1 ଇଦୋମ ଡେସାନ୍‌ ସିଲଡ୍‌ ଲୁଲୁ ସିନ୍‌ରିନ୍‌ ରଲନ୍‌ ବସୋରାନ୍‌ ଆମଙ୍‌ ଆଜିର୍‌ତାଙନ୍‌ ଆମନ୍‌ରା ଆନା ? ଆସିନ୍‌ରିଲୋଙନ୍‌ମା ସନେନ୍‌ସେନନ୍‌ ଡକୋ ଡ ଆ ବୋର୍ସାନ୍‌ ବୟନ୍‌ ଡୁଙ୍‌ଲନ୍‌ ଜିର୍ତାୟ୍‌, ତି ଆନା ? ଞେନ୍‌ ଡରମ୍ମଲୋଙନ୍‌ ଡ ଅନୁରନ୍‌ ଆସନ୍‌ ଏରପ୍ତିତାୟ୍‌ ।

2 ଇନିଆସନ୍‌ ଜନିଜି ସିନ୍‌ରିନମ୍‌ ମିଞାମନ୍‌ ଅନ୍ତମ୍‌ ଲୁଲୁଡମ୍‌ ଡ ଦ୍ରାକାନ୍‌ ଆବଲ୍‌ତେନ୍‌ ଆସିନ୍‌ରି ଅନ୍ତମ୍‌ ?

3 ପ୍ରବୁନ୍‌ ବର୍ତନେ, "ଞେନ୍‌ ଇନ୍‌ସୟ୍‌ଞେନ୍‌ ଦ୍ରାକ୍ୟାନ୍‌ ଞାଲ୍‌ଲାୟ୍‌ ଆରି ମନ୍‌ରାଞ୍ଜି ଆମଙ୍‌ଲୋଙ୍‌ ସିଲଡ୍‌ ଞେନ୍‌ ସରିନ୍‌ ଆନ୍ନିଙ୍‌ ଅଃଡ୍ଡକୋଲଞ୍ଜି, ଞେନ୍‌ ବାବନ୍‌ରାବ୍‌ ଆନିଞ୍ଜିଆଡଙ୍‌ ଞାଡାଲାୟ୍‌ ଆରି ଦ୍ରାକ୍ୟାନ୍‌ ଅନ୍ତମ୍‌ ଞାଲ୍‌ଲାଜି । ତିଆସନ୍‌ ଆପ୍ରାନାଲୋଙଞ୍ଜି ଆମିଞାମ୍‌ ସିନ୍‌ରିଲୋଙ୍‌ଞେନ୍‌ ଅସିର୍‌ର୍ରିୟ୍‌ ଆରି ତିଆସନ୍‌ ଞେନ୍‌ ଜରିଜିଲନାଞନ୍‌ ଆସିନ୍‌ରିଲୋଙ୍‌ ମିଞାମନ୍‌ ଆଜାବ୍‌ଜାବ୍‌ ଡକୋ । 4 ଇନିଆସନ୍‌ଗାମେଣ୍ଡେନ୍‌ ଡୁଲ୍‌ନେନ୍‌ ଆସନ୍‌ ଉଗ୍ଗର୍‌ଲୋଙ୍‌ଞେନ୍‌ ଡକୋଏନ୍‌ ଆରି ମନ୍‌ରାଞେଞ୍ଜି ଅନୁରନ୍‌ ଆଞରାଙେଞ୍ଜି ଆବର୍ସେଙ୍ ତୁୟାୟ୍‌ଲେ ପାଙ୍‌ଲାୟ୍‌ । 5 ଞେନ୍‌ ଆଙାଙ୍‌ଲାୟ୍‌, ବନ୍‌ଡ ସାୟ୍‌ସିମର୍‌ଞେନ୍‌ ଆନ୍ନିଙ୍‌ ଅଃଡକୋଲଞ୍ଜି ଆରି ସନାୟ୍‌ସିମର୍‌ଞେନ୍‌ ଆନ୍ନିଙ୍‌ତଡନ୍‌ ଆସନ୍‌ ଞେନ୍‌ ସାନ୍ନି ଡେତିଁୟ୍‌ । ତିଆସନ୍‌ ଅସିଡମ୍‌ଞେନ୍‌ ଅନୁରନ୍‌ ପାଙ୍‌ଲାୟ୍‌ ଆରି ବନ୍‌ରାବ୍‌ଞେନ୍‌ ସାୟ୍‌ସିଲିୟ୍‌ । 6 ଞେନ୍‌ ବନ୍‌ରାବ୍‌ଞେନ୍‌ ବାତ୍ତେ ମନ୍‌ରାଞ୍ଜିଆଡଙ୍‌ ଞାଡାଲାୟ୍‌ । ବନ୍‌ରାବ୍‌ଞେନ୍‌ ବାତ୍ତେ ଆନିଞ୍ଜିଆଡଙ୍‌ ଅଃବନୁଲ୍‌ଲାଜି ଆରି ଆଜନ୍ତୁଜି ଆମିଞାମ୍‌ ଲବଲୋଙନ୍‌ ଲାଲେ ସେଡ୍‌ଲାୟ୍‌ ।

