1 ଞେନ୍‌ ଡନୁଙ୍‌ୟମ୍‌ମର୍‌ଞେନ୍‌ ଆସନ୍‌, ଆ ଦ୍ରାକ୍ୟାକୋତ୍ତାନ୍‌ ଆ ବିସୟଲୋଙ୍‌ ଡନୁଙ୍‌ୟମ୍‌ମର୍‌ଞେନ୍‌ ଆସନ୍‌ ଅବୟ୍‌ କନନନ୍‌ କନ୍‌ତେ । ଜବ୍ର ଜେଲ୍‌ଜେଲ୍‌ଲ ଅବୟ୍‌ ବରୁଲୋଙନ୍‌ ଡନୁଙ୍‌ୟମ୍‌ମର୍‌ଞେନ୍‌ ଆକୋତ୍ତା ଅବୟ୍‌ ଡକୋଏନ୍‌; 2 ଆରି, ଆନିନ୍‌ ତିଆତେ ଗାୟ୍‌ଲେ ଅରେଙଞ୍ଜି ଅଡ଼୍‌କୋନ୍‌ ତବେନ୍‌ ଆରି ଜବ୍ର ମନଙ୍‌ ଦ୍ରାକ୍ୟାନୁବନ୍‌ ତେତ୍ତେ ଗୁଏନ୍‌ ଆରି ମଡ୍ଡି କୋତ୍ତାନ୍‌ ଅବୟ୍‌ ଜରଗ୍ଗେସିଙନ୍‌ ତୁବ୍‌ଲେ ଆରି ଦ୍ରାକ୍ୟାଡୋଙ୍କାନ୍‌ ଜାୟ୍‌ ଗାୟେନ୍‌, ଆରି ଦ୍ରାକ୍ୟାଜନ୍‌ ଅଜତେ ଗାମ୍‌ଲେ ଜଗ୍ଗେଲେ ଡକୋଲନ୍‌, ବନ୍‌ଡ ତେତ୍ତେ କିନ୍‌ରେଙ୍‌ ଦ୍ରାକ୍ୟାଜନ୍‌ ଅଜଏନ୍‌ । 3 ତିଆସନ୍‌ ନମିଞେନ୍‌ ଏ ଜିରୁସାଲମ ଡ ଜିଉଦାନ୍‌ ଆମନ୍‌ରାଜି, ଞେନ୍‌ ଆମ୍ୱେଞ୍ଜିଆଡଙ୍‌ କାକୁର୍ତିତନାୟ୍‌, ଆମ୍ୱେଞ୍ଜି ଞେନ୍‌ ଡ ଦ୍ରାକ୍ୟାକୋତ୍ତାଞେନ୍‌ ଆସନ୍‌ ପନ୍‌ସୁଆତିବା । 4 ଞେନ୍‌ ଦ୍ରାକ୍ୟାକୋତ୍ତାଲୋଙ୍‌ଞେନ୍‌ ଇନି ଅନ୍‌ର୍ରଙ୍‌ ତୁବାୟ୍‌, କେନ୍‌ଅନ୍ତମ୍‌ ଅଙ୍ଗା ଗୋଗୋୟ୍‌ ଆକାବ୍ବାଡ଼ା ତିଆସନ୍‌ ଲନୁମନ୍‌ ଡେତେ ବନ୍‌ ? ତିଆସନ୍‌ ଞେନ୍‌ ଦ୍ରାକ୍ୟାଜନ୍‌ ଅଜତେ ଗାମ୍‌ଲେ ଜଗ୍ଗେଲାୟ୍‌, ବନ୍‌ଡ ତେତ୍ତେ ଇନିବା କିନ୍‌ରେଙ୍‌ ଦ୍ରାକ୍ୟାଜନ୍‌ ଅଜଏନ୍‌ ? 