1 ଆନାଜି ଅମଙ୍‌ବାଞେନ୍‌ ଅଃପାର୍ତନାଲଞ୍ଜି, ଆନିଞ୍ଜି ମା ଞେନ୍‌ଆଡଙ୍‌ ସାୟ୍‌ଡଙ୍‌ତିୟ୍‌ଜି; ଆନାଜି ଞେନ୍‌ଆଡଙ୍‌ ଅଃସାୟ୍‌ଲିଞ୍ଜି, ଆଜିଞ୍ଜି ଞେନ୍‌ଆଡଙ୍‌ ରବାଙ୍‌ଲିୟ୍‌ଜି; ଅଙ୍ଗା ଆଡେସାବାଜି ଅଞୁମ୍‌ଲୋଙ୍‌ଞେନ୍‌ ଆଙ୍ଗିୟ୍‌ ଆନ୍ନିଙ୍‌ ଅନ୍‌ରଙ୍‌ଜନାଏଜି, ଆନିଞ୍ଜିଆଡଙ୍‌ ଞେନ୍‌ଆଡଙ୍‌ ଗିଜିୟ୍‌ବା, ଞେନ୍‌ଆଡଙ୍‌ ଗିଜିୟ୍‌ବା, ଞେନ୍‌ ଆନିଞ୍ଜିଆଡଙ୍‌ ବର୍ରାଜି । 2 ଅଙ୍ଗା ମନ୍‌ରାଜି ତର୍ଡମ୍‌ ତର୍ଡମ୍‌ ଆନିୟମ୍‌ ବାତ୍ତେ ଇର୍ସେ ତଙର୍‌ଗଡ୍‌ ଜିରେଞ୍ଜି, ଏନ୍ନେଗନ୍‌ ଗୋଡ଼େନ୍‌ ଆରମ୍‌ଡୁଙ୍‌ତାଞଞ୍ଜି ଆମନ୍‌ରାଜି ଆସନ୍‌ ଞେନ୍‌ ତମ୍ପରୁବ୍‌ ଅସିଞେନ୍‌ ତେକ୍କେଲେ ଡକ୍କୋଲାୟ୍‌ । 3 ତି ଆମନ୍‌ରାଜି କୋତ୍ତାଲୋଙନ୍‌ ଅନମଙନ୍‌ ତିୟ୍‌ଲେ ଆରି ଇଟାନ୍‌ ପାଙ୍‌ଲେ ତୋଣ୍ଡୋଇଟାନ୍‌ ତନୁମ୍ମୋଡନ୍‌ ସୟ୍‌ଲେ ମୁକାବାଞେନ୍‌ ଅଡ଼୍‌କୋ ଡିନ୍ନା ଞେନ୍‌ଆଡଙ୍‌ ବିଜ୍ଜାର ଏମ୍ମେଲିୟ୍‌ଜି । 4 ଆନିଞ୍ଜି ମସାନ୍ନିରେଙନ୍‌ ତଙ୍କୁମ୍‌ତଜି ଆରି ଆସସଡରକୋନେରେଙନ୍‌ ଇୟ୍‌ତେ ଡକୋନେଜି; ଆନିଞ୍ଜି କିମ୍ବୋନ୍‌ଜେଲନ୍‌ ଜୋମ୍‌ତଜି ଆରି ଆ ସଡ଼ୁଲୋଙଞ୍ଜି ଅରର୍‌ସମିୟ୍‌ଡାନ୍‌ ଆଡାଜେଲ୍‌ଜି ଡକୋତନ୍‌ । 5 ଆନିଞ୍ଜି ବର୍ତଞ୍ଜି, ତର୍ଡମ୍‌ ଡରକୋଲୋଙ୍‌ବେନ୍‌ ଡକୋନାବା, ଅମଙ୍‌ବାଲେନ୍‌ ଏଜିର୍‌ଡଙାୟ୍‌, ଇନିଆସନ୍‌ଗାମେଣ୍ଡେନ୍‌ ଆମ୍ବେଞ୍ଜି ସିଲଡ୍‌ ଞେନ୍‌ ମଡ଼ିର୍‌ଡମ୍‌, କେନ୍‌ଆନିଞ୍ଜି ଅମୁଞେନ୍‌ ବାତ୍ତେ ଗାମୋଡ୍‌ତଞ୍ଜି, ତମ୍ପରୁବ୍‌ ତଗୋନ୍‌ ଆଡୁଡୁନ୍‌ ଡକୋତନ୍‌ ।

