1 ଏ ସଦାପ୍ରବୁ, ଆମନ୍‌ ଇସ୍ୱରଞେନ୍‌, ଞେନ୍‌ ଆମନ୍‌ଆଡଙ୍‌ ଅବ୍‌ଗୁଗୁତମ୍‌, ଞେନ୍‌ ଅଞୁମ୍‌ନମ୍‌ ସେଙ୍କେତାୟ୍‌; ଇନିଆସନ୍‌ଗାମେଣ୍ତେନ୍‌ ଆମନ୍‌ ସାନ୍ନି କାବ୍ବାଡ଼ାନ୍‌, ଆଗରାମ୍‌ଗାମ୍‌, ପୁର୍ବାନ୍‌ ଆଜୋଗା ଆବର୍ନେ ଅଡ଼୍‌କୋନ୍‌ ଡର୍ନେଡମ୍‌ ଡ ଆଜାଡ଼ିନ୍‌ ବାତ୍ତେ ଗବ୍‌ଡେଲେନ୍‌ । 2 ଇନିଆସନ୍‌ଗାମେଣ୍ତେନ୍‌ ଆମନ୍‌ ଗଡ଼ାନ୍‌ ଅଡ଼୍‌କୋନ୍‌ ଅବ୍‌ସେଡ୍‌ତେ, ଏର୍ରେ କିନ୍ତାଲନ୍‌ ଆଗଡ଼ା ରୁବ୍‌ଡ଼ାଙେନ୍‌; ବଡେସାବାୟ୍‌ଜି ଆରାଜାସିଙ୍‌ ଅବ୍‌ସେଡ୍‌ତଜି; ତିଆତେ ଆରି ଆଙ୍ଗିୟ୍‌ଜା ତନୁବନ୍‌ ଅଃଡେଏ । 3 ତିଆସନ୍‌ ବପ୍ପୁମରଞ୍ଜି ଆମନ୍‌ଆଡଙ୍‌ ଅବ୍‌ଗୁଗୁପେମେଙ୍‌ତମ୍‌ଜି ଆରି ବରନ୍ତଙ୍‌ଡାନ୍‌ ଆକେଜ୍ଜାଜି ଆଗଡ଼ା ଆମନ୍‌ଆଡଙ୍‌ ବତଙ୍‌ତଜି ଆରି ମାନ୍ନେତଜି । 4 ଇନିଆସନ୍‌ଗାମେଣ୍ତେନ୍‌ ଆମନ୍‌ ଡୋଲେୟ୍‌ମରନ୍‌ ଆ ରଡୋ ମରେଲ୍‌ସିଙ୍‌, କରାର୍‌କାରମନ୍‌ ଆମନ୍‌ରାଜି ଆଡଣ୍ଡ ଆଡିଡ୍‌ ଆର୍‌ଲୋଲୋନେସିଙନ୍‌, ବରନ୍ତଙ୍‌ଡାନ୍‌ ଆମନ୍‌ରାଜି ଆରୁୟମ୍‌ ରିଙ୍ଗେତିରନ୍‌ ଅନ୍ତମ୍‌ କିନ୍ତାଲ୍‌ଲୋଙନ୍‌ ଆତରିଡ୍‌ତେନ୍‌ ଆଡିଡ୍‌ ରିଙ୍ଗେତିରନ୍‌ ଆଡରଙ୍‌ନେ, ଉଙ୍‌ରୁଡନ୍‌ ଆଡରଙ୍‌ନେ ଆ ଉମ୍ମୁଲ୍‌ ଡେଏନ୍‌ । 5 ଏଙ୍ଗାଲେ ଆମନ୍‌ ଆସର୍‌ ଡେସାଲୋଙନ୍‌ ଉଙ୍‌ରୁଡନ୍‌ଆଡଙ୍‌, ତି ଅନ୍ତମ୍‌ ବଡେସାବାୟ୍‌ଜି ଆବନାବ୍‌ବାବ୍‌ ସବ୍‌ଙାୟ୍‌ତେ; ଏଙ୍ଗାଲେ ମେଗନ୍‌ ଆ ଉମ୍ମୁଲ୍‌ ବାତ୍ତେ ଉଙ୍‌ରୁଡନ୍‌, ତି ଅନ୍ତମ୍‌ ବରନ୍ତଙ୍‌ଡାନ୍‌ ଆମନ୍‌ରାଜି ଆ କନନ୍‌ ଆସନଡ୍ଡା ସନବ୍‌ଙାଜନ୍‌ ଡେତେ ।

6 ଆରି ପ୍ରବୁନ୍‌ କେନ୍‌ ଆବରୁଲୋଙ୍‌ ଅଡ଼୍‌କୋ କେଜ୍ଜାନ୍‌ ଆସନ୍‌ ମନଙ୍‌ ମନଙ୍‌ ଆଜନୋମ୍‌ଜି ବାତ୍ତେ ଅବୟ୍‌ ବୋଜ୍ଜିନ୍‌ ତୁବେନ୍‌, ଆଗରାମ୍‌ଗାମ୍‌, ପାପୁର୍‌ ଦ୍ରାକ୍ୟାଡାନ୍‌ ଡ ମନଙ୍‌ ମନଙ୍‌ ଆକରିଜେଲ୍‌ ଜନୋମ୍‌ଜୋମ୍‌ ଆ ଜିନିସଜି ଡ ଆରି ମଡ଼ି ପାପୁର୍‌ ଦ୍ରାକ୍ୟାଡାନ୍‌ ବାତ୍ତେ ଅବୟ୍‌ ବୁଜ୍ଜିନ୍‌ ତୁବ୍‌ତେ । 