1 ନନିଞେନ୍‌ ଅମ୍‌ଡଙା ଏ କମ୍ୱାରିମେର୍‌ଞେନ୍‌ ଜାକୁବନ୍‌ ଡ ସନେଡାମର୍‌ ଇସ୍ରାଏଲନ୍; 2 ଆମ୍ୱେନ୍‌ ଆନା ଗଡ଼େଲବେନ୍ ‌କମ୍ପୋଙ୍‌ଲୋଙନ୍‌ ଆଗଡ଼େଲବେନ୍‌ ଆଡ୍ରକୋଲନ୍‌ ଆଡିନା ଆନିନ୍‌ ପଙ୍‌ ଅସାୟ୍‌ସିବେନ୍‌ ତି ଆଇସ୍ୱରନ କେନ୍‌ ଆବର୍ରନେ ବର୍ତନ୍‌; ଏ କମ୍ୱାରିମର୍‌ ଜାକୁବ ସନେଡାମର୍‌ ଜିସୁରୁଣନ ଲବାଡିମର୍ର ଇସ୍ରାଏଲ ବତଙ୍‌ଡଙ୍‌ବେନ୍‌ ତଡ୍‌ । 3 ଇନିଆସନଗାମେଣ୍ତେନ୍‌ ଞେନ୍‌ ଇର୍ଗାଲମରନ୍‌ ଆଉପ୍ରେଙ୍‌ ଡ ଆସଲଲୋଙନ୍‌ ଡାଆନ୍‌ ଅମ୍‌ଡୁଙ୍‌ଲେ ଲାତାୟ କି କେଜ୍ଜାଲୋଙବେନ୍‌ ଡ ପସିୟ୍‌ବେଞ୍ଜି ଆଉପ୍ରେଙ୍‌ ପ୍ରାନ୍ନାନ୍‌ ତିୟ୍‌ତାୟ୍‌ ଡ ଆର୍ସିବାଦ ଏମ୍ମେତାୟ୍‌ । 4 ତିଲୋଙ୍‌ ଆନିଞ୍ଜି ଆଡ୍ରୁଙ୍‌ନେଡାନ୍‌ ଆମଙ୍‌ବା ବାଇସିଟା ଅରାନୁବ୍‌ ଅନ୍ତମ୍‌ ଅଗାବନ୍‌ ଡୁଙ୍‌ତନାୟ୍‌ । 5 ଅବୟ୍‌ନେ ଅବୟ୍‌ନେ ବର୍ରତଞ୍ଜି ଞେନ୍‌ ଇସ୍ୱରନ୍‌, ଆନା ଅବୟ୍‌ନେ ବର୍ରନତେ ଞେନ୍‌ ଜାକୁବନ୍ ଆଞୁମ୍‌ଲୋଙ୍‌ ଅଡ଼୍‌କୋ ଆକେଜ୍ଜା ଜନାଜି; ଅବୟ୍‌ନେ ଇସ୍ୱରନ୍‌ ଆସିଲୋଙ୍‌ ଇଡ୍‌ତଞ୍ଜି, ଞେନ୍‌ ଇସ୍ଵର, ଆରି ଆନିଞ୍ଜି ଇସ୍ରାଏଲନ୍‌ ଆଞୁମ୍‌ଲୋଙ୍‌ ଓଡ୍ଡେତଜି । 6 ଇସ୍ୱରନ୍‌ କେନ୍‌ ଆବର୍ନେ ବର୍ତନ୍‌, ଇସ୍ରାଏଲନ୍‌ ଆରାଜା ଡ ଅନୁର୍‌ମର୍‌ଞେନ୍‌ ଆମ୍ମୁଙ୍‌ ଆରି ଞେନ୍‌ ଆମ୍ମୁଙ୍‌ ଡ ଆସ୍ସ୍‌ନେସ ଅଡ଼େ ଞେନ୍‌ ଅମ୍‌ରେଙ୍‌ଲେ ଆନ୍ନିଙ୍‌ ଇସ୍ୱର ତଡ୍‌ । 7 ଞେନ୍‌ ଆମ୍ମୁଙ୍‌ ପାପୁର୍‌ମରନ୍‌ ଗନ୍‌ଡ଼େଡିନ୍ନାନ୍‌ ସିଲଡ୍‌ ଞେନ୍‌ ଅନ୍ତମ୍‌ ଆନା ଓଡ୍ଡେଡାଲେ ଅବ୍‌ଜନାତବେନ୍‌ ଡ ଞେନ୍‌ ଆସନ୍‌ ତିଆତେ ଲଜ୍ଜିର୍‌ ତାଡ଼ିଜଙ୍‌ ସଜ୍ଜାୟା ? ଆରି ଇନି ଇନି ତୁୟାୟ୍‌ ତିଆତେ ମା ଗଟେତେ, ତିଆତେ ଆନିଞ୍ଜି ଅବ୍‌ଜନାଏତଜି । 8 ଆମ୍ୱେଞ୍ଜି ତକ୍କର୍‌ ଡାଲେ ବତଙ୍‌ଡଙମ୍‌ତଡ୍‌; ଞେନ୍‌ ପୁର୍ବାମା ଅନବ୍‌ଜନାଲବେନ୍‌ ପଙ୍‌ ଡ ଆମ୍ୱେଞ୍ଜି ତି ଆତେଜି ଏନବ୍‌ଜନାଲଜି ? ଆମ୍ୱେଞ୍ଜି ସାକିମର୍ରଞେନ୍‌ ଞେନ୍‌ ଅନ୍ତମ୍‌ ଆଇସ୍ୱରନ୍‌ ଆନା ଡକୋ ପଙ୍‌ ? ଆନା ରଡୋ ସନୁମନ୍‌ ଅବୟ୍‌ତଡ୍‌; ଞେନ୍‌ ଆନ୍ନିଙ୍‌ ଜନାତଡ୍‌ ।