6 ଗିୟ୍‌ବା, ତେମଡ୍‌ଞେନ୍‌ କେନ୍‌ଆତେ ଆଇଡିଡ୍‌ ଡକୋ; ଞେନ୍‌ ଅବ୍‌କଡ଼ିଙ୍‌ଲନ୍‌ ଅଃଡକୋନାୟ୍‌ ବନ୍‌ଡ ଆଇର୍ସେଞ୍ଜି ଆସନ୍‌ ଞେନ୍‌ ଆନିଞ୍ଜିଆଡଙ୍‌ ଡଣ୍ଡାୟ୍‌ତାଜି । 7 ପ୍ରବୁନ୍‌ ବର୍ରତେ, ଆମ୍ବେଞ୍ଜି ବରୁନ୍‌ ଆତୋଣ୍ଡୋ ସନୟ୍‌ ତନୁମ୍ମୋଡନ୍‌ ଏସୟ୍‌ତେ ଆରି ତଡ଼କୁବନ୍‌ ଆତୋଣ୍ଡୋ ଞେନ୍‌ଆଡଙ୍‌ ଏନିଣ୍ଡୟ୍‌ତିୟ୍‌ । ଇର୍ସେବେଞ୍ଜି ଡ ପୁର୍ବା ଜୋଜୋବେଞ୍ଜି ଆ ଇର୍ସେ ଆସନ୍‌ ଞେନ୍‌ ଆମ୍ବେଞ୍ଜିଆଡଙ୍‌ ଆବସାଣ୍ଡନ୍‌ ଡଣ୍ଡାୟ୍‌ତବେନ୍‌ । ତିଆସନ୍‌ ଆ ଇର୍ସେ କାବ୍ବାଡ଼ାଞ୍ଜି ଗିୟ୍‌ଲେ ଞେନ୍‌ ଆନିଞ୍ଜିଆଡଙ୍‌ ଡଣ୍ଡାୟ୍‌ତାଜି ।"

8 ପ୍ରବୁନ୍‌ କେନ୍‌ ଆବର୍ନେ ବର୍ତନେ, ଦ୍ରାକ୍ୟାନ୍‌ ଆଜମ୍ପାଲୋଙ୍‌ ଏଙ୍ଗାଲେ ରଙ୍‌ ଦ୍ରାକ୍ୟାଡାନ୍‌ ଞାଙ୍‌ତବୋ ଆରି ମନ୍‌ରାଞ୍ଜି ବର୍ତଞ୍ଜି କେନ୍‌ଆତେ ଅଃମ୍ମୋସାବା, ଇନିଆସନ୍‌ଗାମେଣ୍ଡେନ୍‌ କେନ୍‌ତ୍ତେନେ ଆସିର୍ବାଦତଡ୍‌, ତିଅନ୍ତମ୍‌ ଞେନ୍‌ କମ୍ବାରିମର୍‌ଞେଞ୍ଜି ଆସନ୍‌ ଲୁମ୍‌ତାୟ୍‌, ଞେନ୍‌ ଅଡ଼୍‌କୋମନ୍‌ରାନ୍ ଅଃନବ୍‌ସେଡାଜି । 