5 ତିଆସନ୍‌ ଞେନ୍‌ କେନ୍‌ ଆଦ୍ରାକ୍ୟାକୋତ୍ତାନ୍‌ ଇନି ଏଙ୍ଗାତାୟ୍‌ ନମିଞେନ୍‌ ଆମ୍ବେଞ୍ଜିଆଡଙ୍‌ ଅବ୍‌ଜାନାତବେନ୍‌; ଞେନ୍‌ ଆତର୍‌ତରନ୍‌ ପୁଡ୍‌ତାୟ୍‌, ଡଙ୍‌ଡଙ୍‌ଲେ ଆଡ୍ରକୋତେନ୍‌ ଆବାଡ଼ି ରୁବ୍‌ଡ଼ାଙ୍‌ତାୟ୍‌; ଜାଡ଼ିଆ ଜନ୍ତୁଜି ଗନ୍‌ଲେ ଦ୍ରାକ୍ୟାନ୍‌ ଜୋମ୍‌ତଜି ଆରି ତାଲ୍‌ଜଙନ୍‌ ବାତ୍ତେ ଞାଡାଲେ ଅବ୍‌ମୋସ୍ସାତଜି । 6 ଆରି ଞେନ୍‌ ତିଆତେ ଅଡାୟ୍‌ତାୟ୍‌; ଆକେଣ୍ତାରନ୍‌ ଅନଡନ୍‌ ଅଃଡେଏ ଅଡ଼େ ଲବନ୍‌ ଗନାୟନ୍‌ ଅଃଡେଏ; ବନ୍‌ଡ ତିଆତେ ପିଃମଡ୍‌ସାଲାଙ୍କଜନ୍‌ ଡ କାନ୍ତେଗାଜନ୍‌ ତୁମ୍‌ ଡେଆୟ୍‌ତେ; ଆରି ତେତ୍ତେ ତରୁବନ୍‌ ଅଡ଼ୋଡଙାନ୍‌ ଗାମ୍‌ଲେ ଞେନ୍‌ ମେଗନ୍‌ଆଡଙ୍‌ ବର୍ତାୟ୍‌ । 7 ଇନିଆସନ୍‌ଗାମେଣ୍ତେନ୍‌ ଇସ୍ରାଏଲ କେଜ୍ଜା ପ୍ରବୁନ୍‌ ଆ ଦ୍ରାକ୍ୟାକୋତ୍ତା ଡ ଜିଉଦାନ୍‌ ଆ ମନ୍‌ରାଜି ଆନିନ୍‌ ସର୍ଡାନ୍‌ ବାତ୍ତେ ଆ ଗରୁଏନ୍‌ ଦ୍ରାକ୍ୟାତଡ଼ି; ଆନିନ୍‌ ଡରମ୍ମମର୍‌ ଆଡନେ ଆସନ୍‌ ଜଗେଏନ୍‌, ବନ୍‌ଡ ୟେୟେଡାନ୍‌ ଗିଜେନ୍‌ ।

8 ଡେସାଲୋଙନ୍‌ ଏଙ୍ଗାଲେ ଆରି ଡରକୋନେନ୍‌ ଅଃଡକୋଏ ଡ ଆମ୍ୱେଞ୍ଜି ଏଙ୍ଗାଲେ ତେତ୍ତେ ତିନ୍‌ସୟ୍‌ବେନ୍‌ ଏଡକୋତନେ, ତିଆସନ୍‌ ଆମ୍ୱେଞ୍ଜି ଅସିଙନ୍‌ ଡକୋନ୍‌ ଡକୋନ୍‌ ଅସିଙନ୍‌ ବସେଙନ୍‌ ଡକୋନ୍‌ ଡକୋନ୍‌ ବସେଙନ୍‌ ଏଃମାୟ୍‌ମାୟ୍‌ତେ, ଆମ୍ୱେଞ୍ଜି ପନବ୍‌ରଡନ୍‌ ଏଞାଙ୍‌ତେ ! 9 ପ୍ରବୁ ଇସ୍ୱରନ୍‌ ଆବର୍ରନ୍‌ ଞେନ୍‌ ଅମ୍‌ଡଙ୍‌ଲାୟ୍‌, "କେନ୍‌ ସୋରାଡ଼ାନ୍‌ ଆସିଙ୍‌ଜି ଅଡ଼୍‌କୋନ୍‌, ମନଙ୍‌ରାଡମନ୍‌ ଆସିଙ୍‌ ଆରିଙ୍‌ରିଙ୍‌ ଏମ୍ମେତାୟ୍‌ ଆରି ରିବ୍‌ଡ଼ାଙାୟ୍‌ତାୟ୍‌ । 