ମୋୟାବନ୍ ଆପନବ୍ରଡ୍
1 ଆମ୍ୱେନ୍ ଆରିଙ୍ରିଙ୍ବସେଙନ୍ ସେଲା ଗଡ଼ାନ୍ ସିଲଡ୍ ଡେସାନ୍ ଆସୋଡ଼ାମର୍ ଆସନ୍ ସିଓନନ୍ ଡାଙ୍ଗଡ଼ି ବରୁନ୍ ମେଣ୍ତାନ୍ ଆପ୍ପାୟ୍ବା । 2 ଇନିଆସନ୍ଗାମେଣ୍ତେନ୍ ଏଙ୍ଗେଙ୍ଡାଲନ୍ ଆବ୍ରୁଲେତେନ୍ ଆଅନ୍ତିଡ୍ ଅନ୍ତମ୍, ଡ ଅନ୍ତିଡ୍ସିଙନ୍ ସିଲଡ୍ ଗନଙନ୍ ଆଡ୍ରେତେନ୍ ଆ ଅନ୍ତିଡ୍ଜି ଅନ୍ତମ୍, ମୋୟାବନ୍ ଆଡାଙ୍ଗଡ଼ିଜି ଅର୍ନୋନ୍ ଆମିୟ୍ତାଲ୍ ଆ ଅନ୍ତିଡଞ୍ଜି ଅନ୍ତମ୍ ଡେତଜି । 3 କଡାଡ଼ିନାବା, ପନ୍ସୁଆତିବା, ତମ୍ୱାଓଲନ୍ ତଗଲନ୍ ଅନ୍ତମ୍ ଅମ୍ମେବା; ଗନଙ୍ତିଡନ୍ ଆମନ୍ରାଜିଆଡଙ୍ ସେବା; ଜିର୍ଜିରିୟ୍ମରଞ୍ଜିଆଡଙ୍ ଏଅବ୍ଗିୟ୍ତାଡଙ୍ଜି । 4 ମୋୟାବନ୍ ସିଲଡ୍ ଡୁଙ୍ଲନ୍ ଆଜିର୍ରାଞଞ୍ଜି ଆମନ୍ରାଜିଆଡଙ୍ ଡରକୋନେନ୍ ତିୟ୍ବାଜି; ରନବୁନ୍ ସିଲଡ୍ ଅବ୍ଡ଼ୁର୍ନେନ୍ ଆସନ୍ ଆନିଞ୍ଜି ଅମଙ୍ବେନ୍ ସଲନ୍ ଡକୋନେତଜି; ଇନିଆସନ୍ଗାମେଣ୍ତେନ୍ ଡନଣ୍ତାୟନ୍ ଡ ଅନବ୍ମୋସ୍ସାନ୍ ଆରି ଅଃଡ୍ଡେଏ । ଆନାଜି ପାଡ଼ୋ ଡେଏଞ୍ଜି ଆନିଞ୍ଜି କେନ୍ ପୁର୍ତିଲୋଙନ୍ ଆରି ଅଃଗିୟ୍ତାଏଜି । 5 ଆରି, ସନାୟୁମ୍ଲୋଙନ୍ ଅବୟ୍ କୁର୍ସିନ୍ ତନୁବନ୍ ଡେତେ ଡ ଦାଉଦନ୍ ଆ ତମ୍ୱୁଲୋଙ୍ ବମନ୍ରା ଆଜାଡ଼ିଲୋଙନ୍ ତି ଆତୋଣ୍ତୁ ତଙ୍କୁମ୍ତେ; ଆନିନ୍ ଆଜାଡ଼ି ପନ୍ସୁଆତିନ୍ ସାୟ୍ଲେ ବିସାରତେ ଡ ଡରମ୍ମଲୁମନ୍ ଆସନ୍ ଅପୁଡ୍ତେ ଡେତେ । 6 ଞେନ୍ ମୋୟାବନ୍ ଆଗର୍ବବର୍ ଏଅମ୍ଡଙ୍ଲାୟ୍ ଡ, ଆନିନ୍ ଜବ୍ର ଗର୍ବତନ୍, ଆକଙ୍କ୍ରିନ୍ ଡ ଆ ଗର୍ବନ୍ ଡ ଆ ବନ୍ଡ୍ରାବନ୍ ଆବର୍ନେ ଏଅମ୍ଡଙ୍ଲାୟ୍; ଆ ଦର୍ପନ୍ ଇନ୍ନିଙ୍ ତଡ୍ । 7 ତିଆସନ୍ ମୋୟାବନ୍ ମୋୟାବଞ୍ଜି ଆସନ୍ ୟେୟେଡାତନ୍, ଅଡ଼୍କୋ ମନ୍ରାନ୍ ୟେୟେଡାତନେ; ଇନିଆସନ୍ଗାମେଣ୍ତେନ୍ ଆମ୍ୱେଞ୍ଜି ଜବ୍ର ଡୁକ୍କଡାଲନ୍ କିର-ଏରସତ ଗଡ଼ାନ୍ ଆ ମନଙ୍ ଜନୋମଞ୍ଜି ଆସନ୍ ଏୟେୟେଡାତନ୍ । 