1 ତିସିଲଡ୍‌ ଇଜକିଅନ୍‌ ତିଆବର୍ନେ ଆରମ୍‌ଡଙେନ୍‌ ସିଲଡ୍‌, ଆନିନ୍‌ ଡୁକ୍କଡାଏନ୍‌ କି ଆସିନ୍‍ରିନ୍‍ ପେଏନ୍‌, ଆରି ଅକାକାବନ୍‌ ଜିଜିଲନ୍‌, ଆରି ପ୍ରବୁନ୍‌ ଆସିଙ୍‌ ଜିରେନ୍‌ । 2 ଆରି ଆନିନ୍‌ ରାଜାସିଙନ୍‌ ଆଗନିୟ୍‌ମର୍‌ ଇଲିୟାକିମନ୍‌ଆଡଙ୍‌; ସିବନନ୍‌, କୋର୍ଟନ୍‌ ଆଇଡଲ୍‌ମର୍‌ଆଡଙ୍‌ ଆରି ରାଓଡ଼ାଞ୍ଜି ଆମ୍ମୁଙ୍‌ଗଡ୍‌ମରଞ୍ଜିଆଡଙ୍‌ ଅକାକାବନ୍‌ ଜିଜିଲନ୍‌ ଆମୋସନ୍‌ ଆଡାଙ୍ଗାଡ଼ାଅନ୍‌ ଜିସାୟ ପୁର୍ବାଃତେ ବର୍ନେମରନ୍‌ ଆମଙ୍‌ବା ଆପ୍ପାୟେନ୍‌ । 3 ସିଲଡ୍‌ଲନ୍‌ ଆନିଞ୍ଜି ଆନିନ୍‌ଆଡଙ୍‌ ବରେଞ୍ଜି ଇଜକିଅନ୍‌ ଏନ୍ନେଲେ ବର୍ରନେ, "ଲଙେ ଡୁକ୍କାଡିନ୍ନା, ଇନ୍‌ଲେଞ୍ଜିଆଡଙ୍‌ ଡନଣ୍ଡାୟନ୍‌ ଡ ଗନବ୍‌ରଜନ୍‌ ଏଞାଙ୍‌ତାୟ୍‌ । ଞେନ୍‌ ଅବୟ୍‌ ଆଇମରନ୍‌ ଅନ୍ତମ୍‌ ଆନା କୋକ୍କୋଡନ୍‌ ବେଡ଼ାନ୍‌ ଜିର୍ତାୟ୍‌ ବନ୍‌ଡ କୋକ୍କୋଡନନ୍‌ ଆସନ୍‌ ଆନିନ୍‌ ବୋର୍ସାତଡ୍‌ । 4 ଆମେଙ୍‌ ଇସ୍ୱରନ୍‌ଆଡଙ୍‌ ଆଗନବ୍‌ରୟ୍‌ ଆସନ୍‌ ଆସିରିଆନ୍‌ ଆସୋଡ଼ାମର୍‌ଜି ଆରାପ୍ପାୟେନ୍‌ ଆମନ୍‌ରାଜିଆଡଙ୍‌ ଗନବ୍‌ରଜନ୍‌ ଡ ଡନଣ୍ଡାୟନ୍‌ ଆସନ୍‌ ଆପ୍ପାୟେଞ୍ଜି । ତିଆସନ୍‌ ଆମେଙ୍‌ଡକୋଞ୍ଜି ଆମନ୍‌ରାଜି ଆସନ୍‌ ଆମ୍ବେନ୍‌ ଇସ୍ୱରନ୍‌ ଆମଙ୍‌ବା ପାର୍ତନାନାବା ।" 5 ଅଙ୍ଗା ଆଡିଡ୍‌ ଇଜକିଅ ରାଜାନ୍‌ ଆବର୍ନେ ଜିସାୟନ୍‌ ଜାଏନ୍‌, 6 ତିଆଡିଡ୍‌ ଆନିନ୍‌ କେନ୍‌ ଏନ୍ନେଲେ ଜାଲଙେନ୍‌ କି ଆପ୍ପାୟେନ୍‌, "ସାଉକାରନ୍‌ ଆମ୍ବେଞ୍ଜିଆଡଙ୍‌ ବର୍ତବେନ୍‌ ଡ ଆନା ଅସୁରିଅଞ୍ଜି ଆମ୍ବେଞ୍ଜିଆଡଙ୍‌ ଡୋବ୍‌ଲେ ଅଃରପ୍ତିବେଞ୍ଜି ଗାମ୍‌ଲେ ବର୍ତଞ୍ଜି ଆନିଞ୍ଜିଆଡଙ୍‌ ଏବବ୍‌ତଙ୍‌ଡଙ୍‌ଜି । ତର୍ଡମ୍‌ ଡେସାନ୍‌ ୟର୍ନାବା ଆରି ସଦାପ୍ରବୁ ଆନିଞ୍ଜିଆଡଙ୍‌ ତେତ୍ତେ ରବ୍ବୁତଜି । 7 ପ୍ରବୁନ୍‌ ଆନିନ୍‌ଆଡଙ୍‌ ଅବୟ୍‌ ବରନ୍ତଙନ୍‌ ଆବର୍ନେ ଅବ୍‌ନମ୍‌ଡଙ୍‌ତେ ଡ ଆନିନ୍‌ଆଡଙ୍‌ ଆଡେସାନ୍‌ ଅବ୍‌ୟର୍‌ନେତେ ଆରି ପ୍ରବୁନ୍‌ ଆନିନ୍‌ଆଡଙ୍‌ ତେତ୍ତେ କୁଣ୍ତିବାତ୍ତେ ରବ୍ବୁତେ ।"

