1 ଆମୋସନ୍‌ ଆ ଡାଙ୍ଗାଡ଼ାଅନ୍‌ ଜିସାୟନ୍‌ ଆ ତନାଲ୍‌ମଡ୍‌, ଆନିନ୍‌ ଜିଉଦାନ୍‌ ଆ ରାଜାଜି ଉସିୟ, ଜୋତମ୍‌, ଆଅସ୍‌ ଡ ଇଜକିୟନ୍‌ ଆର୍ରାଜାଲଞ୍ଜି ଆଡିଡ୍‌ ଜିଉଦାନ୍‌ ଡ ଜିରୁସାଲମନ୍‌ ଆ ବିସୟଲୋଙ୍‌ କେନ୍‌ ଆ ତନାଲ୍‌ମଡନ୍‌ ଗିଜେନ୍‌ ।

2 ଏ ରୁଆଙ୍‌, ଅମ୍‌ଡଙ୍‌ବା, ଏ ପୁର୍ତି, ଡାଲୁଡା, ଇନିଆସନ୍‌ଗାମେଣ୍ତେନ୍‌ ପ୍ରବୁନ୍‌ ବର୍ରନେ; "ଞେନ୍‌ ଅଅନଞ୍ଜିଆଡଙ୍‌ ଏଜୁବାୟ୍‌ତାଜି ଆରି ଏସାକେଲାଜି, ବନ୍‌ଡ ଆନିଞ୍ଜି ବିରୁଦଲିଁୟ୍‌ଞ୍ଜି ।" 3 ତାଙ୍‌ଲିୟନ୍‌ ଆ ସାଉକାରନ୍‌ଆଡଙ୍‌ ଡ ଗୋଡୋଞନ୍‌ ଆ ସାଉକାରନ୍‌ ଆଡୋଙ୍କା ଅଃମତେ; ବନ୍‌ଡ ଇସ୍ରାଏଲନ୍‌ ଅଃଜ୍ଜନାଏ, ମନ୍‌ରାଞେଞ୍ଜି ଅଃନିୟମେଜି ।

4 ଏ ଇର୍ସେମରନ୍‌ ଆକେଜ୍ଜା, ଏର୍‌ଡରମ୍ମଲୋଙନ୍‌ ମଗାଡ୍‌ ମରଞ୍ଜି, ପରାନ୍‌ସାତିନ୍‌ ଆ କାବ୍ବାଡ଼ା ଆର୍‌ଲୁମ୍‌ତେଞ୍ଜି ଆମନ୍‌ରାଜି ଆକେଜ୍ଜା, ଏର୍‌ମଡ଼ିର୍‌ ଆଅନ୍‌ଞ୍ଜି, ଆନିଞ୍ଜି ପ୍ରବୁନ୍‌ଆଡଙ୍‌ ଅମ୍‌ରେଙେଞ୍ଜି, ଆନିଞ୍ଜି ଇସ୍ରାଏଲନ୍‌ ଆ ଡରମ ଅନ୍ତମ୍‌ଆଡଙ୍‌ ପାଡ୍‌ଜଙେଞ୍ଜି, ଆନିଞ୍ଜି ଆୟର୍‌ଗୁଡ଼ିୟ୍‌ଲନ୍‌ ୟର୍ରନ୍‌ ଜିରେଞ୍ଜି । 5 ଆମ୍ୱେଞ୍ଜି ଗୋଗୋୟ୍‌ ଗୋଡ଼େନ୍‌ ଆନମ୍‌ଡୁଙ୍‌ ଆସନ୍‌ ଇନିବା ଆରି ତନିଡନ୍‌ ଏଞାଙ୍‌ତେ ? ସମରା ଅବବନ୍‌ ଆପାରାୟ୍‌ ଡ ସମରା ଉଗରନ୍‌ ବଲାୟେନ୍‌ । 6 ତାଲ୍‌ଜଙନ୍‌ ସିଲଡ୍‌ ଅବବନ୍‌ ଜାୟ୍‌ ଇନ୍ନିଙ୍‌ ସୁକ୍କା ତଡ୍‌; ଆର୍‌ପାୟ୍‌ ଆପାରା, ଅମ୍ପସୁନ୍‌ ଗୁର୍ଡାନ୍‌ ଆବରିୟ୍‌ ତିଅଡ଼୍‌କୋନ୍‌ ଏର୍ଗନିୟ୍‌ଡା ଅଡ଼େ ଏର୍ଜନିବାଡ୍‌, ଅଡ଼େ ମିଞଲନ୍‌ ଜଡ୍‌ଲେ ଲମନ୍‌ ଏର୍‌ନମ୍ମେ ।