9 ଞେନ୍‌ ଜାକୁବନ୍‌ ଆମଙ୍‌ସିଲଡ୍‌ ଆରି ଜିଉଦାନ୍‌ ଆମଙ୍‌ସିଲଡ୍‌ ବରୁଞେଞ୍ଜି ଅବୟ୍‌ ଡନେମର୍‌ ଅମ୍‌ଡୁଙ୍‌ତାୟ୍‌ ଆରି ସନେଡାମର୍‌ଞେନ୍‌ ତିଆତେ ଡନେତେ,ଆରି କମ୍ବାରିମର୍‌ଞେଞ୍ଜି ତେତ୍ତେ ଡକୋତଞ୍ଜି । 10 ଆନାଜି ମନ୍‌ରାଞେଞ୍ଜି ଆନିଞ୍ଜି ଞେନ୍‌ଆଡଙ୍‌ ସାୟ୍‌ତିୟ୍‌ଞ୍ଜି, ଆନିଞ୍ଜି ଆସନ୍‌ ସାରୋଣଲୋଙନ୍‌ ଅବୟ୍‌ ମେଣ୍ଡାଗୁଆଡ଼ାନ୍‌ ଡ ଆକୋର ଗର୍ଡଲୋଙନ୍‌ ତାଙ୍‌ଲିୟଞ୍ଜି ଆର୍‌ଲୁଡ୍‌ଲୁଡ୍‌ ଡେତେ ।

11 ବନ୍‌ଡ ଆମ୍ବେନ୍‌ ପ୍ରବୁନ୍‌ଆଡଙ୍‌ ଆକ୍ରରୋଡାଲବେନ୍‌ ଆମନ୍‌ରାଜି, ମଡ଼ିର୍‌ ବରୁଞେନ୍‌ ଆକ୍ରରୋଡାତେଞ୍ଜି ଆମନ୍‌ରାଜି, କରମ୍ମାଗିୟ୍‌ ସନୁମନ୍‌ ଆସନ୍‌ ମେଜନ୍‌ ଏବ୍‌ଜାଡାତେ ଅଡ଼େ ଗାଦ୍‌ ଡ ମେନି ସନୁମଞ୍ଜି ଆସନ୍‌ ସିମ୍ମାଲୋଙନ୍‌ ଦ୍ରାକ୍ୟାଡାନ୍‌ ଆମ୍ବେନ୍‌ ଏମାୟ୍‌ତେ । 12 ଞେନ୍‌ ଆମ୍ବେଞ୍ଜିଆଡଙ୍‌ କଡ଼ିବନ୍‌ ବାତ୍ତେ ରନବ୍ବୁନ୍‌ ଆସନ୍‌ ଗବ୍‌ରିଲାୟ୍‌ ଆରି ଅଡ଼୍‌କୋନ୍‌ବେନ୍‌ ରନବ୍ବୁନ୍‌ ଆଡ୍ରେଲୋଙ୍‌ତେନ୍‌ ଏବରୁମ୍‌ତେ, ଇନିଆସନ୍‌ଗାମେଣ୍ଡେନ୍‌ ଞେନ୍‌ ଆମ୍ବେଞ୍ଜିଆଡଙ୍‌ ଅରୋଡ୍ଡେଲବେନ୍‌ ଆଡିଡ୍‌ ଆମ୍ବେନ୍‌ ଏଜ୍ଜାଲଙ୍‌ଲିୟ୍‌ ଞେମ୍‌ ବରର୍ରନାଞନ୍‌ ଆଡିଡ୍‌ ଆମ୍ବେଞ୍ଜି ଏଃନମ୍‌ଡଙ୍‌ଲୋ । ବନ୍‌ଡ ଗନିୟ୍‌ଗିୟ୍‌ଲୋଙ୍‌ଞେନ୍‌ ଅଙ୍ଗାତେ ମନଙ୍‌ତଡ୍‌ ଆରି ଅଙ୍ଗାତେ ଆମ୍ବେନ୍‌ ଏଲୁମେନ୍‌ ଆରି ଞେନ୍‌ ଅଃସର୍ଡାଏ ତିମା ଆତେ ଏସେଡାଏନ୍‌ । 