1 ଗିୟ୍‌ବା ଇସ୍ୱରନ୍‌ ଆସି ଡୋୟ୍‌ନାତଡ୍‌ ଡ ଅନୁରନ୍‌ ଅଃଞାଙେ ଅଡ଼େ ଆନିନ୍‌ ଆକାଲ୍ଲା ତଡ୍‌ ଡ ଆନିନ୍‌ ଅଃନମ୍‌ଡଙେ । 2 ଇର୍ସେବେନ୍‌ଞ୍ଜି ଅଡ଼୍‌କୋନ୍‌ ଆମ୍ବେଞ୍ଜି ଡ ଇସ୍ୱରବେନ୍‌ ଆମଙ୍‌ ସିଲଡ୍‌ ସଙାଜେନ୍‌ ଇର୍ସେବେଞ୍ଜି ଆସନ୍‌ ଆମ୍ବେଞ୍ଜି ସିଲଡ୍‌ ଆମୁକାନ୍‌ ଅବ୍‌ସସେନ୍‌ ତିଆସନ୍‌ ଆନିନ୍‌ ଅଃନମ୍‌ଡଙେ । 3 ଇନିଆସନ୍‌ଗାମେଣ୍ଡେନ୍‌ ଅସିବେନ୍‌ ମିଞାମନ୍‌ ଡ ଆମ୍ବେନ୍‌ ପାତ୍ୟାବରନ୍‌ ଏବର୍‌ତନ୍‌ ଆରି ଅଲାଙ୍‌ବେନ୍‌ ବାତ୍ତେ ପେଲ୍ଲାବରନ୍‌ ଏବର୍ତନେ ।

4 ଆନ୍ନିଙ୍‌ ଆଜାଡ଼ିବରନ୍‌ ବାତ୍ତେ ଇୟ୍‌ଲାୟ୍‌ କାକୁର୍ତିନେଡେନ୍‌ ଆମ୍ବେନ୍‌ ଏନମ୍‌ଡଙେ କି ଆନ୍ନିଙ୍‌ ଆଜାଡ଼ି ବରନ୍‌ ବର୍ରନ୍‌ଡେନ୍‌ ଏଃଡାଲୁଡେ; ଆନିଞ୍ଜି ପରାନ୍‌ସାତ୍ତିନ୍‌ ଆବର୍ନେ ଆସାତଞ୍ଜି କି କଣ୍ତାୟ୍‌ବରନ୍‌ ବର୍ତଞ୍ଜି, ଆନିଞ୍ଜି ବନ୍‌ଡ୍ରାବନ୍‌ କମ୍ପୋଲୋଙନ୍‌ ଡକ୍କୋଲେ କୋଡ୍‌ତଜି । 5 ଆନିଞ୍ଜି ବିସଜଡନ୍‌ ଆଡ୍‌ର୍ରେ ସେସେତଜି ଆରି କୁକୁଡିଆଙନ୍‌ ଜର୍ରିଙ୍‌ଜିଙନ୍‌ ତାୟ୍‌ତଜି, ଆନା ଆର୍ରେନ୍‌ ଜୋମ୍‌ତେ ଆନିନ୍‌ ରବୁତେ । ଆରି ତିଆତେ ଞନାଡାନ୍‌ ଡେଏନ୍‌ ଡେନ୍‌ ତେତ୍ତେ ସିଲଡ୍‌ ବିସଜଡନ୍‌ ଡୁଙ୍‌ତନାୟ୍‌ । 6 ଆନିଞ୍ଜି ଜାଲ୍ଲନ୍‌ ସିନରିନ୍‌ ଅଃଡେଏ, ଅଡ଼େ ଆନିଞ୍ଜି ତର୍ଡମ୍‌ କାବ୍ବାଲୋଙନ୍‌ ଆନିଞ୍ଜିଡମ୍‌ ଅଃନବ୍‌ସସଏଜି , ଆକାବାଡ଼ାଞ୍ଜି ଅଡ଼୍‌କୋନ୍‌ ଏର୍‌ଡରମ୍ମ ଡ ଆସିଞ୍ଜି ପେଲ୍ଲା କାବ୍ବାଡ଼ାନ୍‌ ଡକୋ । 