7 ଡେସାବେନ୍‌ ଆନସେଡ୍‌ ଡରକୋନେ; ଗଡ଼ାବେନ୍‌ ଅଡ଼୍‌କୋନ୍‌ ଆଜୁମ୍‌ତୁଡ୍‌; ଲବବେନ୍‌ ବଡେସାବାୟ୍‌ଜି ତେମଡ୍‌ବେନ୍‌ ଜୁରୁତବେଞ୍ଜି, ତିଆତେ ବଡେସାବାଜି ବାତ୍ତେ ଆନବ୍‌ଗୁରୁଡ୍ଡେନ୍‌ ଆସନେଡ୍‌ଡରକୋନେନ ଅନ୍ତମ୍‌ ଡେଏନ୍‌ । 8 ଆରି ସିଓନନ୍‌ ଆ ଡାଙ୍ଗଡ଼ି ଦ୍ରାକ୍ୟାକୋତ୍ତାନ୍‌ ଆ ଅନ୍‌ସିଂ, ଏଙ୍‌ରାକୋତ୍ତାନ୍‌ ଆବସା, ଆଡଙ୍‌ଡଙ୍‌ଗରେଡନ୍‌ ଆଗଡ଼ା ଅନ୍ତମ୍‌ ଡେଏନ୍‌ । 9 ଅଡ଼୍‌କୋନ୍‌ ସିଲଡ୍‌ ସୋଡ଼ାଇସ୍ୱରନ୍‌ ଇନ୍‌ଲେଞ୍ଜି ଆସନ୍‌ ଅସୋୟ୍‌ ମନ୍‌ରାନ୍‌ ନିୟ୍‌ ଅଃଡକୋଲୋ, ଇନ୍‌ଲେଞ୍ଜି ସଦୋମନ୍‌ ଅନ୍ତମ୍‌ ଡେତଲେନ୍‌ବନ୍‌, ଇନ୍‌ଲେଞ୍ଜି ଅମୋରାନ୍‌ ଅନ୍ତମ୍‌ ଡେତଲେନ୍‌ବନ୍‌ ।

10 ଏ ସଦୋମନ୍‌ ଆ ସାନନମର୍‌ଜି, ପ୍ରବୁନ୍‌ ଆବର୍ନେ ଅମ୍‌ଡଙ୍‌ବା, ଏ ଅମୋରାନ୍‌ ଆମନ୍‌ରାଜି, ଆମ୍ୱେଞ୍ଜି ଇସ୍ୱରଲେନ୍‌ ଆ ବନାଁୟ୍‌ବର୍‌ଲୋଙ୍‌ ଡାଲୁଡ୍‌ବା । 11 ପ୍ରବୁନ୍‌ ବର୍ତନେ, ଞେନ୍‌ ଆସନ୍‌ ଆମ୍ୱେଞ୍ଜି ଗୋଗୋୟ୍‌ ଅନମଙନ୍‌ ଆତନିୟ୍‌ ଆଗ୍ରାମ୍‌ଗାମ୍‌ ଇନି ? ଞେନ୍‌ ମେଣ୍ତାଞ୍ଜି ଆ ତନୋମ୍ମୋଡ୍‌ଲୋଙନ୍‌ ଡ ଜେଲ୍‌ଜେଲ୍‌ ଜନ୍ତୁଜି ଆକରି ଆବରିୟ୍‌; ଆରି, ସଣ୍ତନ୍‌, ମେଣ୍ତାନ୍‌ ଅଡ଼େ କିମ୍ମେଡଞ୍ଜି ଆମିଞାମ୍‌ଲୋଙ୍‌ ଞେନ୍‌ ସର୍ଡା ତଡ୍‌ । 12 ଆମ୍ୱେଞ୍ଜି ମୁକାବାଞେନ୍‌ ଏଡ଼ୋତାଞନ୍‌ ଆଡିଡ୍‌ ଡୁଆରାଞେନ୍‌ ଅଡ଼୍‌କୋନ୍‌ ଞନାଡାନ୍‌ ଆସନ୍‌ ଅମଙ୍‌ଲୋଙ୍‌ବେନ୍‌ ସିଲଡ୍‌ ଆନା ଇଃୟମେନ୍‌ ? 