1 ଇସ୍ୱରନ୍‌ କେନ୍‌ ଆବର୍ନେ ବର୍ତନେ, ଅଙ୍ଗା ଅନମ୍‌ରେଙ୍‌ନ ଆ ଅଲା ବାତ୍ତେ ଅୟୋଙ୍‌ବେନ୍‌ଆଡଙ୍‌ ଏଅମ୍‌ରେଙନ୍‌ ତି ଆ ଆନମ୍‌ରେଙ୍‌ ଅଲନ୍‌ ଅଙ୍ଗା ? ଅଡ଼େ ବେବାରମରଞ୍ଜିଲୋଙ୍‌ ସିଲଡ୍‌ ଆନା ଆମଙ୍‌ ଆମ୍ୱେନ୍‌ ଆସନ୍‌ ତମ୍‌ଲବେନ୍‌ ? ଗିୟ୍‌ବା, ଇର୍ସେବେନ୍ ଆସନ୍‌ ଆମ୍ୱେଞ୍ଜି ତନମନ୍‌ ଡେଲବେନ୍‌ ଆରି ନନବେନ୍‌ ଇର୍ସେବେନ୍‌ ଆସନ୍‌ ସବ୍‌ଙାଲବେନ୍‌ ।

2 ଞେନ୍‌ ଆରିୟ୍‌ଲାଞନ୍‌ ଆଡିନ୍ନା ଆମ୍ବେଞ୍ଜି ଇନି ଆସନ୍‌ ଏଡକୋଲନ୍‌ ? ଞେନ୍‌ ଆରୋଡେଲବେନ୍‌ ଆଡିଡ୍‌ ଆମ୍ବେନ୍‌ ଇନିଆସନ୍‌ ଏଜାଲଙ୍‌ଲିୟ୍‌ ? ଅସିଞେନ୍‌ ଡୋୟ୍‌ନାଏନ୍‌ ପଙ୍‌ ଡ ଆମ୍ବେନ୍‌ ଆଡଙ୍‌ ଉର୍ରରେ ଅର୍ରପ୍ତିବେନ୍‌ ? ଅଡ଼େ ଅନମ୍‌ମ୍ମେଙନ୍‌ ଆସନ୍‌ ବୋର୍ସାତଡ୍‌ ପଙ୍‌ ? ଗିୟ୍‌ବା ବନବ୍‌ତଙ୍‌ଞେନ୍‌ ବାତ୍ତେ ସମେଙଁଡ୍ରାନ୍‌ ଅବ୍‌ସର୍‌ତାୟ୍‌, ସନାସୋଡ଼ା ଅଲନ୍‌ଞ୍ଜି ଅସର୍ରଲନ୍‌ ଏମ୍ମେତାୟ୍‌, ଇନିଆନ୍‌ଗାମେଣ୍ତେନ୍‌ ଡାଆନ୍‌ ଅବୟ୍‌ତଡନ୍‌ ଆସନ୍‌ ତେତ୍ତେ ଆଡ୍ରକୋତନ୍‌ ଆୟ୍‌ଜି ଇର୍ଗାଲନ୍‌ ବାତ୍ତେ ରବୁଲେ ସଅତେ ।

3 ଞେନ୍‌ ରୁଆଙନ୍‌ ଅବ୍‌ନୋଙ୍‌ତାୟ୍‌ ଡ ଅକା କାବନ୍‌ ବୟନ୍‌ ଅବ୍‌ଗୋସାୟ୍‌ତା ।

4 ଞେନ୍‌ ଏଙ୍ଗାଲେ ମନ୍‌ଙ୍ଗାମରଞ୍ଜି ଇସ୍ୱରନ୍‌ ଆବର୍ରନେ ବାତ୍ତେ ରବ୍‌ଡୋଲେ ରପ୍ତିତାୟ୍‌, ତିଆସନ୍‌ ପ୍ରବୁନ୍‌ ଜନାମରଞ୍ଜି ଆଲାଙ୍‌ ତିୟଲିୟ୍‌; ତିଆସନ୍‌ ଆଏଡ଼ର୍‌ ଅର୍ରଙ୍‌ଡୋତାନ୍‌ ଞେନ୍‌ ଅବ୍‌ଡୋତିୟ୍‌, ଜନାମରଞ୍ଜି ଅନ୍ତମ୍‌ ଅଲୁଡ୍‌ଞେନ୍‌ ବୟନ୍‌ ରଜାଲ୍‌ଲେକାଁୟ୍‌ ଅମ୍‌ଡଙ୍‌ତେ । 5 ଇସ୍ୱରନ୍‌ ଆବର୍ନେ ଅନମ୍‌ଡଙନ୍‌ ଆସନ୍‌ ଅଲୁଡ୍‌ଞେନ୍‌ ରୋଏନ୍‌, ଆରି ଞେନ୍‌ ସଙ୍ଗତାମର୍‌ ଅଃଡେଲିଁୟ୍‌ କି କିନ୍‌ଣ୍ତୋଙ୍‌ଗଡ୍‌ ଅୟର୍ରଲନାୟ୍‌ । 6 ଞେନ୍‌ ଆନାଜି ତିଡ୍‌ତିୟ୍‌ଞ୍ଜି କିନ୍‌ଣ୍ତୋଙ୍‌ଞେନ୍‌ ଅବ୍‌ତୁୟ୍‌ତାୟ୍‌, କୋରୋତମନ୍‌ ଆପୁରୁୟ୍‌ତେନ୍‌ ଆମନ୍‌ରା କୋତ୍ତାୟ୍‌ତମ୍‌ ଞେନ୍‌ ଅବ୍‌ତୁୟ୍‌ତାୟ୍‌; ଗନବ୍‌ରୟ୍‌ ଞେନ୍‌ ଆସନ୍‌ ବିଜଲଲିଞ୍ଜିଡେନ୍‌ ମୁକାଞେନ୍‌ ଅସ୍ସ୍‌ଆୟ୍‌ ।

