1 ସୋରନ୍‌ ଆସନ୍‌ ପୁର୍ବାଃତେବରନ୍‌ । ଏ ତର୍ସିସନ୍‌ ଆ ଜାଜ୍ଜଜି ଅଡ଼୍‌କୋନ୍‌, ଆମ୍ୱେଞ୍ଜି ୟେୟେଡାନବା; ଇନିଆସନ୍‌ଗାମେଣ୍ତେନ୍‌ ସୋରନ୍‌ କେନ୍‌ ଅନ୍ତମ୍‌ ଅନମ୍‌ଡୁଙନ୍‌ ଡେଏନ୍‌ ଡ, ତେତ୍ତେ ଇନ୍ନିଙ୍‌ ଆସିଙ୍‌ ଅବୟ୍‌ତଡ୍‌, ଅଡ଼େ ଗରନ୍ନେ ତଙରନ୍‌ ଅବୟ୍‌ତଡ୍‌; କିତ୍ତିମ ଡେସାନ୍‌ ସିଲଡ୍‌ କେନ୍‌ଆତେ ଆନିଞ୍ଜି ଆସନ୍‌ ଅନବ୍‌ତୁଜନ୍‌ ଡେଏନ୍‌ । 2 ଏ ମଡ୍ଡି ସମେଁୟ୍‌ଣ୍ଡ୍ରା ଆଡେସାଲୋଙ୍‌ ଏଡ୍ରକୋତନ୍‌ ଆମନ୍‌ରାଜି ଆମ୍ୱେଞ୍ଜି ରିଙ୍‌ଲନ୍‌ ଡକୋନାବା; ସମେଁୟ୍‌ଣ୍ଡ୍ରାନ୍‌ ପଡ୍‌ଲେ ଆଜନିର୍‌ମର୍‌ ସିଦୋନିଅ ବେପାରମରଞ୍ଜି ଡେସାଲୋଙ୍‌ବେନ୍‌ ଗମାଙ୍‌ତଜି । 3 ଆରି ସୋଡ଼ା ସମେଁୟ୍‌ଣ୍ଡ୍ରାନ୍‌ ଆତୋଣ୍ତୁଲୋଙ୍‌ ସିଓରନ୍‌ ଆଜମ୍ମଲ୍‌ ଆରି ନିଡ଼ ଅଲନ୍‌ ଆଜନ୍‌ରୋମ୍‌ ଆନର୍‌ଜେ ଡକୋଏନ୍‌; ଆରି ତିଆତେ ଆନ୍ନା ଆନ୍ନା ଡେସାବାଜି ଆବେବାର ଆଡ୍ରକୋନେ ଅନ୍ତମ୍‌ ଡକୋଏନ୍‌ ।

4 ଏ ସିଦୋନ, ଆମନ୍‌ ଗରୟ୍‌ଜମ୍‌ତୋ, ଇନିଆସନ୍‌ଗାମେଣ୍ତେନ୍‌ ସମେଁୟ୍‌ଣ୍ଡ୍ରାନ୍‌, ସମେଁୟ୍‌ଣ୍ଡ୍ରାନ୍‌ ଆ ରଡୋ ମରେଲ୍‌ସିଙନ୍‌ କେନ୍‌ ଆବର୍ନେ ବର୍ତଞ୍ଜି, "ଞେନ୍‌ କୋକ୍କୋଡନନ୍‌ ଆ ବତ୍ତା ଏର୍‌ଞନାଙ୍‌, ଅନ୍‌ରଙ୍‌ ଏକୋଡାୟ୍‌ ଅଡ଼େ ବେଣ୍ତିଆଞ୍ଜିଆଡଙ୍‌ ଏଃବନ୍‌ଲାୟ୍‌, ଅଡ଼େ ଡାଙ୍ଗଡ଼ିବଜଞ୍ଜିଆଡଙ୍‌ ଏର୍ନାରାୟ୍‌ ।"

5 କେନ୍‌ ଆବର୍ନେ ମିସରଲୋଙନ୍‌ ଅଡ଼ୋଏନ୍‌ଣ୍ଡେନ୍‌, ମନ୍‌ରାଞ୍ଜି ସୋର ଡେସାନ୍‌ ଆବର୍ନେଲୋଙ୍‌ ଜବ୍ର ତକର୍ତଜି ।