7 ଆତଲ୍‌ଜଙଞ୍ଜି ଇର୍ସେକାବ୍ବାଡ଼ାଗଡ୍‌ ଜିର୍ତେ ଡ ଏର୍‌ଡୋସା ମରଞ୍ଜି ମିବ୍‌ଞାମ୍‌ଲେ ଅନବ୍‌ସେଡନ୍‌ ଆସନ୍‌ ଡଡଡ୍‌ ଜିର୍ତେ; ଆନିୟମଞ୍ଜି ଅଡ଼୍‌କୋନ୍‌ ଏର୍‌ଡରମ୍ମ ଆତଙରଞ୍ଜି ତଙିୟ୍‌ନେନ୍‌ ଅଡ଼େ ତେତ୍ତେ ଅନସେଡନ୍‌ ଡକୋ । 8 ଆତଙରଞ୍ଜି ସନୟୁନ୍‌ ଇନ୍ନିଙ୍‌ ପନ୍‌ସୁଆତି ଜନାଜି ତଡ୍‌; ଆନିଞ୍ଜି ଆମ୍ବେଞ୍ଜି ଆସନ୍‌ ତଙରବେନ୍‌ ଆବାଙ୍କୋଡ଼ୁ ଆନ୍ନିଙ୍‌ ଜାକିଁୟ୍‌ ତଙିଲନ୍‌ ଡେନ୍‌ ତେତ୍ତେ ସୟୁନ୍‌ ଅଃଜ୍ଜନାଏ ।

9 କେନ୍‌ ଆସନ୍ ସନ୍‌ସୁଆତିନ୍‌ ଅମଙ୍‌ଲେନ୍‌ ସିଲଡ୍‌ ସଙାତେ ଡରମ୍ମନ୍‌ ଅମଙ୍‌ଲେନ୍‌ ଅଃଡ୍ଡକୋନେ ଇନ୍‌ଲେଞ୍ଜି ସନ୍ନାଆରନ୍‌ ଜଗେତବୋ, ବନ୍‌ଡ ଗିୟ୍‌ବା, ଲୋଙଡନ୍‌; ସନ୍ନାଆରନ୍‌ ଜଗେତବୋ ବନ୍‌ଡ ଇନ୍‌ଲେଞ୍ଜି ଲୋଙଡ୍‌ଲୋଙନ୍‌ ବୁଲ୍ଲେତବୋ । 10 ଇନ୍‌ଲେଞ୍ଜି କାଡ଼ୁମରନ୍‌ ଅନ୍ତମ୍‌ କିନ୍ତାଲନ୍‌ ଅଡ଼େତେ ଅଡ଼େନେ ସାୟ୍‌ତବୋ, ଓ ଅମଡ୍‌ତଡନ୍‌ ଆ ମନ୍‌ରା ଅନ୍ତମ୍‌ ଅଡ଼େତେ ଅଡ଼େନେ ଡେତାୟ୍‌; ଇନ୍‌ଲେଞ୍ଜି ସାଲୁମନ୍‌ ଅନ୍ତମ୍‌ ତମ୍ୱାନ୍‌ ତୁଡ୍ଡୁବ୍‌ତାୟ୍‌; ଇନ୍‌ଲେଞ୍ଜି ଜେଲ୍‌ଜେଲ୍‌ଜନଙ୍‌ଡେନ୍‌ ଅବୟ୍‌ ଆରବୁମରନ୍‌ ଅନ୍ତମ୍‌ ଗିୟ୍‌ତାୟ୍‌ । 11 ଞେନ୍‌ ଅଡ଼୍‌କୋନ୍‌ କମ୍ୱୁଡନ୍‌ ଅନ୍ତମ୍‌ ବାବ୍ବାବ୍‌ତବୋ ଡ କୁକୁରନ୍‌ ଅନ୍ତମ୍‌ ଗୋଗୋୟ୍‌ ୟେତବୋ; ଇନ୍‌ଲେଞ୍ଜି ପନ୍‌ସୁଆତୁନ୍‌ ଜଗେତବୋ ବନ୍‌ଡ ତିଆତେ ଅବୟ୍‌ତଡ, ଅନୁରନ୍‌ ଜଗେତବୋ ବନ୍‌ଡ ଅମଙ୍‌ଲେନ୍‌ ସିଲଡ୍‌ ସଙାୟ୍‌ ଡକୋ ।