13 ତିଆସନ୍‌ ପ୍ରବୁନ୍‌ କେନ୍‌ ଆବର୍ନେ ବର୍ତନେ, ଗିୟ୍‌ବା, କମ୍ବାରିମର୍‌ଞେଞ୍ଜି ଗାଗାତଞ୍ଜି ବନ୍‌ଡ ଆମ୍ବେନ୍‌ଞ୍ଜି ଇର୍‌ଗାଲ୍‌ତଜି, ଗିୟ୍‌ବା କମ୍ବାରିମର୍‌ଞେଞ୍ଜି ଗାତଜି ବନ୍‌ଡ ଆମ୍ବେନ୍‌ଞ୍ଜି ଇର୍‌ଗାଲ୍‌ତବେନ୍‌, ଗିୟ୍‌ବା ଲମ୍ବାରିମର୍‌ଞେଞ୍ଜି ସର୍ଡାଲଞ୍ଜି ବନ୍‌ଡ ଆମ୍ବେନ୍‌ଞ୍ଜି ଗରୟ୍‌ତବେନ୍‌ । 14 ଗିୟ୍‌ବା, କମ୍ବାରିମର୍‌ଞେଞ୍ଜି ଆମନ୍ନ ଆ ସୁକ୍କ ଆସନ୍‌ କନ୍‌ତଜି, ବନ୍‌ଡ ଆମ୍ବେଞ୍ଜି ମନ୍ନଲୋଙ୍‌ବେନ୍‌ ଡୁକ୍କନ୍‌ ଡକୋନ୍‌ ଆସନ୍‌ ଆରି ପୁରାଡ଼ାନ୍‌ ବିକ୍କଡ଼ନ୍‌ ଆସନ୍‌ ଏୟେୟେଡାତନ୍‌; ଆରି ଆନିନ୍‌ ଆକମ୍ବାରିଞ୍ଜିଆଡଙ୍‌ ନିୟ୍‌ ଆନ୍ନା ଆଞୁମ୍‌ଲୋଙ୍‌ ମନ୍‌ରାଞ୍ଜି ଜନାତଜି । 15 ଆରି ଆମ୍ବେନ୍‌ଞ୍ଜି ଞେନ୍‌ ସରେଡାଲାଞଞ୍ଜି ଆମନ୍‌ରାଜି ଆମଙ୍‌ବା ଅଞୁମ୍‌ବେନ୍‌ ସନୟ୍‌ପନ୍‌ ଅନ୍ତମ୍‌ ଏଡକ୍କୋତେ ଆରି ପ୍ରବୁନ୍‌ ଆମ୍ବେଞ୍ଜିଆଡଙ୍‌ ରବ୍ବୁତବେନ୍‌, ଆରି ଆନିନ୍‌ ଆକମ୍ବାରିଞ୍ଜିଆଡଙ୍‌ ଆନ୍ନା ଆଞୁମ୍‌ ମନ୍‌ରାଞ୍ଜି ଜନାତଜି । 16 ଅଙ୍ଗା ଆମନ୍‌ରା ପୁର୍ତିଲୋଙନ୍‌ ଆନିନ୍‌ଡମ୍‌ ଆସିର୍ବାଦତନେନ୍‌ ଆନିନ୍‌ ଆଜାଡ଼ି ଇସ୍ୱରନ୍‌ ଆମଙ୍‌ସିଲଡ୍‌ ଆନିନ୍‌ଡମ୍‌ ଆସିର୍ବାଡମ୍‌ଲନ୍‌ ଆରି ଅଙ୍ଗା ଆମନ୍‌ରା ପୁର୍ତିଲୋଙନ୍‌ ପର୍‌ର୍ମାଡ଼ାତନ୍‌, ଆନିନ୍‌ ଆଜାଡ଼ି ଇସ୍ୱରନ୍‌ ବାତ୍ତେ ପର୍ମାଡ଼ାତନ୍‌ । ଇନିଆସନ୍‌ଗାମେଣ୍ଡେନ୍‌ ଆମ୍ମୁଙ୍‌ ଆବର୍ନେଜି ଅମ୍ମନେବୋ ଆରି ଅନ୍ନିୟମ୍‌ବୋ ।

