1 ଅବିସିକ୍ତନ୍‌ କରସନ୍‌ ଆଡଙ୍‌ ଇସ୍ୱରନ୍‌ କେନ୍‌ ଆବର୍ନେ ବର୍ତନେ, ଞେନ୍‌ ଆନା କେଜ୍ଜାମର୍ରଞ୍ଜି ଆମ୍ମୁକାବା ଅନବ୍‌ଆରେନ୍‌ ଆସନ୍‌ ଅର୍ଜଡ଼ୋମ୍‌ସିନ୍‌ ଞମ୍‌ତାୟ୍‌ କି ରାଜାଞ୍ଜି ଆକୁଣ୍ତୁବ୍‌ ଆଜନିଡୁବ୍‌ଜି ଉୟ୍‌ତାୟ୍‌ ଡ ଆମ୍ମୁକାଲୋଙଞ୍ଜି ସନଙନ୍‌ ଏରୋବା ଗଡ଼ାଞ୍ଜି ଆଡୁଆରା ଅଡ଼୍‌କୋନ୍‌ ଅନିଙ୍‌ନେ; 2 ଞେନ୍‌ ମୁକାଗଡ୍‌ବେନ୍‌ ଆମ୍ମୁଙ୍‌ତନାୟ୍‌, ଜୋଲାଞ୍ଜି ଅଡ଼୍‌କୋନ୍‌ ଗବ୍‌ରିତାୟ୍‌; ଞେନ୍‌ ପିତ୍ତଡ଼ସଙଞ୍ଜି ଅଡ଼୍‌କୋନ୍‌ ପାଲ୍ଲେ ଡୟ୍‌ ଡୟ୍‌ଡାଲେ ଲୁଆଙ୍‌ସଙଞ୍ଜି ଅଡ଼୍‌କୋନ୍‌ ଗଡ୍‌ଲେସେତବୋ; 3 ଞେନ୍‌ ଲୋଙଡ୍‌ସିଙନ୍‌ ଜନଡ୍ରୋମସିଙନ୍‌ ଡ ଅଜନା ଆଡ୍ରକୋଲାୟନ୍ ତିୟ୍‌ତବେନ୍‌ ତି ସିଲଡ୍‌ ଅଞୁମ୍‌ବେନ୍‌ ଞମ୍‌ଲେ ଓଡେତବେନ୍‌ ଞେନ୍‌ ଇସ୍ରାଏଲନ୍‌ ଆ ଇସ୍ୱରନ୍‌ ଗାମ୍‌ଲେ ଆମ୍ବେନ୍‌ ଜନାଲେ ଏର୍ରପ୍ତିତେ । 4 କମ୍ୱାରିଞେନ୍‌ ଜାକୁବନ୍‌ ସନେଡାମର୍‌ ଇସ୍ରାଏଲନ୍‌ ଆସନ୍ ଅଞୁମ୍‌ବେନ୍‌ ଞମ୍‌ଲେ ଓଡେଲାୟ୍‌; ଆମ୍ୱେନ୍‌ ଏଜ୍‌ନାଲିଜାକିୟ୍‌ଡେନ୍‌ ଆମ୍ୱେନ୍‌ ଞେନ୍‌ ଅବ୍‌ଞୁମ୍‌ଲବେନ୍‌ । 5 ଞେନ୍‌ ଇସ୍ୱରନ୍‌ ଆରି ଞେନ୍‌ ଅମ୍‌ରେଙ୍‌ଲେ ଆରି ଆନ୍ନିଙ୍‌ତଡ୍‌ ଇସ୍ୱରତଡ୍‌ ଆମ୍ୱେନ୍‌ ଞେନ୍‌ ଆଡଙ୍‌ ଏଜ୍‌ନାଲିୟ୍‌ଜାକିୟ୍‌ଡେନ୍‌ କିନ୍‌ଣ୍ତୋବ୍‌ଲୋଙବେନ୍‌ ଆଜନୁଡୋବ୍‌ ଜିବାତାୟ୍ । 