8 ତିସିଲଡ୍‌ଲନ୍‌ ଅସୁରିଅନ୍‌ ଆରାଜା ଲାକିସନ୍‌ ସିଲଡ୍‌ ରବ୍‌ସାକିନ୍‌ ୟର୍ରନେ ଆରି ଲିବ୍‌ନା ଗଡ଼ାନ୍‌ ଆ ବିରୁଦଲୋଙ୍‌ ଆରଲ୍‌ଜୁଜ୍ଜେଲନ୍‌ ଗାମ୍‌ଲେ ଆରମ୍‌ଡଙେନ୍‌ ସିଲଡ୍‌; ଆନିନ୍‌ଆଡଙ୍‌ ଆସନାୟ୍‌ ଆସନ୍‌ ଆନିନ୍‌ ତେତ୍ତେ ଇୟେନ୍‌ । 9 କୁସଡେସାବାୟ୍‌ ତିର୍ରକ ରାଜାନ୍‌, ଆବର୍ନେ ଅସୁରିଅ ରାଜାନ୍‌ ଅଡ଼ୋଏନ୍‌, ଆନିନ୍‌ ଆମ୍ବେଞ୍ଜି ସରିନ୍‌ ଅଲ୍‌ଜୁଜ୍ଜେନ୍‌ ଆସନ୍‌ ଇୟ୍‌ଲାୟ୍‌ । କେନ୍‌ ଆବର୍ନେ ରାଜାନ୍‌ ଆରମ୍‌ଡଙେନ୍‌, ଆନିନ୍‌ ଇଜକିଅ ରାଜାନ୍‌ ଆମଙ୍‌ବା ଅଲାନ୍‌ ଇଡ୍‌ଲେ ଆପ୍ପାଲେ ବର୍ରନେ 10 ଆମ୍ବେନ୍‌ ଜିଉଦାନ୍‌ ଆରାଜା ଇଜକିଅନ୍‌ଆଡଙ୍‌ କେନ୍‌ ଆବର୍ନେ ବର୍ବା, "ଆମନ୍‌ ଅଙ୍ଗା ଆ ଇସ୍ୱର ଆମଙ୍‌ ଡର୍ତନେ ଡ ଜିରୁସାଲମନ୍‌ ଅସୁରିଅନ୍‌ ଆସିଲୋଙ୍‌ ସନୋରୋପ୍ପାୟ୍‌ ଅଃଡେଏ, ବନ୍‌ଡ କେନ୍‌ ଆବର୍ନେ ବର୍ରନ୍‌ କଣ୍ଡାୟ୍‌ଡଙ୍‌ଲେନ୍‌ । 11 ଆମନ୍‌ ଅମ୍‌ଡଙେନ୍‌ ଡ ଅସୁରନ୍‌ ଆରାଜା ଅନ୍ନିଙ୍‌ ଆଡେସା ଅନବ୍‌ସେଡନ୍‌ ଆସନ୍‌ ଇଃୟମେନ୍‌ । ଆମନ୍‌ ଇୟମ୍‌ତେ ପଙ୍‌ ଞେନ୍‌ ଅଡ଼ୁର୍‌ତିଁୟ୍‌ ? 12 ଜୋଜୋଞେଞ୍ଜିଆଜୋଜୋ ଅଙ୍ଗା ଡେସା ଗୋସନ୍‌, ଆରୋଣ, ରେତ୍ସପ, ଆରି ବେତେଡେନ୍‌ ଆମନ୍‌ରାଜି ଆନାଜି ତଳସର ଗଡ଼ା ଲୋଙନ୍‌ ଏଦନ ଡକୋଲଞ୍ଜି ଆନିଞ୍ଜି ରବ୍ବୁଏଞ୍ଜି, ଆରି ଅନ୍ନିଙ୍‌ ଆସନୁମଞ୍ଜି ଆନିଞ୍ଜିଆଡଙ୍‌ ଡୋବ୍‌ଲେ ରପ୍ତିଏଞ୍ଜି । 13 ଅମାତର, ଅର୍ପଦର, ସପର୍ବିମନ୍‌ ଆଗଡ଼ା ଆରାଜାଜି ଅଡ଼େଙ୍ଗାଜି ?"

