌ ତି ଆବବ୍‌, ଆରି କଣ୍ତାୟ୍‌ ଞନଙ୍‌ତିୟ୍‌ମରନ୍‌ ପୁର୍ବାଃତେବର୍ନେମରନ୍‌ ଆଲାନ୍‌, 16 ଇନିଆସନ୍‌ଗାମେଣ୍ତେନ୍‌ କେନ୍‌ ଆମନ୍‌ରାଜି ଆ ତଙରନ୍‌ ଆନବ୍‌ତୁୟ୍‌ମର୍‌ଜି ଆନିଞ୍ଜିଆଡଙ୍‌ ଅଃବାଡ଼ତଜି, ଆରି. ଅଙ୍ଗା ଆମନ୍‌ରାଜି ଆନିଞ୍ଜି ବାତ୍ତେ ତଙରନ୍‌ ଅବ୍‌ତୁୟ୍‌ତଜି, ଆନିଞ୍ଜି ଅସେଡ୍‌ତଜି । 17 ତିଆସନ୍‌ ପ୍ରବୁନ୍‌ ଆ ବେଣ୍ତିଆଞ୍ଜି ଆମଙ୍‌ବା ଅସର୍ଡାନେ, ଅଡ଼େ ଆ କୋନ୍‌ରାସିଜଞ୍ଜି ଡ ଜୋଆର୍‌ବଜଞ୍ଜି ଆଡଙ୍‌ ଅଃସାୟୁମେ; ଇନିଆସନ୍‌ଗାମେଣ୍ତେନ୍‌ ଅଡ଼୍‌କୋ ମନ୍‌ରାନ୍‌ ଡରମ୍ମତଡ୍‌ ଆରି ଡୋସାମର୍‌ ଡ ଡିଲେ ତଅଡନ୍‌ ପାତ୍ୟାମର୍‌ଜି । କେନ୍‌ ଅଡ଼୍‌କୋନ୍‌ ଜନଙ୍‌ଡେନ୍‌ ପ୍ରବୁନ୍‌ ଆ ବନ୍‌ରାବ୍‌ ଅଃସୟୁଏ, ବନ୍‌ଡ ଆସିନ୍‌ ଆମ୍ମୁଙ୍‌ ଅନ୍ତମ୍‌ ପନବ୍‌ରଡନ୍‌ ଆସନ୍‌ ଉର୍ରାସିଲନ୍‌ ଡକୋ । 18 ଇନିଆସନ୍‌ଗାମେଣ୍ତେନ୍‌ ପେଲ୍ଲାମରଞ୍ଜି ତଗୋନ୍‌ ଅନ୍ତମ୍‌ ଡୁଡୁତେ; ତିଆତେ କାନ୍ତେସିନୁବନ୍‌ ଡ ଅବ୍ବାନୁବନ୍‌ ଜୋମ୍‌ତୋଡ୍‌ତେ; ଆରି ତିଆତେ ଜବ୍ରସଡବ୍‌ କିନ୍‌ରେଙ୍‌ରେଙନ୍‌ ଡୁଡୁଲେ ୟଗାମେଗନ୍‌ ଅନ୍ତମ୍‌ ଓମୋଡନ୍‌ ତୋଣ୍ଡୋନ୍‌ ଡୋତନେ । 19 ପ୍ରବୁନ୍‌ ଆବନ୍‌ର୍ରାବ୍‌ ବାତ୍ତେ ଡେସାନ୍‌ ମୋସାତେ; ଆରି ମନ୍‌ରାଞ୍ଜି ତଗୋନ୍‌ ଆସନ୍‌ ଅଙଲନ୍‌ ଅନ୍ତମ୍‌ ଡେଏଞ୍ଜି; ଆନ୍ନିଙ୍‌ ଆବୋୟାଁଙନ୍‌ଆଡଙ୍‌ ଅଃସାୟୁମେଜି । 20 ଅର୍ଜଡ଼ୋମ୍‌ସିଗଡ୍‌ ମନ୍‌ରାଞ୍ଜି ଞମ୍‌ଲେ ଜୋମ୍‌ତଜି, ଡେଲୋଜନଙ୍‌ଡେନ୍‌ ଡୋଲୟ୍‌ତଜି; ଆରି, ଅର୍କାବଡ଼ିଗଡ୍‌ ଜୋମ୍‌ତଜି ଡେଲୋଜନଙ୍‌ ଆନିଞ୍ଜି ଅଃବୋଓଏଜି; ଆନିଞ୍ଜି ତର୍ଡମ୍‌ ତର୍ଡମ୍‌ ଆ ପସିଜଞ୍ଜି ଆଜେଲୁ ଜୋମ୍‌ତଜି; 21 ମନସିନ୍‌ ଇପ୍ରିଅମନ୍‌ଆଡଙ୍‌ ଆରି ଇପ୍ରିଅମନ୍‌ ମନସିନ୍‌ଆଡଙ୍‌ ବିରୁଦତେ, ଆରି ଆନିଞ୍ଜି ରୁକ୍କୁଡାଲନ୍‌ ଆନିଞ୍ଜି ଜିଉଦାନ୍‌ ଆବିରୁଦ ଡେତଜି, କେନ୍‌ ଅଡ଼୍‌କୋନ୍‌ ଡେଏନ୍‌ଜନଙ୍‌ଡେନ୍‌ ପ୍ରବୁନ୍‌ ଆ ବନ୍‌ରାବ୍‌ ଅଃସୟୁଏ, ବନ୍‌ଡ ଆସିନ୍‌ ଆମ୍ମୁଙ୍‌ ଅନ୍ତମ୍‌ ପନବ୍‌ରଡନ୍‌ ଆସନ୍‌ ଉର୍ରାସିଲନ୍‌ ଡକୋ ।