12 ଇନିଆସନ୍‌ଗାମେଣ୍ତେନ୍‌ ମୁକାଲୋଙ୍‌ବେନ୍‌ ସିଲଡ୍‌ ଏର୍‌ଡରମ୍ମନ୍‌ ଗୋଗୋୟ୍‌ଲେ ପାଙେନ୍‌ ଡ ଇର୍ସେନ୍‌ ବିରୁଦଲୋଙ୍‌ଲେନ୍‌ ସାକିନ୍‌ ତିୟ୍‌ତେ; ତି ଆସନ୍‌ ଏର୍‌ଡରମ୍ମଲେଞ୍ଜି ଅମଙ୍‌ଲେନ୍‌ ଅଡ଼୍‌କୋ‌ନ୍‌ ଡକୋ ଡ ଇର୍ସେଲେଞ୍ଜି ଅଡ଼୍‌କୋନ୍‌ ଞେନ୍‌ ଜନା । 13 ଇନ୍‌ଲେଞ୍ଜି ଇସ୍ୱରନ୍‌ ଆମଙ୍ ସିଲଡ୍‌ ସଙାତାୟ୍‌ ଡ ରୁମ୍‌ଡେଲେ ତୁସେଲେ ଆବର୍ନେ କଣ୍ତାୟ୍‌ବରନ୍‌ ଞମ୍‌ଲେ ଉଗ୍ଗରଲୋଙ୍‌ ଆସିନ୍ତା ଲୋଙ୍‌ ଅମ୍‌ଡୁଙ୍‌ତାୟ୍‌ବୋ । 14 ତି ଆସନ୍‌ଲନ୍‌ ପନ୍‌ସୁଆତିନ୍‌ କିଣ୍ତୋଙ୍‌ତନ୍‌ ଡ ଡରମ୍ମନ୍‌ ସଙାୟ୍‌ ତନଙ୍‌ତେ; ମଡିରୋଡନ୍‌ ଆଜାଡ଼ିନ୍‌ ଅଞିଡେନ୍‌ ଡ ଲବଡ୍ଡିନ୍‌ ଗନ୍‌ଲେ ଅଃରପ୍ତିଏ । 15 ଆଜାଡ଼ିନ୍‌ ଅସୁଜେନ୍‌ ପରାନ୍‌ସାତ୍ତିଲୁମଞ୍ଜି ଅମ୍‌ରେଙେବା ଆନିନ୍‌ଡମ୍‌ ଜୁରୁଡନ୍‌ ଅନ୍ତମ୍‌; ଆରି ଇସ୍ୱରନ୍‌ କେନ୍‌ ଆତେ ଗିଜେନ୍‌; ଆରି ଆଜାଡ଼ି ପନ୍‌ସୁଆତିନ୍‌ ଅବୟ୍‌ତଡନ୍‌ ଆସନ୍‌ ବର୍ରାବେନ୍‌ ।

16 ଆରି ଆନିନ୍‌ ଗିଜେନ୍‌ ଡ ଆନ୍ନିଙ୍‌ ଓବ୍ବାସିଜନ୍‌ ନମି ଅବୟ୍‌ତଡ୍‌, ଆନ୍ନିଙ୍‌ତଡ୍‌ ଗାମ୍‌ଲେ ଆନିନ୍ ଓଙେନ୍‌; ଇନିଆସନ୍‌ ଆ ବୋର୍ସାନ୍‌ ବାତ୍ତେ ଆନିନ୍‌ ଅନୁରନ୍‌ ତିଏନ୍‌ କି ଆଡରମ୍ମମା ଆନିନ୍‌ ଞମ୍‌ଲେ ସେଡେନ୍‌ । 17 ଆନିନ୍‌ ଡରମ୍ମ ମାୟଙନ୍‌ ଆଡରଙ୍‌ନେ ଅନ୍ତମ୍‌ ରଲନେ, ଅନୁରନ୍‌ ରନୁବ୍ବବନ୍‌ ଅନ୍ତମ୍‌ ରୁବ୍‌ବବ୍‌ଲନ୍‌ ଆରି ଡନୁଲନ୍‌ ଆସନ୍‌ ପନବ୍‌ରଡ୍‌ ସରିନ୍‌ ଜିଜିଲନ୍‌ ଆରି ସଙ୍ଗା ସିଲଡ୍‌ ଜାୟ୍‌ତାନ୍‌ ଆଜ୍‌ନିଜି ରଲଞ୍ଜି । 