1 ସଉଦ ବର୍ସେଙ୍‌ଲୋଙ୍‌ ଇଜକିଅନ୍‌ ଜିଉଦାନ୍‌ ଆରାଜା ଡକୋଏନ୍‌, ଆସିରିଆନ୍‌ ଆ ରାଜା ସେନାଏରିବନ୍‌ ଜିଉଦାନ୍‌ ଆ ମରେଲ୍‌ସିଙ୍‌ ଗଡ଼ାନ୍‌ ଅବ୍‌ଗେଗେଲେ ଆନିଞ୍ଜିଆଡଙ୍‌ ଆସିଲୋଙନ୍‌ ଡକ୍କୋଏନ୍‌ । 2 ତିସିଲଡ୍‌ଲନ୍‌ ଆସିରିଆନ୍‌ ଆରାଜା ରବ୍‌ସାକିନ୍‌ଆଡଙ୍‌ ସୋଡ଼ା ସିପ୍ପୟଞ୍ଜି ସରିନ୍‌ ଲାକିସନ୍‌ ସିଲଡ୍‌ ଜିରୁସାଲମ୍‌ବାନ୍‌ ଇଜକିଅନ୍‌ ରାଜାନ୍‌ ଆମଙ୍‌ବା ଆପ୍ପାୟେଞ୍ଜି । ଆରି ଆନିନ୍‌ ଡୋବ୍ବାନ୍‌ ଆବସେଙ୍‌ ଆତଙର୍‌ ଆତୋଣ୍ଡୋଗଡ୍‌ ବଣ୍ଡାନ୍‌ ଆଅନା ଆତୁୟାୟ୍‌ ତନଙେନ୍‌ । 3 ଇଜକିଅନ୍‌ ଆ ଡାଙ୍ଗାଡ଼ାଅନ୍‌, ଇଲିୟାକିମନ୍‌ ରାଜାସିଙନ୍‌ ଆଗନିୟ୍‌ମର୍‌; ସିବନନ୍‌, କୋର୍ଟନ୍‌ ଆଇଡଲ୍‌ମର୍‌; ଆରି ଆସପନ୍‌ ଆ ଡାଙ୍ଗାଡ଼ାଅନ୍‌, ଜୋୟାଅନ୍‌ ଇତିଆସନ୍‌ ଆଇଡଲ୍‌ମର୍‌ ଡୁଙ୍‌ଲନାଜି କି ଆମଙ୍‌ବାନ୍‌ ଇୟ୍‌ଲାଜି । 4 ତିସିଲଡ୍‌ ରବ୍‌ସାକିନ୍‌ ଅସୁରନ୍‌ ଆରାଜା ଡ ଆନିଞ୍ଜିଆଡଙ୍‌ ବରେଞ୍ଜି ନମି ଆମ୍ବେନ୍‌ ଇଜକିଅନ୍‌ଆଡଙ୍‌ ବର୍ବା ଅସୁରନ୍‌ ଆରାଜା କେନ୍‌ ବାବର୍ନେ ବର୍ତନେ ଆମନ୍‌ କେନ୍‌ ଡର୍ନେନମ୍‌ ଡକୋ କେନ୍‌ଆତେ ଏଙ୍ଗାଗୋ ଆଡର୍ନେ ? 5 ଞେନ୍‌ "ବର୍ତନାୟ୍‌ ଅଲ୍‌ଜୁଜ୍ଜେନ୍‌ ଆସନ୍‌ ବର୍ନେନମ୍‌ ଡ ବୋର୍ସାନ୍‌ କାଜ୍ଜାନ୍‌ ? ଆମନ୍‌ ଆନାଆଡଙ୍‌ ଆସାଡାଲନ୍‌ ଞେନ୍‌ଆଡଙ୍‌ ଏସଙ୍ଗତାତିଁୟ୍‌ ? 