1 ଏ ସିଓନ, ଡୋନା ଆରି ରବ୍‌ଡୋନା, ବୋର୍ସାନମ୍‌ ଜିଜିନା, ଏ ମଡ଼ିର୍‌ ଗଡ଼ା ଜିରୁସାଲମ, ଆମନ୍‌ ମନଙ୍‌ ସିନ୍‌ରିନମ୍‌ ଅଡ଼୍‌କୋନ୍‌ ଜିଜିନା ଇନିଆସନ୍‌ଗାମେଣ୍ଡେନ୍‌ କେନ୍‌ ସିଲଡ୍‌ ଅମଙ୍‌ଲୋଙ୍‌ବେନ୍‌ ସିଲଡ୍‌ ଏର୍‌ମଡ଼ିର୍‌ ଡ ଏର୍‌ ଗନବ୍‌ରେଡ୍‌ ମରନ୍‌ ଆରି ଅଃଜିରାଜି । 2 ଏ ଜିରୁସାଲମ୍‌ ଡୋନାବା ଡଅଙ୍‌ଲୋଙ୍‌ବେନ୍‌ ଆଉମରିଲନ୍‌ ତୁୟ୍‌ତୁୟ୍‌ନାବା, ତରଙ୍କୁମ୍‌ଲୋଙନ୍‌ ତୁଙ୍କୁମ୍‌ବା ସିଅନନ୍‌ ଆବଣ୍ତିବୟ୍‌ଜି, ସଙ୍ଗାଲୋଙ୍‌ବେନ୍‌ ଆଜିନିବାଡ୍‌ଜି ଅଡ଼୍‌କୋନ୍‌ ଉୟ୍‌ନାବା ।

3 ଇସ୍ୱରନ୍‌ କେନ୍‌ ଆବର୍ନେ ବର୍ତନେ, ଆମ୍ବେଞ୍ଜି କାଜାନ୍‌ ତମ୍‌ଲବେଞ୍ଜି ଆରି ତନ୍‌ଙ୍କାନ୍‌ ଏର୍‌ତନିୟନ୍‌ କାଜ୍ଜାନ୍‌ ଅମ୍‌ରେଙ୍‌ତବେଞ୍ଜି । 4 ଇନିଆସନ୍‌ଗାମେଣ୍ତେନ୍‌ ଇସ୍ୱରନ୍‌ କେନ୍‌ ଆବର୍ନେ ବର୍ତନେ, ମନ୍‌ରାଲେଞ୍ଜି ଆପ୍ରତମ୍ମୁନ୍‌ ଡକୋନେନ୍‌ ଆସନ୍‌ ମିସରନ୍‌ ଜିରେଞ୍ଜି; ଅସୁରିଅଞ୍ଜି କାଜ୍ଜାନ୍‌ ଆନିଞ୍ଜି ସରିନ୍‌ ଗୋଡ଼େନ୍‌ ଅମ୍‌ଡୁଙ୍‌ଲାଜି । 5 ତିଆସନ୍‌ ଇସ୍ୱରନ୍‌ କେନ୍‌ ଆବର୍ନେ ବର୍ତନେ, ମନ୍‌ରାଲେଞ୍ଜି କାଜ୍ଜାନ୍‌ ଓରୋଙ୍‌ତଜି, ଞେନ୍‌ ତେନେ ଡକୋଲନ୍‌ ଇନିଏଙ୍ଗାନାୟ୍‌ ? ଇସ୍ୱରନ୍‌ କେନ୍‌ ଆବର୍ନେ ବର୍ତନେ, ଆଉପ୍ରେଙଞ୍ଜି ରାଜ୍ୟନ୍‌ ଆ ସାସନମରଞ୍ଜି ବାବାବ୍‌ତଜି କି ଅଞୁମ୍‌ଞେନ୍‌ ଆଏଡ଼ର୍‌ ନିଣ୍ତୟ୍‌ତିଞ୍ଜି । 6 କେନ୍‌ ଆସନ୍‌ ମନ୍‌ରାଲେଞ୍ଜି ଅଞୁମ୍‌ଞେନ୍‌ ଜନାତଜି; କେନ୍‌ଆସନ୍‌ ବର୍ନେଞେନ୍‌ ବର୍ତଞ୍ଜି, ଆନିଞ୍ଜି ତି ଆଡିନ୍ନା ଜନାତଜି, ଗିୟ୍‌ବା, ଆନିନ୍‌ ଞେନ୍‌ଡମ୍‌ ।

7 ଅଙ୍ଗା ଆମନ୍‌ରା ମନଙ୍‌ବରନ୍‌ ପାଙ୍‍ତାଜି, ଆନା ସନୟୁବରନ୍‌ ବର୍ତଞ୍ଜି ସୁକ୍କାନ୍‌ ମନଙ୍‌ବରନ୍‌ ପାଙ୍‌ତାୟ୍‌ ଆନିନ୍‌ ଅନୁରନ୍‌ ଆ ମନଙ୍‌ବରନ୍‌ ବର୍ତନାୟ୍‌, ଡ ସିଓନନ୍‌ଆଡଙ୍‌ ଇସ୍ୱରନ୍‌ ଆରାଜ୍ୟ ଗାମ୍‌ଲେ ବର୍ତଞ୍ଜି, ଆତାଲ୍‌ଜଙନ୍‌ ବରୁନ୍‌ ଆତୁଣ୍ତୁ ଡିଅଙ୍ଗା ଆମନଙ୍‌ ରାଙ୍‌ଡାତେ । 8 ଗିୟ୍‌ବା ଜନଗ୍ଗେମର୍‌ବେଞ୍ଜି ଆସର୍ରଙ୍‌, ଆନିଞ୍ଜି ସୋଡ଼ା ସର୍ରଙନ୍‌ ବାତ୍ତେ କନ୍‌ତଜି; ଇନିଆସନ୍‌ଗାମେଣ୍ଡେନ୍‌ ଇସ୍ୱରନ୍‌ ସିଓନନ୍‌ ଗଡ଼ାନ୍‌ ଆୟର୍‌ତନାଞନ୍‌ ଆଡିଡ୍‌ ଆନିଞ୍ଜି ତର୍ଡମ୍‌ ଅଲ୍‌ଗିୟ୍‌ତଜି ।