14 ଇଜକିଅ ରାଜାନ୍‌ ପାଙ୍‌ଲଙ୍‌ବର୍‌ମରଞ୍ଜି ଆସିଲୋଙ୍‌ସିଲଡ୍‌ ଅଲାନ୍‌*ବେଡ୍‌ଲେ ପଡ଼େଲନେ । ଆରି ଇଜକିଅନ୍‌ ସରେବାସିଙନ୍‌ ଜିର୍ରେ ତି ଆ ଅଲା ପ୍ରବୁନ୍‌ ଆମଙ୍‌ବା ଡକ୍କୋଏନ୍‌ । 15 ଆରି ଇଜକିଅନ୍‌ ପ୍ରବୁନ୍‌ ଆମଙ୍‌ବା ପାର୍ତନାଲନ୍‌ ଗାମେନ୍‌, 16 ଏ କିରୁବଞ୍ଜି ଆତୋଣ୍ଡୋ ଆଡ୍ରକୋତନ୍‌ ଅଡ଼୍‌କୋନ୍‌ ସିଲଡ୍‌ ବୋର୍ସାଡମନ୍‌ ଆପ୍ରବୁ, ଇସ୍ରାଏଲଞ୍ଜି ଆ ଇସ୍ୱର,ସମ୍ପରା ପୁର୍ତିନ୍‌ ଆରାଜ ସରାସନତେନ୍‌ ଆ ଇସ୍ୱର ଆମନ୍‌ତୁମ, ଆମନ୍‌ ପୁର୍ତିନ୍‌ ଡ ରୁଆଙନ୍‌ ଗବ୍‌ଡେଲେନ୍‌ । 17 ନମିଞେନ୍‌, ଏ ସଦାପ୍ରବୁ, ବର୍ନେଲେନ୍‌ ଅମ୍‌ଡଙା ଆରି ଇନ୍‌ଲେଞ୍ଜି ଇନି ଗଟେତେ ଗିଜା । ଆମେଙ୍‌ ଇସ୍ୱରନ୍‌ ଆମନ୍‌ଆଡଙ୍‌ ଗନବ୍‌ରଜନ୍‌ ଆସନ୍‌, ସେନାଏରିବନ୍‌ ଇନି ଗାମ୍‌ତେ ତିଆତେ ଅମ୍‌ଡଙା । 18 ଞେନ୍‌ ଅଡ଼୍‌କୋନ୍‌ଲେନ୍‌ ଜନା, ଏ ପ୍ରବୁ, ଅସୁରିଅନ୍‌ ଆରାଜାଜି ଲାଙ୍‌ଲେଡ୍‌ ଆଡେସାଜି ଅବ୍‌ସେଡେଞ୍ଜି, ଆଡେସାଞ୍ଜି ନିୟ୍‌ ମୋସ୍ସାଏନ୍‌, 19 ଆରି ଆସନୁମଞ୍ଜି ତଗୋଲୋଙନ୍‌ ସୟେଞ୍ଜି, କେନ୍‌ଆତେଜି ଆଜାଡ଼ି ଇସ୍ୱରଜିତଡ୍‌, କେନ୍‌ଆତେ ଅବୟ୍‌ ଅରାନ୍‌ ଡ ଅରେଙନ୍‌ ବାତ୍ତେ ମନ୍‌ରାନ୍‌ ଆସିନ୍‌ବାତ୍ତେ ଆତୁନ୍‌ରୁବ୍‌ ଆକୋଙ୍‌ଡାୟ୍‌ଜି ଅବ୍‌ଗୁରୁଡେନ୍ । 20 ତିଆସନ୍‌ ଏ ପ୍ରବୁ ଇସ୍ୱରଲେନ୍‌, ନମିଞେନ୍‌, ଆସିରିଆନ୍‌ ଆରାଜା ଆସିଲୋଙ୍‌ ସିଲଡ୍‌ ଡୋବ୍‌ଲେନ୍‌, ଏଙ୍ଗାଲ୍‌ଡେନ୍‌ ସମ୍ପରା ପୁର୍ତିନ୍‌ ଆଜାତିଜି ଡ ଆମନ୍‌ତୁମ୍‌ ଇସ୍ୱର ଗାମ୍‌ଲେ ଜନାତଜି ।

