1 ଆନାଜି ସନାୟ୍‌ସିନ୍ ଆଞନାଙ୍ ଆସନ୍ ମିସର୍‌ ଡେସାନ୍‌ ଇୟ୍‌ତଜି ଆନିଞ୍ଜି ଅସେଡ୍‌ତଜି । ଆନିଞ୍ଜି ମିସରନ୍ ଆ କୁର୍ତା, ରତ୍ତାନ୍ ଡ ସିପ୍ପାୟଞ୍ଜିଆଡଙ୍ ଆସାଲନ୍ ଡକୋତଞ୍ଜି ବନ୍‌ଡ ଆନିଞ୍ଜି ଇସ୍ରାଏଲନ୍ ଆ ଇସ୍ୱରଆମଙ୍ ଅଃଡର୍ନେଜି, ଆରି ଆନିନ୍‌ଆଡଙ୍‌ ଅଃସାଜେଜି । 2 ଇନିଏଙ୍ଗାବୋ ତିଆତେ ଆନିନ୍‌ ନିୟ୍‌ ଗିଆନମରନ୍‌, ଆନିନ୍ ପନବ୍‌ରଡନ୍ ଆପ୍ପାୟ୍‌ତେ । ପେଲ୍ଲାମରଞ୍ଜିଆଡଙ୍* ଆରି ଆକେଜ୍ଜାମରଞ୍ଜିଆଡଙ୍ ଆରି ଏର୍‌ଡରମ୍ମମରଞ୍ଜି ପନବ୍‌ରଡନ୍ ଆସନ୍ ଡୋଲନେ । 3 ମିସର୍‌ମରଞ୍ଜି ମନ୍‌ରାଜି ଇସ୍ୱର ତଡ୍‌ ଆରି ଆକୁର୍ତାଞ୍ଜି ମିଞାମ୍‌ଜେଲୁଡଅଙ୍ ଜନ୍ତୁଜି ପୁରାଡ଼ା ତଡ୍‌ ଇସ୍ୱରନ୍‌ ଅଙ୍ଗାଆଡିଡ୍‌ ତେକ୍କେସିଲନ୍ ସନାୟ୍‌ସିନ୍ ଆସ୍ରାଜେନ୍ ଆମନ୍‌ରା ତୁଡ୍ଡୁବ୍‌ତେ ଆରି ଆସରାୟ୍‌ସିଏନ୍ ଆମନ୍‌ରା ନିୟ୍ ଅକୁଡ୍‌ତେ ବାଗୁଞ୍ଜି ଆବସାଣ୍ଡନ୍‌ ଅସେଡ୍‌ତଜି ।

4 ଇନିଆସନ୍‌ଗାମେଣ୍ଡେନ୍‌ ପ୍ରବୁନ୍ କେନ୍ ଆବର୍ନେ ଞେନ୍ଆଡଙ୍ ବର୍ରିଁୟ୍‌, "ତୁର୍‌ମେନ୍‌ମରନ୍ ଡିଅଙ୍ଗା ବାବ୍ବାବେନ୍ ଜାକିଁୟ୍‌ଡେନ୍ ସିଅଁ କିଡନ୍ ଜନ୍ତୁନ୍ ଆର୍ରବ୍ବୁଏନ୍ ଆଜନ୍ତୁ ଆମଙ୍‌ସିଲଡ୍ ସିଅଁ କିଡନ୍ ଅଃଡେଲନେ; ଏତ୍ତେଗନ୍ ଞେନ୍ ଅଡ଼୍‌କୋନ୍ ସିଲଡ୍‌ ବୋର୍ସା ଇସ୍ୱରନ୍‌ ସିଓନ୍ ବରୁନ୍‌ ଡନୋବନ୍ ଆସନ୍ ଅଲ୍‌ଜୁଜ୍ଜେନ୍ ଆସନ୍‌ ଓଲନାୟ୍‌ଡେନ୍ ଆନ୍ନିଙ୍ ଞେନ୍‌ଆଡଙ୍ ସବ୍‌ଙାୟ୍‌ଲେ ଅଃରପ୍ତିଇଞ୍ଜି । 5 ଅନ୍ତିଡଞ୍ଜି ଏଙ୍ଗାଲେ ଏଙ୍‌ଡାଲନ୍ ଡୋବ୍‌ଡମ୍‌ତଞ୍ଜି, ଏତ୍ତେଲେମା ଅଡ଼୍‌କୋନ୍ ସିଲଡ୍‌ ବୋର୍ସା ପ୍ରବୁନ୍, ଜିରୁସାଲମ ଗଡ଼ାନ୍ ଡୋବ୍‌ତେ ଆରି ଆନିନ୍‌ଆଡଙ୍‌ ଅନୁରନ୍ ତିୟ୍‌ତେ ।"

6 ଇସ୍ୱରନ୍‌ ଗାମେନ୍, "ଏ ଇସ୍ରାଏଲନ୍‌ଆମନ୍‌ରାଜି, ଆମ୍ବେନ୍ ବିରୁଦଲୋଙ୍‌ଞେନ୍ ଡୋଲନ୍ ଇର୍ସେନ୍ ଏଲୁମେନ୍‌ ଆରି ଅମଙ୍‌ଞେନ୍ ସିଲଡ୍‌ ସଙାୟ୍‌ଲବେନ୍ । ବନ୍‌ଡ ଇସ୍ୱରନ୍‌ ଆମଙ୍‌ବା ୟର୍ନାୟ୍‌ବା, 7 ବଡିନ୍ନା ଜିର୍ତାୟ୍‌ ଆମ୍ବେନ୍ ତର୍ଡମ୍‌ ରୁପ୍ପାନ୍‌ ଡ ସୁନ୍ନାନ୍‌ ବାତ୍ତେ ଆତୁବ୍‌ତୁବନ୍ ଇର୍ସେ ଆକୁଣ୍ଡାୟ୍‌ଜି ଏସେଡ୍‌ତେ । 8 ଆସିରିଆମରଞ୍ଜି ଅଲ୍‌ଜୁଜ୍ଜେଲୋଙନ୍ ରବୁତଜି, ବନ୍‌ଡ ତିଆତେ ମନ୍‌ରାନ୍‌ ଆବୋର୍ସା ବାତ୍ତେ ତଡ୍‌ । ଆସିରିଆମରଞ୍ଜି ଅଲ୍‌ଜୁଜ୍ଜେଲୋଙନ୍ ସିଲଡ୍‌ ବନ୍ତଙନ୍ ଇରାୟ୍‌ତଜି, ଆରି ବେଣ୍ଡିଆମରଞ୍ଜି କମ୍ବାରିନ୍ ଡକୋତଞ୍ଜି । 9 ଆରି ବନ୍ତଙନ୍ ଆସନ୍‌ ଆ ସିପ୍ପାୟଞ୍ଜି ଇରାୟ୍‌ତଜି, ଆରି ଆସୋଡ଼ାମରଞ୍ଜି ଜନିନୟ୍ ପତକାନ୍ ଗିୟ୍‌ଲେ ବତଙ୍‌ତଜି ।" ପ୍ରବୁନ୍‌ ଗାମେନ୍ ଇସ୍ୱରନ୍‌ ଜିରୁସାଲମଲୋଙନ୍‌ ସନେପ୍ପୁରନ୍ତଜି ଆରି ସନୋରୋପ୍ପାୟନ୍ ଆ ତନୁମ୍ମୋଡ୍‌ ତନମ୍ପେଲନ୍ ଡକୋ ।