7 ଆରି, ଅଡ଼୍‌କୋକେଜ୍ଜାନ୍‌ ଆମନମ୍‌ରାଜି ଆଉପରେଙ୍‌ ଅଙ୍ଗା ଆ ୟନୁମ୍‌ରାବ୍‌କାବନ୍‌ ଆୟୁମ୍‌ୟୁମ୍‌ ଆରି ଅଡ଼୍‌କୋ ଡେସାନ୍‌ ମନାରାଜି ଆଉପରେଙ୍‌ ଅଙ୍ଗା ଆ ୟନୁମ୍‌ରାମ୍‌ ଆୟୁମ୍‌ରାମ୍‌ ତିଆତେ ଆନିନ୍‌ କେନ୍‌ ଆବରୁଲୋଙ୍‌ ଅବ୍‌ସେଡ୍‌ତ । 8 ଆନିନ୍‌ ଅଡ଼୍‌କୋ ଡିନ୍ନାନ୍‌ ଆସନ୍‌ ରନବୁନ୍‌ ସବାଙାୟ୍‌ତେ, ଆରି ପ୍ରବୁ ପ୍ରବୁନ୍‌ ଅଡ଼୍‌କୋ ମୁକାନ୍‌ ସିଲଡ୍‌ ଆମଡ୍ଡାନ୍‌ ଗସଡ୍‌ତେ, ଡ ଅଡ଼୍‌କୋ ପୁର୍ତିନ୍‌ ସିଲଡ୍‌ ଆନିନ୍‌ ଆମନ୍‌ରାଞ୍ଜି ଆଗନ୍‌ରୟ୍‌ ସବ୍‌ଙାୟ୍‌ତେ; ଇନିଆସନ୍‌ଗାମେଣ୍ତେନ୍‌ ପ୍ରବୁନ୍‌ କେନ୍‌ ଆବର୍ନେ ବରନେ । 9 ଆରି, ତି ଆଡିନ୍ନା କେନ୍‌ ଆବର୍ନେ ବର୍ରନ୍‌, "ଗିୟ୍‌ବା, କେନ୍‌ ଇସ୍ୱରଲେନ୍‌; ଇନ୍‌ଲେଞ୍ଜି ଆନିନ୍‌ଆଡଙ୍‌ ଜଗେତବୋ ଆରି ଆନିନ୍‌ ଇନ୍‌ଲେଞ୍ଜିଆଡଙ୍‌ ଡୋବ୍‌ଡୋଲଙ୍‌ତନ୍‌; କେନ୍‌ ଆନିନ୍‌ ସଦାପ୍ରବୁ; ଇନ୍‌ଲେଞ୍ଜି ଆନିନ୍‌ଆଡଙ୍‌ ଜଗେତବୋ, ଇନ୍‌ଲେଞ୍ଜି ଆନିନ୍‌ ଆତ୍ରୁବେନ୍‌ ଆନୁର୍‌ଲୋଙ୍‌ ସର୍ଡାଲନ୍‌ ଏତଙ୍‌ସେଙ୍‌ତନାୟ୍‌ ।"

10 ଇନିଆସନ୍‌ଗାମେଣ୍ତେନ୍‌ ସିଓନ ଆବରୁଲୋଙ୍‌ ପ୍ରବୁନ୍‌ ଆସିନ୍‌ ଜାବ୍‌ତେ, ଆରି ଲରାତାଙିୟ୍‌ଲୋଙନ୍‌ ଏଙ୍ଗାଲେ ଅଲାମନ୍‌ ଞନାଡାନ୍‌ ଡେତେ, ତି ଅନ୍ତମ୍‌ ଆନିନ୍‌ ଆ ତାଲ୍‌ଜଙନ୍‌ ବାତ୍ତେ ମୋୟାବନ୍‌ ଡେସାନ୍‌ ଞନାଡାନ୍‌ ଡେତେ । 11 ଆରି ପୁପୁଡାମରନ୍‌ ପୁପୁଡାନ୍‌ ଆସନ୍‌ ଏଙ୍ଗାଲେ ଆସିନ୍‌ ଉର୍ରାତେ, ଏତ୍ତେଲେ ମୋୟାବନ୍‌ ଆମନ୍‌ରାଜି ଆସିଞ୍ଜି ଉର୍ରାତେ; ବନ୍‌ଡ ପ୍ରବୁନ୍‌ କାବ୍ବାଡ଼ାନ୍‌ ଡ ଆ ଗର୍ବନ୍‌ ଅବ୍‌ସେଡ୍‌ତେ । 12 ଆରି ଆନିନ୍‌ ଡେଙ୍ଗା କିନ୍ତାଲ୍‌ ରଡୋ ମରେଲ୍‌ସିଙନ୍‌ ରୁବ୍‌ଡ଼ାଙ୍‌ଲେ ଅବ୍‌ସେଡ୍‌ତେ ଆରି ତିଆତେ ରୁବ୍‌ଡ଼ାଙ୍‌ଲେ ଲବଲୋଙନ୍‌ ଅଃବ୍‌ମାୟ୍‌ନେତେ ।