10 ଇନିଆସନ୍‌ଗାମେଣ୍ତେନ୍‌ ଦସ ଏକ୍ରା ଦ୍ରାକ୍ୟାକୋତ୍ତାଲୋଙନ୍‌ ବମଅଣ* ଦ୍ରାକ୍ୟାଡାନ୍‌ ଲୋତେ ଆରି ଦସ ମଅଣ* ଜମ୍ମଲନ୍‌ ସିଲଡ୍‌ ୨୨ ଆଡା ଜନ୍‌ରୋମନ୍‌ ଅବାୟ୍‌ତେ ।" 11 ଅଙ୍ଗା ଆମନ୍‌ରାଜି ଗାସାଲନ୍‌ ଆସନ୍‌ ଅନ୍‌ରଙନ୍‌ ଡୋତାନ୍‌ ଡୋତଞ୍ଜି, ଅନ୍‌ରଙ୍‌ ବନ୍‌ନୁଲେଞ୍ଜି ଜାୟ୍‌ ଅବ୍‌ଡିଙ୍‌ଲନ୍‌ ତଗଲନ୍‌ ଜିର୍ତାଜି, ଆନିଞ୍ଜି ପନବ୍‌ରଡନ୍‌ ଞାଙ୍‌ତଜି ! 12 ଆବୁଜିଲୋଙଞ୍ଜି ବିଣାରାଜନ୍‌, ଗଡେରାଜନ୍‌, ଡରେବ୍‌ଡିଙନ୍‌, ପିରୋଡ଼ୋଜନ୍‌ ଡ ଦ୍ରାକ୍ୟାଡାନ୍‌ ଡକୋତନ୍‌; ବନ୍‌ଡ ଆନିଞ୍ଜି ପ୍ରବୁନ୍‌ ଅଙ୍ଗା ଆକାବ୍ବାଡ଼ା ଲୁମେନ୍‌ ଆନିଞ୍ଜି ଅଃଜନାଏଜି । 13 ତିଆସନ୍‌ ମନ୍‌ରାଞେଞ୍ଜି ଜନନାନ୍‌ ଅବୟତଡନ୍‌ ଆସନ୍‌ ବଣ୍ତିଲନ୍‌ ପନାଙନ୍‌ ଡେତଜି; ଆରି ଆ ସୋଡ଼ାଗଡ୍‌ ମରଞ୍ଜି ଆରାଡୋଲ୍‌ ଆରି ଆମନ୍‌ରାଞ୍ଜି ଉର୍ଗାଲ୍‌ଲେ ରବୁତଜି । 14 ତିଆସନ୍‌ ପାତାଡ଼ନ୍‌ ଆ କିମ୍ପୋଙନ୍‌ ଅବ୍‌ଲାଆଙ୍‌ତେ ଆରି ଆ ତଅଡନ୍‌ ଅବ୍‌ଲାଆଙ୍‌ଲେ ଆଙ୍‌ତମ୍‌ତେ; ଆରି, ଆଗନୁଗୁ ପନେମେଙଞ୍ଜି, ଆମନ୍‌ରାଞ୍ଜି ଅଡ଼୍‌କୋନ୍‌, ଆ ବନ୍‌ଡ୍ରାବଞ୍ଜି ଡ ଆମଙ୍‌ଲୋଙଞ୍ଜି ମନଅଁୟ୍‌ମରଞ୍ଜି ତେତ୍ତେ ପଡ୍‌ଲନ୍‌ ଜିର୍ତଜି । 