ଇସ୍ୱରନ୍ ଅଡ଼୍କୋ ଜାତିଞ୍ଜି ଆନବ୍ମାୟ୍ମାୟ୍
1 ଇସ୍ୱରନ୍ କେନ୍ ଆବର୍ନେ ବର୍ତନ୍, ଆମ୍ବେଞ୍ଜି ଆଜାଡ଼ିନ୍ ପନ୍ସୁଆତିନ୍ ଡ ଡରମ୍ମ କାବ୍ବାଡ଼ାନ୍ ଲୁମ୍ଲେ ଡକୋନାବା; ଇନିଆନ୍ଗାମେଣ୍ତେନ୍ ଅନୁର୍ଞେନ୍ ଡ ଡରମ୍ମନ୍ ତୁୟାଲାୟ୍ । 2 ଅଙ୍ଗା ଆମନ୍ରା କେନ୍ ଆତେ ଲୁମ୍ତେ ରବ୍ଡୋଲନ୍ ଞମ୍ଡ୍ରନେତୁ; ଆନା ଲୋଲୋନେଡିନ୍ନାନ୍ ମାନ୍ନେତେ ଡାଲେ ଏର୍ରମଡ଼ିର୍ ଅଃନେମେଏ କି ଅଡ଼୍କୋ ମନଙ୍ କାବ୍ବାଡ଼ାନ୍ ଆସିଲୋଙନ୍ ପାଙ୍ତେ ଆନିନ୍ ସନେନ୍ସେନ୍ ।
3 "କେନ୍ ଆତେ ଆଜାଡ଼ିନ୍, ଇସ୍ୱରନ୍ ଆମନ୍ରାଜି ଆମଙ୍ ସିଲଡ୍ ଞେନ୍ ଆନ୍ନାତିୟ୍," କେନ୍ ଆତେ ଇସ୍ୱରନ୍ ଆମଙ୍ ମଗାଡ୍ଲନ୍ ଆଡ୍ରକୋନେ ଆନ୍ନା ଡେସାମର୍ ଗାମ୍ଲେ ବର୍ଡଙ୍ନେତଡ୍; ଅଡ଼େ "ଗିୟ୍ବା, ଞେନ୍ ଅବୟ୍ ଆସରନୁବ୍, କେନ୍ ଆତେ ମାୟ୍ତଲିଆ ଗାମ୍ଲେ ବର୍ରଡଙ୍ନେ ତଡ୍ ।" 4 ଇନିଆସନ୍ଗାମେଣ୍ତେନ୍, ମାୟ୍ତଲିଆଞ୍ଜି ଆବିସୟ୍ ଇସ୍ୱରନ୍ କେନ୍ ବର୍ତନ୍, "ଆନାଜି ଲୋଲୋନେଡିନ୍ନାଞେନ୍ ମାନ୍ନେତଜି ଆରି ସିବ୍ଡୟ୍ବର୍ରଞେନ୍ ସେଡାଲେ ଡର୍ରନେନ୍ ବାତ୍ତେ ଅନସୟ୍ଞେନ୍ ମାନ୍ନେତଜି," 5 "ଆନିଞ୍ଜି ଅସିଙ୍ଲୋଙ୍ଲେନ୍ କିନ୍ତାଲନ୍ ଆ ଅମ୍ମ୍ ପସିୟ୍ ଗୋଲା ତିକ୍କି ମନଙ୍ ମନ୍ନାନେନ୍ ଆସୋଣ୍ତାଙ୍ ଅଞୁମନ୍ ଏତିୟ୍ବା; ଞେନ୍ ଆନିଞ୍ଜି ଆଡଙ୍ ଅଃନ୍ନଞିଡିନ୍ନାନ୍ଜାୟ୍ ଅଞୁମନ୍ ଏତିୟ୍ବା, କେନ୍ ଆତେ ଅଃଗଡ୍ନେ ।
6 ଇସ୍ୱରନ୍ ଆନାଡେସାମରଞ୍ଜି ଏଙ୍ଗାଲେ ସେବା ଆସନ୍ ଡ ଇସ୍ୱରନ୍ ଆଞୁମ୍ ଡନୁଙ୍ୟମନ୍ ଡ ଆ କମ୍ୱାରି ଡନେନ୍ ଆସନ୍ ଇସ୍ୱରନ୍ ଆମଙ୍ ମଗାଡ୍ଲନ୍ ଡକୋତଞ୍ଜି, ଆଗ୍ରାମ୍ଗାମ୍ ଆନାଜି ଲୋଲୋନେଡିନ୍ନାନ୍ ମାନ୍ନେଲେ ଏର୍ରମଡ଼ିର୍ ଅଃନେମେଏଜି କେନ୍ ଆତେ ଞେନ୍ ଅନସଜନ୍ ମାନ୍ନେତାୟ୍; 7 ତି ଅଡ଼୍କୋନ୍ ଞେନ୍ ମଡ଼ିର୍ ବରୁଲୋଙନ୍ ଓରୋଙ୍ତାୟ୍ କି ଆନିଞ୍ଜି ପ୍ରାର୍ତନାସିଙ୍ଲୋଙନ୍ ଅବ୍ସର୍ଡାତାଜି; ଆନମଙଞ୍ଜି ଡ କେମ୍ମାନ୍ ଆନମଙ୍ ଅଡ଼୍କୋନ୍ ତନ୍ମ୍ପିଲ୍ଲୋଙ୍ଲେନ୍ ଜାତନ୍; ଇନିଆସନ୍ଗାମେଣ୍ଡେନ୍ ଅସିଙ୍ଲୋଙ୍ଲେନ୍ ପ୍ରାର୍ତନାସିଙ୍ ଗାମ୍ଲେ ଜନାତଜି ।
8 ଇସ୍ୱରନ୍ ବର୍ତନ୍, ଇସ୍ରାଏଲମର୍ରଞ୍ଜି ସବ୍ଙାଲନ୍ ଆଡ୍ରକୋତଞ୍ଜି ଆମନ୍ରାଜି ରୁକୁବା, ଆରୁକୁଲଞ୍ଜି ଆମନ୍ରା ଅମ୍ରେଙ୍ଲେ ଆନ୍ନାମର୍ରଞ୍ଜି ଆମଙ୍ବାନ୍ ଏରୁକୁବା ।"
ଇସ୍ରାଏଲନ୍ ଆ ସୋଡ଼ାମର୍ଜି ଆନିଣ୍ଡୟ୍
9 ଏ ସର୍ବାରେଙନ୍ ଅଡ଼୍କୋ ଆଜନ୍ତ୍ରୁଜି,ଏ କିନ୍ରେଙନ୍ ଆଜନ୍ତ୍ରୁଜି, ଆମ୍ବେଞ୍ଜି ଜନୋମନ୍ ଅନବ୍ଗୁରୁଡ୍ଡେନ୍ ଆସନ୍ ଜିରାୟ୍ବା । 10 ଆନିଞ୍ଜି ଅଡ଼୍କୋ ଜନଗ୍ଗେମରଞ୍ଜି ଆକାଡ଼ୁ, ବୁଡ୍ଡିଜିତଡ୍, ଆଜାଡ୍ଡା, ବର୍ରନ୍ ଅଃରପ୍ତିଏଜି; ଆନିଞ୍ଜି ଗନୁମ୍ତେନ୍ଗିୟ୍ତଜି, ଡିମଡ୍ଲନ୍ ଆଡ୍ରକୋନେ ଲଡୟ୍ତଜି । 11 ଆରି ଆନିଞ୍ଜି କିନ୍ସଡନ୍ ଅନ୍ତମ୍ ଲୋବଜି, ଆନିଞ୍ଜି ଆଙ୍ଗିୟ୍ଜା ଅବ୍ବୋଓଏଜି; ଆରି ଆନିଞ୍ଜି ଇନ୍ନିଙ୍ ଇଃୟମ୍ଲେ ଅଃରପ୍ତିଏଜି; ଆନିଞ୍ଜି ଅଡ଼୍କୋରେଙନ୍ ରମ୍ମଙ୍ ରମ୍ମଙ୍ ଆଲାବ ଏର୍ତଜିଗୋୟ୍ତଜି ଡ ରମ୍ମଙ୍ ଆତଙର୍ ୟର୍ତଞ୍ଜି । 12 ଅଡ଼୍କୋମନ୍ରାନ୍ ବର୍ତଞ୍ଜି, ଜିର୍ରାୟ୍ବା ଇନ୍ଲେଞ୍ଜି ଦ୍ରାକ୍ୟାଡାନ୍ ଏପାଙାୟ୍ବା କି ଗାସାଲନ୍ ଏଡ୍କୋନେବା; ଆରି ଲଙେ ଏଙ୍ଗାଲେ ଏତେଗୋନ୍ ବିଅଡ଼େନିୟ୍ ନିୟ୍ ତିଆତେ ଡେତେ ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)