6 ତି ସିଲଡ୍‌ ଞେନ୍‌ ଅମ୍‌ରେଙ୍‌ଲେ ଆରି ଆନ୍ନିଙ୍‌ତଡ୍‌, ଡରୁଙ୍‌ୟୋଙ୍‌ ସିଲଡ୍‌ ବରୁବ୍‌ୟୋଙ୍‌ଜାୟ୍‌ ମନ୍‌ରାଞ୍ଜି ନିୟ୍‌ ଜନାତଜି, ଞେନ୍‌ ଅମ୍‌ରେଙ୍‌ଲେ ଆନିଙ୍‌ଡତ୍‌ ଇସ୍ୱରତଡ୍‌ ଗାମ୍‌ଲେ ଜନାତଜି। 7 ଞେନ୍‌ ଉୟୋଙ୍‌ନ ତୁବ୍‌ଲାୟ୍‌ ଡ ଲନୋଙଡନ୍‌ ଗଡ଼େଲାୟ୍‌, ଞେନ୍‌ ସନୟୁନ୍‌ ତିୟ୍‌ତାୟ୍‌ ଅବ୍‌ଗୁରୁଡେନ୍‌ ଞେନ୍‌ ଗଡ଼େଲାୟ୍‌, ଇସ୍ୱରନ୍‌ କେନ୍‌ ଅଡ଼୍‌କୋନ୍‌ ଗବ୍‌ଡେଲ୍‌ତାୟ୍‌ । 8 ଏ ରୁଆଙ୍‌ ଆମ୍ୱେଞ୍ଜି ତୋଣ୍ତୁନ୍‌ ସିଲଡ୍‌ ତରୁବନ୍‌ ତିଆୟ୍‌ ପୋୟ୍‌ଡାତିର୍‌ ଡରମ୍ମନତିରନ୍‌ ଏଙ୍ଗାଲେ ଅନୁରନ୍‌ ଡୁଙ୍‌ତନାୟ୍‌ ଡ ପୁର୍ତିନ୍‌ ଲାଆଙେତୁ କି ଡରମ୍ମନ୍‌ ମାୟ୍‌ଲନ୍‌ ପଡ୍ଡାବାୟ୍‌ତୋ ଇସ୍ୱରନ୍‌ କେନ୍‌ ଅଡ଼୍‌କୋନ୍‌ ଗଡ଼େଲାୟ୍‌ ।

9 ଆନା ଗନ୍‌ଡ଼େମରନ୍‌ ବିରୁଡତେ ଆନିନ୍‌ ସନ୍‌ୟ୍‌ପନ୍‌ ଞାଙ୍‌ତେ, ପୁର୍ତିଲୋଙନ୍‌ ଅବୟ୍‌ ଗରିଜନ୍‌ ଅନ୍ତମ୍‌; ଲବନ୍‌ ପଙ୍‌ କୁମ୍ୱିଜନ୍‌ ଆମଙ୍‌ ବର୍ରେ ରପ୍ତିତେ ଆମନ୍‌ ଇନି ତୁବ୍‌ତେ ? ଅଡ଼େ କାବାଡ଼ାନମ୍‌ ଇନି ? ଆସିତଡ୍‌ ପଙ୍‌ ? 10 ଆପ୍ପେୟନ୍‌ ବର୍ରେନ୍‌ ଆମନ୍‌ ଇନି ଅବ୍‌କୋକୋତ୍ତେ, ଅଡ଼େ ଆଇବଜନ୍‌ ବର୍ତନ୍‌, ଆମନ୍‌ ଇନି କୋତ୍ତେ ? ଆନିନ୍‌ ସନୟ୍‌ପୟ୍‌ ଞାଙ୍‌ତେ । 