1 ଇନିଆସନ୍‌ଗାମେଣ୍ତେନ୍‌ ପ୍ରବୁନ୍‌ ଜାକୁବନ୍‌ଆଡଙ୍‌ ସାୟୁମ୍‌ତେ ଆରି ଇସ୍ରାଏଲନ୍‌ଆଡଙ୍‌ ଆରି ବତର ସେଡାତଜି ଡ ଆନିଞ୍ଜିଆଡଙ୍‌ ଆଡେସାଲୋଙଞ୍ଜି ଡକୋତଜି, ସିଲତ୍ତେ ବଡେସା ଆମନ୍‌ରାଜି ଆନିଞ୍ଜି ସରିନ୍‌ ମାୟ୍‌ତନେଜି, ଆନିଞ୍ଜି ଜାକୁବନ୍‌ ଆକେଜ୍ଜାଆଡଙ୍‌ ମାୟ୍‌ତନେଜି । 2 ଆରି ମନ୍‌ରାଞ୍ଜି ଆନିଞ୍ଜିଆଡଙ୍‌ ଓରୋଙ୍‌ଡାଲେ ଆନିଞ୍ଜିଡମନ୍‌ ଆଡ୍ରକୋନେବାନ୍‌ ଜୋନ୍‌ଜୋନ୍‌ତଜି, ଇସ୍ରାଏଲନ୍‌ ଆକେଜ୍ଜା ପ୍ରବୁନ୍‌ ଆଡେସାଲୋଙ୍‌ ଆନିଞ୍ଜିଆଡଙ୍‌ କମ୍ୱାରିମରନ୍‌ ଡ କମ୍ୱାରିବଜନ୍‌ ଅନ୍ତମ୍‌ ଏମ୍ମେତେ; ଆନିଞ୍ଜି ଅଙ୍ଗା ଆମନ୍‌ରାଜି ଆମଙ୍‌ ଆବଣ୍ତି ଡକୋଏଞ୍ଜି, ଆନିଞ୍ଜିଆଡଙ୍‌ ବଣ୍ତିଲେ ଓରୋଙ୍‌ତଜି ଡ ଆନିଞ୍ଜି ରମ୍ମଙ୍‌ ଆ ଜିରୁମର୍‌ଜି ଆତୋଣ୍ତୁ ସାସନତେଜି ।

3 ଆରି, ଅଙ୍ଗା ଆଡିଡ୍‌ ପ୍ରବୁନ୍‌ ଆମ୍ୱେନ୍‌ଆଡଙ୍‌ ଡୁକବେନ୍‌ ଡ ଡନଣ୍ତାୟନ୍‌ ସିଲଡ୍‌ ଡ ଅଙ୍ଗା କମ୍ୱାରିଲୋଙନ୍‌ ଆମ୍ୱେନ୍‌ଆଡଙ୍‌ କମ୍ୱାରି କାବ୍ବାଡ଼ାନ୍‌ ଲନୁମନ୍‌ ଡେଏନ୍‌, ତିସିଲଡ୍‌ଲନ୍‌ ଲୋଲୋନେନ୍‌ ତିୟ୍‌ତବେନ୍‌ । 4 ତି ଆଡିଡ୍‌ ଆମ୍ୱେନ୍‌ ବାବିଲ୍‌ ରାଜାନ୍‌ ଆ ବିରୁଦଲୋଙ୍‌ କେନ୍‌ ଆନବ୍‌ଜଙ୍‌ ବରନ୍‌ ଏବର୍ତନ୍‌, ଆଗରାମ୍‌ଗାମ୍‌, ରୁୟ୍‌ରୁୟ୍‌ମରଞ୍ଜି ଏଙ୍ଗାଲେ ଅସେଡାଜେଞ୍ଜି ! ସୁନ୍ନା ଗଡ଼ାନ୍‌ ଏଙ୍ଗାଲେ ଅସେଡେନ୍‌ ! 5 ଆନାଜି ବନ୍‌ଡ୍ରାବନ୍‌ ବାତ୍ତେ ଆନ୍ନା ଆନ୍ନା ଆଡେସାବାଜି ମନ୍‌ରାଞ୍ଜିଆଡଙ୍‌ ଆକେଜ୍ଜାଆଡଙ୍‌ ବନ୍‌ଡ୍ରାବନ୍‌ ବାତ୍ତେ ସାସନଲେ ଆଏଡ଼ର୍‌ ଡଣ୍ତାୟେଞ୍ଜି 6 ପ୍ରବୁନ୍‌ ତି ଆ ପେଲ୍ଲାମର୍‌ଜି ଆଡାଙ୍ଗୋ ଡ ସୋଡ଼ାଗଡ୍‌ମରଞ୍ଜି ଆନଗଡ୍‌ ଅବ୍‌ସେଡେଞ୍ଜି । 