7 ପ୍ରବୁନ୍‌ ଆଡନୁଙ୍‌ଞମ୍‌ ଏରିଡ୍‌ନାଗୋ ଡକୋନ୍‌ ଆସନ୍‌ ଞେନ୍‌ ବର୍ରନାୟ୍‌; ପ୍ରବୁନ୍‌ ଞେନ୍‌ ଆସନ୍‌ ଅଡ଼୍‌କୋନ୍‌ ଆର୍‌ଲୁମେନ୍‌ ଆସନ୍‌ ଞେନ୍‌ ଆନିନ୍‌ଆଡଙ୍‌ ସେଙ୍କେତାୟ୍‌ । ଆ ସନାୟୁମନ୍‌ ଆସନ୍‌ ଆନିନ୍‌ ଇସ୍ରାଏଲନ୍‌ ଆକେଜ୍ଜା ଆସନ୍‌ ଗୋଗୋୟ୍‌ ଆସିର୍ବାଦଏଞ୍ଜି ।

8 ଇନିଆସନ୍‌ଗାମେଣ୍ଡେନ୍‌ ଆନିଞ୍ଜି ମନ୍‌ରାଲେଞ୍ଜି ଆନାଜି, ଞେନ୍‌ଆଡଙ୍‌ ଅଃକଣ୍ଡାୟିଞ୍ଜି ଆ ପସିୟ୍‌ଜି; ତିଆସନ୍‌ ଆନିଞ୍ଜି ଅନୁର୍‌ମର୍‌ ଡେଏଜି । 9 ଆଡୁକଞ୍ଜି ଅଡ଼୍‌କୋନ୍‌ ଆସନ୍‌ ଆନିନ୍‌ ଡୁକ୍କଡାଏନ୍‌, ଆରି ଆମୁକାବାନ୍‌ ଡକୋନ୍‌ ଆ ରୁଆଙ୍‌ ପାଙ୍‌ଲଙ୍‌ବର୍‌ମରନ୍‌ ଆନିଞ୍ଜିଆଡଙ୍‌ ଅନୁରନ୍‌ ତିୟେଞ୍ଜି; ଆନିନ୍‌ ଆଡନୁଙ୍‌ୟମନ୍‌ ଡ ଆସନାୟୁମ୍‌ ଆସନ୍‌ ଆନିଞ୍ଜିଆଡଙ୍‌ ତାଣ୍ଡେଏଞ୍ଜି ଆରି ଆନିନ୍‌ ପୁର୍ବାନ୍‌ ଆଡିଡ୍‌ ଅଡ଼୍‌କୋ ଆନିଞ୍ଜିଆଡଙ୍‌ ଜୁବାୟେଞ୍ଜି । 10 ବନ୍‌ଡ ଆନିଞ୍ଜି ଗୋଡ଼େନ୍‌ ଆନମ୍‌ଡୁଙ୍‌ମର୍‌ଜି ଡେଏଞ୍ଜି ଆରି ମଡ଼ିର୍‌ ପୁରାଡ଼ାନ୍‌ଆଡଙ୍‌ ଅବ୍‌ଡୁକଏଞ୍ଜି । ତିଆସନ୍‌ ଆନିନ୍‌ ୟର୍ରନ୍‌ ଆବନେରାମରଞ୍ଜି ଡେଏଞ୍ଜି ଆରି ଆନିଞ୍ଜିଡମ୍‌ ଆନିଞ୍ଜି ସରିନ୍‌ ଅଲ୍‌ଜୁଜ୍ଜେଏଞ୍ଜି ।