11 ଇସ୍ରାଏଲନ୍‌ ମଡ଼ିର୍‌ ଇସ୍ୱରନ୍‌ କେନ୍‌ ଆବର୍ରନେ ବର୍ତନେ, ଆଜିର୍ତାଞନ୍‌ ଆଗନଟେ ଞେନ୍‌ ବରିଙ୍‌ମ୍ୱା; ପସିୟ୍‌ଞେଞ୍ଜି ଆବିସୟ୍‌ ଅସିଲୋଙ୍‌ଞେନ୍‌ ଆକାବାଡ଼ା ଅଡ଼୍‌କୋନ୍‌ ବନାୟଁନ୍‌ ନିୟ୍‌ । 12 ଞେନ୍‌ ପୁର୍ତିନ୍‌ ଗଡ଼େଲାୟ୍‌ ତିଲୋଙ୍‌ ଅସିଲୋଙ୍‌ଞେନ୍‌ ମନ୍‌ରାନ୍‌ ଡ ରୁଆଙନ୍‌ ତୁବ୍‌ଲାୟ୍‌; ତି ଅଡ଼୍‌କୋନ୍‌ ଆବିସୟ୍‌ଲୋଙ୍‌ ଞେନ୍‌ ବନାଁୟ୍‌ବରନ୍‌ ତିୟ୍‌ଲାୟ୍‌ । 13 ଞେନ୍‌ ଅଡ଼୍‌କୋନ୍‌ ଡରମ୍ମ ବାତ୍ତେ ଗଡ଼େଲାୟ୍‌ ଡ ଆ ତଙରନ୍‌ ଅଡ଼୍‌କୋନ୍‌ ବିଙୟ୍‌ତେ; ଆନିନ୍‌ ଗଡ଼ାଲେନ୍‌ ତୁବ୍‌ତେ ବଣ୍ତିମର୍‌ଲେଞ୍ଜି ଏର୍ରଡନାବୁ ଅମ୍‌ରେଙ୍‌ତେ ଅଡ଼େ ଓଞୋଲ୍‍କୁଜନ୍‍ ଆସନ୍‌ ତଡ୍‌ କେନ୍‌ ଆବର୍ରନେ ଇସ୍ୱରନ୍‌ ବର୍ତନ୍‌ ।

14 ଇସ୍ୱରନ୍‌ କେନ୍‌ ଆବର୍ରନେ ବର୍ତନେ,ମିସରନ୍‌ ଆବେପାରି ଡ କୁସଡେସାନ୍‌ ଆବେପାରି ଜଅନ୍‌ ଡ ଡେଙ୍ଗାମରନ୍‌ ମନଙ୍‌ନମ୍‌ ଜିର୍ରତାଜି,ଆମନ୍‌ ବାତ୍ତେ ଡେତେ, ଆନିଞ୍ଜି କିଣ୍ତୋଙ୍‌ଗଡ୍‌ନମ୍‌ ଜିର୍ରତାଜି, ସିଙ୍କୁଡ଼ିଲୋଙନ୍‌ ଆଜିଜି ଜିର୍ରତାଜି ଅଡ଼େ ଆନିଞ୍ଜି ଆମନ୍‌ ଆଡଙ୍‌ ତୁଡୁମ୍‌ଲେ ଲୋମତବେଞ୍ଜି ଡ କାକୁର୍ତ୍ତିଲନ୍‌ ବର୍ରତମଞ୍ଜି, ଆଜାଡ଼ିନ୍‌ ଇସ୍ୱରନ୍‌ ଅମଙ୍‌ନମ୍‌ ଡକୋ ଆନିନ୍‌ ଅମ୍‌ରେଙ୍‌ଲେ ଇସ୍ୱରନ୍‌ ଅବୟ୍‌ତଡ୍‌ । 15 ଆଜାଡ଼ିନ୍‌ ଇସ୍ରାଏଲ୍‌ ଆଇସ୍ୱରନ୍‌ ଅନୁରମର୍‌ ଆମନ୍‌ ସଲନ୍‌ଆଡ୍ରକୋତନ୍‌ ଆଇସ୍ଵର । 