7 ସମ୍ପରା ପୁର୍ତିନ୍‌ ସନୟୁନ୍‌ ଡ ଲୋଲୋନେନ୍‌ ଞାଙେଞ୍ଜି; ଆନିଞ୍ଜି ସର୍ଡାନ୍‌ ବାତ୍ତେ କନନ୍‌ତଞ୍ଜି । 8 ଓଓ, ଦେବଦାରୁ ଅରାନ୍‌ ଡ ଲିବାନୋନ୍‌ଲୋଙନ୍‌ ଏରସ ଅରାଞ୍ଜି ବର୍ନେମନ୍‌ ଆସନ୍‌ ସର୍ଡାଲନ୍‌ ବର୍ତଞ୍ଜି, ଆମନ୍‌ ଆଗ୍ରୋଙ୍‌ଲମନ୍‌ ସିଲଡ୍‌ ଆନ୍ନିଙ୍‌ ଆଡ୍ରାମରନ୍‌ ଆ ବିରୁଦଲୋଙ୍‌ ଅନ୍‌ରଙ୍‌ଜିରାୟ୍‌ । 9 ବାବିଲୋନନ୍‌ ଆ ରାଜାଆଡଙ୍‌ ଆର୍‌ନବାଙ୍‌ ଆସନ୍‌ ରନବୁ ଡରକୋନେନ୍‌* ଅବ୍‌ଜାଡାତନ୍‌ । ଆନାଜି ପୁର୍ତିଲୋଙନ୍‌ ବୋର୍ସମର୍‌ଜି ଡକୋଏଞ୍ଜି ଆ ବୁତ୍ତଞ୍ଜି ଅଡ଼େତେ ଅଡ଼େନେ ବୁଲେତଜି । ରାଜାଞ୍ଜି ଆବୁତ୍ତ ଆ ତରଙ୍କୁମଞ୍ଜି ଆତୋଣ୍ଡୋ ଡାୟ୍‌ତଜି । 10 ଆନିଞ୍ଜି ଅଡ଼୍‌କୋଞ୍ଜି ଜାଲଙ୍‌ଲେ ଆମନ୍‌ଆଡଙ୍‌ ବର୍ତମ୍‌ଜି, ଆମନ୍‌ ଜାୟ୍‌ ଇନି ଇନ୍‌ଲେଞ୍ଜି ଅନ୍ତମ୍‌ ବପ୍ପୁ ତଡ୍‌ ଡେଲମ୍‌, ଆମନ୍‌ ଇନି ଇନ୍‌ଲେଞ୍ଜି ଆସ୍ରମାନ ଡେଲମ୍‌, 11 ଅନର୍ଜେନମ୍‌ ଡ ବିଣାରାୟ୍‌ନମ୍‌ ଆସନଡ୍ଡା ପାତାଡ଼ନ୍‌ ଜାୟ୍‌ ଅଡ଼ୋଏନ୍‌; ବୋବ୍ବୋଡନ୍‌ ବରେଲ୍‌ନେନମ୍‌ ଆଜାୟ୍‌ତା ଆବେଲ୍‌ସାୟ୍‌ ଆରି ବୋବ୍ବୋଡନ୍‌ ଗରୁସାୟ୍‌ନେନମ୍‌ ଡେଏନ୍‌ । 12 ଏ ଲୁସିପର୍‌, ଆତଗାଡ୍‌ ସୁଙ୍କରାନ୍‌, ଆମନ୍‌ ରୁଆଙନ୍‌ ସିଲଡ୍‌ ଏଙ୍ଗାଲେ ଗଲୋଲମ୍‌, ଆମନ୍‌ କେଜ୍ଜାଞ୍ଜିଆଡଙ୍‌ ଅବ୍‌ଲଡ୍‌ନେଏନ୍‌, ବନ୍‌ଡ ନମି ଆମନ୍‌ ଏଙ୍ଗାଲେ ଲବଲୋଙନ୍‌ ସନେଡନ୍‌ଡେଲମ୍‌ । 13 ଆରି ଆମନ୍‌ ଅମଲଙ୍‌ନମ୍‌ ଇୟମ୍‌ଲେ ବର୍ରନେ, ଞେନ୍‌ ରୁଆଙନ୍‌ ଡାୟ୍‌ତାୟ୍‌, ଞେନ୍‌ ଇସ୍ୱରନ୍‌ ଆ ତୁତୁଜଞ୍ଜି ଆତୋଣ୍ଡୋ କୁର୍ସିଞେନ୍‌ ଏମ୍ମେତାୟ୍‌; ଞେନ୍‌ ଅର୍କାବଡ଼ିଗଡ୍‌ ଆ ମଡ଼ିର୍‌* ବରୁଲୋଙନ୍‌ ଡକୋତନାୟ୍‌ । 