15 ଆରି ବୋର୍ସାତଡନ୍‌ ଆମନ୍‌ରାଜି ବରୁମ୍‌ତଜି ଆରି ସୋଡ଼ାମରଞ୍ଜି ଅବ୍‌ସନ୍ନାଡମ୍‌ତଞ୍ଜି, ଆରି କଙ୍କ୍ରିମରଞ୍ଜିଆଡଙ୍‌ ଅବ୍‌ସନ୍ନାଡମ୍‌ତନ୍‌; 16 ବନ୍‌ଡ ଅଡ଼୍‌କୋନ୍‌ ସିଲଡ୍‌ ସୋଡ଼ା ପ୍ରବୁନ୍‌ ପନ୍‌ସୁଆତିଲୋଙନ୍‌ ଅନବ୍‌ସୋଡ଼ାନ୍‌ ଡେତେ, ଆରି ଡରମ୍ମନ୍‌ ଅନ୍ତମ୍‌ ଇସ୍ୱରନ୍‌ ଡରମ୍ମଲୋଙନ୍‌ ମଡ଼ିର୍‌ ଗାମ୍‌ଲେ ମନାନ୍ନେନ୍‌ ଡେତେ । 17 ତିଆଡିଡ୍‌ ଆଅନ୍‌ ମେଣ୍ତାଞ୍ଜି ଆ ଜନୋମ୍‌ଜୋମ୍‌ ବସେଙ୍‌ଲୋଙନ୍‌ ଅଗାବନ୍‌ ଜୋମ୍‌ତଜି, ଆରି ଗମାଙ୍‌ମରଞ୍ଜି ଆପୁଡ୍‌ସିଙ୍‌ରେଙନ୍‌ ଆବସେଙ୍‌ରେଙ୍‌ ଜୋମ୍‌ଜୋମ୍‌ତଞ୍ଜି । 18 ଆନାଜି ସଗାଡ଼ା ଲୁଡନ୍‌ ଅନ୍ତମ୍‌ କନଣ୍ଡାୟନ୍‌ ଡ ପେଲ୍ଲାନ୍‌ ବାତ୍ତେ ଇର୍ସେନ୍‌ ପାଙ୍‍ତାଜି, ଆନିଞ୍ଜି ପନବ୍‌ରଡନ୍‌ ଞାଙ୍‌ତଜି । 19 ଆନିଞ୍ଜି ବର୍ତଞ୍ଜି, "ଇନ୍‌ଲେଞ୍ଜି ଏଙ୍ଗାଲେ ସାୟ୍‌ଲେ ରପ୍ତିତବୋ, ତିଆସନ୍‌ ଆନିନ୍‌ ଲତୁବେତୋ, ଆନିନ୍‌ ଆ କାବ୍ବାଡ଼ାନ୍‌ ଲଲୁମେତୋ; ଆରି, ଇନ୍‌ଲେଞ୍ଜି ଏଙ୍ଗାଲେ ଜନାଲେ ଏରପ୍ତିତିଆୟ୍‌, ତିଆସନ୍‌ ଇସ୍ରାଏଲନ୍‌ ଆ ମଡ଼ିର୍‌ମର୍‌ ଆବର୍ନେ ଅନ୍ତମ୍‌ ଡେଏତୋ ।" 20 ଆନାଜି ମନଙ୍‌ତଡନ୍‌ ଆତେ ମନଙ୍‌ ଆରି ମନଙନ୍‌ଆତେ ମନଙ୍‌ତଡ୍‌ ଗାମ୍‌ତଜି; ଆନାଜି ଲୋଙଡନ୍‌ ସାଆର୍‌ ଆରି ସାଆରନ୍‌ ଲୋଙଡନ୍‌ ଅନ୍ତମ୍‌ ଇଃୟମ୍‌ତଜି; ଆନାଜି ଅସାଙନ୍‌ ଆତେ ଜବୁଙ୍‌ ଆରି ଜବୁଙନ୍‌ଆତେ ଅସାଙନ୍‌ ଅନ୍ତମ୍‌ ଇଃୟମ୍‌ତଜି, ଆନିଞ୍ଜି ପନବ୍‌ରଡନ୍‌ ଞାଙ୍‌ତଜି ! 21 ଆନାଜି ତର୍ଡମ୍‌ ତର୍ଡମ୍‌ ଆଗନିୟ୍‌ଗିୟ୍‌ଲୋଙ୍‌ ଗିଆନଡମ୍‌ ଆରି ତର୍ଡମ୍‌ ତର୍ଡମ୍‌ ଆଜନନାଲୋଙ୍‌ ବୁଡ୍ଡିଡମ୍‌, ଆନିଞ୍ଜି ପନବ୍‌ରଡନ୍‌ ଞାଙ୍‌ତଜି ! 