6 ଆମ୍ୱେଞ୍ଜି ସମେଁୟ୍‌ଣ୍ଡ୍ରନ୍‌ ପଡ୍‌ଲେ ତର୍ସିସନ୍‌ ଜିର୍ବା; ଏ ମଡ୍ଡି ସମେଁୟ୍‌ଣ୍ଡ୍ରାନ୍‌ ଆ ଡେସାବାଜି ୟେୟେଡାନାବା । 7 କେନ୍‌ ମନଅଁୟ୍‌ ଗଡ଼ାବେନ୍‌ ପଙ୍‌ ? କେନ୍‌ ଆତେ ଆମ୍ମୁଙ୍‌ ମା ସିଲଡ୍‌ ଆ ପାପୁର୍‌ ଡକୋଏନ୍‌; ଆତାଲ୍‌ଜଙନ୍‌ ସଙାୟ୍‌ ଡେସାନ୍‌ଲୋଙନ୍‌ ଆଗନ୍ନେ ଆସନ୍‌ କେନ୍‌ ଆନିନ୍‌ ଓରୋଙେନ୍‌ । 8 ରନୁବ୍ବବନ୍‌ ଆ ବନାନ୍ତେବୟ୍‌ ସୋରନ୍‌ ଆବେବାରମର୍‌ଜି ରାଜା ଅନ୍ତମ୍‌, ଆ ଗମାଙ୍‌ମରଞ୍ଜି ପୁର୍ତିନ୍‌ ଆ ମନାନ୍ନେମର୍‌; ଆବର୍ରନ୍‌ ଆବର୍ନେ କେନ୍‌ ଆବର୍ନେ ଆନା ଲୁମେନ୍‌ ? 9 ପ୍ରବୁନ୍‌ ଅଡ଼୍‌କୋନ୍‌ ଆ ଗନୁଗୁ ପନେମେଙ୍‌ ଆ କଙ୍କ୍ରି ଏର୍ମଡ଼ିର୍‌ ଆନବ୍‌ସେଡନ୍‌ ଆସନ୍‌, ଡ ପୁର୍ତିଲୋଙନ୍‌ ଆସୋଡ଼ାଗଡ୍‌ ମରଞ୍ଜି ଅଡ଼୍‌କୋନ୍‌ ଗନବ୍‌ରଜନ୍‌ ଆସନ୍‌ ପ୍ରବୁନ୍‌ କେନ୍‌ ଆତେ ଇଃୟମେନ୍‌ । 10 ଏ ତର୍ସିସନ୍‌ ଆ ଡାଙ୍ଗଡ଼ିଜି, ଆମ୍ୱେନ୍‌ ନିଡ଼ ଅଲନ୍‌ ଅନ୍ତମ୍‌ ଡେସାଗଡ୍‌ନମ୍‌ ଜିରା, ନମି ଅବୟ୍‌ନେ ଜା ଆମନ୍‌ଆଡଙ୍‌ ଡନଙ୍‌ଡଙନ୍‌ ଆନ୍ନିଙ୍‌ ତଡ୍‌ । 11 ପ୍ରବୁନ୍‌ ସମେଁୟ୍‌ଣ୍ଡ୍ରାନ୍‌ ଆତୋଣ୍ତୋ ଆସିନ୍‌ ତେକେସିଲନ୍‌, ଆନିନ୍‌ ଅଡ଼୍‌କୋ ରାଜ୍ୟନ୍‌ ଅବ୍‌ୟୁୟୁଏନ୍‌; ପ୍ରବୁନ୍‌ କିନାନନ୍‌ ଆ ରଡୋ ମରେଲ୍‌ସିଙ୍‌ ଅଡ଼୍‌କୋନ୍‌ ଆନବ୍‌ସେଡନ୍‌ ଆସନ୍‌ ଆବିରୁଦଲୋଙନ୍‌ ବନାୟଁନ୍‌ ତିୟେ । 12 ଆରି ଆନିନ୍‌ ବର୍ରନେ, "ଏ ସିଦୋନନ୍‌ ଆଗନଙ୍‌ତିଡ୍‌, ପୟ୍‌ଲଙ୍‌ ଡାଙ୍ଗଡ଼ିଜି, ଆମ୍ୱେନ୍‌ ଆରି ଏଃସର୍ଡାନେ, ଡୋନା, ପଡ୍‌ଲେ କିତିମନ୍‌ ଜିରା; ତି ତେତ୍ତେ ଜାୟ୍‌ ଇନ୍ନିଙ୍‌ ଲୋଲୋନେନ୍‌ ଅଃଞାଙେ ।" 