ବାବିଲନ୍ ଆଗନ୍ରୟ୍
1 ଏ ବାବିଲନ୍ ଆଡାଙ୍ଗିଡ଼ିବୟ୍ ଆମ୍ବେନ୍ ପଡ୍ଲନ୍ ଲବଲୋଙନ୍ ତଙ୍କୁମ୍ବା, ଏ କଲଦିଅନ୍ ଆ ଡାଙ୍ଗଡ଼ି ତରଙ୍କୁମ୍ କୁର୍ରସିନ୍ ଅମ୍ରେଙ୍ଲେ ଲବନ୍ ତୁତୁମା ଇନିଆସନ୍ଗାମେଣ୍ଡେନ୍ ଆମନ୍ ବୟ୍ଲେ ଆରି ଲବଡ୍ଡି ଡାଙ୍ଗଡ଼ିସିୟ୍ ଗାମ୍ଲେ ଅଃଜନାଏଜି ।
2 ଗୋର୍ନାନ୍ ପାଙ୍ଲେ ଜନ୍ରୋମନ୍ ରିଡ୍ବା ୟରୋଙ୍ନେବ୍ବନମ୍ ଡ ଜିଜିକାବ୍ନମ୍ଜି ତବା, ଅଲ୍ରେଙନ୍ ସିପିଲିନ୍ ତବ୍ଲେ ତଙିଲନ୍ ଜିରା । 3 ଉର୍ଡିୟ୍ନେନମ୍ ଅଡ଼୍କୋମନ୍ରାନ୍ ଗିୟ୍ତଜି, ଓଓ ଗନ୍ରୟ୍ନମ୍ ଅଡ଼୍କୋନ୍ ଗିୟ୍ତାତେ; ଞେନ୍ କେନ୍ ଆପାଲ୍ତେଙ୍ ଲିମ୍ତାୟ୍ ଆରି ଆନ୍ନିଙ୍ ଆବର୍ନେ ଅନମ୍ଡଙାୟ୍ ।
4 ଇସ୍ରାଏଲନ୍ ଇସ୍ୱରନ୍ ମଡ଼ିର୍ ଅନୁର୍ମର୍ କେନ୍ ଆଞୁମନ୍ ଇସ୍ୱର ।
5 ଏ କଲଦିଅନ ଆଙ୍ଗଡ଼ିବୟ୍ ଲୋଙଡ୍ଲୋଙନ୍ ଜିର୍ରେ କଡ଼ିଙ୍ଲେ ଇୟ୍ଡକୋନା; ଇନିଆସନ୍ଗାମେଣ୍ଡେନ୍ ଡେସାନ୍ ଆସୋଡ଼ାବୟ୍ ଗାମ୍ଲେ ଅଃନୋଡେଅମଞ୍ଜି । 6 ଞେନ୍ ମନ୍ରାଞେଞ୍ଜି ଆମଙ୍ବା ବର୍ରାବ୍ଲେ ଆଡନେଞ୍ଜି ଏର୍ରମଡ଼ିର୍ ଅମ୍ମେଲାୟ୍ ଡ ଅସିଲୋଙ୍ବେନ୍ ତିୟ୍ଲବେନ୍; ଆମ୍ବେଞ୍ଜି ଆନିଞ୍ଜି ଆଡଙ୍ କାନ୍କାରମ୍ ଅନ୍ନେମେଲଜି; ଅଡ଼୍କୋନ୍ ଆକାବାଡ଼ା ବୁଡ଼ାକୋଜଞ୍ଜି ଆତରଙ୍ଲୋଙ୍ ତୁମ୍ ଏତିୟେଞ୍ଜି । 7 ଆମ୍ବେନ୍ ଏବର୍ରନ୍ ଞେନ୍ ଆଏଡ଼ର୍ ସାସନବୟ୍ ଅମ୍ମେଲେ ଡକୋତନାୟ୍, ତି ଆସନ୍ କେନ୍ ଅଡ଼୍କୋନ୍ ଆବିସୟଜି ଅଃନମ୍ଡଙ୍ଲୋ କି ତିକ୍କି ଇନିଡେତେ କେନ୍ ଆତେ ଅନିୟ୍ୟମ୍ଲୋଙ୍ ।
8 ଏ ସର୍ରଡାବୟ୍ କେନ୍ ଆବର୍ନେ ଅମ୍ଡଙା, ଆମନ୍ ମନଲୋଙ୍ନମ୍ ଏର୍ରବତଙ୍ନେନ୍ ତେତ୍ତେ ଆନ୍ନିଙ୍ ଅଃଡ୍ଡକୋନେଜି ଞେନ୍ ଅମ୍ରେଙ୍ଲେ ଆନ୍ନିଙ୍ ତଡ୍; ଞେନ୍ ଜୁଆର୍ବଜନ ଅନ୍ତମ୍ ଅଃତଙ୍କୁମାୟ୍ ଅଡ଼େ ଆଞ୍ଜେବଜନ୍ ଜନାତେ । 9 କେନ୍ ବାଗୁ ଆବଡିନ୍ନାନ୍ ଆମଙ୍ଲୋଙ୍ବେନ୍ ଗଟେତେ ତି ଆତେଜି ବଡିନ୍ନା ପସିୟ୍ବେନ୍ ରବୁତେ ଅଡ଼େ ଜୁଆର୍ବୟ୍ ଡେତବେନ୍, ମନ୍ତ୍ରବେନ୍, ତନେଜନମର୍ରଞ୍ଜି ଡକୋଲନ୍ ଜାକିୟଁନ୍ ଡେନ୍ କେନ୍ ବାତ୍ତେ ଏଙ୍ଗାଲ୍ଜାୟ୍ ଡେତେ ।