13 ମନଙ୍‌ତଡନ୍‌ ଆନମଙ୍‌ ଆରି ଏପାଙ୍‌ଡଙାୟ୍‌; ତରୋମ୍ମୋଡନ୍‌ ଞେନ୍‌ ଏଡ଼ୁର୍‌ମଡ୍‌ତାୟ୍‌; ଅମାସିଆନ୍‌ ଡ ଲୋଲୋନେ ଡିନ୍ନା, ସୋବାନ୍‌ ଆନପ୍ପୁଙ୍‌ବର୍‌ ଏର୍‌ଡରମ୍ମନ୍‌ ଡ ସୋଡ଼ା ସୋବାବେଞ୍ଜି ଞେନ୍‌ ସଏଲେ ଏଃରପ୍ତିଆୟ୍‌ । 14 ପରାନ୍ନାଞେନ୍‌ ଅମାସିଆବେନ୍‌ ଡ ଗନବ୍‌ରି ପୁରନ୍‌ ଅଡ଼୍‌କୋନ୍‌ ଏଡ଼ୁର୍‌ମଡ୍‌ତାୟ୍‌; ତିଅଡ଼୍‌କୋନ୍‌ ଞେନ୍‌ ଆସନ୍‌ ମାଡ୍ଡ ଡଣ୍ତ; ଞେନ୍‌ ତିଅଡ଼୍‌କୋନ୍‌ ଆବନୋୟ୍‌ ମଙ୍ଗାଲଲେନ୍‌ ।

15 ଆରି, "ଆମ୍ୱେନ୍‌ ଏତେକେସିଲନ୍‌ ଆଡିଡ ଞେନ୍‌ ଆମ୍ୱେନ୍‌ଆଡଙ୍‌ ଅଃନାଙାଙ୍‌ବେନ୍‌ । ଆରି ଆମ୍ୱେଞ୍ଜି ଡିଡିଲେରୁଙ୍‌ରୁଙ୍‌ଲେ ଏପାର୍ତନାତନେନ୍‌ ଆଡିଡ୍‌ ଞେନ୍‌ ଏଃନମ୍‌ଡଙାୟ୍‌ । ଅସିବେନ୍‌ ମିଞାମନ୍‌ ଆଜାବ୍‌ଜାବ୍‌ । 16 ଆମ୍ୱେନ୍‌ ଆମ୍ବେନ୍‌ଡଙ୍‌ ଉମାଲନ୍‌ ମବ୍‌ଡ଼ିର୍‌ନାବା, ଗନିୟ୍‌ଗିୟ୍‌ଲୋଙ୍‌ଲେନ୍‌ ସିଲଡ୍‌ ପରାନ୍‌ସାତ୍ତିନ୍‌ କାବାଡ଼ାବେଞ୍ଜି ସବ୍‌ଙାୟ୍‌ବା; ପରାନ୍‌ସାତ୍ତିଞ୍ଜି ଆକାବାଡ଼ା ଆଲନୁମ୍‌ ସିଲଡ୍‌ ଆଙ୍‌ସାନାବା; 17 ମନଙ୍‌ କାବ୍ବାଡ଼ାନ୍‌ ଆଲନୁମ୍‌ ଆସନ୍‌ ଞଙ୍‌ନାବା; ଆଜାଡ଼ି ପନ୍‌ସୁଆତିନ୍‌ ଆସନ୍‌ ଏର୍ବାଗୋୟ୍‌ବା, ଆଜ୍ରୁରୁଲେଞ୍ଜି ଆମନ୍‌ରାଜିଆଡଙ୍‌ ସାୟ୍‌ସିବା, ଆକୋନ୍‌ରାମରଞ୍ଜିଆଡଙ୍‌ ଆଜାଡ଼ି ଅପସୁଆତିବା, ଜୁଆର୍‌ବଜଞ୍ଜିଆଡଙ୍‌ ଡନେଡାଲେ ବର୍ନାବା ।"

18 ପ୍ରବୁନ୍‌ ବର୍ତନେ, ଜିରାୟ୍‌ବା, ଇନ୍‌ଲେଞ୍ଜି ଏକଡାଡ଼ିନେବା; ଇର୍ସେବେଞ୍ଜି ଅଡ଼୍‌କୋନ୍‌ ସିଣ୍ଡରନ୍‍ ଅନ୍ତମ୍‌ ଲୁଲୁ ଡେଏନ୍‌ ଜନଙ୍‌ଡେନ୍‌ ଆଡ଼େରନ୍‌ ଅନ୍ତମ୍‌ ଜେଏ ଡେତେ; ତିଅଡ଼୍‌କୋନ୍‌ ମିଞାମନ୍‌ ଅନ୍ତମ୍‌ ଲୁଲୁଡମ୍‌ ଡେଏନ୍‌ ଜନଙ୍‌ଡେନ୍‌ ଜେଏ ମେଣ୍ତାପ୍ପୁରନ୍‌ ଅନ୍ତମ୍‌ ଡେତେ । 