1 ଡରମ୍ମମରନ୍‌ ଅସେଡ୍‌ତଜି ଆରି ତି ଆବର୍ନେ ଆସନ୍‌ ଆନ୍ନିଙ୍‌ ଅଃଡାଲୁଡେଜି; ଆରି ସନାୟୁମ୍‌ମରଞ୍ଜି ଅନୋରୋଙନ୍‌ ଡେତେ, ଡରମ୍ମମରଞ୍ଜି ତିକ୍କି ଆଓୟୋଙ୍‌ ଆ ଡଣ୍ଡ ଆସନ୍‌ ଅନୋରୋଙନ୍‌ ଡେତଜି, କେନ୍‌ ଆସନ୍‌ ଆନ୍ନିଙ୍‌ ଅଃନିୟମେଜି । 2 ଆନିନ୍‌ ଲବିଡା ଇୟ୍‌ତେ ଗନେ, ଲଗଡ୍‌ ତଙର୍‌ଗଡ୍‌ ଆଜିର୍ତେଞ୍ଜି ଆମନ୍‌ରାଜି ଅଡ଼୍‌କୋନ୍‌ ତର୍ଡମ୍‌ ତର୍ଡମ୍‌ ଆର୍‌ଲନୁଡ୍‌ଲୁବାନ୍‌ ଇୟ୍‌ତେ ଲୋଲୋନେଜି ।

3 ଏ ପାଞ୍ଜିଗିୟ୍‌ମରନ୍‌ ଆ ଡାଙ୍ଗାଡ଼ାଅଞ୍ଜି, ଜୁଣ୍ଡଡ଼ିନ୍‌, ଡାରିନେନ୍‌ ଆକେଜ୍ଜା, ପନ୍‌ସୁଆତିନ୍‌ ଆସନ୍‌ ତେନ୍ନେ ଜିରାୟ୍‌ବା । 4 ଆମ୍ବେନ୍‌ ଆନାଆଡଙ୍‌ ଏଗବ୍‌ରୟ୍‌ତେ ? ଆମ୍ବେନ୍‌ ଆନାଆମଙ୍‌ଗଡ୍‌ ମୁକାବେନ୍‌ ଆଙ୍‌ତମ୍‌ଲେ ଅଲାଙ୍‌ବେନ୍‌ ଏଅମ୍‌ଡୁଙ୍‌ତାୟ୍‌ ? ଆମ୍ବେନ୍‌ ଇନି ଏର୍‌ଡମ୍ମନ୍‌ ଆ ଡାଙ୍ଗାଡ଼ାଅନ୍‌ ଆରି କଣ୍ଡାୟ୍‌ ମରଞ୍ଜି ଆକେଜ୍ଜ ତଡ୍‌ ପଙ୍‌ ? 5 ଆମ୍ବେନ୍‌ ଅଲୋନ ଆରାନୁବନ୍‌ ଆଜାୟ୍‌ତା ଡଅଙ୍‌ଡାଗୋ ଇର୍ସେ କାବ୍ବାଡ଼ାଞ୍ଜି ଲୁମ୍‌ଲେ ଆମ୍ବେଞ୍ଜିଡମ୍‌ ଏନବ୍‌ ସନ୍‌ସଡ଼ଲନ୍‌; ଆମ୍ବେନ୍‌ ଆନ୍ନା ଆନ୍ନା ଆଗର୍ଡଲୋଙ୍‌, ଆପଡ଼ାରନ୍‌ ଆରେଙ୍‌ଲୋଙ୍‌ ପସିଜଞ୍ଜିଆଡଙ୍‌ ଏଃରବ୍ବୁଲ ପଙ୍‌ ? 6 ଗର୍ଡରେଙନ୍‌ ଜଲେମ୍‌ ଅରେଙ୍‌ଲୋଙ୍‌ ପାଙ୍‌ଲେ ଅବୟ୍‌ ମାପ୍ରୁନ୍‌ ଅନ୍ତମ୍‌ ଏପୁର୍‌ତେ ଆରି ଆମ୍ବେନ୍‌ ଅଲିନ୍‌ ଅନମଙନ୍‌ ଏଲାତେ ଆରି ଜନ୍‌ରୋମନ୍‌ ଅନମଙନ୍‌ ଏତିୟ୍‌ତେ । କେନ୍‌ ଅଡ଼୍‌କୋନ୍‌ ଆକାବ୍ବାଡ଼ା ଆସନ୍‌ ଞେନ୍‌ ସର୍ଡାତିଂ ଗାମ୍‌ଲେ ଏଇଃୟମ୍‌ତେ ପଙ୍‌ ? 