6 ଗିୟ୍‌ବା ଆମନ୍‌ ମିସରନ୍‌ ଞେନ୍‌ଆଡଙ୍‌ ସାୟ୍‌ସିତିଁୟ୍‌ ଗାମ୍‌ଲେ ଆସାତନେ, ବନ୍‌ଡ ତିଆତେ ଅବୟ୍‌ ଡାଙ୍ଗୋନ୍‌ ଆଞନର୍ରମ୍‌ତବନ୍‌ ଆଡାଙ୍ଗୋ ଅନ୍ତମ୍‌ ଞର୍ରମ୍‌ନେନ୍‌ ଡେତେ କେନ୍‌ଆତେ ଅସିନମ୍‌ ଲବ୍‌ଗଡ୍‌ତେ । ଅଙ୍ଗାଆଡିଡ୍‌ ଆନ୍ନିଙ୍‌ ଆନିନ୍‌ଆଡଙ୍‌ ଆସାତନେ ତିଆଡିଡ୍‌ ମିସରନ୍‌ ଆରାଜା ତିଅନ୍ତମ୍‌ ।"

7 ଆସିରିଆନ୍‌ ଆସୋଡ଼ାମର୍‌ ଆମ୍ମୁଗଡ୍‌ ଜିରେନ୍‌, "ଅଡ଼େ ଆମନ୍‌ ଞେନ୍‌ଆଡଙ୍‌ ବର୍ତିଁୟ୍‌ ଆମନ୍‌ ପ୍ରବୁ ଇସ୍ୱରନମ୍‌ ଆମଙ୍‌ ଆସାତନ୍‌ ? ଇଜକିଅନ୍‌ ଜିଉଦାନ୍‌ ଡ ଜିରୁସାଲମନ୍‌ ଆମନ୍‌ରାଜିଆଡଙ୍‌ ଆବୟନ୍‌ ଆନମ୍ପେଲ୍‌ଲୋଙ୍‌ ତୁମ୍‌ ପୁର୍‌ପୁରନ୍‌ ଆସନ୍‌ ଆବର୍ତନ୍‌ ଆଡିଡ୍‌ ପ୍ରବୁନ୍‌ ଆସରେବାସିଙ୍‌ ଡ ତନମ୍ପେଲନ୍‌ ଅବ୍‌ସେଡାଜେନ୍‌ । 8 ଞେନ୍‌ ରାଜାନ୍‌ ଆଞୁମ୍‌ଲୋଙ୍‌ ଆମ୍ବେନ୍‌ ସରିନ୍‌ ଗବ୍‌ରିବା । ଞେନ୍‌ ଆମ୍ବେଞ୍ଜିଆଡଙ୍‌ ବାଗୁଅଜାର କୁର୍ତାନ୍‌ ତିୟ୍‌ତବେନ୍‌ ଆମ୍ବେନ୍‌ ଏପାବ୍‌ତିଏଣ୍ଡେନ୍‌ ଡାୟ୍‌କୁର୍ତାମରଞ୍ଜି ଓରୋଙାୟ୍‌ବାଜି । 9 ଏଙ୍ଗାଲ୍‌ଡେନ୍‌ ଆମ୍ବେନ୍‌ ରାଜାଞେନ୍‌ ଆକମ୍ବାରି ଆମଙ୍‌ଲୋଙ୍‌ ସିଲଡ୍‌ ଅବୟ୍‌ ସନ୍ନା ସିପ୍ପାୟନ୍‌ଆଡଙ୍‌ ଗଙ୍‌ଲେ ଏରପ୍ତିତେ, ଆରି ରତ୍ତାନ୍‌ ଡ ଡାୟ୍‌କୁର୍ତାମରନ୍‌ ଆସନ୍‌ ମିସର୍‌ ଡେସାନ୍‌ ଆମନ୍‌ରାଜି ଡର୍ତଞ୍ଜି ? 