10 ଇନିଆସନ୍ଗାମେଣ୍ଡେନ୍ ପେଲ୍ଲାନମ୍ ଆସାଲନ୍ ଡକୋତନ୍ ଆମନ୍ ବର୍ତନ୍ ଆନ୍ନିଙ୍ ଅଃଗିଜିଞ୍ଜି, ବୁଡିନମ୍ ଡ ମନ୍ତ୍ରନମ୍ ଆନାଗଡ୍ ଓରୋଙ୍ତମ୍; ଆରି ଆମନ୍ ଇୟ୍ୟମ୍ଲେ ମନ୍ନେତେ ଞେନ୍ ଡକୋ ଞେନ୍ ଅମ୍ରେଙ୍ଲେ ଆନ୍ନିଙ୍ ତଡ୍; 11 ଅମଙ୍ବେନ୍ ବରନ୍ତଙନ୍ ଆତନଙଡ୍ ଜିର୍ରତାୟ୍, କେନ୍ ଆତେ ମନ୍ତ୍ରବେନ୍ ସରିନ୍ ଏଙ୍ଗାଲେ ଞନଡ୍ରମଲନ୍ ସବ୍ଙାତବୋ ଆମ୍ବେନ୍ ଜନାଲେ ଅଃରପ୍ତିଏ ଆମ୍ବେନ୍ ଅସୁବିଦା ଡେତବେନ୍, ତଙ୍କାନ୍ ସବ୍ଙାଲେ ଅର୍ରପ୍ତିବେନ୍, ତି ଆତ୍ଏ ଆମ୍ବେନ୍ ଜନାଲେ ଏର୍ରପ୍ତିଏ କି ତେତେନ୍ ଉପ୍ରେଙ୍ଲୋଙ୍ବେନ୍ ଗଟେତେ । 12 ଆସନାବେନ୍ ସିଲଡ୍ଲନ୍ ଅଙ୍ଗା ଆତନେୟ୍ବୟ୍ ପାଞ୍ଜି କାବାଡ଼ାନ୍ଲୁମଲେ ଏଜିରାୟ୍ ତି ଆତେ ସନ୍ନିବା, ଓଡେନ୍ ଆମ୍ବେନ୍ ଉପକାରନ୍ ଅଡ଼େ ଜିନୟଲେ ଏର୍ରପ୍ତିତେ । 13 ଆମ୍ବେଞ୍ଜି ତନ୍ତ୍ରନ୍ ଞାଙ୍ଲେ ମଙ୍ଗାଲବେନ୍; ରୁଆଙନ୍, ତୁତୁଜନ୍, ଓୟୋଙନ୍ ଆଗ୍ରିୟ୍ତେଞ୍ଜି ଆମନରା ଅଡ଼େ ତନେୟ୍ ମର୍ରଞ୍ଜି ତନଙେତଜି ଡ ଅମଙ୍ବେନ୍ ଇନି ଗଟେତେ ତିଲୋଙ୍ ଆମ୍ବେଞ୍ଜି ଡନୋବନ୍ ଏଞାଙ୍ତେ ।
14 ଗିୟ୍ବା ଆନିଞ୍ଜି ଅଲାମନ୍ ଅନ୍ତମ୍ ଡେତଜି ଆନିଞ୍ଜି ତଗୋଲୋଙନ୍ ଜୋମ୍ତ୍ତୋତଜି, ଆଉଲାଙ୍ତୋଡ୍ଲୋଙନ୍ ସିଲଡ୍ ଆନିଞ୍ଜି ଡୋବ୍ଲେ ଅଃରପ୍ତିଏ । ତବ୍ଗୋନେନ୍ ଆସନ୍ ଅସାୟ୍ ଅଡ଼େ ତଗୋନ୍ ଆମଙବାନ୍ ଆତ୍ରଙ୍କୁମ୍ତେନ୍ ଆମନ୍ରା ଅନ୍ତମ୍ ଅଡ଼େ । 15 ଅଙ୍ଗା କାବାଡ଼ାନ୍ ଆମ୍ବେନ୍ ଏଲୁମ୍ତେ ତି ଅଡ଼୍କୋନ୍ ଏନେଲେ ଡେତେ ବେଣ୍ତିଆଇଙ୍ନ୍ ଆନାଜି ସରିନ୍ ଏବେପାରଲନ୍ ଆନିଞ୍ଜି ଅଡ଼େତେ ଅଡ଼େନେ ବୁଲ୍ଲେ ଆଡ୍ରକୋନେଲୋଙ୍ଞ୍ଜି ଜିର୍ରତଜି ଆମ୍ବେଞ୍ଜି ଆନ୍ନିଙ୍ ଡୋବ୍ଲେ ଅରପ୍ତିବେଞ୍ଜି ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)