1 ଜିଉଦାନ୍‌ ଆ ରାଜା ଉସିୟନ୍‌ ଆଉଲେଙ୍‌ ଜୋତମନ୍‌ ଆ ଡାଙ୍ଗାଡ଼ାଅନ୍‌ ଆଅସନ୍‌ ଆରାଜାଗଡ୍‌ ଆଡିଡ୍‌ ଅରାମନ୍‌ ରତ୍‌ସିନ ରାଜାନ୍‌ ଆରି ରମଲିଅନ୍‌ ଆ ଡାଙ୍ଗାଡ଼ାଅନ୍‌ ପେକଅ ଆଞୁମ୍‌ ଇସ୍ରାଏଲନ୍‌ ଆ ରାଜା ଜିରୁସାଲମନ୍‌ ଆ ବିରୁଦଲୋଙ୍‌ ଜୁଜ୍ଜେନେନ୍‌ ଆସନ୍‌ ତେତ୍ତେ ଜିରେଞ୍ଜି, ବନ୍‌ଡ ଆନିନ୍‌ଆଡଙ୍‌ ଅଃବାରେଲେ ଅରପ୍ତିଲଜି । 2 ତି ସିଲଡ୍‌ଲ୍ଲନ୍‌ ଦାଉଦ କେଜ୍ଜାନ୍‌ଆଡଙ୍‌ ଅନବ୍‌ଜନାନ୍‌ ଡେଏନ୍‌ ଡ, ଅରାମ ଇପ୍ରିଅମନ୍‌ ସାୟ୍‌ସିତେ, ସିଲତ୍ତେ ଆ ଉଗରନ୍‌ ଡ ଆମନ୍‌ରାଞ୍ଜି ଆଉଗ୍ଗର୍‌ ରିଙ୍ଗେନ୍‌ ବାତ୍ତେ ତକରେନ୍‌ ଆରି କିନ୍‌ରେଙ୍‌ ଅରାନୁବନ୍‌ ଅନ୍ତମ୍‌ ମୋଲନ୍‌ । 3 ତିଆଡିଡ୍‌ ସଦାପ୍ରବୁ ଜିସାୟନ୍‌ଆଡଙ୍‌ ବରେନ୍‌, "ଆମନ୍‌ ଡ ଡାଙ୍ଗାଡ଼ାଅନ୍‌ନମ୍‌ ସାର-ଜାସୁବନ୍‌, ଡୋବ୍ବାନ୍‌ ଆବସେଙ୍‌ ଆରୋତ୍ତଗଡ୍‌ ବଣ୍ତାନ୍‌ ଆଅନା ଆ ମୁଣ୍ଡାଡ଼ିରେଙ୍‌ ଆଅସନ୍‌ ସରିନ୍‌ ଇୟ୍‌ଲେ ଅର୍ରବାଙ୍‌ବା । 4 ଡ ଆନିନ୍‌ଆଡଙ୍‌ ବର୍ବା, ଜାଗର୍ତ ଡ ରିଙ୍‌ଲନ୍‌ ଡକୋନାବା; ତି ବାଗୁ ଓମୋଡ୍‌ କୁତିଲାତୋଡନ୍‌, ଆଗ୍ରାମ୍‌ଗାମ୍‌, ରତ୍‌ସିନ, ଅରାମନ୍‌ ଡ ରମଲିଅନ୍‌ ଆ ଡାଙ୍ଗାଡ଼ାଅନ୍‌ ଜବ୍ର ଆବନ୍‌ର୍ରାବ୍‌ ଆସନ୍‌ ବତଙ୍‌ଡଙ୍‌ବେନ୍‌, ଅଡ଼େ ଉଗର୍‌ବେନ୍‌ ଏଅବ୍‌ମୁସୁକାଡଙେ । 