16 ଆନିଞ୍ଜି ଅଃଗରଜେଜି ଓଓ ଆନିଞ୍ଜି ଅଡ଼୍‌କୋନ୍‌ ଉଲ୍ଲାୟ୍‌କୋଲାୟ୍‌ ଡେତଜି; କୋଙ୍‌ଣ୍ତାୟ୍‌ ତୁବ୍‌ମର୍ରଞ୍ଜି ଅଡ଼୍‌କୋନ୍‌ ଗରୟ୍‌ତଜି । 17 ବନ୍‌ଡ ଇସ୍ରାଏଲନ୍‌ ଆଇସ୍ୱରନ୍‌ ବାତ୍ତେ ଅଡ଼୍‌କୋଡିନ୍ନାନ୍‌ ଅନୁରନ୍‌ ଞାଙ୍‌ତେ; ଆନିଞ୍ଜି ଜୁଗା ଜୁଗାଜାୟ୍‌ ଆଗ୍ଗରଜେଜି କି ଅନାଙ୍କାଏଜି । 18 ଇନିଆସନ୍‌ଗାମେଣ୍ତେନ୍‌ ରୁଆଙନ୍‌ ଆଗନଡ଼େ ଇସ୍ୱର ବର୍ତନ୍‌, ଆନିନ୍‌ ଇସ୍ୱରନ୍‌ ଡକୋ, ଆନିନ୍‌ ପୁର୍ତିନ୍‌ ଗବ୍‌ଡେଲେନ୍‌ ତି ବାତ୍ତେ ଅବ୍‌ଜାଡାଏନ୍, ଆନିନ୍‌ ମନ୍‌ରାଞ୍ଜି ଆଡ୍ରକୋନେନ୍‌ ଆସନ୍‌ ତୁବେନ୍‌ ଞେନ୍‌ ଆଇସ୍ୱରନ୍‌ ଆରି ଆନ୍ନିଙ୍‌ ଅବୟ୍‌ ତଡ୍‌ । 19 ଞେନ୍‌ ଅଜନା ଲୋଙଡ୍‌ଲୋଙନ୍‌ ଆଡେସାରେଙ୍‌ ଇନ୍ନିଙ୍‌ ଏବର୍ରନାୟ୍‌; ଆମ୍ୱେଞ୍ଜି କାଜ୍ଜାନ୍‌ ଏସାୟ୍‌ତିୟ୍‌ । ଞେନ୍‌ ଜାକୁବନ୍‌ ଆକେଜ୍ଜା ଗାମ୍‌ଲେ ଅବର୍ରନାୟ୍‌, ଞେନ୍‌ ଆଜାଡ଼ିନ୍‌ ଡରମ୍ମବର୍ରନ୍‌ ବର୍ତନାୟ୍‌ ।

20 ଏ ଆନା ଆନା କେଜ୍ଜାମରଞ୍ଜିଲୋଙ୍‌ ଡୋବ୍‌ଲନ୍‌ ଆଡ୍ରକୋତନ୍‌ ଆମନ୍‌ରାଜି ରୁକୁଡାଲନ୍‌ ମାୟ୍‌ଲନ୍‌ ଜିର୍ରାବାୟ୍‌; ଆନାଜି କୋଙ୍‌ଡାଜନ୍‌ ଆରା ବୋୟ୍‌ତଜି ଡ ଅନୁରନ୍‌ ଅଃଞାଙ୍‌ନେନ୍‌ ଆସନୁମ୍‌ ଆମଙ୍‌ବାନ୍‌ ପ୍ରାର୍ତନାତଞ୍ଜି ଆନିଞ୍ଜି ଇନ୍ନିଙ୍‌ ବୁଡିଜିତଡ୍‌ । 