1 ଇସ୍ୱରବେନ୍‌ ଗାମ୍‌ତେ, "ମନ୍‌ରାଞେଞ୍ଜିଆଡଙ୍‌ ବବ୍‌ୟୋବାଜି, " ଆନିଞ୍ଜିଆଡଙ୍‌ ବବ୍‌ୟୋବାଜି ।

2 "ଜିରୁସାଲମନ୍‌ ଆମନ୍‌ରାଜିଆଡଙ୍‌ ଅନବ୍‌ଉୟୁବନ୍‌ ଆବର୍ନେ ବର୍ବାଜି ।

ଇନିଆସନ୍‌ଗାମେଣ୍ଡେନ୍‌ ଆନିଞ୍ଜି ଗୋଗୋୟ୍‌ ଡିନ୍ନା ଜାୟ୍‌ ଡନଣ୍ଡାୟନ୍‌ ଞାଙେଞ୍ଜି

ଆ ଇର୍ସେଞ୍ଜି ଆସନ୍‌ ଇସ୍ୱରନ୍‌ ଆନିଞ୍ଜିଆଡଙ୍‌ ବାଗୁନା ଦଣ୍ଡାୟେଞ୍ଜି କି ମନଙ୍‌ବରନ୍‌ ବର୍ରନାବା,

ବନ୍‌ଡ ନମି ଆନିଞ୍ଜି କେମ୍ମାନ୍‌ ତନିୟନ୍‌ ଡେଏନ୍‌ ।"

3 ଅବୟ୍‌ ମନ୍‌ରାନ୍‌ ଆ ସର୍ରଙ୍‌ ସଡ୍ଡାତେ,

"ଆମ୍ବେନ୍‌ ଆରିଙ୍‌ରିଙ୍‌ଲୋଙନ୍‌ ପ୍ରବୁନ୍‌ ଆସନ୍‌ ତଙରନ୍‌ ଅବ୍‌ଜାଡାବା,

ଇସ୍ୱରଲେନ୍‌ ଆସନ୍‌ ଲକିୟ୍‌ଲରେଙନ୍‌ ତଙରନ୍‌ ଅବ୍‌ଲାଙ୍‌ବା ।

4 ଅଡ଼୍‌କୋ ଗର୍ଡଞ୍ଜି ବବ୍‌ରିୟ୍‌ତନେ,

ଆରି ଅଡ଼୍‌କୋ ବରୁଞ୍ଜି ଡ ତଡ଼କୁବଞ୍ଜି ଅବ୍‌ଜାୟ୍‌ତାତନେ,

ଆବାଙ୍କଡ଼ୋନ୍‌ ଆ ତଙର୍‌ଜି ବିଙୟ୍‌ତେ,

ଆରି ତୋଣ୍ଡୋ ଜାୟ୍‌ତାନ୍‌ ଆ ଲବଜି ଗରିଡମ୍‌ ଆ ତଙର୍‌ ଡେତେ ।

5 ଆରି ଇସ୍ୱରନ୍‌ ଆଗନୁଗୁ ଗିୟ୍‌ତାତେ.

ଆରି ପୁର୍ତିନ୍‌ ଆମନ୍‌ରାଜି ଅଡ଼୍‌କୋନ୍‌ ଗିୟ୍‌ତଜି,

ଇନିଆସନ୍‌ଗାମେଣ୍ଡେନ୍‌ ପ୍ରବୁନ୍‌ ଆନିନ୍‌ଡମ୍‌ କେନ୍‌ ଆବର୍ନେ ବର୍ରନେ ।"

6 ଅବୟ୍‌ ମନ୍‌ରାନ୍‌ ଆସର୍ରଙ୍‌ "ସଡ୍ଡାତେ, ଅପ୍ପୁଙ୍‌ବର୍‌ବା"

"ଞେନ୍‌ ବର୍ରନାୟ୍‌ । ଇନି ଅପ୍ପୁଙ୍‌ବର୍‌ତବୋ ?"

