ଜିସାୟ 24

ପ୍ରବୁନ୍‌ ପୁର୍ତିନ୍‌ ପବ୍‌ରଡ୍‌ତେ

1 ଗିୟ୍‌ବା, ପ୍ରବୁନ୍‌ ପୁର୍ତିନ୍‌ ଅବ୍‌ସେତେ ଆରି ଅବ୍‌ରିକ୍କାତେ, ଆରି ପୁର୍ତିନ୍‌ ସବ୍‌ଡିଡାଲେ ତେତ୍ତେ ଡକୋନ୍‌ ଆମନ୍‌ରାଞ୍ଜିଆଡଙ୍‌ ପିରିଙ୍‌ପାଡାନ୍‌ ଏମ୍ମେଆୟ୍‌ତେ । 2 ସିଲତ୍ତେ ଡିଲେ ମନ୍‌ରାନ୍‌ ଆବସରିନ୍‌ ଅଃର୍ରବାଙ୍‌ତଜି, ମନ୍‌ରାଞ୍ଜି ଏଙ୍ଗାଲେ ରାଓଡ଼ାଞ୍ଜି ଏତ୍ତେଲେ, କମ୍ୱାରିନ୍‌ ଏଙ୍ଗାଲେ ଆ ସାଉକାରନ୍‌ ଏତ୍ତେଲେ; କମ୍ୱାରିବଜନ୍‌ ଏଙ୍ଗାଲେ ସାଉଆଣିବଜନ୍‌ ଏତ୍ତେଲେ; ଞିଞିନେମରନ୍‌ ଏଙ୍ଗାଲେ, ତି ଅନ୍ତମ୍‌ ତମ୍‌ତମ୍‌ନେମରନ୍‌; ଗମାଙ୍‌ମରନ୍‌ ଏଙ୍ଗାଲେ, ତି ଅନ୍ତମ୍‌ ସାଉନେମରନ୍‌; ସାଉତିୟ୍‌ମରନ୍‌ ଏଙ୍ଗାଲେ, ତି ଅନ୍ତମ୍‌ ସାଉନେମରନ୍‌ ଆଡଙ୍‌ ଡେତେ । 3 ପୁର୍ତିନ୍‌ ମେର୍ରନ୍‌ ଅବ୍‌ରିକାତେ ଆରି ମେର୍ରନ୍‌ ଜନୁରୁନ୍‌ ଡେତେ; ଇନିଆସନ୍‌ଗାମେଣ୍ତେନ୍‌ କେନ୍‌ ଆବର୍ନେ ପ୍ରବୁନ୍‌ ବର୍ରନେ । 4 ପୁର୍ତିନ୍‌ ୟେୟେଡାଲନ୍‌ ମୁସୁକାମତେ, ଅଡ଼ାରନ୍‌ ବାଲ୍‌ଡଙ୍‌ଲେ ଅସର୍‌ତେ, ପୁର୍ତିନ୍‌ ଆ ସୋଡ଼ାମର୍‌ଜି ଗରୟ୍‌ତଜି । 5 ପୁର୍ତିନ୍‌ ଆଡ୍ରକୋତଞ୍ଜି ଆମନ୍‌ରାଜି ଆତାଲ୍‌ଜଙ୍‌ ଆ ଜାୟ୍‌ତା ଏର୍‌ମଡ଼ିର୍‌ ଡେତେ, ଇନିଆସନ୍‌ଗାମେଣ୍ତେନ୍‌ ଆନିଞ୍ଜି ବନାଁୟ୍‌ବରନ୍‌ ଅଡ଼୍‌କୋନ୍‌ ଆଲ୍ଲେଏଞ୍ଜି, ଅନଗଡନ୍‌ ତାନେଞ୍ଜି, ଆଏଡ଼ର୍‌ ବନାୟ୍‌ବରନ୍‌ ମେଡ୍ଡେଏଞ୍ଜି । 6 ତିଆସନ୍‌ ଆସୟ୍‌ପନ୍‌ ଆପୁର୍ତି ରବ୍ବୁଏନ୍‌ ଆରି ତେତ୍ତେ ଅଡ଼୍‌କୋନ୍‌ ଆମନ୍‌ରାଜି ଡୋସାମର୍‌ ଡେଏଞ୍ଜି; ତି ଆସନ୍‌ ପୁର୍ତିନ୍‌ ଆମନ୍‌ରାଜି ଜୋମ୍‌ତୋଡେଞ୍ଜି ଆରି ଅସୋୟ୍‌ ମନ୍‌ରା ଡକୋଜି । 7 ରଙ୍‌ ଦ୍ରାକ୍ୟାଡାନ୍‌ ୟେୟେଡାତନ୍‌, ଦ୍ରାକ୍ୟାନୁବନ୍‌ ବାଲ୍‌ଡଙ୍‌ଲେ ଅସର୍‌ତେ, ସର୍ଡା ଉଗରନ୍‌ ଅଡ଼୍‌କୋ ଆକ୍ରାନ୍‌ ଦୁକତଞ୍ଜି । 