13 କଲ୍‌ଦିଅମରଞ୍ଜି ଆଡେସା ଗିଜା; କେନ୍‌ ଆମନ୍‌ରାଜି ଆରି ଅବୟ୍‌ତଡ୍‌ଜି; କିନ୍‌ରେଙ୍‌ ଜନ୍ତୁଜି ଆସନ୍‌ ତିଆତେ ଅସୁରନ୍‌ ଡେସାନ୍‌ ସେଡାଏନ୍‌; ଆନିଞ୍ଜି ମେଡ଼ସିଙନ୍‌ ତୁବ୍‌ଲେ ମରେଲ୍‌ସିଙନ୍‌ ରୁବ୍‌ଡ଼ାଙେଞ୍ଜି; ଆନିନ୍‌ ତିଆତେ ଅରେଙନ୍‌ ଆକନୁଡ଼ାୟ୍‌ ଏମ୍ମେଏନ୍‌ । 14 ଏ ତର୍ସିସନ୍‌ ଆଜାଜ୍ଜ ଅଡ଼୍‌କୋନ୍‌, ୟେୟେଡାନାବା, ଇନିଆସନ୍‌ଗାମେଣ୍ତେନ୍‌ ରଡୋ ମରେଲ୍‌ସିଙ୍‌ବେନ୍‌ ରୁଡ଼ାଙେନ୍‌ । 15 ତି ଆଡିନ୍ନା ଏନ୍ନେଲେ ଡେତେ ଡ, ଅବୟ୍‌ ରାଜାନ୍‌ ଆର୍ରାଜାଲନ୍‌ ଆଡିଡ୍‌ ଅନ୍ତମ୍‌, ସୋର ଗଡ଼ାନ୍‌ ସତୁରି ବର୍ସେଙ୍‌ ଜାୟ୍‌ ଅଃମନ୍ନେଏଜି; ସତୁରି ବର୍ସେଙ୍‌ ଆତିକି ଜୋଣ୍ତଡ଼ିବଜନ୍‌ ଆକନନ୍‌ ଅନ୍ତମ୍‌ ସୋରନ୍‌ ଗଡ଼ାନ୍‌ ଡେତେ । 16 ଏ ଏମ୍ମନେଏନ୍‌ ଜୋଣ୍ତଡ଼ିଜୟ୍‌ଜି, ବିଣାରାଜନ୍‌ ପାଙ୍‌ଲେ ଗଡ଼ାନ୍‌ ବୁଲେବା; ମନଙ୍‌ ରାଜ୍ୟ, ଗୋଗୋୟ୍‌ କନନନ୍‌ କନା, ଏଙ୍ଗାଲେ ଆମନ୍‌ଆଡଙ୍‌ ମନେତମ୍‌ଜି । 17 ଆରି ସତୁରି ବର୍ସେଙ୍‌ ଆତିକି ପ୍ରବୁନ୍‌ ସୋରନ୍‌ ଗଡ଼ାନ୍‌ ସାୟ୍‌ଡଙ୍‌ତେ, ସିଲତ୍ତେ ଆନିନ୍‌ ଜୋଣ୍ତଡ଼ିଲୁମନ୍‌ ଆସନ୍‌ ୟର୍ତନାୟ୍‌, ଆରି, ଅଡ଼୍‌କୋନ୍‌ ପୁର୍ତି ଆ ରାଜାଜି ସରିନ୍‌ ଜୋଣ୍ତଡ଼ିତନେ । 18 ଆରି ଆ ବେବାରନ୍‌ ଡ ଆରିଜାନ୍‌ ପ୍ରବୁନ୍‌ ଆସନ୍‌ ମଡ଼ିର୍‌ ଡେତେ; ଆ ଡରକ୍କୋସିଙ୍‌ଲୋଙନ୍‌ ଡନକ୍କୋନ୍‌ ଅଃଡେଏ କି ତନର୍ତୁମନ୍‌ ଅଃଡେଏ; ଇନିଆସନ୍‌ଗାମେଣ୍ତେନ୍‌ ଆନାଜି ପ୍ରବୁନ୍‌ ଆମୁକାବା ଡକୋତଞ୍ଜି, ଆନିଞ୍ଜି ଆସନ୍‌ ଗୋଗୋୟ୍‌ ଜନୋମଞ୍ଜି ଡ ଆଡ୍‌କୋଡିନ୍ନାନ୍‌ ସିନ୍‌ରିନ୍‌ ଆସନ୍‌ ଆ ବେବାରନ୍‌ ଡେତେ ।