14 ଞେନ୍‌ ମେଗନ୍‌ ସିଲଡ୍‌ ଡାତୋଣ୍ଡୋ ଆଡ୍ରକୋନେଲୋଙ୍‌ ଡାୟ୍‌ତାୟ୍‌ ଆରି ଞେନ୍‌ ଇସ୍ୱରନ୍‌ ଅନ୍ତମ୍‌ ଡେତାୟ୍‌ । 15 ବନ୍‌ଡ ଆମନ୍‌ ପାତାଡ଼ନ୍‌, ଲୋଓଙନ୍‌ ଆନ୍ନେଙ୍‌ ସଣ୍ତିବା ଅନଃପଡନ୍‌ ଡେତମ୍‌ । 16 ଆନାଜି ଆମନ୍‌ଆଡଙ୍‌ ଗିୟ୍‌ତମ୍‌ଜି, ଆନିଞ୍ଜି ଏର୍ସେଡ୍‌ମଡ୍‌ଲନ୍‌ ଆଙାଙ୍‌ଲେ ବର୍ନେନମ୍‌ ଇଃୟମ୍‌ଲେ ବର୍ତଞ୍ଜି, ଆନା ପୁର୍ତିନ୍‌ଆଡଙ୍‌ ଅବ୍‌ୟୁର୍ନେଏନ୍‌, ଆରି ଅଡ଼୍‌କୋ ରାଜ୍ୟନ୍‌ ଅବ୍‌ୟୁନେଆଜେନ୍‌ ? 17 ଆନା ପୁର୍ତିନ୍‌ଆଡଙ୍‌ ରିଜାଲନ୍‌ ଅନ୍ତମ୍‌ ଅମ୍ମେଏନ୍‌ ଡ ତେତ୍ତେ ଡକୋନ୍‌ ଆଗଡ଼ାଜି ଅଡ଼୍‌କୋନ୍‌ ଅବ୍‌ସେଡେଞ୍ଜି; ଆନା ଆ ବଣ୍ତିମରଞ୍ଜିଆଡଙ୍‌ ଆସିଙଞ୍ଜି ଅଃନବ୍‌ଜିର୍ଜିରୋ ଆନିନ୍‌ ପଙ୍‌ କେନ୍‌ ଆମନ୍‌ରା ? 18 କେଜ୍ଜାନ୍‌ ଆ ରାଜାଜି, ଆମନ୍‌ରାଞ୍ଜି ଅଡ଼୍‌କୋନ୍‌ ମା, ଅବ୍‌ସୋଡ଼ାଡମ୍‌ଲନ୍‌ ରମ୍ମଙ୍‌ ରମ୍ମଙ୍‌ ଆସିଙ୍‌ଲୋଙ୍‌ ଲୁଡ୍‌ତଜି, 19 ବନ୍‌ଡ ଆମନ୍‌ ଏଡ଼ୁର୍‌ମଡ୍‌ କେଣ୍ତାରନ୍‌ ଅନ୍ତମ୍‌, କଡ଼ିବନ୍‌ ବାତ୍ତେ ଆରବ୍ବୁ ଡ ଲୋଓଙନ୍‌ ଆରେଙ୍‌ଲୋଙ୍‌ ସେଡ୍‌ଲେ ଆରବ୍ବୁନ୍‌ ଆମନ୍‌ରା ବାତ୍ତେ ଆଞୁମ୍‌ନେ, ମସାନିନମ୍‌ ସିଲଡ୍‌ ସଙାୟ୍‌ ସନେଡନ୍‌ ଡେଲମ୍‌; ଆମନ୍‌ ଆଞନାଡା ମରାନ୍‌ ଅନ୍ତମ୍‌ ଡେଲମ୍‌ । 20 ଆମନ୍‌ ଆନିଞ୍ଜି ସରିନ୍‌ ତନିଲନ୍‌ ଅଃଡେଅମ୍‌, ଇନିଆସନ୍‌ଗାମେଣ୍ତେନ୍‌ ଆମନ୍‌ ଡେସାନମ୍‌ ଅଃମୋସାଏନ୍‌, ଆମନ୍‌ ମନ୍‌ରାନମ୍‌ଞ୍ଜିଆଡଙ୍‌ ରବ୍ବୁଏନ୍‌, ମନଙ୍‌ କାବ୍ବାଡ଼ାନ୍‌ ଅଃଲୁମେଞ୍ଜି ଆକେଜ୍ଜା ଆଞୁମ୍‌ ଆଙ୍ଗିୟ୍‌ ଅନିଡଲନ୍‌ ଅଃଡେଏ । 