ଦମେସକନ୍ ଆସନ୍ ପୁର୍ବାଃତେବରନ୍
1 ଦମେସକନ୍ ଆସନ୍ ପୁର୍ବାଃତେବରନ୍ । ଗିୟ୍ବା, ଦମ୍ମେସକ ଗଡ଼ାନ୍ ଗାମ୍ଲେ ଆରି ଅଃଡକୋଏ, ତିଆତେ ଆରିଡ଼ାଙ୍ତାଲନ୍ ଡେତେ । 2 ଅରୋୟରନ୍ ଆ ଗଡ଼ା ଅଡ଼୍କୋନ୍ ଅନୁମ୍ରେଙନ୍ ଡେଏନ୍; ତି ଅଡ଼୍କୋନ୍ ଜନ୍ତୁଜି ଆଡ୍ରକୋନେ ଆସନ୍ ଡେତେ, ଆନିଞ୍ଜି ତିତେତ୍ତେ ଲୁଡ୍ତଜି, ଆରି ଆନ୍ନିଙ୍ ଆନିଞ୍ଜିଆଡଙ୍ ଅବବ୍ତଙେଜି । 3 ଆରି ଇପ୍ରିଅମନ୍ ସିଲଡ୍ ମରେଲ୍ସିଙନ୍ ଡ ଦମେସକନ୍ ସିଲଡ୍ ରାଜ୍ୟନ୍ ଡ ଅରାମନ୍ ସିଲଡ୍ ଲାଙ୍ଲେଡ୍ ଆମନ୍ରାଜି ଗୁରୁଡ୍ଡେତଜି; ପ୍ରବୁନ୍ ବର୍ତନେ, "ତି ଅଡ଼୍କୋନ୍ ଇସ୍ରାଏଲ ଆଅନ୍ଞ୍ଜି ଗନୁଗୁ ପନେମେଙ୍ ଅନ୍ତମ୍ ଡେତେ । 4 ଆରି ତି ଆଡିନ୍ନାଲୋଙ୍ ଜାକୁବନ୍ ଆ ଗନୁଗୁ ପନେମେଙ୍ ଅନବ୍ସୋଜନ୍ ଡେତେ ଆରି ଆ ବୋର୍ସାନ୍ ଅସୋୟ୍ତେ । 5 ଆରି, ଜନ୍ରୋମନ୍ ଆଗ୍ରତ୍ତେନ୍ଆମନ୍ରା ଏଙ୍ଗାଲେ ବସେଙନ୍ ଆ ଜନ୍ରୋମ୍ ଆ ତନର୍ତୁମ୍ ଆଡିଡ୍ ଡ ଆସିନ୍ ବାତ୍ତେ ଆସିସାନ୍ ଆଗ୍ରତେନ୍ ଆଡିଡ୍, ଅଡ଼େ ଆନ୍ନିଙ୍ ରପାଇମନ୍ ଆବସେଙ୍ଲୋଙ୍ ଆସେଡନ୍ ଆସିସା ଆଞନିଡା ଆଡିଡ୍ ଏଙ୍ଗାଲେ ଡେତେ, ତି ଅନ୍ତମ୍ ଡେତେ । 6 ଜିତନୁବନ୍ ଆ ଜଅ ୟୁଲେ ଆପ୍ରାଙ୍ତେଞ୍ଜି ଆତିକି, ଏଙ୍ଗାଲେ ମନଙ୍ ଆଜନ୍ କେଣ୍ତାର୍ଲୋଙନ୍ ବାଗୁ ଅଡ଼େ ୟାଗି ଜଅନ୍ ଡକୋତେ, ଡ ଜଅନୁବନ୍ ଆ କେଣ୍ତାର୍ଲୋଙଞ୍ଜି ଉଞ୍ଜି ଅଡ଼େ ମନ୍ଲୟ୍ ଡକୋତେ," ଏତ୍ତେଲେ ତିତ୍ତେଲୋଙ୍ ଅସୋୟ୍ ଆତନଲନ୍ ଡକୋତେ, କେନ୍ଆତେ ଇସ୍ରାଏଲନ୍ ଆ ସଦାପ୍ରବୁ ବର୍ତନେ । 7 ତି ଆଡିନ୍ନା ମନ୍ରାଞ୍ଜି ଆନିଞ୍ଜି ଆ ଗନଡ଼େ ଇସ୍ୱରନ୍ ଆମଙ୍ବାନ୍ ଡ ସନାୟୁମନ୍ ଆଞନାଙ୍ ଆସନ୍ ଇସ୍ରାଏଲନ୍ ଡରମ୍ମ ଇସ୍ୱରନ୍ ଅନ୍ତମ୍ ଆଡଙ୍ ଗିୟ୍ଗିୟ୍ତଜି । 8 ଆରି ଆସିନ୍ ବାତ୍ତେ ଆତ୍ରୁବେନ୍ ଆତନମ୍ପିଲ୍ ଅଡ଼୍କୋନ୍ ଆନିନ୍ ଅଃଗିଜେ, ଅଡ଼େ ଆସିନ୍ ବାତ୍ତେ ଆତୁବ୍ତୁବନ୍ ଆସେରା ମୁର୍ତିନ୍ ଅଡ଼େ ଓୟୁଙ୍ କୁଣ୍ଡାୟନ୍ ଅଡ଼୍କୋନ୍ ଆଡଙ୍ ଏଆଙାଙ୍ଡଙ୍ । 