ଅପ୍ପୁଙ୍‌ବର୍‌ବା ଡ ଅଡ଼୍‌କୋ "ମନ୍‌ରାନ୍‌ ଅବୟ୍‌ ତାର୍ବାନ୍‌ ଅନ୍ତମ୍‌;

ଆନିଞ୍ଜି ଜାଡ଼ିଆନ୍‌ ଆତାର୍ବା ଅନ୍ତମ୍‌ ଗୋଗୋୟ୍‌ ଡିନ୍ନା ଅଃଡକୋଏଜି ।

7 ଇସ୍ୱରନ୍‌ ଆରାପ୍ପାୟ୍‌ତାଞନ୍‌ ଆରିଙ୍ଗେ ଇଡେନ୍‌ଣ୍ଡେନ୍‌ ଅଜିଙନ୍‌ ଅସର୍‌ତେ ଆରି ତାର୍ବାନ୍‌ ଅସେତ୍ତେ,

ମନ୍‌ରାଞ୍ଜି ତାର୍ବାନ୍‌ ଅନ୍ତମ୍‌ ।

8 ଓଓ, ତାର୍ବାନ୍‌ ଅସେତ୍ତେ ଆରି ଅଗାବନ୍‌ ଅସର୍‌ତେ, ବନ୍‌ଡ ଇସ୍ୱରଲେନ୍‌ ଆବର୍ନେ ଆଏଡ଼ର୍‌ ଡକୋତେ ।"

9 ଏ ଜିରୁସାଲମ, ଡେଙ୍ଗା ବରୁଲୋଙନ୍‌ ଡାଜା ଆରି ମନଙ୍‌ବର୍‌ ଅପ୍ପୁଙ୍‌ବରା ସିଓନ, ସୋଡ଼ା ସର୍ରଙନ୍‌ ବାତ୍ତେ ବାବ୍ବାବ୍‌ଲେ ମନଙ୍‌ବରନ୍‌ ଅପ୍ପୁଙ୍‌ବରା; ବତଙ୍‌ଡଙମ୍‌ ବର୍ନା । ଇସ୍ୱରନ୍‌ ଜିର୍ତାୟ୍‌ ଗାମ୍‌ଲେ ଜିଉଦା ଡେସାରେଙନ୍‌ ବର୍ରାଜି ।

10 ଗିୟ୍‌ବା, ଇସ୍ୱରନ୍‌ ଆ ବୋର୍ସାନ୍‌ ବାତ୍ତେ ସସନନ୍‌ ଆସନ୍‌ ଅଡ଼୍‌କୋନ୍‌ ସିଲଡ୍‌ ସୋଡ଼ା ଇସ୍ୱରନ୍‌ ଜିର୍ତାୟ୍‌,

ଆଡ୍ରୋବେଞ୍ଜି ଆମନ୍‌ରାଜି ସରିନ୍‌ ଆନିନ୍‌ ଜିର୍ତାୟ୍‌ । ଗିୟ୍‌ବା ଆନିଞ୍ଜି ସରିନ୍‌ ଓୟୋଲ୍‌କୋଜନ୍ ଆମଙ୍‌ବାନ୍‌ ଆଜଜି ତିୟ୍‌ତେ ।

11 ତୁର୍‌ମେନ୍‌ ମରନ୍‌ ଅନ୍ତମ୍‌ ଆ ଗୋସ୍ସାନ୍‌ ତୁର୍‌ତୁର୍‌ତେ; ଆ ଅନ୍‌ମେନଞ୍ଜି ଅବ୍‌ରୁକ୍କୁତେ ଆରି ଆତାରଙ୍‌ଲୋଙନ୍‌ ବୋୟ୍‌ଲେ ପାଙ୍‌ତେ; ଆରି ଆଅନନ୍‌ ଡକୋନ୍‌ ଆୟୋଙ୍‌ମେଡଞ୍ଜି ଇସ୍ରାଏଲ ଆ ଇସ୍ୱର ଲବିଡ୍ଡା ତୁରିୟ୍‌ଲେ ପାଙ୍‌ତେ ।

12 ସମେଁୟ୍‌ଣ୍ଡ୍ରାନ୍‌ ଆଡାଆ ଆଡୋବ୍‌ଆଡୋବ୍‌ଲେ ଆନା ତରେଡ୍‌ଲେ ରପ୍ତିଏ ଅଡ଼େ ଆସିନ୍‌ ବାତ୍ତେ ରୁଆଙନ୍‌ ତରେଡ୍‌ଲେ ରପ୍ତିଏ, ପୁର୍ତିନ୍‌ ଆଉମୁରିଲ୍‌ ଅଡ଼୍‌କୋନ୍ ଡିଡିତେ ଆରି ବରୁନଞ୍ଜି ତନୁଡ଼େଲୋଙନ୍‌ ତୁଡ଼େତେ ?