22 ଆନାଜି ଦ୍ରାକ୍ୟାଡାନ୍‌ ଆଗନା ଆସନ୍‌ ଅଃବାମୁଙ୍‌ତଞ୍ଜି ଡ ଅଲିନ୍‌ ଆମନାୟ୍‌ମାୟ୍‌ ଆସନ୍‌ ବପ୍ପୁ; 23 ଆନାଜି ତଙ୍କାନ୍‌ ଆଞନାଙ୍‌ ଆସନ୍‌ ପେଲ୍ଲାମରନ୍‌ଆଡଙ୍‌ ଡୋସା ତଡ୍‌ ଏମ୍ମେତଜି ଆରି ଡରମ୍ମମରନ୍‌ ଆ ଡରମ୍ମଗଡନ୍‌ ଆମଙନ୍‌ ସିଲଡ୍‌ ସବ୍‌ଙାୟ୍‌ତଜି, ଆନିଞ୍ଜି ପନବ୍‌ରଡନ୍‌ ଞାଙ୍‌ତଜି । 24 ତିଆସନ୍‌ ଆଉଲାଙ୍‌ତୋଡନ୍‌ ଏଙ୍ଗାଲେ ଅଲାମନ୍‌ ଓବ୍‌ଞାଲ୍‌ଲେ ଜୋମ୍‌ତୋଡ୍‌ତେ ଆରି ଆସରନ୍‌ ଆଜିଙ୍‌ ଏଙ୍ଗାଲେ ତଗୋନ୍‌ଲୋଙନ୍‌ ଜୋମ୍‌ତୋଡ୍‌ତେ, ତିଅନ୍ତମ୍‌ ଆନିଞ୍ଜି ଆ ମୁଡ଼ଜଡନ୍‌ ଲତର୍ତେ ଆରି ଆ ତାର୍ବାଞ୍ଜି ଆରଡ଼ିସଲନ୍‌ ଅନ୍ତମ୍‌ ପାଙ୍‌ରିଙ୍‌ତେ; ଇନିଆସନ୍‌ଗାମେଣ୍ତେନ୍‌ ଆନିଞ୍ଜି ପ୍ରବୁନ୍‌ ଆ ବନାଁୟ୍‌ବରନ୍‌ ଆଲ୍ଲେଏଞ୍ଜି ଆରି ଇସ୍ରାଏଲନ୍‌ ଆଡରମ୍ମମର୍‌ ଆବର୍ନେ ଆଲ୍ଲେଏଞ୍ଜି । 25 ତିଆସନ୍‌ ପ୍ରବୁନ୍‌ ଆବନ୍‌ଡ୍ରାବ୍‌ ଆ ମନ୍‌ରାଞ୍ଜି ଆ ବିରୁଦଲୋଙ୍‌ ଆଡୁଡୁତୋଡ୍‌ଗୋ ଡେଏନ୍‌ ଆରି ଆନିନ୍‌ ଆବିରୁଦଲୋଙଞ୍ଜି ଆସିନ୍‌ ତେକ୍କେଲେ ଆନିଞ୍ଜିଆଡଙ୍‌ ତିଡେଞ୍ଜି, ଆରି, ଡୋୟ୍‌ନାବରୁଞ୍ଜି ତକରେଞ୍ଜି ଡ ମନ୍‌ରାଞ୍ଜି ଆମରା ରୋତରେଙନ୍‌ ଲନାଜିଙନ୍‌ ଅନ୍ତମ୍‌ ଡେଏନ୍‌ । କେନ୍‌ ଅନ୍ତମ୍‌ ଅଡ଼୍‌କୋନ୍‌ ଡେଏନ୍‌ ଜନଙ୍‌ଡେନ୍‌ ଆବନ୍‌ଡ୍ରାବ୍‌ ଅସୟୁଲୋ, ବନ୍‌ଡ ଆସିନ୍‌ ଆମ୍ମୁଙ୍‌ ଅନ୍ତମ୍‌ ମା ଆତେକେସି ଡକୋତନେ । 