10 ଞେନ୍‌ ଇନି ପ୍ରବୁନ୍‌ ଅମ୍‌ରେଙ୍‌ଲେ କେନ୍‌ଆତେ ପାଡ଼ୁଅମ୍ମେତାୟ୍‌ ଆସନ୍‌ ଇୟ୍‌ଲାୟ୍‌ ? ପ୍ରବୁନ୍‌ ଞେନ୍‌ଆଡଙ୍‌ ବର୍ରିଁୟ୍‌ କେନ୍‌ ଆଡେସା ଆ ବିରୁଦଲୋଙ୍‌ ଇୟ୍‌ଲେ ପାଡ଼ୁଅମ୍ମେତାୟ୍‌ ।"

11 ତିଆସନ୍‌ ଇଲିଆକିମନ୍‌, ସିବନନ୍‌, ଡ ଜୋୟାଅନ୍‌ ଆସୋଡ଼ାଞ୍ଜିଆଡଙ୍‌ ବରେଞ୍ଜି, "ଆମନ୍‌ ଆରାମିଅ ଲଙ୍‌ଲଙନ୍‌ ବାତ୍ତେ କମ୍ବାରିନମ୍‌ଜିଆଡଙ୍‌ ବରାଜି । ଇନିଆସନ୍‌ଗାମେଣ୍ଡେନ୍‌ ଇନ୍‌ଲେଞ୍ଜି ଆରାମିଅ ଲଙ୍‌ଲଙନ୍‌ ଗନ୍‌ଲୁଡ୍‌ତଲେନ୍‌ । ଇବ୍ରୁ ଲଙ୍‌ଲଙନ୍‌ ବାତ୍ତେ ଏବର୍‌ଡଙ୍‌ନେ; କିନ୍ତାଲ୍‌ଲୋଙନ୍‌ ଡକୋନ୍‌ ଆମନ୍‌ରାଜି ଅଡ଼୍‌କୋନ୍‌ ଅମ୍‌ଡଙ୍‌ତଜି ।"

12 ଆନିନ୍‌ ଜାଲଙେନ୍‌, "ପ୍ରବୁଞେନ୍‌ ପଙ୍‌ ରାଜାନମ୍‌ଆଡଙ୍‌ ଆରି କେନ୍‌ ଅଡ଼୍‌କୋନ୍‌ ଆବନର୍‌ ଆସନ୍‌ ଞେନ୍‌ଆଡଙ୍‌ ଆପ୍ପାୟ୍‌ଲିଁୟ୍‌ ? ଇଜ୍ଜା, କେନ୍‌ ଅଙ୍ଗା ଆମନ୍‌ରାଜି ଆମ୍ବେଞ୍ଜି ସରିନ୍‌ ତର୍ଡମ୍‌ ତର୍ଡମ୍‌ ଏର୍‌ମଡ଼ିର ଜନୋମନ୍‌ ଆସନ୍‌ ସନୁମନ୍‌ ଗନାନ୍‌ ଆସନ୍‌, କିନ୍ତାଲ୍‌ଲୋଙନ୍‌ ଆତଙ୍କୁମ୍‌ଜି, ଆମଙ୍‌ବାଞ୍ଜି ଞେନ୍‌ଆଡଙ୍‌ ଅଃନାପ୍ପାୟ୍‌ଲିଁୟ୍‌ ପଙ୍‌ ?"