9 ପାଡ଼ୋ ଜିରୁସାଲମନ୍‌ ଆଜାଗା ଗୋଗୋୟ୍‌ ସର୍ରଡଙନ୍‌ ଡ କନନ୍‌ ବାତ୍ତେ ମାୟ୍‌ଲନ୍‌ ସର୍ରଡାନା; ଇନିଆସନ୍‌ଗାମେଣ୍ଡେନ୍‌ ଇସ୍ୱରନ୍‌ ଆମନ୍‌ରାଜି ସନ୍‌ୟୁନ୍‌ତିଏଞ୍ଜି, ଆନିନ୍‌ ଜିରୁସାଲମନ୍‌ ଅନୁରନ୍‌ ତିଏନ୍‌ । 10 ଇସ୍ୱରନ୍‌ ଅଡ଼୍‌କୋନ୍‌ ଡେସାମରଞ୍ଜି ଇସ୍ୱରନ୍‌ ଆଗନିୟ୍‌ଗିୟ୍‌ଲୋଙ୍‌ ମଡ଼ିର୍‌ ଅସିନ୍‌ବାତ୍ତେ ଉର୍ରାସିନା, ଆରି ଅଡ଼୍‌କୋନ୍‌ ପୁର୍ତିନ୍‌ ଆମନ୍‌ରାନଜି ଇସ୍ୱରନ୍‌ ଅନୁରନ୍‌ ଗିୟ୍‌ତଜି । 11 ତି ଆଜାସିଲଡ୍‌ ଆମ୍ବେଞ୍ଜି ଡୁଙ୍‌ନାବା, ଇନ୍ନିଙ୍‌ ଏର୍ରମଡ଼ିର୍‌ ଆଜନବ୍‌ଜି ଏସୁଙେଡଙ୍‌, ତେତ୍ତେ ସିଲଡ୍‌ ଆମ୍ବେଞ୍ଜି ଡୁଙ୍‌ଲନ୍‌ ଜିର୍ରବା, ଇସ୍ୱରନ୍‌ ଆ ସିମାନ୍‌ଞ୍ଜି ଆପରାଙ୍‌ତେନ୍‌ ଆମନ୍‌ରାଜି, ଆମ୍ବେଞ୍ଜି ମଡ଼ିର୍‌ ଅମ୍ମେନାବା। 12 ଆମ୍ବେଞ୍ଜି ଲଜିର୍ ଲଜିର୍‌ ଏଡୁଙ୍‌ଡଙ୍‌ନେ, ଅଡ଼େ ଆମ୍ବେଞ୍ଜି ଆମ୍ମୁଙ୍‌ ଡୁଙ୍‌ଲନ୍‌ ଏଜିର୍ରଡଙ୍‌; ଇନିଆସନ୍‌ଗାମେଣ୍ତେନ୍‌ ଇସ୍ୱରନ୍‌ ମୁକାଗଡ୍‌ବେନ୍‌ ଆମ୍ମୁଙ୍‌ଲନ୍‌ ଜିର୍ତେ କି ଇସ୍ରାଏଲନ୍‌ ଆ ଇସ୍ୱର କିନ୍‌ଣ୍ତୋଙ୍‌ଗଡ୍‌ବେନ୍‌ ଜିର୍ତେ ।

13 ଗିୟବା,କମ୍ୱାରିମର୍‌ଞେନ୍‌ ମନଙ୍‌ ଞନ୍‌ଡ୍ରମ୍‌ତନ୍‌, ଆନିନ୍‌ ତୋଣ୍ତୁନ୍‌, ଡେଙ୍ଗା ତନଙ୍ଗୁମଞ୍ଜି ଞାଙ୍‌ଲେ ମଇମାନ୍‌ ଡେତେ । 14 ମନ୍‌ରାନ୍‌ଞ୍ଜି ଆମୁକ୍କା ସିଲଡ୍‌ ଆନିନ୍‌ ଗୋଗୋୟ୍‌ ବରନ୍ତଙନ୍‌ ଗିୟ୍‌ତାଏନ୍‌ ଏଙ୍ଗାଲେ କି ଲାଙ୍‌ଲେନେ ଆବର୍ନେନ୍‌ ଅମ୍‌ଡଙ୍‌ଲେ ସାନ୍ନି ଡେଏଞ୍ଜି । 15 ଏତ୍ତେଲେ ଆନା ଡେସାମର୍ରଞ୍ଜି ସିନ୍‌ସିଡାତେ; ରାଜାଞ୍ଜି ଆମୁକ୍କାଲୋଙ୍‌ ଇନ୍ନିଙ୍‌ ଅବରଞ୍ଜି, ଇନିଆସନ୍‌ଗାମେଣ୍ଡେନ୍‌ ଆନିଞ୍ଜି ଇନି ଅବ୍ବର୍ରନେ ଅବର୍ରଜି, ଆନିଞ୍ଜି ଗିୟ୍‌ତଜି ଡ ଆନିଞ୍ଜି ଇନି ଅଡ୍‌ନମ୍‌ଡଙ୍‌ଲଜି, ତିଆତେ ଗନ୍‌ଲୁତଜି ।