7 ଡେଙ୍ଗା ଡ ସୋଡ଼ା ବରୁନ୍‌ ଆତୋଣ୍ଡୋ ଆମ୍ବେନ୍‌ ତର୍ଡମ୍‌ ଆସନ୍‌ ଏର୍ସେକାବ୍ବାଡ଼ାନ୍‌ ଆଲନୁମ୍‌ ଆସନ୍‌ ବରେଲ୍‌ନେନ୍‌ ଏତୁବ୍‌ତେ; ଆରି ତେତ୍ତେ ମା ଆମ୍ବେନ୍‌ ଅନମଙନ୍‌ ଆତନିୟ୍‌ ଆସନ୍‌ ଏଇୟ୍‌ତେ । 8 ସନଙନ୍‌ ଡ ଡାରନ୍ନିନ୍‌ ଆ କୁଣ୍ଡୋଙ୍‌ଗଡ୍‌ ଆମ୍ବେନ୍‌ ଆମନ୍‌ଆଡଙ୍‌ ଆମନନ୍ନେ ଆସନ୍‌ କୁଣ୍ଡାୟନ୍‌ ଏଡକ୍କୋତେ; ତର୍ଡମ୍‌ ଏର୍‌ନବ୍‌ ସସନ୍‌ ତୋଣ୍ଡୋନ୍‌ ଏଜିର୍ତେ; ଆମ୍ବେନ୍‌ ତର୍ଡମ୍‌ ଆରେଲ୍‌ନେ ଏବ୍‌ସୋଡ଼ାତେ ଆରି ଆନିଞ୍ଜି ସରିନ୍‌ ଅନଗଡନ୍‌ ଏତୁବ୍‌ତେ ଆରି ଅଙ୍ଗାଲୋଙ୍‌ ଆର୍‌ଲୁଲ୍ଲୁଡନ୍‌ ଗିୟ୍‌ଲେ ଆମ୍ବେନ୍‌ ଲଡୟ୍‌ତବେନ୍‌ । 9 ଆମ୍ବେନ୍‌ ମିଞଲନ୍‌ ପାଙ୍‌ଲେ ମଲେକନ୍‌ କୁଣ୍ଡାୟ୍‌ ମାପ୍ରୁନ୍‌ ଆମଙ୍‌ବା ଏଇୟ୍‌ତେ ଆରି ତର୍ଡମ୍‌ ଲଙିଡ୍‌ ଜିନିସନ୍‌ ଏରୁତେ, ଆରି ଆମ୍ବେନ୍‌ ସଙାୟ୍‌ ଡେସାନ୍‌ ଅପ୍ପୁଙ୍‌ବର୍‌ମର୍‌ବେଞ୍ଜି ଏଆପ୍ପାୟ୍‌ତେ ଆରି ପାତାଡ଼ନ୍‌ ଜାୟ୍‌ ଆମ୍ବେନ୍‌ଡମ୍‌ ଜାୟ୍‌ତାନ୍‌ ଏନ୍ନମେଲନ୍‌ । 10 ତଙର୍‌ବେନ୍‌ ସଙାୟ୍‌ଡମନ୍‌ ଆସନ୍‌ ଆମ୍ବେନ୍‌ ମଙ୍ଗାଲବେନ୍‌, ଏଲେଜାକିଁୟ୍‌ଡେନ୍‌ ଆସାତଡ୍‌ ଗାମ୍‌ଲେ ଏବ୍ବର୍ରନେ; ବୋର୍ସାବେନ୍‌ ମରଙେନ୍‌ ଗାମ୍‌ଲେ ଏଇଃୟମେନ୍‌, ତିଆସନ୍‌ ଆମ୍ବେନ୍‌ ଅଃମଙ୍ଗାଲବେନ୍‌ ।