18 ବେନ୍ନେରାମରଞ୍ଜି ଆକାବାଡ଼ାଞ୍ଜି ବାତ୍ତେ ବିରୁଦମରଞ୍ଜି ଆବନ୍‌ର୍ରାବନ୍‌ ଆବଡିଡ୍‌ତେ ଡ ଆବନ୍ନେରାମର୍ରଞ୍ଜି ପନବ୍‌ରଡନ୍‌ ଆନିନ୍‌ ତିୟ୍‌ତେ; ମଡି ସମେଙ୍‌ଡ୍ରାନ୍‌ ଡେପ୍ପାନ୍‌ ଆପିଙ୍ଗତୋଡଞ୍ଜି ସୁଜାୟ୍‌ତନ୍‌ । 19 ତିଲୋଙ୍‌ ମନ୍‌ରାଞ୍ଜି ବରୁବ୍‌ୟୋଙ୍‌ଗଡ୍‌ ଇସ୍ୱରନ୍‌ ଆଞୁମ୍‌ ଡ ଡରୁଙ୍‌ୟୋଙ୍‌ଗଡ୍‌ ମନ୍‌ରାଞ୍ଜି ଆ ବୋର୍ସାନ୍‌ ବତଙ୍‌ତଜି; ଇନିଆସନ୍‌ଗାମେଣ୍ଡେନ୍‌ ଇସ୍ୱରନ୍‌ ଆତନଙ୍‌ୟମ୍‌ ବାତ୍ତେ ଡାଆନ୍‌ ଆପରେତେନ୍‌ ଅନ୍ତମ୍‌ ବନ୍ନେରାମରଞ୍ଜି ଜିର୍ତାଜି ।

20 ଆରି ଇସ୍ୱରନ୍‌ ବର୍ତନେ, "ସିଓନନ୍‌ ଡ ଜାକୁବନ୍‌ ଆନାଜି ଏର୍‌ଡରମ୍ମଲୋଙନ୍‌ ସିଲଡ୍‌ ୟର୍ତନାଜି ଆମଙ୍‌ବାଞ୍ଜି ସିଲଡ୍‌ ଅବୟ୍‌ ଅନୁର୍‌ମରନ୍‌ ଜିର୍ତାୟ୍‌ । 21 ଇସ୍ୱରନ୍‌ ଆବର୍ନେନ୍‌ ବର୍ତନେ, ଆନିଞ୍ଜି ସରିନ୍‌ ଅବୟ୍‌ ଅନଗଡନ୍‌ ଅକେନ୍‌, ପୁରାଡ଼ାଲେନ୍‌ ଅମଙ୍‌ଲୋଙ୍‌ବେନ୍‌ ଇୟ୍‌ତାୟ୍‌ ପନ୍ନେ ଡ ବର୍ନେଲେନ୍‌ ଅଡ଼୍‌କୋନ୍‌ ମୁକାଲୋଙ୍‌ବେନ୍‌ ଏଡକ୍କୋତାୟ୍‌, ତିଆତେ ମୁକାଲୋଙ୍‌ବେନ୍‌ ସିଲଡ୍‌ ଆରି କେଜ୍ଜାବେନ୍‌ ଆମୁକ୍କାଲୋଙ୍‌ ସିଲଡ୍‌ ଆରି ଡ କେଜ୍ଜାଲୋଙ୍‌ବେନ୍‌ ସିଲଡ୍‌ ଆଡ୍ରୁଙ୍‌ତନାଞଞ୍ଜି ଆକେଜ୍ଜା ଆମୁକ୍କାଲୋଙ୍‌ ସିଲଡ୍‌ ଲଙେ ସିଲଡ୍‌ ଆଏଡ଼ର୍‌ ଆସନ୍‌ ସନବ୍‌ଙାଜନ୍‌ ଡେତେ,"