9 ତି ଆଡିନ୍ନା ରବ୍ଡୋଲନ୍ ଆଡ୍ରକୋତଞ୍ଜି ଗଡ଼ାଞ୍ଜି ଅଡ଼୍କୋନ୍ ଇସ୍ରାଏଲନ୍ ଆଅଞ୍ଜି ଆବନ୍ତଙ୍ ଆସନ୍ ଜାଡ଼ିଆନ୍ ଆରି ବରୁନ୍ ଆତୋଣ୍ତୁ ଆରମ୍ରେଙ୍ତବନ୍ ଆଡ୍ରକୋନେ ଅନ୍ତମ୍ ଡେତେ ଆରି ଡେସାନ୍ ରସମ୍ତେ । 10 ଇନିଆସନ୍ଗାମେଣ୍ତେନ୍ ଆମ୍ୱେନ୍ ଅନୁର୍ ଇସ୍ୱରନ୍ଆଡଙ୍ କରୋଡାଡଙ୍ବେନ୍ ଆରି ବୋର୍ସାନ୍ ଅନ୍ତମ୍ ଆରେଙ୍ ଆବର୍ନେ ଏଡାଲୁଡ୍ଡଙ୍; ତିଆସନ୍ ଆମ୍ୱେନ୍ ମନଙ୍ରାନ୍ ଆତଲି ଏଗୁତେ ଆରି ବଡେସା ଆକଲମି ସରିନ୍ ତିଆତେ ଏଜୁଡ଼େତେ । 11 ଆମ୍ୱେନ୍ ଏଗ୍ରୁତେନ୍ ଆଡିଡ୍ ଏର୍ରେ ଏତର୍ତେ ଆରି ଡୋତାନ୍ ଆମ୍ୱେନ୍ ଅବାୟ୍ବେନ୍ ଏଅବ୍ତାର୍ବାତେ; ବନ୍ଡ ଡୁକ୍କନ୍ ଡ ପନବ୍ରଡନ୍ ଆଡିନ୍ନା ଜଅବେନ୍ ଗଲୋଆୟ୍ତାୟ୍ । 12 ୟୋଙ୍! ଲାଙ୍ଲେଡ୍ ଆ କେଜ୍ଜା ଆୟନୋଙ୍ୟାଙ୍, ଆନିଞ୍ଜି ସମେଁୟ୍ଣ୍ଡ୍ରାନ୍ ଆ ଇଡ୍ଡୋୟ୍ଡା ଆସନଡ୍ଡା ଅନ୍ତମ୍ ଅବ୍ସଡ୍ଡାତଞ୍ଜି; ଏର୍ଜାଡ଼ିକାନ୍ ଆଡେସାବାୟ୍ଜି ରୁମ୍ପେଲ୍ଲେ ଜିର୍ତାଜି, ଆନିଞ୍ଜି ଗଗଡାନ୍ ଅନ୍ତମ୍ ରୁମ୍ପେଲ୍ଲେ ଜିର୍ତାଜି ! 13 ଜବ୍ର ଗଗଡାନ୍ ଲାର୍ରନ୍ ଆଜିର୍ତାଞନ୍ ଅନ୍ତମ୍ ରୁମ୍ପେଲ୍ଲେ ଜିର୍ତାଜି; ବନ୍ଡ ଇସ୍ୱରନ୍ ଆନିଞ୍ଜିଆଡଙ୍ ବବ୍ତଙ୍ତେ, ସିଲତ୍ତେ ଆନିଞ୍ଜି ସଙାୟ୍ ଜିର୍ତଜି ଡ ରିଙ୍ଗେନ୍ ବାତ୍ତେ ବରୁନ୍ ଆତୋଣ୍ତୁ ଆପୋନ୍ଲାସରନ୍ ଅନ୍ତମ୍ ଡ ଜବ୍ର ଗାବ୍ୟାର୍ରିଙନ୍ ବାତ୍ତେ ଆରଡ଼ିଲନ୍ ଆପ୍ରାଙ୍ରିଙ୍ତେନ୍ ଅନ୍ତମ୍ ଗନଙ୍ତିଡନ୍ ଡେତଜି । 14 ଗିୟ୍ବା, ସାଲୁମନ୍ ଆଡିଡ୍ ଆ ବନ୍ତଙ୍ ଡ ଅନ୍ରଙ୍ ସାଆରେନ୍ ଆମ୍ମୁଙ୍ ଆନିଞ୍ଜି ଆନ୍ନିଙ୍ ତଡ୍ । ଆନାଜି ଜୁରୁମର୍ଲେଞ୍ଜି ତିଆତେ ମା ଆତନଲ୍ଞ୍ଜି ଡ ଆନାଜି ରାଉମର୍ଲେଞ୍ଜି ତିଆତେ ମା ଆବନ୍ତାଞ୍ଜି ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)