11 ପୁର୍ବାନ୍‌ ଆଡିଡ୍‌ ଆନିଞ୍ଜି ମୋସାନ୍‌ ଡ ଆମନ୍‌ରାଞ୍ଜିଆଡଙ୍‌ ମନ୍ନେଡାଲେ ବର୍ରତଞ୍ଜି, ଡ ଆଗୋସା ମେଡନ୍‌ ଆ ତୁର୍‌ମେନ୍‌ମରଞ୍ଜି ସରିନ୍‌ ଆନିଞ୍ଜିଆଡଙ୍‌ ସମେଁଣ୍ଡ୍ରାନ୍‌ ଅଃପ୍‌ଲେ ଓରୋଙ୍‌ଲାଜି ଆନିନ୍‌ ଅଡ଼େଙ୍ଗା ? ଆ ଉଗର୍‌ଲୋଙଞ୍ଜି ମଡ଼ିର୍‌ ପୁରାଡ଼ାନ୍‌ ତିୟେଞ୍ଜି, 12 ଆନା ମୋସାନ୍‌ ଆ ଗନୁଗୁ ପନେମେଙ୍‌ ଆ ବୋର୍ସା ଡେନାନ୍‌ ଆପ୍ପାୟ୍‌ଲାୟ୍‌ ଆରି ଆନା ସମେଁୟ୍‌ଣ୍ଡ୍ରାନ୍‌ ଆ ଡାଆ ବାଗୁ ପାଲ୍ଲାଙ୍‌ ଏମ୍ମେଡାଲେ ଆନିଞ୍ଜିଆଡଙ୍‌ ଅଃପଡ୍‌ଲେ ଓରୋଙ୍‌ଲାଜି ଆରି ଆଏଡ଼ର୍‌ ଆଞୁମନ୍‌ ମନନ୍ନେନ୍‌ ଆସନ୍‌ ଡନକ୍କୋନ୍‌ ଡେଏନ୍‌, 13 ଆନା ଆରିଙ୍‌ରିଙ୍‌ଲୋଙନ୍‌ ଆ କୁର୍ତା ଅନ୍ତମ୍‌ ଜରୁ ସମେଁୟ୍‌ଣ୍ଡ୍ରାଗଡ୍‌ ଅଃପଡ୍‌ଲେ ଓରୋଙ୍‌ଲାଜି ବନ୍‌ଡ ଆନିନ୍‌ ଅଃତୁଡୁବ୍‌ଲୋ ଆନିନ୍‌ ଅଡ଼େଙ୍ଗା ?" 14 ଗର୍ଡଲୋଙନ୍‌ ପଡ୍‌ଲନ୍‌ ଆଜିର୍ତାଞନ୍‌ ଆ ଜନ୍ତୁ ଗସ୍ସାନ୍‌ ଅନ୍ତମ୍‌ ପ୍ରବୁନ୍‌ ଆପୁରାଡ଼ା ଆନିଞ୍ଜିଆଡଙ୍‌ ଲରୋଲୋନେନ୍‌ ତିୟ୍‌ତଜି; ତିଅନ୍ତମ୍‌ ଆମ୍ବେନ୍‌ ତର୍ଡମ୍‌ ଗନୁଗୁ ପନେମେଙ୍‌ ଅଞୁମନ୍‌ ଡନକ୍କୋନ୍‌ ଆସନ୍‌ ମନ୍‌ରାବେଞ୍ଜିଆଡଙ୍‌ ଓରୋଙ୍‌ଲବେନ୍‌ ।