8 ମର୍ଡଡ଼ନ୍‌ ଆସର୍ଡା ସନବ୍‌ଙାଜନ୍‌ ଡେତେ, ସର୍ଡାନେମରଞ୍ଜି ଆସର୍ରଙ୍‌ ଅସୋୟ୍‌ତେ, ବିଣାରାଜନ୍‌ ସନବ୍‌ଙାଜନ୍‌ ଡେତେ । 9 ମନ୍‌ରାଞ୍ଜି କନନ୍‌ଲନ୍‌ ଦ୍ରାକ୍ୟାଡାନ୍‌ ଅଃଗାଏଜି; ଗାସାଲ୍‌ମରଞ୍ଜି ଆସନ୍‌ ଅଲିନ୍‌ ଅସାଙ୍‌ତେ । 10 ଗଡ଼ାନ୍‌ ଅଡ଼୍‌କୋନ୍‌ ଆ ଜିନିସଜି ପଲାଙାଜେନ୍‌; ଆନ୍ନିଙ୍‌ ଏଙ୍ଗାଲେ ଅମ୍ମନ୍‌ ଜିର୍ରେ ଅଃରପ୍ତିଏ, ଇନିସାନ୍‌ଗାମେଣ୍ଡେନ୍‌ ଅଡ଼୍‌କୋନ୍‌ ଆସିଙ୍‌ ଆଇଙଡ୍‌ । 11 ଡ୍ରାକ୍ୟାଡାନ୍‌ ଆସନ୍‌ ରୋତ୍ତରେଙନ୍‌ ମନ୍‌ରାଞ୍ଜି ବାବ୍ବାବ୍‌ତଜି; ଅଡ଼୍‌କୋ ଆସନର୍ଡା ଲୋଙଡାୟ୍‌ତେ, ଡେସାନ୍‌ ଆସର୍ଡା ସଙାୟ୍‌ତେ । 12 ଡେସାନ୍‌ ଅସେଡ୍‌ତେ ବନ୍‌ଡ ଲାଙ୍‌ଲେଡ୍‌ ଡକୋନ୍‌ ଡକୋତେ ଆରି ଡାରନିନ୍‌ ଲଗଡ୍‌ଲେ ମୋସ୍ସାତେ । 13 ଇନିଆସନ୍‌ଗାମେଣ୍ତେନ୍‌ ଏଙ୍ଗାଲେ ଜିତନୁବନ୍‌ ୟନୁନ୍‌ ଆଡ୍ରେତେନ୍‌ ଆଡିଡ୍‌ ଡେତେ, ଆରି ଏଙ୍ଗାଲେ ଡ୍ରାକ୍ୟାଜନ୍‌ ତନର୍ତୁମନ୍‌ ଆଡ୍ରେତେନ୍‌ ସିଲଡ୍‌ ଡ୍ରାକ୍ୟା ଜନ୍‌ ଞନିଡାନ୍‌ ଡେତେ, ତି ଅନ୍ତମ୍‌ ପୁର୍ତିଲୋଙନ୍‌ କେଜ୍ଜାମରଞ୍ଜି ଆସନ୍‌ ଡେତେ ।

14 କେନ୍‌ ଆନିଞ୍ଜି ଆକ୍ରାନ୍‌ ବାବ୍‌ବାବ୍‌ତଜି, କେନ୍‌ ଆନିଞ୍ଜି ସର୍ଡାଲନ୍‌ କନ୍‌ତଞ୍ଜି; ପ୍ରବୁନ୍‌ ଆ ଗନୁଗୁ ପନେମେଙ୍‌ ଆସନ୍‌ ଆନିଞ୍ଜି ବରୁବ୍‌ୟୋଙ୍‌ଗଡ୍‌ ସିଲଡ୍‌ ଆକ୍ରାନ୍‌ ବାବ୍‌ବାବ୍‌ତଜି । 15 ତିଆସନ୍‌ ଆମ୍ୱେଞ୍ଜି ଡରୁଙ୍‌ୟୋଙ୍‌ଗଡ୍‌ ପ୍ରବୁନ୍‌ଆଡଙ୍‌ ଗନୁଗୁପନେମେଙନ ତିୟ୍‌ବା, ଆଗରାମ୍‌ଗାମ୍‌, ଇସ୍ରାଏଲନ୍‌ ଆ ଇସ୍ୱର ପ୍ରବୁନ୍‌ ଆଞୁମ୍‌ ମଡ୍ଡି ସମେଁୟ୍‌ଣ୍ଡ୍ରାନ୍‌ ଆଡେସାଲୋଙ୍‌ ସିଲଡ୍‌ ସେଙ୍କେବା । 