26 ଆରି, ପ୍ରବୁନ୍‌ ସଙାୟ୍‌ କେଜ୍ଜାଞ୍ଜିଆଡଙ୍‌ ଆସନ୍‌ ଅବୟ୍‌ ଜନିନୟ୍‌କାବନ୍‌ ଅବ୍‌ଡୋତେ ଆରି ପୁର୍ତିନ୍‌ ଆନଗଡ୍‌ ସିଲଡ୍‌ ଆନିଞ୍ଜି ଆସନ୍‌ ପେସିତଜି, ଆରି ଗିୟ୍‌ବା, ଆନିଞ୍ଜି ଅପୁଡ୍‌ ତଙିୟ୍‌ଲନ୍‌ ଲଜିର୍ତାଜି; 27 ଆମଙ୍‌ଲୋଙଞ୍ଜି ସିଲଡ୍‌ ଆନ୍ନିଙ୍‌ ଅମ୍ମଙ୍ଗାଏଜି, କି ଅଃତ୍ତୁଡ୍ଡୁବେଜି; ଆନ୍ନିଙ୍‌ ଅମବ୍‌ମବ୍‌ଡାଏଜି କି ଅଃଲୁଡେଜି; ଆରି, ଆଜନିଡୁବଞ୍ଜି ଅନପୁରେ କି ଆପାଣ୍ତୁଞଞ୍ଜି ଆଜନିବାଡ୍‌ ଅନତଡେ; 28 ଆଅଆମଞ୍ଜି ଅସୁବ୍‌ଡମ୍‌ ଆରି ଆଞଙାଞ୍ଜି ଅଡ଼୍‌କୋନ୍‌ ଆସନେଙ୍‌ମଡ୍‌; ଆ କୁର୍ତାଞ୍ଜି ଆଗୋଡ୍ଡଜଙ୍‌ ଆକ୍ରିଲାୟ୍‌ତେନ୍‌ ଆରେଙ୍‌ ଅନ୍ତମ୍‌ ଆରି ଆରତ୍ତାଞ୍ଜି ଆଗୁଡ଼ିଜଙ୍‌ ଗାବ୍‌ୟାର୍‌ରିଙନ୍‌ ଅନ୍ତମ୍‌; 29 ଆଗୁନୁରୁମଞ୍ଜି ସିଅଁକିଡନ୍‌ ଅନ୍ତମ୍‌ ଗୁଡ୍‌ରୁମ୍‌ତଜି, ଆନିଞ୍ଜି ଡାମ୍ୱଡ଼ା ସିଅଁକିଡନ୍‌ ଅନ୍ତମ୍‌ ଗୁରୁମ୍‌ତଜି; ଆରି ଆନିଞ୍ଜି ଗୁଡ୍‌ରୁମ୍‌ଲେ ଜନ୍ତୁନ୍‌ ଞମ୍‌ଲେ ଏରାମ୍ମୁୟ୍‌ ତିଆତେ ପାଙ୍‌ଲେ ଜିର୍ତଜି ଡ ଡନୋବନ୍‌ ଆସନ୍‌ ଆନ୍ନିଙ୍‌ ସାୟ୍‌ଲେ ଅଃରପ୍ତିଏଜି । 30 ଆରି ଆନିଞ୍ଜି ତିଆଡିନ୍ନା ସମେଁୟ୍‌ଣ୍ଡ୍ରାନ୍‌ ଆସନଡ୍ଡା ଅନ୍ତମ୍‌ ମନ୍‌ରାଞ୍ଜି ଆଉପ୍ରେଙ୍‌ଲୋଙ୍‌ ଗୁଡ୍‌ରୁମ୍‌ତଜି; ସିଲତ୍ତେ ଆନ୍ନିଙ୍‌ ଡେସାନ୍‌ଆଡଙ୍‌ ଆଙାଙ୍‌ତେ, ଗିୟ୍‌ବା, ଲୋଙଡ୍‌ ଆରି ବନ୍ତଙନ୍‌ ରାଙ୍‌ଡାତେ, ଆରି ତି ଆଡ୍ରକୋନେ ଆସନାଆର୍‌ ମେଗନ୍‌ ବାତ୍ତେ ଲୋଙଡ୍‌ତେ ।