17 ଇନିଆସନ୍‌ଗାମେଣ୍ଡେନ୍‌ ଗିୟ୍‌ବା, "ଞେନ୍‌ ରଙ୍‌ ରୁଆଙନ୍‌ ଡ ପୁର୍ତିନ୍‌ ଗବ୍‌ଡେଲ୍‌ତାୟ୍‌ ଆରି ଆମ୍ମୁଙ୍‌ ଆବର୍ନେଜି ଆରି ଅଃମ୍ମନେବୋ, ଅଡ଼େ ମନ୍ନଲୋଙ୍‌ଲେନ୍‌ ଅଃନ୍ନିୟମ୍‌ବୋ । 18 ବନ୍‌ଡ ଅଙ୍ଗାଆତେ ଞେନ୍‌ ଗବ୍‌ଡେଲ୍‌ଲାୟ୍‌, ଆମ୍ବେଞ୍ଜି ଆଏଡ଼ର୍‌ ତେତ୍ତେ ସର୍ଡାନ୍‌ ବାତ୍ତେ ମଅୟ୍‌ନାବା; ଇନିଆସନ୍‌ଗାମେଣ୍ଡେନ୍‌ ଗିୟ୍‌ବା, ଞେନ୍‌ ଜିରୁସାମଲ ମନଅଁଞନ୍‌ ଅନ୍ତମ୍‌ ଆରି ତେତ୍ତେ ଆମନ୍‌ରାଜିଆଡଙ୍‌ ସର୍ଡାନ୍‌ ଅବ୍‌ନମ୍‌ଡୁଙ୍‌ଲାୟ୍‌ । 19 ଆରି ଞେନ୍‌ ଜିରୁସାଲମ୍‌ଲୋଙନ୍‌ ମଅୟ୍‌ତନାୟ୍‌ ଆରି ମନ୍‌ରାଞେଞ୍ଜି ଆମଙ୍‌ ସର୍ଡାତନାୟ୍‌; ଆରି ତେତ୍ତେ ୟନେନ୍‌ ଆସନଡ୍ଡା, ଅଡ଼େ ୟେୟେଡାନ୍‌ ଆସନଡ୍ଡା ଅଃସଡ୍ଡାଏ । 20 ଆବନେଡ଼ା ସିଲଡ୍‌ ତେତ୍ତେ ସନ୍ନା ଅବୟ୍‌ ଆରେସାସିଜନ୍‌ ଅଡ଼େ ଡିନ୍ନା ଆବୁଡାଡମଞ୍ଜି ଆମନ୍‌ରା ଆରି ଅଃଡକୋଏ; ଇନିଆସନ୍‌ଗାମେଣ୍ଡେନ୍‌ ବସଅ ବର୍ସେଙ୍‌ଲୋଙ୍‌ ରବୁତେ ଆରି ଇର୍ସେମରନ୍‌ ବସଅ ବର୍ସେଙ୍‌ ଡେଏନ୍‌ ଡେନ୍‌ ଆନିନ୍‌ ସନୟ୍‌ପନ୍‌ ଡେତେ । 21 ଆରି, ମନ୍‌ରାଞ୍ଜି ଅସିଙନ୍‌ ତୁବ୍‌ଲେ ତେତ୍ତେ ଡକୋତଞ୍ଜି ଆରି ଆନିଞ୍ଜି ଦ୍ରାକ୍ୟାକୋତ୍ତାନ୍‌ ତୁବ୍‌ଲେ ତେତ୍ତେ ସିଲଡ୍‌ ଦ୍ରାକ୍ୟାଜନ୍‌ ଜୋମ୍‌ତଜି । 