21 ଆମ୍ୱେଞ୍ଜି ଡକୋଡାଲନ୍‌ ବର୍ରନାବା; ଆନିଞ୍ଜି ରମ୍ମଙ୍‌ ରମ୍ମଙ୍‌ ତନ୍ତ୍ରଏତଜି ପୁର୍ବାନ୍‌ ସିଲଡ୍‌ କେନ୍‌ ଆବର୍ରନେ ଅବ୍‌ଜନାଲବେଞ୍ଜି ? ପୁର୍ବାନ୍‌ ସିଲଡ୍‌ ଆନା ବର୍ରବେଞ୍ଜି ? ଞେନ୍‌ ଇସ୍ୱରନ୍‌ କେନ୍‌ ଆବର୍ରନେ ଅବର୍ରବେନ୍‌ ପଙ୍‌ ? ଞେନ୍‌ ଅମ୍‌ରେଙ୍‌ଲେ ଆନ୍ନିଙ୍‌ ଇସ୍ୱରତଡ୍‌ ଞେନ୍‌ ଡରମ୍ମ ଇସ୍ୱରନ୍‌ ଡ ଅନୁର୍‌ମର୍‌ ଞେନ୍‌ ଅମ୍‌ରେଙ୍‌ଲେ ଆନ୍ନିଙ୍‌ ଇସ୍ୱରତଡ୍‌ । 22 ଏ ଅଡ଼୍‌କୋ ପୁର୍ତିନ୍‌ ଆମନ୍‌ରାଜି ଞେନ୍ ଆଞାଙ୍‌ଲେ ଅନୁରନ୍‌ ଞାଙ୍‌ବା, ଇନିଆସନ୍‌ଗାମେଣ୍ତେନ୍‌ ଞେନ୍‌ ଅମ୍‌ରେଙ୍‌ଲେ ଆନ୍ନିଙ୍‌ତଡ୍‌ । 23 ଅଞୁମ୍‌ଲୋଙ୍‌ଞେନ୍‌ ପାଙ୍‌ଲେ ସିବ୍‌ଡୟବର୍ରନାୟ୍‌ ଡରମ୍ମବରନ୍‌ ମୁକ୍କାଲୋଙ୍‌ଞେନ୍‌ ସିଲଡ୍‌ ଡୁଙ୍‌ଲନାୟ୍‌ ତିଆତେ କାଜ୍ଜାନ୍‌ ଅଡ଼େ, ମୁକ୍କାଲୋଙ୍‌ଞେନ୍‌ ଅଡ଼୍‌କୋନ୍ ତୁଡ଼ୁମ୍‌ତଜି ଡ ଅଲାଙନ୍‌ ବାତ୍ତେ ପର୍ମାଡ଼ାତଞ୍ଜି । 24 ମନ୍‌ରାଞ୍ଜି ଲତେଙ୍‌ଞେନ୍‌ ବର୍ତଞ୍ଜି ଇସ୍ୱରନ୍‌ ଆମଙ୍‌ମା ବୋର୍ସା ଡରମ୍ମନ୍‌ ଡ ସନୟୁନ୍‌ ଡକୋ । ମନ୍‌ରାଞ୍ଜି ଆମଙ୍‌ବାନ୍‌ ଜିର୍ରତାଜି,ଆରି ଆନାଜି ବର୍ରବେଞ୍ଜି ଆନିଞ୍ଜି ଅଡ଼୍‌କୋଞ୍ଜି ଗରୟ୍‌ତଜି । 25 ଇସ୍ରାଏଲନ୍‌ ଆକେଜ୍ଜାଜି ଅଡ଼୍‌କୋନ୍‌ ଇସ୍ୱରନ୍‌ ଆମଙ୍‌ ଡରମ୍ମନ୍‌ ଡକୋ କି ଞେନ୍‌ ତୁମ୍‌ ଗାମ୍‌ଲେ ଅବ୍‌ସୋଡ଼ାଡମ୍‌ତନ୍‌ ।