8 ଇନିଆସନ୍ଗାମେଣ୍ତେନ୍ ଇସ୍ବୋନ୍ ଗଡ଼ାନ୍ ଆ ବସେଙ୍ଞ୍ଜି ଅଡ଼୍କୋନ୍ ଡ ସିବ୍ମା ଗଡ଼ାନ୍ ଆ ଦ୍ରାକ୍ୟାନୁବ୍ ଅସରାଜେନ୍; କେଜ୍ଜାନ୍ ଆ ସୋଡ଼ାମର୍ଜି ତି ଆଲେଡେଙ୍ କେଣ୍ତାରଞ୍ଜି ଅଲ୍କୋଡେଞ୍ଜି; ତି ଅଡ଼୍କୋନ୍ ଜାସେର ଗଡ଼ାନ୍ ଜାୟ୍ ଜିରେଞ୍ଜି, ଆରିଙ୍ରିଙ୍ରେଙନ୍ ଜାୟ୍ ଅଡ଼େତେଅଡ଼େନ୍ନେ ଜିରେଞ୍ଜି; ଆକେଣ୍ତାରନ୍ ଅଡ଼୍କୋନ୍ ଏର୍ରେ ଲାମେନ୍, ତି ଅଡ଼୍କୋନ୍ ସମେଁୟ୍ଣ୍ଡ୍ରାନ୍ ପଡ୍ଲେ ଜିରେନ୍ । 9 ତିଆସନ୍ ଞେନ୍ ଜାସେରନ୍ ଆସନ୍ ୟରେୟେଡାତନାଞନ୍ ଆଡିଡ୍ ସିବ୍ମାନନ୍ ଆ ଦ୍ରାକ୍ୟାନୁବ୍ ଆସନ୍ ନିୟ୍ ୟେୟେଡାତନାୟ୍; ଏ ଇସ୍ବୋନ୍, ଏ ଇଲିୟାଲି ଆମଡ୍ଡାଞେନ୍ ବାତ୍ତେ ଆମନ୍ଆଡଙ୍ ଅବ୍ଡାଡାତମ୍; ଇନିଆସନ୍ଗାମେଣ୍ତେନ୍ ମନ୍ରାଞ୍ଜି ଆନବ୍ ମଅୟ୍ ଆସନ୍ ଡାଗାଡାଇଙନ୍ ଅଜନ୍ ଡ ଜନ୍ରୋମ୍ନମ୍ ଏଃନେଲେ । 10 ଆରି, ସର୍ଡାନ୍ ଡ ମଅଁୟନ୍ ଆରେଲ୍ତେନ୍ ଆବସେଙ୍ ସିଲଡ୍ ସନବ୍ଙାଜନ୍ ଡେଏନ୍; ଆରି, ଦ୍ରାକ୍ୟାକୋତ୍ତାଲୋଙନ୍ କନନନ୍ ଅଡ଼େ ସର୍ଡାକନନ୍ ଅଃଡ୍ଡେଏ; ଆନ୍ନିଙ୍ ଅତାଲ୍ଜଙନ୍ ବାତ୍ତେ ଞାଡାଲେ ଦ୍ରାକ୍ୟାଡାନ୍ ଅଃଞାଲେ; ଞେନ୍ ଦ୍ରାକ୍ୟାନ୍ ଆତର୍ତୁମ୍ ଆସର୍ଡାକନ୍ ସବ୍ଙାୟ୍ଲାୟ୍ । 11 କେନ୍ ଆସନ୍ଲନ୍ ମୋୟାବନ୍ ଆସନ୍ ପୁରାଡ଼ାଞେନ୍ ଡ କିଏଅରସନ୍ ଆସନ୍ ଉଗର୍ଞେନ୍ ବିଣାରାଜନ୍ ଅନ୍ତମ୍ ୟେୟେଡାତନ୍ । 12 ଆରି, ଅଙ୍ଗା ଆଡିଡ୍ ମୋୟାବନ୍ ଆନିନ୍ଡମ୍ ଆରଡ଼ୋଲାଙନ୍ ଆଡିଡ୍ ପୁର୍ପୁର୍ ଡରକୋନେଲୋଙନ୍ ଆନିନ୍ଡମ୍ ଅଃମଙ୍ଗାଲନ୍ ପାର୍ତନାନେନ୍ ଆସନ୍, ସିଲତ୍ତେ ଆନିନ୍ ଆସ୍ରେବାସିଙ୍ବାନ୍ ପାର୍ତନାନେନ୍ ଆସନ୍ ଜିର୍ତେ ବନ୍ଡ ଆ ପାର୍ତନାନ୍ ଅଃଗଡେଲେ । 13 ମୋୟାବନ୍ ଆକେଜ୍ଜା ଆବର୍ନେ କେନ୍ ଅଡ଼୍କୋନ୍ ଆମ୍ମୁଙ୍ମା ପ୍ରବୁନ୍ ବର୍ରନେ । 14 ବନ୍ଡ ନମି ପ୍ରବୁନ୍ କେନ୍ ବର୍ତନେ, ବଡିମରନ୍ ଆବର୍ସେଙ୍ ଅନ୍ତମ୍, ୟାଗି ବର୍ସେଙ୍ଲୋଙ୍ ମୋୟାବନ୍ ଆଗନୁଗୁ ପନେମେଙ୍ ଜବ୍ର ଗୋଗୋୟ୍ ଆମନ୍ରାଞ୍ଜି ଜନଙ୍ ଏଡ଼ୁର୍ମଡନ୍ ଡେତଜି, ଆରି ଲାଙ୍ଲେଡ୍ ଆମନ୍ରାଜି ଅସୋୟ୍ଡମ୍ ଡେତଜି ଆରି ଡନିଡିନ୍ ଅଡେଏଜି ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)