13 ତିଆସନ୍‌ ରବ୍‌ସାକିନ୍‌ ତନଙ୍‌ଡାଲେ ସୋଡ଼ା ସର୍ରଙନ୍‌ ବାତ୍ତେ ଇବ୍ରୁ ଲଙ୍‌ଲଙନ୍‌ ବାତ୍ତେ କେନ୍‌ ଆବର୍ନେ ବର୍ରନେ, "ଆମ୍ବେଞ୍ଜି ଆସ୍ରାସନତେନ୍‌ ଅସୁରନ୍‌ ଆରାଜା ଆବର୍ନେ ଅମ୍‌ଡଙ୍‌ବା । 14 ଇଜକିଅନ୍‌ ଆମ୍ବେଞ୍ଜିଆଡଙ୍‌ କଣ୍ଡାୟ୍‌ଡଙ୍‌ବେଞ୍ଜିତଡ୍‌ ଗାମ୍‌ଲେ ଆନିନ୍‌ ଆମ୍ବେଞ୍ଜିଆଡଙ୍‌ ଅବ୍‌ଜନାଲବେନ୍‌ । ଇଜକିଅନ୍‌ ଆମ୍ବେଞ୍ଜିଆଡଙ୍‌ ଡୋବ୍‌ଲେ ଅଃରପ୍ତିବେନ୍‌ । 15 ଇଜ୍ଜାଡେନ୍‌ ପ୍ରବୁନ୍‌ ଏଙ୍ଗାଲେଜାକିଁୟ୍‌ଡେନ୍‌ ଇନ୍‌ଲେଞ୍ଜିଆଡଙ୍‌ ଡୋବ୍‌ଡୋବ୍‌ଲଙ୍‌ତନ୍‌ ଆରି କେନ୍‌ ଆଗଡ଼ା ଅସୁରିଅ ରାଜାନ୍‌ ଆସିଲୋଙ୍‌ ସନୋରୋପ୍ପାୟନ୍‌ ଅଃଡେଏ । କେନ୍‌ ଆବର୍ନେ ବର୍ରନ୍‌ ଇଜକିଅନ୍‌ ଆମ୍ବେଞ୍ଜିଆଡଙ୍‌ ପ୍ରବୁନ୍‌ ଆମଙ୍‌ ଅବ୍‌ଡର୍ନେଡଙ୍‌ବେନ୍‌ ତଡ୍‌ । 16 ଇଜକିଅନ୍‌ ଆବର୍ନେ ଏଅମ୍‌ଡଙ୍‌ଡଙ୍‌ । ଇନିଆସନ୍‌ଗାମେଣ୍ଡେନ୍‌ ଅସୁରିଅନ୍‌ ଆରାଜା କେନ୍‌ ଆବର୍ନେ ବର୍ତନେ ଆମ୍ବେନ୍‌ ଞେନ୍‌ ସରିନ୍‌ ସଣ୍ତିନ୍‌ ଆରି ଗଡ଼ାନ୍‌ ସିଲଡ୍‌ ଡୁଙ୍‌ଲନ୍‌ ଜିରାୟ୍‌ବା । ଅଡ଼୍‌କୋମ୍ବେନ୍‌ ଆମ୍ବେଞ୍ଜିଆଡଙ୍‌ ଦ୍ରାକ୍ୟାକୋତ୍ତାବେନ୍‌ ସିଲଡ୍‌ ଦ୍ରାକ୍ୟାଜନ୍‌ ଆରି ଲୁଆନୁବନ୍‌ ସିଲଡ୍‌ ଲୁଆଜନ୍‌ ଏଜୋମ୍‌ତେ ଆରି କୁଆଲୋଙ୍‌ବେନ୍‌ ସିଲଡ୍‌ କୁଆଲୋଙ୍‌ବେନ୍‌ ସିଲଡ୍‌ ଡାଆନ୍‌ ଏଗାତେ । 17 ଅଙ୍ଗାଜାୟ୍‌ ରାଜାନ୍‌ ଆମ୍ବେଞ୍ଜିଆଡଙ୍‌ ରମ୍ମଙ୍‌ ଡେସାଲୋଙନ୍‌ ଡକୋନେନ୍‌ ଆସନ୍‌ ଅନ୍‌ର୍ରଙ୍‌ ଗବ୍‌ରିଏ, ତେତ୍ତେ ଦ୍ରାକ୍ୟାକୋତାନ୍‌ ଡ ଦ୍ରାକ୍ୟାଡାନ୍‌ ଡକୋ ଆରି ରୁଟିନ୍‌ ଆତନୁବ୍‌ ଆସନ୍‌ କମ୍ବୁଜନ୍‌ ଡକୋ । 