11 ଆମ୍ବେନ୍‌ ଆନା ଆସନ୍‌ ବାଉଲ୍ଲିଡେତବେନ୍‌ ଆରି ବତଙ୍‌ତବେନ୍‌ ଡ ଆମ୍ବେନ୍‌ ଏକଣ୍ଡାୟ୍‌ବର୍ତନେ ଆରି ଞେନ୍‌ଆଡଙ୍‌ ଏମ୍ମନେଇଁୟ୍‌, ଅଡ଼େ ତର୍ଡମ୍‌ ମନ୍ନବେନ୍‌ ଏତ୍ତିୟେ ? ତିଆସନ୍‌ ଆମ୍ବେନ୍‌ ଞେନ୍‌ଆଡଙ୍‌ ଅଃବତଙ୍‌ବେନ୍‌ ? 12 ଆମ୍ବେନ୍‌ ଏଇଃୟମ୍‌ତେ ଡ ଞେନ୍‌ ଇନି ଲୁମ୍‌ତାୟ୍‌ ତିଆତେ ମନଙ୍‌ଡକୋ, ବନ୍‌ଡ ଲନୁମ୍‌ବେଞ୍ଜି ଞେନ୍‌ ଅବ୍‌ଜନାତାଜି, ଆରି କୁଣ୍ଡାୟ୍‌ବେଞ୍ଜି ଆମ୍ବେଞ୍ଜିଆଡଙ୍‌ ସାୟ୍‌ସିଲେ ଅଃରପ୍ତିବେଞ୍ଜି । 13 ଅଙ୍ଗା ଆଡିଡ୍‌ ଆମ୍ବେନ୍‌ ସନାୟ୍‌ସିନ୍‌ ଆସନ୍‌ ଏୟେତେ, ଆବନେଡ଼ା ଞେନ୍‌ଆଡଙ୍‌ ଅବ୍‌ମେଙଲେନ୍‌ ଗାମ୍‌ଲେ କୁଣ୍ଡାୟ୍‌ବେନଞ୍ଜି ବର୍ବାଜି, ବନ୍‌ଡ ରିଙ୍‌ଗେନ୍‌ ବାତ୍ତେ ପାଙ୍‌ରିଙ୍‌ତେ, ଅବୟ୍‌ ତନଙ୍‌ୟମନ୍‌ କୁଣ୍ଡାୟଞ୍ଜିଆଡଙ୍‌ ବୋୟ୍‌ଲେ ପାଙ୍‌ତେ; ବନ୍‌ଡ ଅଙ୍ଗା ମନ୍‌ରା ଅମଙ୍‌ଞେନ୍‌ ଆସାତନ୍‌ ଆନିନ୍‌ ଡେସାଲୋଙନ୍‌ ଡ ମଡ଼ିର୍‌ ବରୁଲୋଙ୍‌ବେନ୍‌ ଆ ସନୋଡ଼ାନେନ୍‌ ଏଞାଙ୍‌ତେ ।

14 ପ୍ରବୁନ୍‌ ବର୍ତନେ, ମନ୍‌ରାଞେଞ୍ଜି ଅମଙ୍‌ବାଞେନ୍‌ ୟର୍ନାୟ୍‌ତଜି । ମନ୍‌ରାଞେଞ୍ଜି ତଙର୍‌ରେଙନ୍‌ ଆ ଡନଙ୍‌ଡଙଜି ଅଡ଼୍‌କୋନ୍‌ ସବ୍‌ଙାଜା, ଆରି ତଙରନ୍‌ ତୁବେତଜି ଆରି ଅବ୍‌ଜାଡାଏତଜି ।

15 ଞେନ୍‌ ସୋଡ଼ା ଡ ମଡ଼ିର୍‌ ଇସ୍ୱର, ଆନା ଆଏଡ଼ର୍‌ ଆସନ୍‌ ଆମେଙ୍‌ ଡକୋ । ଞେନ୍‌ ଅବୟ୍‌ ସୋଡ଼ା ଡ ଡରକୋନେଲୋଙନ୍‌ ଡକୋଲନାୟ୍‌, ବନ୍‌ଡ ଞେନ୍‌ ନିୟ୍‌ ଲଗଡ୍‌ ବୁଡ୍ଡିମରଞ୍ଜି ଡ ଆରାବ୍‌ୟର୍‌ ବୁଡ୍ଡିତଞ୍ଜି ଆମନ୍‌ରା ସରିନ୍‌ ଡକୋତନାୟ୍‌ । ଇନିଆସନ୍‌ଗାମେଣ୍ଡେନ୍‌ ଆଡର୍ତଞ୍ଜି ଆମନ୍‌ରାଜି ଡ ଆସାଲନ୍‌ ଆଡ୍ରକୋତଞ୍ଜି ଆମନ୍‌ରାଜିଆଡଙ୍‌ ମବ୍‌ରଙ୍‌ତାଜି । 