7 ଇନିଆସନ୍‌ଗାମେଣ୍ତେନ୍‌ ପ୍ରବୁଞେନ୍‌ ସାୟ୍‌ସିତିୟ୍‌; ତି ଆସନ୍‌ ଅଡ଼େତେଅଡ଼େନ୍ନେ ଅଃଡେଲିଁୟ୍‌; ତିଆସନ୍‌ ଞେନ୍‌ ଜିଲ୍‌ଜାଲ୍‌ ଅରେଙନ୍‌ ଅନ୍ତମ୍‌ ମୁକ୍କାଞେନ୍‌ ଡକୋଲାୟ୍‌, ତିଆସନ୍‌ ଞେନ୍‌ ଅଃଗରଜିଁୟ୍‌ । 8 ଆନା ଞେନ୍‌ ଡରମ୍ମର୍‌ଅମେଲିୟ୍‌ ଆନିନ୍‌ ଅମଙ୍‌ଞେନ୍‌ ଆନା ଞେନ୍‌ ସଙ୍ଗତାଞିୟ୍‌ ? ଜିର୍ରାୟ୍‌ବା ଇନ୍‌ଲେଞ୍ଜି ଏରୁକୁନେବା; ସଙ୍ଗତାମର୍‌ଞେନ୍‌ ଆନା ଡକୋ ? ତି ଆମନ୍‌ରା ଅମଙ୍‌ଞେନ୍‌ ଜିର୍ରାୟ୍‌ତୋ । 9 ଗିୟ୍‌ବା ପ୍ରବୁ ଇସ୍ୱରଞେନ୍‌ ସାୟ୍‌ସିତିୟ୍‌; ଞେନ୍‌ ଆନା ଅବ୍‌ଡୋସାଇନ୍‌ ? ଆନିଞ୍ଜି ଆପାପୁର୍‌କାବ୍‌ଗୋ ଡେତଜି ଆନିଞ୍ଜି ଆଡଙ୍‌ ବୋବୋଡନ୍‌ ବାତ୍ତେ ପାଡ଼ୁଡେତଜି ।

10 ଆନା ଇସ୍ୱରନ୍‌ ବତଙ୍‌ତେ ଅଡ଼େ ଆସେବାମରନ୍‌ ଆବର୍ରନେ ମାନ୍ନେତେ ଏନେଗୋମରନ୍‌ ଅମଙ୍‌ଲୋଙ୍‌ବେନ୍‌ ଆନା ଡକୋ ? ଅଙ୍ଗା ମନ୍‌ରା ଲୋଙଡ୍‌ଲୋଙନ୍‌ ଜିର୍ତେ ଆନିନ୍‌ ସନାଆରନ୍‌ ଅଙାଞେନ୍‌, ଇସ୍ୱରନ୍‌ ଆଞୁମ୍‌ଲୋଙ୍‌ ଆନିନ୍‌ ଡର୍ରତନେ କି ଆନିନ୍‌ ଇସ୍ୱରନ୍‌ ଆମଙ୍‌ ଆସାଲନ୍‌ ଡକୋତନ୍‌ । 11 ଆମ୍ୱେଞ୍ଜି ରମ୍ମଙ୍‌ ରମ୍ମଙ୍‌ ଅନମେଙନ୍‌ ଆସନ୍‌ ତଙରନ୍‌ ଏସାୟ୍‌ତେ । ଆମ୍ୱେଞ୍ଜି ରମ୍ମଙ୍‌ ରମ୍ମଙ୍‌ ତଗୋନ୍‌ ଏସୟ୍‌ତେ କି କୋତିଲାତୁଗଡ୍‌ ଆମ୍ୱେନ୍‌ଡମ୍‌ ଏର୍ରେ ଏଜିର୍ତେ । ଆମ୍ୱେନ୍‌ ଆଉଲ୍‌ଲାଙ୍‌ତୋଡ୍‌ଗଡ୍‌ ଡ କୁତ୍ତିଲାତଡ୍‌ଗଡ୍‌ ତଙିୟ୍‌ଲନ୍‌ ଏଜିର୍ତେ । ଅସିଲୋଙ୍‌ଞେନ୍‌ ସିଲଡ୍‌ କେନ୍ ଆତେଜି ଆମ୍ୱେଞ୍ଜି ଏଙାତେ, କି ଡୁକ୍କାଲନ୍‌ ଏଲୁତେ ।