21 ଆମୋସନ୍‌ ଆଡାଙ୍ଗାଡ଼ାଅନ୍‌ ଜିସାୟନ୍‌ ଇଜକିଅ ରାଜାନ୍‌ ଆମଙ୍‌ବା ବର୍ରେ ଆପ୍ପାୟେନ୍‌ ଡ ପ୍ରବୁନ୍‌ ଇସ୍ରାଏଲନ୍‌ ଆ ଇସ୍ୱର କେନ୍‌ ଆବର୍ନେ ବର୍ରନେ ଆମ୍ବେନ୍‌ ଅସୁରିଅନ୍‌ ଆରାଜା ସନ୍‌ଏରିବନ୍‌ ଆ ବିରୁଦଲୋଙ୍‌ ଅମଙ୍‌ବାଲେନ୍‌ ପାର୍ତନାନାବା 22 ପ୍ରବୁନ୍‌ ବର୍ରନେ, ସିଅନନ୍‌ ଜିରୁସାଲମ ଆଡାଙ୍ଗିଡ଼ିବୟ୍‌ ଆମନ୍‌ ଗବ୍‌ରୟ୍‌ତମ୍‌ ଜିରୁସାଲମନ ଗଡ଼ାନ୍‌ ଆମନ୍‌ଆଡଙ୍‌ ଗବ୍‌ୟର୍‌ତମ୍‌ ଆରି ୟୁୟୁବ୍ବତନ୍‌ ଡୋସେତମ୍‌ । 23 ଆମ୍ବେନ୍‌ ଆନାଆଡଙ୍‌ ଏଗବ୍‌ରୟ୍‌ତେ ଆରି ଏନିନ୍‌ଡୟ୍‌ତେ ଗାମ୍‌ଲେ ଏଇଃୟମ୍‌ତେ ? ଞେନ୍‌ ଇସ୍ରାଏଲନ୍‌ ମଡ଼ିର୍‌ ଇସ୍ୱରନ୍‌, ଆମ୍ବେନ୍‌ ଞେନ୍‌ଆଡଙ୍‌ ଏମ୍ମାନେଇଁୟ୍‌ । 24 ଆମ୍ବେନ୍‌ କମ୍ବାରିବେଞ୍ଜି ଆପ୍ପାୟ୍‌ଡାଲେ ପ୍ରବୁନ୍‌ଆଡଙ୍‌ ଗବ୍‌ରୟ୍‌ଲେ ଏବର୍ତନେ ଅଡ଼୍‌କୋନ୍‌ ରତ୍ତାଲୋଙ୍‌ ବରୁଞ୍ଜି ଆତୋଣ୍ଡୋ ଲିବାନୋନନ୍‌ ଆତନୁଞିୟ୍‌ଜାୟ୍‌ ଜିର୍ରାୟ୍‌ । ଆରି ଞେନ୍‌ ତେତ୍ତେ ଡକୋନ୍‌ ଡେଙ୍ଗାରାନ୍‌ ଆ ଏରସନୁବନ୍‌ ଡ ମନଙ୍‌ ଦେବଦାରୁନୁବଞ୍ଜି ଅଡ଼୍‌କୋନ୍‌ ଗଡ୍‌ଲେ ଏବ୍‌କୁଡାୟ୍‌ବା, ଆରି ଆମ୍ବେନ୍‌ ଗୋଗୋୟ୍‌ ରିଜାଲନ୍‌ ଡକୋରେଙନ୍‌ ଏଜିରେନ୍‌ । 25 ଆମ୍ବେନ୍‌ କୁଆନ୍‌ ଏସାଜେନ୍‌ ଆରି ବଡେସା ଆଲବଲୋଙ୍‌ ସିଲଡ୍‌ ଡାଆନ୍‌ ଏଗାଏନ୍‌, ଆରି ଞେନ୍‌ ମିସରନ୍‌ ଆଲଡା ଅବ୍‌ଞଡ୍‌ଲେ ତାଲ୍‌ଜଙ୍‌ବେନ୍‌ ଆଜାୟ୍‌ତା ଏମ୍ମେତାୟ୍‌ ।