21 ଆଅନଞ୍ଜି ଡୋଲନ୍‌ ଏଙ୍ଗାଲେ ପୁର୍ତିନ୍‌ ଅଦିକାର ଅଃନେମ୍ମେଏଜି ଆରି ପୁର୍ତିନ୍‌ ଗଡ଼ାନ୍‌ ଗବ୍‌ଡେଲ୍‌ଡଙ୍‌ଜିତଡ୍‌, ତିଆସନ୍‌ ଆମ୍ୱେଞ୍ଜି ଆପୁର୍ବାଜୋଜୋଞ୍ଜି ଆଇର୍ସେ ଆସନ୍‌ ଆନିଞ୍ଜି ଆସନ୍‌ ରନବ୍ବୁ ଡରକୋନେନ୍‌ ଅବ୍‌ଜାଡାବା । 22 ଆରି, ପ୍ରବୁନ୍‌ ବର୍ତନେ, "ଞେନ୍‌ ଆ ବିରୁଦଲୋଙଞ୍ଜି ଡୋତନାୟ୍‌," ପ୍ରବୁନ୍‌ ବର୍ତନେ, "ଞେନ୍‌ ବାବିଲନ୍‌ ସିଲଡ୍‌ ଅଞୁମନ୍‌ ଡ ଲାଙ୍‌ଲେଡ୍‌, ଡାଙ୍ଗାଡ଼ାଅନ୍‌ ଡ ଉଲ୍ଲେଙନ୍‌, ଅବ୍‌ସେଡ୍‌ବା । 23 ଆରି ପ୍ରବୁନ୍‌ ବର୍ତନେ, ଞେନ୍‌ ତି ଆଗଡ଼ାଆଡଙ୍‌ କଞ୍ଜିଙ୍‌ତିଡନ୍‌ ଆ ଅଦିକାର ଡ ଡାଆନ୍‌ତୁମ୍‌ ଏମ୍ମେତାୟ୍‌ ଆରି ଞେନ୍‌ ରନବ୍ବୁନ୍‌ ଜନନ୍‌ ଅନ୍ତମ୍‌ ଆନିନ୍‌ଆଡଙ୍‌ ଜଲେ ସେତ୍ତାୟ୍‌ ।"

24 ପ୍ରବୁନ୍‌ ପର୍ମାଡ଼ାଲନ୍‌ ବର୍ରନେ, "ଞେନ୍‌ ଇନିଜି ଇଃୟମ୍‌ଲାୟ୍‌, ଆଜାଡ଼ିନ୍‌ ତିଅନ୍ତମ୍‌ ଗଟେତେ ଆରି ଞେନ୍‌ ଏଙ୍ଗାଲେ କଡାଡ଼ିଲନାୟ୍‌, ତିଅନ୍ତମ୍‌ ଗରିତେ । 25 ଞେନ୍‌ ଡେସାଲୋଙ୍‌ଞେନ୍‌ ଅସୁରନ୍‌ଆଡଙ୍‌ ଅବ୍‌ସେଡ୍‌ବା ଆରି ବରୁଲୋଙ୍‌ଞେନ୍‌ ଆନିନ୍‌ଆଡଙ୍‌ ତାଲ୍‌ଜଞନ୍‌ ବାତ୍ତେ ଞାଡାତାୟ୍‌; ଏତ୍ତେଲ୍‌ଡେନ୍‌ ମନ୍‌ରାଞ୍ଜି ଆମଙ୍‌ ସିଲଡ୍‌ ଆ ରାଙ୍ଗଙନ୍‌ ଡ ଆତାରଙ୍‌ଲୋଙଞ୍ଜି ସିଲଡ୍‌ ଆବୁଡ଼ାରନ୍‌ ସବ୍‌ଙାୟ୍‌ତାୟ୍‌ ।" 26 ସମ୍ପରା ପୁର୍ତିନ୍‌ ଆବର୍ନେ କେନ୍‌ ଆକଡାଡ଼ି ଗନବ୍‌ରିନ୍‌ ଡେଏନ୍‌ ଆରି କେନ୍‌ ଆସି ଅଡ଼୍‌କୋନ୍‌ ଆକେଜ୍ଜାଜିଆଡଙ୍‌ ଆଲାର୍ନେ । 27 ଇନିଆସନ୍‌ଗାମେଣ୍ତେନ୍‌ ପ୍ରବୁନ୍‌ କଡାଡ଼ିଲନ୍‌, ଆରି ତିଆତେ ଆନ୍ନିଙ୍‌ ଆନ୍ନାଲେ ରପ୍ତିଏ ? ଆରି ଆସିନ୍‌ ଆତେକେ ଡକୋ, ଆରି ଆନା ତିଆତେ ଆବ୍‌ୟରେ ?