15 ନମି ରୁଆଙନ୍‌ ସିଲଡ୍‌ ଗିୟ୍‌ଗିୟ୍‌ବା, ମନଡ଼ିରନ୍‌ ଡ ଗନୁଗୁପନେମଙ୍‌ ଡରକୋନେନମ୍‌ ସିଲଡ୍‌ ଗିୟ୍‌ଗିଜାୟ୍‌; ଅନୁୟୁବ୍‌ନମ୍‌ ଡ କବ୍ବାଡ଼ାନମ୍‌ଞ୍ଜି ଅଡ଼୍‌କୋନ୍‌ ଅଡ଼େଙ୍ଗା ? ପରାନ୍ନାବେନ୍‌ ଆବତା ଡ ଡନୁଙ୍‌ୟମ୍‌ନମ୍‌ ଅମଙ୍‌ଞେନ୍‌ ସିଲଡ୍‌ ସଙାଜେନ୍‌ । 16 ଅବ୍ରାଆମନ୍‌ ଆପ୍ପେୟ୍‌ଲେନ୍‌ ଜନାତଡ୍‌ ଆରି ଇସ୍ରାଏଲନ୍‌ ଇନ୍‌ଲେଞ୍ଜିଆଡଙ୍‌ ଅଃଜାଜାଲଙ୍‌ଲଞ୍ଜି, ବନ୍‌ଡ ଞେନ୍‌ ତ ଆପ୍ପେୟ୍‌ବେନ୍‌; ଏ ପ୍ରବୁ ଆମନ୍‌ ଆପ୍ପେୟ୍‌ଲେ; ଆମ୍ମୁଙ୍‌ମା ସିଲଡ୍‌ ଅନୁର୍‌ମର୍‌ଲେନ୍‌ ଗାମ୍‌ଲେ ଅଞୁମ୍‌ନମ୍‌ ଡକୋ । 17 ଏ ପ୍ରବୁ, ତଙର୍‌ଲୋଙ୍‌ନମ୍‌ ସିଲଡ୍‌ ଇନିବା ଆମନ୍‌ ଇନ୍‌ଲେଞ୍ଜିଆଡଙ୍‌ ବବ୍‌ତଙ୍‌ତଲେନ୍‌ ଆରି ଉଗ୍‌ଗର୍‌ଲେନ୍‌ ରବ୍‌ଡୋତେ, ତିଆସନ୍‌ ଞେନ୍‌ ଆମନ୍‌ଆଡଙ୍‌ ଏଃମାନେଅମ୍‌ ? ଅଙ୍ଗା ଆକେଜ୍ଜା ଆମ୍ବେନ୍‌ ଆସନ୍‌ ସନୋଡ଼ାଗଡ୍‌ ଞାଙେଞ୍ଜି ତି ଆକମ୍ବରିମର୍‌ଜି ଆସନ୍‌ ଆମ୍ବେନ୍‌ ୟର୍ନାବା ।

18 ମଡ଼ିର୍‌ମର୍‌ନମ୍‌ଜି ଅସୋୟ୍‌ ଡିନ୍ନା ଆସନ୍‌ ସନୋଡ଼ାଗଡନ୍‌ ଞାଙେଞ୍ଜି; ବନେରାମର୍‌ଲେଞ୍ଜି ମଡ଼ିର୍‌ ଡରକୋନେନ୍‌ ଆଜାୟ୍‌ତା ଞାଡାଲାଜି । 19 ଅଙ୍ଗା ମନ୍‌ରାଞ୍ଜିଆଡଙ୍‌ ଆଉପରେଙ୍‌ ଆଙ୍ଗିୟ୍‌ ଅନ୍‌ରଙ୍‌ ସାସନଏଜି, ଅଙ୍ଗା ମନ୍‌ରା ଅଞୁମ୍‌ନମ୍‌ ଆସନ୍‌ ଆଙ୍ଗିୟ୍‌ ଅନ୍‌ରଙ୍‌ ଜନାଏଜି, ତି ଆମନ୍‌ରାଜି ଅନ୍ତମ୍‌ ଇନ୍‌ଲେଞ୍ଜି ଡେଲଲେନ୍‌ ।