26 ଏଙ୍ଗାଲେ ଞେନ୍‌ ଆମ୍ମୁଙ୍‌ମା ସିଲଡ୍‌ କେନ୍‌ଆତେ ଏଇୟମ୍‌ଲାୟ୍‌ ଆରି ପୁର୍ବାନ୍‌ମା ସିଲଡ୍‌ କେନ୍‌ ଆତେ ଏଗବ୍‌ରିଲାୟ୍‌ କେନ୍‌ଆତେ ଆମ୍ବେନ୍‌ ଅନ୍‌ରଙ୍‌ ଏଅମ୍‌ଡଙେ ପଙ୍‌ ? ଞେନ୍‌ କେନ୍‌ଆତେ ନମି ଲୁମ୍‌ଲାୟ୍‌ ମରେଲ୍‌ମେଲ୍‌ସିଙ୍‌ ଗଡ଼ାଞ୍ଜି ରୁବ୍‌ଡ଼ାଙ୍‌ଲେ ସରେଜିଙ୍‌ ଲବନ୍‌ ଅନ୍ତମ୍‌ ଆନେମ୍ମେ ଆସନ୍‌ ଞେନ୍‌ ଆମନ୍‌ଆଡଙ୍‌ ବୋର୍ସାନ୍‌ ତିୟ୍‌ଲମ୍‌ । 27 ତେତ୍ତେ ଆଡ୍ରକୋଲଞ୍ଜି ଆମନ୍‌ରାଜି ବୋର୍ସତଡ୍‌ ଡେଏଞ୍ଜି; ଆନିଞ୍ଜି ବାଉଲ୍ଲି କାଉଲ୍ଲି ଡେଏଞ୍ଜି । ଅଙ୍ଗା ଆଡିଡ୍‌ ଉଙ୍‌ରୁଡମନ୍‌ ଆରିଙ୍ଗେ ଡରୁଙ୍‌ୟୋଙ୍‌ଗଡ୍‌ ସିଲଡ୍‌ ଆମଙ୍‌ବାଞ୍ଜି ଇଡ୍‌ତେ, ଆନିଞ୍ଜି ବସେଙ୍‌ଲୋଙନ୍‌ ଆଜିଙ୍‌ ଡ ଆଲେଡେଙ୍‌ ଗାବନ୍‌ ଅନ୍ତମ୍‌ ଆରି ଆଜିଅଲନ୍‌ ଆତୋଣ୍ଡୋ ଆସ୍ରୋଡ଼ାତେନ୍‌ ଆଜିଙ୍‌ ଡ ଅନ୍‌ର୍ରଙ୍‌ ଅଗୁରେନ୍‌ ଆଜନ୍‌ଡ୍ରୋମ୍‌ ଅନ୍ତମ୍‌ ଡେଏଞ୍ଜି ।

28 "ଆମ୍ବେନ୍‌ ଇନି ଏଲୁମ୍‌ତେ ଆରି ଆମ୍ବେନ୍‌ ଅଙ୍ଗାଲୋଙ୍‌ ଏଇୟ୍‌ତେ, ଆମ୍ବେନ୍‌ ଞେନ୍‌ଆଡଙ୍‌ ବିରୁଦଡାଲେ ଏଙ୍ଗାଲେ ଏବବ୍‌ରାବ୍‌ତିଁୟ୍‌ କେନ୍‌ ଅଡ଼୍‌କୋନ୍‌ ବର୍ନେବେଞ୍ଜି ଞେନ୍‌ ଜନା । 