13 ଇନି ଲୁମ୍‌ତବୋ ଗାମ୍‌ଲେ ଇସ୍ୱରନ୍‌ଆଡଙ୍‌ ଆପ୍ରାନ୍ନା ଆନା ବାଞେନ୍‌,

ଆନା ଆନିନ୍‌ଆଡଙ୍‌ ଞନଙମରନ୍‌ ଡେଲେ ଞଙ୍‌ଞଙ୍‌ଲେ ରପ୍ତିଏ ?

14 ଇନି ଏଙ୍ଗାଲେ ଲନୁମନ୍‌ ଡେତେ

କେନ୍‌ ଆବର୍ନେ ଆନବ୍‌ଜନାନ୍‌ ଆସନ୍‌, ଜନ୍‌ନାନ୍‌ ଆସନ୍‌ ତଙରନ୍‌ ଅବ୍‌ତୁୟ୍‌ଲଙ୍‌ତନ୍‌,

ଇସ୍ୱରନ୍‌ ସରିନ୍‌ ଆନା ଇନି ବର୍ରେ ରପ୍ତିଏ ?

15 ଇସ୍ୱରନ୍‌ ଆଗନିୟ୍‌ଗିୟ୍‌ଲୋଙ୍‌ କେଜ୍ଜାଞ୍ଜି ଇନ୍ନିଙ୍‌ ତଡ୍‌,

ଆନିଞ୍ଜି ବଜନବ୍‌ତଡ୍‌ ଡାଆନ୍‌ ଅନ୍ତମ୍‌; ତନୁଡ଼େଲୋଙନ୍‌ ଆ ସନ୍ନା ଆଉମରିଲନ୍‌ ଅନ୍ତମ୍‌,

ମଡି ସମେଁୟ୍‌ଣ୍ଡ୍ରାଲୋଙନ୍‌ ଆଡେପାଲଅଲୋଙ୍‌ ଅବ୍‌ଡୁତେ ।

16 ଲିବାନୋନ ଆରାଜି ସନ୍‌ୟନ୍‌ ଆସନ୍‌ ଜାଡ଼ିଆଲୋଙନ୍‌ ଆଡ୍ରକୋତନ୍‌ ଆଜନ୍ତୁଜି ଡ ଅନମଙନ୍‌ ଆତନିୟ୍‌ ଆସନ୍‌ ଅରାନ୍‌ ଅଃଡେଏ,

17 ଇସ୍ୱରନ୍‌ ଆଗନିୟ୍‌ଗିୟ୍‌ଲୋଙ୍‌ ଅଡ଼୍‌କୋ କେଜ୍ଜାନ୍‌ ଇନ୍ନିଙ୍‌ ତଡ୍‌ । ଆମଙବାଞ୍ଜି ଇଡ୍‌ନିଙ୍‌ତଡ୍‌ ଆରିକାନ୍‌ ଡ କାଜ୍ଜାନ୍‌ ଡନିଡିନ୍‌ ଅଡ଼େ ।

18 ଆନା ସରିନ୍‌ ଇସ୍ୱରନ୍‌ ଅବ୍‌ଜଙ୍‌ଲେ ଏରପ୍ତିତେ ?

ଆନିନ୍‌ ଅଙ୍ଗା କୋଙଣ୍ତାୟ୍‌ ସରିନ୍‌ ଏବ୍‌ଜଙ୍‌ତେ ?