16 ଇନିଆସନ୍‌ଗାମେଣ୍ଡେନ୍‌ ଆମ୍ବେନ୍‌ ଅଡ଼୍‌କୋ ଡିନ୍ନାନ୍‌ ଅଃସଙ୍ଗତାବେନ୍‌, ଆରି ଆଏଡ଼ର୍‌ ବନ୍‌ଡ୍ରାବନ୍‌ ଅଃଡ୍ଡକୋଆୟ୍‌ ଏତ୍ତେଲେ ଲୁମ୍‌ଲାୟ୍‌ଡେନ୍‌ ପୁରାଡ଼ାନ୍‌ ଡ ଞେନ୍‌ ତରୁବ୍‌ଲାଙନ୍‌ ଆପରାନ୍ନାଜି ଅଡ଼୍‌କୋନ୍‌ ଅମଙ୍‌ବାଲେନ୍‌ ସିଲଡ୍‌ ଅସେଡ୍‌ତଜି । 17 ଞେନ୍‌ ଆ ଲନୋବନ୍‌ ଇର୍‌ସେନ୍‌ ଆସନ୍‌ ବରାବ୍‌ଲିୟ୍‌ କି ଆନିନ୍‌ଆଡଙ୍‌ ଅବ୍‌ଡଣ୍ଡାୟ୍‌ ଲାୟ୍‌, ବନ୍‌ରାବ୍‌ଞେନ୍‌ ସୟୁଏନ୍‌ କି ୟର୍ରନାୟ୍‌ ତିଆସନ୍‌ ଆଇସ୍ସୁମ୍‌ଡମନ୍‌ ବାତ୍ତେ ଆନିନ୍‌ ବୋଲ୍ଲେଏନ୍‌ ।

18 ଆନିନ୍‌ ଇନିଲୁମେନ୍‌ ଞେନ୍‌ ଗିୟ୍‌ଲାୟ୍‌, ବନ୍‌ଡ "ଞେନ୍‌ ଆନିଞ୍ଜିଆଡଙ୍‌ ମବ୍‌ନଙ୍‌ଲାଜି । ଞେନ୍‌ ଆନିଞ୍ଜିଆଡଙ୍‌ ଅବ୍‌ତୁରିୟ୍‌ ତାଜି ଆରି ସାୟ୍‌ସିତାଜି, ଆରି ଆନିନ୍‌ଆଡଙ୍‌ ଆରି ୟନେମରଞ୍ଜିଆଡଙ୍‌ ବବ୍‌ୟୁତାଜି । 19 ଆୟରେୟେଡାତଞ୍ଜି ଆମନ୍‌ରାଜି ଆମୁକ୍କାଲୋଙ୍‌ ଞେନ୍‌ ଅବ୍‌ସର୍ଡାତାଜି, ପ୍ରବୁନ୍‌ ବର୍ତନେ, ସଙାୟ୍‌ ଡ ତୁୟାଜନ୍‌ ଆମନ୍‌ରାଜି ଆଡଙ୍‌ ସନୟୁନ୍‌, ସନୟୁନ୍‌ ଡେଏତୋ ଆରି ଞେନ୍‌ ଆନିଞ୍ଜିଆଡଙ୍‌ ମବ୍‌ନଙ୍‌ତାଜି । 20 ବନ୍‌ଡ ପେଲ୍ଲାମରଞ୍ଜି ସମେଁୟ୍‌ଣ୍ଡ୍ରାନ୍‌ ଆ ଇଡ୍ଡୋୟ୍‌ଡାନ୍‌ ଅନ୍ତମ୍‌, ଇନିଆସନ୍‌ଗାମେଣ୍ଡେନ୍‌ ତିଆତେ ଆଙ୍ଗିୟ୍‌ ଅଃଗରିଏ, ଆରି ତି ଆ ଡାଆଲୋଙ୍‌ କାଡ୍ଡୋନ୍‌ ଡ ରାବ୍‌ଡାଲନ୍‌ ଆବରିୟ୍‌ ଡକୋତନ୍‌ । 21 ଇସ୍ୱରଞେନ୍‌ ବର୍ତନେ, ପେଲ୍ଲାମରଞ୍ଜି ଆସନ୍‌ ଆଙ୍ଗିୟ୍‌ ସନୟୁନ୍‌ ଅବୟ୍‌ତଡ୍‌ ।"