5 ଇନିଆସନ୍‌ଗାମେଣ୍ତେନ୍‌ ଅରାମ, ଇପ୍ରଇମ ଡ ରମଲିଅନ୍‌ ଆ ଡାଙ୍ଗାଡ଼ାଅନ୍‌ ବିରୁଦଲୋଙ୍‌ନମ୍‌ ସଙ୍ଗତାଲେ ବର୍ତଞ୍ଜି । 6 ଜିରାୟ୍‌ବା, ଇନ୍‌ଲେଞ୍ଜି ଜିଉଦା ଡେସାନ୍‌ ଆ ବିରୁଦଲୋଙ୍‌ ଆ ବନବ୍‌ତଙ୍‌ବାନ୍‌ ଏଜିର୍ବା । ଆରି ଞେନ୍‌ଡମନ୍‌ ଆସନ୍‌ ତି ଡେସାନ୍‌ ଏଡନେବା । ରାଜାନ୍‌ ଆନମେ ଆସନ୍‌ ଟାବେଲନ୍‌ ଆଡାଙ୍ଗାଡ଼ାଅନ୍‌ଆଡଙ୍‌ ଏତବ୍‌ନଙ୍‌ବା । 7 ପ୍ରବୁ ପ୍ରବୁନ୍‌ କେନ୍‌ ଆବର୍ନେ ବର୍ତନେ, କେନ୍‌ଆତେ ଅଃଗଟେଏ କି ଅଃଗଡେଲେ । 8 ଇନିଆସନ୍‌ଗାମେଣ୍ତେନ୍‌ ଦାମାସ୍‌କସ୍‌ ସିରିଆନ୍‌ ଆ ଜାରଦାନି ଆରି ରେଜିନ୍‌ ତୁମ୍‌ ଦାମାସ୍‌କସନ୍‌ ଆସୋଡ଼ାଗୋ* ଡକୋତନ୍‌, ଆରି ୬୫ ବର୍ସେଙ୍‌ଲୋଙ୍‌ ଇପ୍ରିଅମନ୍‌ ଏନ୍ନେଲେ ଡେୟ୍‌ଡେୟ୍‌ଲନ୍‌ ଜିର୍ତେ ଡ କେନ୍‌ଆତେ ଅବୟ୍‌ କେଜ୍ଜା ଗାମ୍‌ଲେ ଆରି ଅଃଡକୋଏ । 9 ଆରି ଇପ୍ରିଅମନ୍‌ ଆବବ୍‌ ସମରିଆନ୍‌ ଡ ସମରିଆନ୍‌ ଆବବ୍‌ ରମଲିଅଞ୍ଜି ଆଡାଙ୍ଗାଡ଼ାଅନ୍‌ । ଆମ୍ୱେଞ୍ଜି ଏଃଡରନ୍‌ଡେନ୍‌, ଏତ୍ତେଲ୍‌ଡେନ୍‌ ଗନବ୍‌ରିନ୍‌ ଅଃଡ୍ଡେଏ, କେନ୍‌ଆତେ ଆଜାଡ଼ିନ୍‌ ।"