19 ଅସମୟ୍‌ ଆମ୍ୱେଞ୍ଜି ଏଅଡ଼େଏଣ୍ଡେ ଆରି ଏମାନ୍ନେଏନ୍‌ଡେନ୍‌, ତିଡେନ୍‌ ତି ଆଡେସା ମନଙ୍‌ ଅଜନ୍‌ ଏଜୋମ୍‌ତେ ଡେସାନ୍‌ ଆ ମନଙ୍‌ ଜଅ ଏଞାଙ୍‌ତେ । 20 ବନ୍‌ଡ ଆମ୍ୱେନ୍‌ ଅଃନଡ଼େଲଡେନ୍‌ ଆରି ଏବିରୁଦଏଣ୍ଡେନ୍‌, ତିଡେନ୍‌ କଡ଼ିବନ୍‌ ବାତ୍ତେ ଅନବ୍‌ସେଡନ୍‌ ଡେତେ; ଇନିଆସନ୍‌ଗାମେଣ୍ତେନ୍‌ ପ୍ରବୁନ୍‌ କେନ୍‌ଆତେ ବର୍ତନେ ।

21 ଡର୍ନେଡମନ୍‌ ଆଗଡ଼ା ଏଙ୍ଗାଲେ ଜୋଣ୍ଡଡ଼ାଜୁଣ୍ତଡ଼ିନ୍‌ ଡେଏନ୍‌ ! ଆନିନ୍‌ ଆଜାଡ଼ି ପନ୍‌ସୁଆତିଲୋଙନ୍‌ ଆବରିୟ୍‌ ଡକୋଏନ୍‌ । ଡରମ୍ମନ୍‌ ଆମଙ୍‌ବାନ୍‌ ଡକୋଲନ୍‌, ବନ୍‌ଡ ନମି ସମ୍ବବ୍‌ମରଞ୍ଜି ଡକୋଜି । 22 ଏ ଜିରୁସାଲମ, ବଡିନ୍ନା ରୁପାନ୍‌ ଅନ୍ତମ୍‌ ଡକୋଲମ୍‌, ବନ୍‌ଡ ନମି ଆମନ୍‌ ବରାଁୟ୍‌ବାଁୟ୍‌ତଡ୍‌ ଡେଲମ୍‌; ଆମନ୍‌ ମନଙ୍‌ ଦ୍ରାକ୍ୟାଡାନ୍‌ ଅନ୍ତମ୍‌ ଡକୋଲମ୍‌, ବନ୍‌ଡ ଆମନ୍‌ ନମି ସତ୍ତର୍‌ ଡାଆ । 23 ସାସନମର୍‌ବେଞ୍ଜି ଗୋଡ଼େନ୍‌ ଆନମ୍‌ଡୁଙ୍‌ମର୍‌ଜି ଆରି ରାଉମରଞ୍ଜି ଆଗଡ଼ି; ଅଡ଼୍‌କୋଞ୍ଜି ତଙ୍କାନ୍‌ ଆ ଜାସିନେ ଲଡୟ୍‌ତଜି ଆରି ତନିୟ୍‌ତିୟନ୍‌ ଆଞନାଙ୍‌ ଆସନ୍‌ ଆସାତନ୍ତି; ଆନିଞ୍ଜି କୋନ୍‌ରାମରଞ୍ଜି ଅଃନବ୍‌ପନ୍‌ସୁଆତିଏଜି, ଅଡ଼େ ଜୁଆର୍‌ବଜନ୍‌ ଆବର୍ନେ ଆମଙ୍‌ବାଞ୍ଜି ଅଃନ୍ନଡ଼ୋଆୟ୍‌ । 24 ତିଆସନ୍‌ ପ୍ରବୁନ୍‌, ଇସ୍ରାଏଲନ୍‌ ଆ ବପ୍ପୁମର୍‌ ଗାମ୍‌ତେ, ଅମ୍‌ଡଙ୍‌ବା, "ଞେନ୍‌ ସଙ୍ଗତାମର୍‌ଲେଞ୍ଜି ଆବର୍ନେଲୋଙ୍‌ ଲୋଲୋନେନ୍‌ ଞାଙ୍‌ତବୋ ଆରି ଞେନ୍‌ ବନେରାମର୍‌ଲେଞ୍ଜି ସିଲଡ୍‌ ଡୁଲ୍‌ତନାୟ୍‌ । 