28 ଅଙ୍ଗା ଆବର୍ସେଙ୍ ଆଅସ୍‌ ରାଜାନ୍‌ ରବୁଏନ୍‌, କେନ୍‌ଆତେ ତି ଆବର୍ସେଙ୍ ପୁର୍ବାଃତେବର୍‌ । 29 ଏ ପଲେସ୍ଟିଅଜି, ଅଙ୍ଗା ଆଡାଙ୍ଗୁ ଆମନ୍‌ଆଡଙ୍‌ ତିଡ୍‌ଲମ୍‌, ତିଆତେ ଲଗଡେନ୍‌ ଗାମ୍‌ଲେ ଅଡ଼୍‌କୋମ୍ବେନ୍‌ ଏସର୍ଡାଡଙ୍‌ନେ; ଇନିଆସନ୍‌ଗାମେଣ୍ତେନ୍‌ ଜାଆଡନ୍‌ ଆକେଣ୍ତାର୍‌ ସିଲଡ୍‌ ବିସଜଡନ୍‌ ଡୁଙ୍‌ତନାୟ୍‌ ଆରି ତଗୋଙ୍‌ ଅନ୍ତମ୍‌ ଆରେଙ୍‌ତେନ୍‌ ଆ ଜାଆଡ୍‌ ଆ ଜଅନ୍‌ ଡେତେ । 30 ଆରି ଡୋଲେୟ୍‌ମରନ୍‌ ଆପର୍ତମ୍ମୁ ଆଅନ୍‌ଜି ଜୋମ୍‌ତେ ଆରି ଲଗଡ୍‌ ବୁଡ୍ଡିମରଞ୍ଜି ଏରାମ୍ମୁୟ୍‌ ଲୁଡ୍‌ତଜି; ଆରି, କାନ୍ତାରାନ୍‌ ବାତ୍ତେ ମୁଡ଼ବେନ୍‌ ଅବ୍‌ଗୁରୁଡେତାୟ୍‌ ଆରି ଲାଙ୍‌ଲେଡ୍‌ ମନ୍‌ରାବେନ୍‌ ରନବ୍ବୁନ୍‌ ଡେତଜି । 31 ଏ ଗଡ଼ାନ୍‌ ଆ ଡୁଆରା, ୟେୟେଡାନାବା; ଏ ଗଡ଼ା ୟେବା, ଏ ପଲେସ୍ଟିଅବାଜି ଅଡ଼୍‌କୋନ୍‌ମ୍ବେନ୍‌ ବନ୍ତଙନ୍‌ ବାତ୍ତେ ରାଞାଡ଼େଙ୍‌ତବେନ୍‌ । ଇନିଆସନ୍‌ଗାମେଣ୍ଡେନ୍‌ ଅର୍‌କାବଡ଼ିଗଡ୍‌ ସିଲଡ୍‌ ମେଗନ୍‌ ଅନ୍ତମ୍‌ ଓମୋଡନ୍‌ ଜିର୍ତାୟ୍‌, ତିଆତେ ଅବୟ୍‌ ସିପ୍ପାୟଞ୍ଜି, ତେତ୍ତେ ଅବୟ୍‌ ଆବ୍ରତଙ୍‌ତେଞ୍ଜି ଆମନ୍‌ରା ଆନ୍ନିଙ୍‌ ତଡ୍‌ । 32 ଆରି,କେନ୍‌ ଆକେଜ୍ଜା ଆପାଙ୍‌ଲଙ୍‌ବର୍‌ମରଞ୍ଜିଆଡଙ୍‌ ଇନି ଗାମ୍‌ଲେ ଜନାଲଙନ୍‌ ଡେତେ ? କେନ୍‌ ତ, ପ୍ରବୁନ୍‌ ସିଓନନ୍‌ ଆ ଜିମ୍ମି ତୁବେନ୍‌ ଆରି ତି ତେତ୍ତେ ଆ ଡୁକ୍କମରଞ୍ଜି ଲୋଲୋତଞ୍ଜି ।