10 ତିସିଲଡ୍‌ଲ୍ଲନ୍‌ ପ୍ରବୁନ୍‌ ଆଅସନ୍‌ଆଡଙ୍‌ ଆରି ବରେନ୍‌, 11 "ସଦାପ୍ରବୁ ଇସ୍ୱରନ୍‌ନମ୍‌ଆଡଙ୍‌ ଅବୟ୍‌ ଅରମ୍ମଡନ୍‌ ବେଡା; ପୁର୍ତିନ୍‌ ଆଜାୟ୍‌ତା ଡେଏତୋ କି ରୁଆଙନ୍‌ ଆତୋଣ୍ଡୋ ଡେଏତୋ, ବେଡା ।" 12 ବନ୍‌ଡ ଆଅସନ୍‌ ଗାମେନ୍‌, "ଞେନ୍‌ ଅରମ୍ମଡନ୍‌ ଅଃବେଡାୟ୍‌ କି ପ୍ରବୁନ୍‌ଆଡଙ୍‌ ଅଃମାଲାୟ୍‌ ।"

13 ସିଲତ୍ତେ ଆନିନ୍‌ ବର୍ରନେ, "ଏ ଦାଉଦନ୍‌ ଆକେଜ୍ଜା, ଆମ୍ୱେଞ୍ଜି ନମିଞେନ୍‌ ଅମ୍‌ଡଙ୍‌ବା; ମନ୍‌ରାନ୍‌ ଆସନଏ ଡ ଆମନାଲ୍‌ ଆମ୍ୱେଞ୍ଜି ଆସନ୍‌ ସନ୍ନାଡମ୍‌ ଆବର୍ନେ ଗାମ୍‌ଲେ ପଙ୍‌ ଆମ୍ୱେଞ୍ଜି ଇସ୍ୱରଞେନ୍‌ ଆସନଏ ଜାୟ୍‌ ଏଅଲ୍ଲ୍‌ତେ ? 14 ତିଆସନ୍‌ ପ୍ରବୁନ୍‌ ଆନିନ୍‌ଡମ୍‌ ଆମ୍ୱେଞ୍ଜିଆଡଙ୍‌ ଅବୟ୍‌ ଅରମ୍ମଡନ୍‌ ତିୟ୍‌ତବେନ୍‌, ଗିୟ୍‌ବା, ଅବୟ୍‌ ପୟ୍‌ଲଙ୍‌ ଡାଙ୍ଗଡ଼ିସିଜନ୍‌ ପାଙ୍ଗୁରନ୍‌ଡାଲେ ଅବୟ୍‌ ଓବ୍ବାସିଜନ୍‌ କୋଡ୍‌ତେ, ଆରି ଆଞୁମନ୍‌ ‘ଇମ୍ମାନୁୟେଲ୍‌’ ଅନବ୍‌ଞୁମନ୍‌ ଡେତେ । କେନ୍‌ ଆଞୁମ୍‌ ଆଗରାମ୍‌ଗାମ୍‌ ଇନ୍‌ଲେଞ୍ଜି ସରିନ୍‌ ଇସ୍ୱରନ୍‌ ଡକୋ । 15 ଆନିନ୍‌ ଅଙ୍ଗାତେ ଇର୍ସେ ଏର୍‌ଜନନାନ୍‌ ଆରି ମନନଙନ୍‌ ଆତେ ସନେଡାନ୍‌ ଆସନ୍‌ ଜନାଲେ ଆର୍ରପ୍ତିତେନ୍‌ ଆଡିଡ୍‌ ଆନିନ୍‌ ଆଡ଼ୁବନ୍‌ ଡ ଆଡଙନ୍‌ ଜୋମ୍‌ତେ । 16 ଇନିଆସନ୍‌ଗାମେଣ୍ତେନ୍‌ ପସିଜନ୍‌ ପରାନ୍‌ସାତ୍ତିନ୍‌ ବାସ୍ସେତେ ଆରି ମନଙନ୍‌ ସନେଡାନ୍‌ ଆଜ୍ରନାତେନ୍‌ ଆମ୍ମୁଙ୍‌ ଅଙ୍ଗା ଆଡେସା ଆ ରାଜାଆଡଙ୍‌ ଆମ୍ୱେନ୍‌ ଏଡ଼ୁର୍‌ମଡ୍‌ତେ, ତି ଆଡେସା ଅନୁମ୍‌ରେଙନ୍‌ ଡେତେ ।

17 ଇପ୍ରିଅମନ୍‌ ଜିଉଦାନ୍‌ ସିଲଡ୍‌ ଆରାଙ୍‌ସାଲନ୍‌ ଆଡିଡ୍‌ ଅନ୍ତମ୍‌ ଆଙ୍ଗିୟ୍‌ ଅନ୍‌ରଙ୍‌ଡେଏ, ତିଅନ୍ତମ୍‌ ଆଡିନ୍ନା ପ୍ରବୁନ୍‌ ଆମ୍ୱେନ୍‌ଆଡଙ୍‌ ଡ ମନ୍‌ରାବେଞ୍ଜିଆଡଙ୍‌ ଡ ଆପେୟ୍‌ବେଞ୍ଜି ଆକେଜ୍ଜାଆଡଙ୍‌ ଗଟାୟ୍‌ତେ; ଆ ଗରାମ୍‌ଗାମ୍‌, ଅସୁରନ୍‌ ଆ ରାଜାଆଡଙ୍‌ ଓରୋଙ୍‌ତାୟ୍‌ ।"