25 ଆରି ଞେନ୍‌ ଅମଙ୍‌ଗଡ୍‌ବେନ୍‌ ଅସିଞେନ୍‌ ଆବ୍‌ୟର୍ରେ ଅଡିଲ୍‌ବେନ୍‌ ମବ୍‌ରିଡ଼୍‌ତାୟ୍‌ ଆରି ସଣ୍ତିବେନ୍‌ ଅଡ଼୍‌କୋନ୍‌ ତବ୍‌ଲେ ପାଙ୍‌ତେ । 26 ଆରି ଞେନ୍‌ ଆମ୍ମୁଙ୍‌ମା ଅନ୍ତମ୍‌ ପନ୍‌ସୁଆତିମର୍‌ବେଞ୍ଜିଆଡଙ୍‌ ଡ ଆମ୍ମୁଙ୍‌ମା ଅନ୍ତମ୍‌ ମନ୍ତ୍ରିବେଞ୍ଜିଆଡଙ୍‌ ଆବାର୍‌ତମ୍‌ନଙ୍‌ବା । ତିସିଲଡ୍‌ ଆମ୍ୱେନ୍‌ ଡର୍ନେଡମନ୍‌, ଡରମ୍ମଗଡ଼ାନ୍‌ ଗାମ୍‌ଲେ ଅଡ଼୍‌କୋମନ୍‌ରାନ୍ ଜନାତଜି ।" 27 ସିଓନନ୍‌ ଆଜାଡ଼ି ପନ୍‌ସୁଆତିନ୍‌ ବାତ୍ତେ ଡ ୟର୍ରନ୍‌ ଆଜିର୍ରାଞଞ୍ଜି ଆମନ୍‌ରାଞ୍ଜି ଡରମ୍ମନ୍‌ ବାତ୍ତେ ଅନୁରନ୍‌ ଞାଙ୍‌ତଜି । 28 ବନ୍‌ଡ ଏର୍‌ଡରମ୍ମମରନ୍‌ ଡ ଇର୍ସେମରଞ୍ଜି ଆବସାଣ୍ଡନ୍‌ ରବୁତଜି ଆରି ଆନାଜି ପ୍ରବୁନ୍‌ଆଡଙ୍‌ ଅମ୍‌ରେଙ୍‌ତଜି, ଆନିଞ୍ଜି ରନବ୍ବୁନ୍‌ ଡେତଜି । 29 ଇନିଆସନ୍‌ଗାମେଣ୍ତେନ୍‌ ଆମ୍ବେନ୍‌ ଅରାନୁବଞ୍ଜି ଏପ୍ରୁର୍‌ତେନ୍‌ ଆସନ୍‌ ଆରି ଆମ୍ବେନ୍‌ଡମ୍‌ କୋତ୍ତାଲୋଙନ୍‌ ଏଗ୍ରୁଏନ୍‌ ଆରାନୁବ୍‌ଜି ମଡ଼ିର୍‌ ଗାମ୍‌ଲେ ଏମ୍ରନ୍ନେଏନ୍‌ ଆସନ୍‌ ଆମ୍ବେନ୍‌ ଡରୟ୍‌ତବେନ୍‌ । 30 ଇନିଆସନ୍‌ଗାମେଣ୍ତେନ୍‌ ଆମ୍ୱେଞ୍ଜି ଆର୍ରବୁତେନ୍‌ ଅଲୋନନୁବନ୍‌* ଅନ୍ତମ୍‌ ଅସର୍‌ତବେନ୍‌, ଡାଆନ୍‌ ଅଃରୁଡାଏଞ୍ଜି ଆ କୋତ୍ତା ଅନ୍ତମ୍‌ ଡେତବେନ୍‌ । 31 ଆରି, ବପ୍ପୁମରନ୍‌ ଆସରନ୍‌ ଆଲଙ୍‌ ଅନ୍ତମ୍‌ ଆରି ଆ କାବ୍ବାଡ଼ାନ୍‌ ଆଉଲ୍ଲାଙ୍‌ତୋଡନ୍‌ ବାତ୍ତେ ଆଜ୍ରୁମ୍‌ତୋତେନ୍‌ ଅନ୍ତମ୍‌ ଡେତେ; ତି ବାଗୁନ୍‌ ଆବସାଣ୍ଡନ୍‌ ଡୁଡୁତେ ଆରି ଆନ୍ନିଙ୍‌ ତିଆତେ ପବ୍‌ଞିଡ୍‌ଲେ ଅଃରପ୍ତିଏ ।