19 ତନ୍‌ଡ୍ରୁବ୍‌ମରନ୍‌ ଆକୁଣ୍ଡାୟନ୍‌ ଆତ୍ରୁବେନ୍‌ ଅନ୍ତମ୍‌ ଆନିନ୍‌ ତଡ୍‌, ସୁନ୍ନାରିନ୍‌ କୁଣ୍ଡାୟନ୍‌ଆଡଙ୍‌ ସୁନ୍ନାନ୍‌ ବାତ୍ତେ ବଲ୍‌ତେ ଆରି ରୁପାନ୍‌ ସିଙ୍କୁଡ଼ିଲୋଙନ୍‌ ତୁବ୍‌ତେ ।

20 ଆନା ସୁନ୍ନାନ୍‌ ଡ ରୁପାନ୍‌ ବାତ୍ତେ କୁଣ୍ଡାୟନ୍‌ ତୁବ୍‌ଲେ ଅଃରପ୍ତିଏ ଅଙ୍ଗା ଆରା ଇନ୍ନିଙ୍‌ ଅଃଡେଏ ଏତ୍ତେଗନ୍‌ ଆରା ବାତ୍ତେ ବାଟୋଞନ୍‌ ବର୍ରେ କି ଅବୟ୍‌ କୁଣ୍ଡାୟନ୍‌ ଅବ୍‌ତୁବ୍‌ତୁବନ୍‌ ଆସନ୍‌ ମନ୍‌ରାନ୍‌ ସାୟ୍‌ତେ ।

21 ପୁର୍ତିନ୍‌ ଏଙ୍ଗାଲେ ଗନବ୍‌ଡେଲନ୍‌ ଡେଏନ୍‌ ଆମ୍ବେନ୍‌ ଏର୍‌ନମ୍‌ଡଙ୍‌ ପଙ୍‌ ? ଆମ୍ବେନ୍‌ ଜନାତଡ୍‌ ପଙ୍‌ ? କେନ୍‌ ଆବର୍ନେ ଅମ୍ମୁଙ୍‌ମା ଆନ୍ନିଙ୍‌ ଆମ୍ବେନ୍‌ଆଡଙ୍‌ ଅବ୍ବର୍‌ରବେଞ୍ଜି ପଙ୍‌ ?

22 ଆନିନ୍‌ ପୁର୍ତିନ୍‌ ଆତୋଣ୍ଡୋ ଡ ରୁଆଙନ୍‌ ଆତୋଣ୍ଡୋ ଡକୋତନ୍‌; ପୁର୍ତିଲୋଙନ୍‌ ଆଡ୍ରକୋତଞ୍ଜି ଆମନ୍‌ରାଜି ଆଗନିୟ୍‌ଗିୟ୍‌ଲୋଙନ୍‌ ପପ୍ପରନ୍‌ ଅନ୍ତମ୍‌ । ଆନିନ୍‌ ଆଙ୍ଗାଜନ୍‌ ଡ ରୁଆଙନ୍‌ ଆସିନ୍‌ ବାତ୍ତେ ଉର୍ରଡେନ୍‌ ତମ୍ବୁସିଙନ୍‌ ଆଡ୍ରକୋନେ ଅନ୍ତମ୍‌ ଗବ୍‌ଡେଲେନ୍‌ ।

23 ରାଜାଞ୍ଜିଆଡଙ୍‌ ଆନିନ୍‌ ଅବ୍‌ସେତେ ଆରି ଆନିଞ୍ଜିଆଡଙ୍‌ ଅବ୍‌ସନ୍ନାତଜି ।

24 ଓଓ, ଆନିଞ୍ଜି ଅନ୍‌ରଙ୍‌ ଆଜନେନ୍‌, ଡ ରଙ୍‌ଗୁନ୍‌ ଆପିଲନୁବ୍‌ ଅନ୍ତମ୍‌ । ଇସ୍ୱରନ୍‌ ଆରାପ୍ପାୟ୍‌ତାଞନ୍‌ ଆରିଙ୍ଗେ ତିଆତେଜି ଅବ୍‌ସର୍‌ତେ ଆରି ଆଙ୍‌ସନିବନ୍‌ ଅନ୍ତମ୍‌ ଅଃପାଙ୍‌ରିଙ୍‌ତେ ।

25 ମଡ଼ିର୍‌ ଇସ୍ୱରନ୍‌ ଆନା ବାତ୍ତେ ଅବ୍‌ଜଙ୍‌ଲେ ରପ୍ତିତେ ? ଆନିନ୍‌ ଅନ୍ତମ୍‌ ଆନ୍ନିଙ୍‌ ଡକୋଜି ପଙ୍‌ ?