18 ଆରି, ତି ଆଡିନ୍ନା ପ୍ରବୁନ୍‌ ମିସର୍‌ ଡେସାନ୍‌ ଆ ନିଳ ଅଲନ୍‌ ଆତନୁଙିୟ୍‌ ସିଲଡ୍‌ ଅରୟଞ୍ଜିଆଡଙ୍‌ ଡ ଅସୁର ଡେସାନ୍‌ ଆଇଙ୍‌ରଡ୍‌ଜି ଆଡଙ୍‌ ପେଡ୍‌ସିତେ । 19 ସିଲତ୍ତେ ତିଅଡ଼୍‌କୋଞ୍ଜି ଜିର୍ରେ ଗର୍ଡରେଙନ୍‌ ଡ ଲୋଙରେଙନ୍‌ ଡ ଅଡ଼୍‌କୋ ଅବ୍ବାଙ୍‌ନୁବ୍‌ରେଙନ୍‌ ଡ ତନୁର୍‌ବସେଙ୍‌ରେଙନ୍‌ ଡକୋତଞ୍ଜି ।

20 ତି ଆଡିଡ୍‌ ପ୍ରବୁନ୍‌ ମିୟ୍‌ତାଲ୍‌ ଅଲନ୍‌ ବଣ୍ଡାରିନ୍‌ ବଡିନ୍‌ ବାତ୍ତେ, ଆଗରାମ୍‌ଗାମ୍‌, ଅସୁରନ୍‌ ଆ ରାଜା ବାତ୍ତେ ଅବବନ୍‌, କୋରୋଜଙ୍‌ବେନ୍‌ ଡ କୋରୁତମ୍‌ବେଞ୍ଜି କନୋଙନ୍‌ ଡେତେ ।

21 ତି ଆଡିନ୍ନା ଅବୟ୍‌ ମନ୍‌ରାନ୍‌ ସଡ୍ଡାତାଙନ୍‌ ଡ ବାଗୁ ମେଣ୍ତାନ୍‌ ବନେନ୍‌, 22 ଆଡ଼ୁବଞ୍ଜି ଆଞନାଙ୍‌ ଆସନ୍‌ ଆନିନ୍‌ ଦଇନ୍‌ ଜୋମ୍‌ତେ । ଇନିଆସନ୍‌ଗାମେଣ୍ତେନ୍‌ ଡେସାଲୋଙନ୍‌ ଲାଙ୍‌ଲେଡ୍‌ ଅଡ଼୍‌କୋ ଆମନ୍‌ରା ଦଇନ୍‌ ଡ ଆଡଙନ୍‌ ଜୋମ୍‌ତଜି ।

23 "ଆରି ଅଙ୍ଗା ଅଙ୍ଗା ଆଡ୍ରକୋନେଲୋଙ୍‌ ଅଜାର ରୁପାଡାବନ୍‌ ଆମୁଲ୍ଲ ଡ୍ରାକ୍ୟାନୁବନ୍‌ ଡକୋଏନ୍‌, ତି ଅଡ଼୍‌କୋନ୍‌ ଆଡ୍ରକୋନେରେଙ୍‌ କାନ୍ତେସିନୁବନ୍‌ ଡ ଅବ୍ବାନୁବନ୍‌ ଡେତେ । 24 ଆରି ସମ୍ପରା ଡେସାନ୍‌ କାନ୍ତେସିନୁବନ୍‌ ଡ ଅବ୍ବାନୁବନ୍‌ତୁମ୍‌ ଆଡ୍ରେନ୍‌ ଆସନ୍‌ ମନ୍‌ରାନ୍‌ ଅଆମନ୍‌ ଡ ଞଙାନ୍‌ ପାଙ୍‌ଲେ ବେନ୍ତାବାନ୍‌ ଜିର୍ତଜି । 25 ଆରି ଅଙ୍ଗା ଅଡ଼୍‌କୋନ୍‌ ଆବରୁ କୁଡ୍ଡେନ୍‌ ବାତ୍ତେ ଗନାୟନ୍‌ ଡେଏନ୍‌, ଆମ୍ୱେନ୍‌ କାନ୍ତେସିନୁବନ୍‌ ଡ ଅବ୍ବାନୁବ୍‌ କିନ୍‌ରେଙନ୍‌ ଆବନ୍ତଙ୍‌ ତି ଆଡ୍ରକୋନେବାନ୍‌ ଜିର୍ରେ ଏଃର୍ରପ୍ତିଏ, ବନ୍‌ଡ ତିଆତେ ତରୁର୍ତାଙନ୍‌ ଡ ମେଣ୍ତାନ୍‌ ଆଞନାଡା ଡରକୋନେ ଡେତେ ।"