29 ଆମ୍ବେନ୍‌ ଞେନ୍‌ଆଡଙ୍‌ ଏବବ୍‌ରାବ୍‌ଲିଁୟ୍‌ ଆରି ଏବିରୁଦଲିଁୟ୍‌ ଆରି ପୋପ୍ପୋଡ଼ାବର୍‌ବେନ୍‌ ଞେନ୍‌ ଅମ୍‌ଡଙ୍‌ଲାୟ୍‌, ତିଆସନ୍‌ ଞେନ୍‌ ଅମୁଲୋଙ୍‌ବେନ୍‌ ମାଚକଣ୍ଟାନ୍‌ ଅବ୍‌ରୁତମ୍‌ ଆରି ତଡ୍‌ଲୋଙ୍‌ବେନ୍‌ ତୁଣ୍ଡିନ୍‌ ଅବ୍‌ତୁଣ୍ଡିତମ୍‌ ଆରି ଆମ୍ବେନ୍‌ ଅଙ୍ଗା ଆତଙର୍‌ଗଡ୍‌ ଏଜିର୍ରାୟ୍‌ ତିମା ଆତଙର୍‌ଗଡ୍‌ ଞେନ୍‌ ଆମ୍ବେଞ୍ଜିଆଡଙ୍‌ ଅବ୍‌ୟର୍ନେତବେନ୍‌ ।" 30 ତିଆସନ୍‌ ଜିସାୟନ୍‌ ଇଜକିଅ ରାଜାନ୍‌ଆଡଙ୍‌ ବରେନ୍‌, ଆମ୍ବେଞ୍ଜି ଆସନ୍‌ ଇନି ଗଟେତେ କେନ୍‌ ଆରମ୍ମଡନ୍‌ ଡେତେ । ଲଙବର୍ସେଙ୍‌ ଡ ମିୟ୍‌ନୁମ୍‌ତୋ ଆମନ୍‌ ଜାଡ଼ିଆନ୍‌ ଆଜନ୍‌ରୋମ୍‌ ଜୋମ୍‌ତେ, ବନ୍‌ଡ ଆଜିର୍ତାଞନ୍‌ ଆବର୍ସେଙ୍ ଆମନ୍‌ ଜମ୍ମଲନ୍‌ ବିଡ୍‌ଲେ ଜନ୍‌ରୋମନ୍‌ ଗଡ୍‌ତେ, ଆରି ଦ୍ରାକ୍ୟାକୋତାନ୍‌ ତୁବ୍‌ଲେ ତେତ୍ତେସିଲଡ୍‌ ଦ୍ରାକ୍ୟାଜନ୍‌ ଜୋମ୍‌ତେ । 31 ଜିଉଦାନ୍‌ ଆମନ୍‌ରାଜି ଆମେଙ୍‌ଡକୋନ୍‌ ଆରାନୁବ୍‌ ଅନ୍ତମ୍‌ ମରଙ୍‌ତଜି ଅଙ୍ଗାତେ ଆ ମୁଡ଼ଜଡନ୍‌ ସିଲଡ୍‌ ଆଜଡନ୍‌ ଡୁଙ୍‌ତନାୟ୍‌ ଆରି ଅଜନ୍‌ ଅଜତଜି । 32 ଆନାଜି ଅମେଙ୍‌ତଜି, ଆନିଞ୍ଜି ଜିରୁସାମଲୋଙନ୍‌ ଡ ସିଓନ ବରୁଲୋଙନ୍‌ ଅସୋୟ୍‌ ମନ୍‌ରା ଡକୋତଞ୍ଜି । ଇନିଆସନ୍‌ଗାମେଣ୍ଡେନ୍‌ ଅଡ଼୍‌କୋନ୍‌ ସିଲଡ୍‌ ସୋଡ଼ା ପ୍ରବୁନ୍‌ କେନ୍‌ ଆଲନୁମ୍‌ ଆସନ୍‌ ଗବ୍‌ରିଏନ୍‌ । 