22 ଆନିଞ୍ଜି ଅସିଙନ୍‌ ତୁବେଞ୍ଜିଡେନ୍‌, ଆନ୍ନିଙ୍‌ ତେତ୍ତେ ଅଃଡକୋନେଜି; ଆନିଞ୍ଜି ଦ୍ରାକ୍ୟାନୁବନ୍‌ ଗୁଏଞ୍ଜିଡେନ୍‌ ଆନ୍ନିଙ୍‌ ଦ୍ରାକ୍ୟାଜନ୍‌ ଅଃଜୋମେଜି । ଇନିଆସନ୍‌ଗାମେଣ୍ଡେନ୍‌ ମନ୍‌ରାଲେଞ୍ଜି ଆନମେଙ୍‌ ଡ ଅରାନ୍‌ଞ୍ଜି ଆନମେଙ୍‌ ଅନ୍ତମ୍‌ ଡେତଜି ଆରି ଞେନ୍‌ ସରେଡାଲାଞଞ୍ଜି ଆମନ୍‌ରାଜି ଗୋଗୋୟ୍‌ ଡିନ୍ନା ଜାୟ୍‌ ଆନିଞ୍ଜିଡମ୍‌ ଆର୍‌ଲୁମେଞ୍ଜି ଆକାବ୍ବାଡ଼ା ଆବଡି ଞାଙ୍‌ତଜି । 23 ଆନିଞ୍ଜି କାଜ୍ଜାନ୍‌ ଅଃକାବାଡ଼ାନେଜି, ଅଡ଼େ ବନ୍ତଙନ୍‌ ଆସନ୍‌ ଅଃକୋଡେଜି; ଇନିଆସନ୍‌ଗାମେଣ୍ଡେନ୍‌ ଆନିଞ୍ଜି ଡ ଆନିଞ୍ଜି ସରିନ୍‌ ଆଡ୍ରକୋଲଞ୍ଜି ଆ ଅନ୍‌ଞ୍ଜି ପ୍ରବୁନ୍‌ ଆ ଆସିର୍ବା ଆକେଜ୍ଜାଜି । 24 ଇନ୍ନେଗ ଡେତେ ଡ ଆନିଞ୍ଜି ଅନ୍‌ର୍ରଙ୍‌ ଓଡ୍ଡେଇଞଞ୍ଜି ଞେନ୍‌ ଜାଲଙ୍‌ତାଜି ଆରି ଆନିଞ୍ଜି ବର୍ନା ବର୍ନା ଞେନ୍‌ ଅମ୍‌ଡଙ୍‌ତାୟ୍‌ । 25 ବଲିଆନ୍‌ ଡ ଆ ଅନ୍‌ମେଣ୍ଡାନ୍‌ ଏକାନ୍‌ ଡକୋତଞ୍ଜି ଆରି ସିଅକିଡନ୍‌ ତାଙ୍‌ଲେୟନ୍‌ ଅନ୍ତମ୍‌ ଅଗାବନ୍‌ ଜୋମ୍‌ତେ; ଆରି ଜାରଡ଼ିଲନ୍‌ ଜାଆଡନ୍‌ ଆଜନୋମ୍‌ ଡେତେ । ଆନିଞ୍ଜି ମଡ଼ିର୍‌ ବରୁଞେନ୍‌ ଅନ୍ନିଙ୍‌ଲୋଙ୍‌ ସଙ୍ଗତ୍ତାନ୍‌ ଅଡ଼େ ରନବ୍ବୁନ୍‌ ଅଃଡ୍ଡେଏ, କେନ୍‌ଆତେ ପ୍ରବୁନ୍‌ ବର୍ତନେ ।"