16 ଡରମ୍ମମରଞ୍ଜି ଗନୁଗୁ ପନେମେଙନ୍‌ ଞାଙ୍‌ତଜି, କେନ୍‌ ଆକନନ୍‌ ଞେନ୍‌ ପୁର୍ତିନ୍‌ ଆନଞିଡ୍‌ ସଣ୍ତି ସିଲଡ୍‌ ଏଅମ୍‌ଡଙ୍‌ଲାୟ୍‌ । ବନ୍‌ଡ ଞେନ୍‌ ବର୍ରନାୟ୍‌, "ଞେନ୍‌ ଅସେଡ୍‌ଲିୟ୍‌, ଞେନ୍‌ ଅସେଡ୍‌ଲିୟ୍‌ ! ଞେନ୍‌ ସନୟ୍‌ପମର୍‌ ! ବନାଁୟ୍‌ସିନେମରଞ୍ଜି ବାଁୟ୍‌ସିତଞ୍ଜି; ଓଓ, ବାଁୟ୍‌ସିନେମରଞ୍ଜି ଜବ୍ର ବାଁୟ୍‌ସିତଞ୍ଜି ।" 17 ଏ ପୁର୍ତିନ୍‌ ଆଡ୍ରକୋତଞ୍ଜି ଆମନ୍‌ରାଜି, ଆମ୍ୱେନ୍‌ ଆସନ୍‌ ବନ୍ତଙନ୍‌, ଲୋଓଙନ୍‌ ଡ ଜନ୍ତାନ୍‌ ଆବ୍‌ଜାଡା । 18 ଆରି, ଏନ୍ନେଲେ ଡେତେ ଡ, ଆନ୍ନିଙ୍‌ ଅସମୟ୍‌ ବନ୍ତଙନ୍‌ ଆସନଡ୍ଡା ସିଲଡ୍‌ ଜିର୍ତେ, ଆନିନ୍‌ ଲୋଓଙ୍‌ଲୋଙନ୍‌ ଗଲୋତେ; ଆନ୍ନିଙ୍‌ ଲୋଓଙନ୍‌ ସିଲଡ୍‌ ଡାୟ୍‌ଲେ ଜିର୍ରାୟ୍‌ ଡେନ୍‌, ଆନିନ୍‌ ଜନ୍ତାଲୋଙନ୍‌ ଞନମନ୍‌ ଡେତେ; ଇନିଆସନ୍‌ଗାମେଣ୍ତେନ୍‌ ରୁଆଙନ୍‌ ଆଜର୍କା ଅଡ଼୍‌କୋନ୍‌ ଆରୋସାଡ୍‌ ଡକୋ ଆରି ପୁର୍ତିନ୍‌ ଜିମ୍ମି ଅଡ଼୍‌କୋନ୍‌ ୟୁତନେ । 19 ପୁର୍ତିନ୍‌ ସିଡ଼ିର୍‌ଗଡ଼ିର୍‌ ଡେତେ, ପୁର୍ତିନ୍‌ ଲେଏମ୍‌ତେ, ପୁର୍ତିନ୍‌ ଜବ୍ର ବାଉଲ୍ଲିଡେଏନ୍‌ । 20 ପୁର୍ତିନ୍‌ ଆବନୁଲ୍‌ମରନ୍‌ ଅନ୍ତମ୍‌ ଅଡିଅତାନ୍‌ ଆରି ଅନ୍‌ସିଙନ୍‌ ଅନ୍ତମ୍‌ ମୋତନେ; ଆରି, ଆଡୋସାନ୍‌ ଆନିନ୍‌ଆଡଙ୍‌ ଞମ୍‌ତେ, ସିଲତ୍ତେ ଆନିନ୍‌ ଅସେଡ୍‌ତେ, ଡୋଲନ୍‌ ଅରପ୍ତିଏ । 21 ଆରି ତି ଆଡିନ୍ନା ପ୍ରବୁନ୍‌ ତୋଣ୍ତୁନ୍‌ ଆ ସିପ୍ପାୟ୍‌ଜିଆଡଙ୍‌ ଡ ପୁର୍ତିନ୍‌ ଆ ରାଜାଜିଆଡଙ୍‌ ପବ୍‌ରଡ୍‌ତଜି । 22 ଏଙ୍ଗାଲେ ବଣ୍ତିମରଞ୍ଜି କୁଆଲୋଙନ୍‌ ରୁକୁତଞ୍ଜି, ତି ଅନ୍ତମ୍‌ ଆନିଞ୍ଜି ରୁକୁଲନ୍‌ ବଣ୍ତିସିଙନ୍‌ ଅନିଙଡନ୍‌ ଡେତଜି, ଆରି, ଅଗୋୟ୍‌ ଡିନ୍ନା ଆତିକି ଆନିଞ୍ଜିଆଡଙ୍‌ ଅନବ୍‌ପନ୍‌ସୁଆତିନ୍‌ ଡେତଜି । 23 ତି ଆଡିଡ୍‌ ଆଙ୍ଗାଜନ୍‌ ଡ ଓୟୋଙନ୍‌ ଅଃନବ୍‌ ସାଆରେ; ଇନିଆସନ୍‌ଗାମେଣ୍ତେନ୍‌ ପ୍ରବୁନ୍‌ ସିଓନ ବରୁଲୋଙନ୍‌, ଜିରୁସାଲମ୍‌ଲୋଙ୍‌ ଡ ଆ ପାପୁର୍‌ମରଞ୍ଜି ଆତେମଡ୍‌ଲୋଙ୍‌ ସୋଡ଼ା ବୋର୍ସାନ୍‌ ବାତ୍ତେ ସାସନତେ ।