33 ତିଆସନ୍‌ "ପ୍ରବୁନ୍‌ ଅସୁରିଅନ୍‌ ଆରାଜାନ୍‌ ଆବର୍ନେ କେନ୍‌ ଆବର୍ନେ ବର୍ରନେ, ଆନିନ୍‌ କେନ୍‌ ଆଗଡ଼ା ଅଃନିୟାୟ୍‌ ଗନେ ଅଡ଼େ କେନ୍‌ ଆବିରୁଦଲୋଙନ୍‌ ଅବୟ୍‌ ନିୟ୍‌ ଅଆମନ୍‌ ବାତ୍ତେ ଅଃତୁଙେ । ଅଡ଼େ ଡରଙ୍‌ନେନ୍‌ ଞମ୍‌ଲେ ଅଃନିୟାୟ୍‌ ଇଜ୍ଜାଡେନ୍‌ ଆବିରୁଦଲୋଙନ୍‌ ଇନ୍ନିଙ୍‌ ଡରଙ୍‌ନେନ୍‌ ଅଃଡକୋଏ । 34 ପ୍ରବୁନ୍‌ ଗାମେନ୍‌, ଆନିନ୍‌ ଅଙ୍ଗା ଆତଙର୍‌ଗଡ୍‌ ଜିର୍ରାୟ୍‌ ତି ଆତଙର୍‌ଗଡ୍‌ ୟର୍ତନେ, ଆରି ଆନିନ୍‌ କେନ୍‌ ଆଗଡ଼ା ଅଃନିୟାୟ୍‌ । 35 ଇନିଆସନ୍‌ଗାମେଣ୍ଡେନ୍‌ ଞେନ୍‌ ଆମନ୍‌ ଆସନ୍‌ ଡ କମ୍ବାରିମର୍‌ଞେଞ୍ଜି ଆସନ୍‌ କେନ୍‌ ଆଗଡ଼ା ଡନୋବନ୍‌ ଆସନ୍‌ ଗଡ଼ାନ୍‌ ଆଡନେ ଡେଲାୟ୍‌ ।"

36 ପ୍ରବୁନ୍‌ ଆପଙ୍‌ଲଙ୍‌ବର୍‌ ଆସିରିଆଞ୍ଜି ଆତମ୍ବୁସିଂବାନ୍‌ ଇୟେନ୍‌ ଆରି ୧୮୫,୦୦୦ ସିପ୍ପାୟଞ୍ଜି ରବ୍ବୁଏନ୍‌ । ଆରି ମନ୍‌ରାଞ୍ଜି ଅନ୍‌ର୍ରଙନ୍‌ ଡୋତାନ୍‌ ଡୋଲଞ୍ଜି, ଅଡ଼୍‌କୋମନ୍‌ରାନ୍ ଆରବୁଜି । 37 ତିସିଲଡ୍‌ ଅସୁରିଅନ୍‌ ଆରାଜା ସନ୍‌ଏରିବନ୍‌ ୟର୍ରନେ ଆରି ୟର୍ରନ୍‌ ନିନିବି ଗଡ଼ାଲୋଙନ୍‌ ଇୟ୍‌ଲେ ଡକୋନେ । 38 ବଡିନା ଅଙ୍ଗାଆଡିଡ୍‌ ଆନିନ୍‌ ନିସ୍ରୋଣ ଗାମ୍‌ଲେ ସନୁମନ୍‌ ଆଞୁମ୍‌ ଆସିଙ୍‌ଲୋଙ୍‌ ପୁର୍‌ପୁରିଙନ, ବାଗୁ ଆଡାଙ୍ଗାଡା ଅନନ୍‌ ଅଦ୍ରମେଲକନ୍‌ ଡ ସରେସ୍‌ସରନ୍‌ ଆଞୁମନ୍‌ ବାଗୁ ଡାଙ୍ଗାଡ଼ଅନଞ୍ଜିଆଡଙ୍‌ କଡ଼ିବନ୍‌ ବାତ୍ତେ ରବ୍ବୁଏଞ୍ଜି ସିଲଡ୍‌ଲନ୍‌ ଆରାରାଟ ଡେସାନ୍‌ ଜିରେଞ୍ଜି । ଆରି ଅବୟ୍‌ ଆଡଙ୍ଗଡ଼ାଅନ୍‌, ଇସାର୍‌ଆଦନନ୍‌, ଆପାଲ୍‌ତେଙନ୍‌ ଆନିନ୍‌ ରାଜାଲନେ ।