1 ମୋୟାବନ୍‌ ଆସନ୍‌ ପୁର୍ବାଃତେବରନ୍‌ । ମୋୟାବନ୍‌ ଆର ଗଡ଼ାନ୍‌ ଆବତଗଲନ୍‌ ଅସେଡେନ୍‌ ଆରି ରସମେନ୍‌, ଆବତଗଲନ୍‌ ମୋୟାବନ୍‌ଲୋଙନ୍‌ ଡକୋନ୍‌ କିର୍‌ଗଡ଼ାନ୍‌ ଆବତଗଲନ୍‌ ଅସେଡେନ୍‌ ଆରି ରସମେନ୍‌ । 2 ଆନିନ୍‌ ୟେୟେଡାନେନ୍‌ ଆସନ୍‌ ବଇତେନନ୍‌ ଡ ଦିବୋନନ୍‌ ଆମନ୍‌ରାଜି ତୋଣ୍ତୁ ଡରକୋନେନ୍‌ ଜିରେନ୍‌; ନବୋନ ଡ ମେଦବାନ୍‌ ଆ ଆବର୍ନେ ଆସନ୍‌ ମୋୟାବନ୍‌ ୟେୟେଡାତନେ; ତି ଅଡ଼୍‌କୋନ୍‌ ଆମନ୍‌ରାଞ୍ଜି ଆବବ୍‌ ଅବ୍‌ଡାଗଡ଼ୋଲଞ୍ଜି, ଅଡ଼୍‌କୋ ମନ୍‌ରାନ୍‌ ଆକୋରୋତମ୍‌ ଗନଡନ୍‌ ଡେଏନ୍‌ । 3 ଅଡ଼୍‌କୋନ୍‌ ଆତଙର୍‌ଲୋଙଞ୍ଜି ମନ୍‌ରାଞ୍ଜି ଅକାକାବନ୍‌ ଜିଜିତଞ୍ଜି; ରମ୍ମଙ୍‌ ରମ୍ମଙ୍‌ ଆସିଙ୍‌ ଆ ତୋଣ୍ତୁ ବିଲେଙ୍‌ ଡ ପାଡ଼ାର୍‌ ଡ୍ରକୋନେରେଙନ୍‌ ଡିଲେ ମନ୍‌ରାନ୍‌ ଜବ୍ର ଡୁକ୍କଲନ୍‌ ୟେୟେଡାତଞ୍ଜି । 4 ଇସବୋନ୍‌ ଡ ଇଲିୟାଲିନ୍‌ ୟେୟେଡାତଞ୍ଜି; ଆସରଙଞ୍ଜି ଜଅସନ୍‌ ଜାୟ୍‌ ସଡ୍ଡାଏନ୍‌; ତିଆସନ୍‌ ମୋୟାବ ଲୋଙନ୍‌ ଅବ୍‌ଜାଡାଲନ୍‌ ଆଡ୍ରକୋଲଞ୍ଜି ଆମନ୍‌ରାଜି ୟେୟେଡାତଞ୍ଜି ଆରି ଆପ୍ରାନାନ୍‌ ତକର୍ତେ । 5 ଉଗ୍ଗର୍‌ଲେନ୍‌ ମୋୟାବନ୍‌ ଆସନ୍‌ ୟେୟେଡାତନ୍‌; ଆ ଆମ୍ମୁଙ୍‌ଗଡ୍‌ମରଞ୍ଜି ସୋୟର୍‌ ଗଡ଼ାନ୍‌ ଡ ଇଗ୍ଲତ୍‌-ସଲିସିଆନ୍‌ ଜିର୍ତଜି; ଇନିଆସନ୍‌ଗାମେଣ୍ତେନ୍‌ ଆନିଞ୍ଜି ୟେଲେ ୟେଲେ ଲୁଇତ-ଆ ଡାୟ୍‌ବୁର୍‌ଗଡ୍‌ ଡାୟ୍‌ଲେ ଜିର୍ତଜି; ଓରୋନଇମନ୍‌ ଆତଙର୍‌ରେଙ୍‌ ଅସେଡ୍‌ତଲେନ୍‌ ଗାମ୍‌ଲେ ଆନିଞ୍ଜି ୟେୟେଡାତଞ୍ଜି । 6 ଇନିଆସନ୍‌ଗାମେଣ୍ତେନ୍‌ ନିମ୍ରିମନ୍‌ ଆଡାଆ ଅଡ଼୍‌କୋନ୍‌ ଅଞଡ୍‌ତେ; ଅଗାବନ୍‌ ଅସରେନ୍‌, ଆଲେଡେଙ୍‌ଗାବନ୍‌ ଅସୋଜେନ୍‌, ଆଲେଡେଙନ୍‌ ଇନ୍ନିଙ୍‌ ଅବୟ୍‌ତଡ୍‌ । 7 ତିଆସନ୍‌ ଆନିଞ୍ଜି ଆଞରାଙେଞ୍ଜି ଆନର୍ଜେ ଡ ଡକୋନ୍‌ ଆନର୍ଜେଜି ଅଡ଼୍‌କୋନ୍‌ ବାଇସି ଅରାନୁବନ୍‌ ଆପ୍ରେପେଟାରେଙ୍‌ ପାଙ୍‌ତଜି । 8 ଇନିଆସନ୍‌ଗାମେଣ୍ତେନ୍‌ ମୋୟାବନ୍‌ ଆସଣ୍ତି ଅବ୍‌ୟର୍‌ୟର୍‌ ୟନେନ୍‌ ସଡ୍ଡାଏନ୍‌ । ତେତ୍ତେ ଆୟନେ ଇଗ୍ଲଇମନ୍‌ ଜାୟ୍‌ ଆରି ତେତ୍ତେ ଆୟେୟେଡା ବେଲେରିମନ୍‌ ଜାୟ୍‌ ଅଡ଼ୋଏନ୍‌ । 9 ଇନିଆସନ୍‌ଗାମେଣ୍ତେନ୍‌ ଦିମୋନନ୍‌ ଆଡାଆ ଅଡ଼୍‌କୋନ୍‌ ମିଞାମ୍‌ତୁମ୍‌ ଡେଏନ୍‌; ଆରି ଞେନ୍‌ ଦିମୋନନ୍‌ ଆତୋଣ୍ତୁ ଆରି ଡୁକ୍କନ୍‌ ଆରି ମୋୟାବନ୍‌ ଆଜିର୍‌ଜିରିୟ୍‌ ମରଞ୍ଜି ଆଉପ୍ରେଙ୍‌ ଡ ଲାଙ୍‌ଲେଡ୍‌ ଆଡେସା ଆଉପ୍ରେଙ୍‌ ଅବୟ୍‌ ସିଅଁକିଡନ୍‌ ଆପ୍ପାୟ୍‌ତାୟ୍‌ ।