26 ରୁଆଙନ୍‌ ଆଙାଙ୍‌ଲେ ବର୍ନାବା କେନ୍‌ ଅଡ଼୍‌କୋନ୍‌ ଆନା ଗବ୍‌ଡେଲେନ୍‌ ? ଆନା ତୁତୁଜଞ୍ଜି ତଙ୍‌ବୟ୍‌ ତଙ୍‌ବୟ୍‌ ଅମ୍‌ଡୁଙ୍‌ଲେ ଓରୋଙ୍‌ତାୟ୍‌ କି ଅଡ଼୍‌କୋନ୍‌ ଆଞୁମନ୍‌ ଞମ୍‌ଲେ ଓଡ୍ଡେତେ, ଆନିନ୍‌ ଗୋଗୋୟ୍‌ ବୋର୍ସାନ୍‌ ଡକୋ ତି ଆବୋର୍ସାବାତ୍ତେ ଅବୟ୍‌ ଜାକିଁୟ୍‌ ଅଃନାଡ଼ଏ ।

27 ଏତ୍ତେଲ୍‌ଡେନ୍‌ ଏ ଇସ୍ରାଏଲ କନାକୁର୍ତିବେନ୍‌ ଇସ୍ୱରନ୍‌ ଇନି ଅଃଜ୍ଜନାଏ କାକୁର୍ତିବେନ୍‌ ଡ ଡନଣ୍ଡାୟ୍‌ବେଞ୍ଜି ଇସ୍ୱରନ୍‌ ଅଃନିୟମେ ଗାମ୍‌ଲେ ଆମ୍ବେନ୍‌ ଏ ଜାକୁବ ଇନିଆସନ୍‌ ଏବର୍ରତେ ?

28 ଆମ୍ବେନ୍‌ ଇନି ଅନ୍‌ର୍ରଙ୍‌ ଏଅମ୍‌ଡଙେ ? ଅଡ଼େ ଅନ୍‌ର୍ରଙ୍‌ ଏଜନାଏ ? ପ୍ରବୁନ୍‌ ଆଡ଼େର୍‌ ଆ ଇସ୍ୱର; ଆନିନ୍‌ ସମ୍ପରା ପୁର୍ତିନ୍‌ ଆଗନବ୍‌ଡେଲ୍‌ମର୍‌ । ଆନିନ୍‌ ଅଃମଙ୍ଗାଏ କି ଅଃମ୍ମଙ୍ଗାଏ* । ଆ ଜରୁବରଞ୍ଜି* ଅଃଜନାଲଙ୍‌ନେ ।

29 ଇଜ୍ଜାଡମନ୍‌* ଡ ଆମରଙ୍ଗାତେନ୍‌ ଡ ଇଜ୍ଜାଡମନ୍‌ ଆମନ୍‌ରାଆଡଙ୍‌ ଆନିନ୍‌ ଅବ୍‌ବୋର୍ସାତେ ।

30 ବେଣ୍ଡିଆଞ୍ଜି ନିୟ୍‌ ମଙ୍ଗାତଜି ଡେତଜି; ଆରି ବେଣ୍ଡିଆଞ୍ଜି ତୁଡ୍ଡୁବ୍‌ଲେ ଅକୁଡ୍‌ତଜି ।

31 ବନ୍‌ଡ ଆନାଜି ଇସ୍ୱରନ୍‌ ଆମଙ୍ ଆସାଲନ୍‌ ଜଗ୍ଗେଲେ ଡକୋତଞ୍ଜି ଆନିଞ୍ଜି ରଙ୍‌ ବୋର୍ସାନ୍‌ ଞାଙ୍‌ତଜି । ଆନିଞ୍ଜି ଗିର୍ଜାତିଡନ୍‌ ଅନ୍ତମ୍‌ ତୋଣ୍ଡୋନ୍‌ ଏଙ୍‌ତଜି; ଆନିଞ୍ଜି ଇରେଞ୍ଜିଡେନ୍‌ ଏର୍ରମନଙ୍ଗାନ୍‌ ତଙିୟ୍‌ଲନ୍‌ ଜିର୍ରତଜି ।