18 ପ୍ରବୁନ୍‌ ଇନ୍‌ଲେଞ୍ଜିଆଡଙ୍‌ ଡୋବ୍‌ଡୋବ୍‌ଲଙ୍‌ତନ୍‌ ଗାମ୍‌ଲେ ଇଜକିଅନ୍‌ ଆମ୍ବେଞ୍ଜିଆଡଙ୍‌ ଅବ୍‌ଡର୍ନେଡଙ୍‌ବେନ୍‌ତଡ୍‌ ଆବ୍ବୟ୍‌ଲନ୍‌ ଡକୋନାବା । ଆନ୍ନା ଆନ୍ନା କେଜ୍ଜାମରଞ୍ଜି ଆସନୁମ୍‌ଜିଲୋଙ୍‌ ସିଲଡ୍‌ ଅନ୍ନିଙ୍‌ ଆସନୁମ୍‌ ଅସୁରିଅ ରାଜାନ୍‌ ଆସିଲୋଙ୍‌ ସିଲଡ୍‌ ଡେସାନ୍‌ ଡୋବେନ୍‌ ପଙ୍‌ ? 19 ଅମାତରନ୍‌ ଡ ଅର୍ପଦରନ୍‌ ଆସନୁମ୍‌ଜି, ନମି ଆନିଞ୍ଜି ଅଡ଼େଙ୍ଗା ଡକୋଜି ? ସପର୍ବଇମନ୍‌ ଆସନୁମ୍‌ଜି ଅଡ଼େଙ୍ଗା ଡକୋଜି ? ଆନ୍ନିଙ୍‌ ସମରିଆନ୍‌ଆଡଙ୍‌ ଡୋବେଞ୍ଜି ପଙ୍‌ ? 20 ଅଙ୍ଗାଆଡିଡ୍‌ କେନ୍‌ ଅଡ଼୍‌କୋ ଡେସାନ୍‌ ଆସନୁମ୍‌ଜି ରାଜାଲେନ୍‌ ଆମଙ୍‌ସିଲଡ୍‌ ଆଡେସାନ୍‌ ଡୋବେନ୍‌ ? ତିଆଡିଡ୍‌ ପ୍ରବୁନ୍‌ ଅସିଞେନ୍‌ ବାତ୍ତେ ଜିରୁସାଲମନ୍‌ ଡୋବ୍‌ଲେ ରପ୍ତିତେ ଗାମ୍‌ଲେ ଆମ୍ବେନ୍‌ ଏଇଃୟମ୍‌ତେ ପଙ୍‌ ?"

21 ବନ୍‌ଡ ମନ୍‌ରାଞ୍ଜି ରିଙ୍‌ ଗାମ୍‌ଲେ ଡକୋଲଞ୍ଜି, ବପଦ ଜାକିଁୟ୍‌ ଆନିନ୍‌ଆଡଙ୍‌ ଅଃଜାଲଙ୍‌ଲଜି; ଇନିଆସନ୍‌ଗାମେଣ୍ଡେନ୍‌ ଆନିନ୍‌ଆଡଙ୍‌ ଏଜାଲଙ୍‌ଡଙ୍‌ ଗାମ୍‌ଲେ ରାଜାନ୍‌ ଆବନାଁୟ୍‌ ଡକୋଏନ୍‌ । 22 ଇଜକିଅନ୍‌ ଆ ଡାଙ୍ଗାଡ଼ାଅନ୍‌, ଇଲିୟାକିମନ୍‌ ରାଜାସିଙନ୍‌ ଆଗନିୟ୍‌ମର୍‌; ସିବନନ୍‌, କୋର୍ଟନ୍‌ ଆଇଡଲ୍‌ମର୍‌; ଆରି ଆସପନ୍‌ ଆ ଡାଙ୍ଗାଡ଼ାଅନ୍‌, ଜୋୟାଅନ୍‌ ଇତିଆସନ୍‌ ଆଇଡଲ୍‌ମର୍‌ ତର୍ଡମ୍‌ ତର୍ଡମ୍‌ ଆସିନ୍‌ର୍ରି ପେଲେ ଇଜକିଅନ୍‌ ଆମଙ୍‌ବା ଇୟ୍‌ଲେ ରବ୍‌ସାକିରନ୍‌ ଆବର୍ନେ ଅଡ଼୍‌କୋନ୍‌ ଆନିନ୍‌ଆଡଙ୍‌ ଅବ୍‌ଜନାଏଞ୍ଜି ।