9 ଆନାଜି ଆତାଙ୍‌ତାଙନ୍‌ ଆକୋଙ୍‌ଣ୍ତାୟ୍‌ ତୁବ୍‌ତଜି ଆନିଞ୍ଜି ଅଡ଼୍‌କୋଞ୍ଜି କାଜ୍ଜାନ୍‌ ଡ ଆନିଞ୍ଜି ଇନି ଇୟ୍ୟମତଜି ଇନ୍ନିଙ୍‌ ଅଃଗଡେଲେ ଆନିଞ୍ଜି ଏଙ୍ଗାଲେ ଆନିଞ୍ଜି ଗରୟ୍‌ତଜି ତି ଆସନ୍‌ ଆସାକିରମଞ୍ଜି ଅଗିଜେଜି କି ଅଃଜ୍ଜନାଏଞ୍ଜି । 10 ଅଙ୍ଗାଜାକିଁୟ୍‌ ଆବିସୟ୍‌ ଲାବମ୍‌ତଡ୍‌, ଏନ୍ନେଗନ୍‌ ଆସନୁମ୍‌ ଆନା ତୁବେନ୍‌, ଅଡ଼େ କୋଙ୍‌ଣ୍ତାଜନ୍‌ ଆଚଞ୍ଚଲୋଙ୍‌ ଆନା ତୁବେଞ୍ଜି ? 11 ଗିୟ୍‌ବା, ଆସାଙ୍ଗଞ୍ଜି ଡ ଆସ୍ରେବାତ୍ତେଞ୍ଜି ଆମନ୍‌ରାଜି ଗନ୍‌ରଜନ୍‌ ଞାତଜି; ଆରି ତୁବ୍‌ତୁବମର୍ରଞ୍ଜି ନିୟ୍‌ ଆନିଞ୍ଜି ଅଡ଼୍‌କୋନ୍‌ ମନ୍‌ରାନ୍‌ ଆରୁକୁଲନ୍‌ ତନଙେତଜି; ଆନିଞ୍ଜି ତକ୍କର୍‌ତଜି କି ଆନିଞ୍ଜି ଆବସରିନ୍‌ ଗନ୍‌ରଜନ୍‌ ଞାତଜି । 12 ମୁଲିନ୍‌ ଅସାୟ୍‌ଲୋଙନ୍‌ ଲୁଆଙନ୍‌ ତବ୍‌ଗୋଡାଲେ ଅତିଆରନ୍‌ ତୁବ୍‌ତେ କି ଆସିନ୍‌ ଆବୋର୍ସା ବାତ୍ତେ ଆତୁଡ଼ିନ୍‌ ସରିନ୍‌ ପଙ୍‌ତେ ଆନିନ୍‌ ଇର୍‌ର୍ଗାଲନ୍‌ ଡ ଡୋଲଜନ୍‌ ଆମାଡ୍‌ ଆ ବୋର୍ସାନ୍‌ ଉନାତେ, ଆନିନ୍‌ ଡାଆନ୍‌ ଅର୍ଗାନନ୍‌ ମଙ୍ଗାତେ । 13 ବାଡ଼େୟନ୍‌ ଅରାଲୋଙନ୍‌ ତାଡ଼େରନ୍‌ ଡିଙ୍‌ଲେ ଲୁଲୁକଡ଼ିଲୋଙନ୍‌ ଗାରାତେ, ମନ୍‌ରାନ୍‌ ଆଇସ୍ସୁମନ୍‌ ବାତ୍ତେ ସିତ୍ରନ୍‌ ତୁବ୍‌ତେ ଅସିଙନ୍‌ ମନଙ୍‌ ଡକୋନେତୁଗାମ୍‌ଲେ ତୁବ୍‌ତେ । 14 ଆନିନ୍‌ ଆସନ୍‌ ଏରସନ୍‌ ଅରାନ୍‌ ଗଡ୍‌ତେ, ତରସାନ୍‌ ଡ ଅଲୋନ ଅରାନ୍‌ ପାଙ୍‌ତେ, କିନ୍‌ରେଙ୍‌ନ୍‌ ସିଲଡ୍‌ ଅବୟ୍‌ ଅରାନ୍‌ ପାଙ୍‌ଲେ ରବ୍‌ଡୋତ; ଆନିନ୍‌ ଦେବଦାରୁନୁବନ ଗୁଲେ ତରୁବନ୍‌ ଅବ୍‌ଗୋଗୋୟ୍‌ତେ । 15 ତି ଆରା ମନ୍‌ରାନ୍‌ ଆସନ୍‌ ସରୟ୍‌ତୋଡନ୍‌ ଡେତେ; ତିଲୋଙ୍‌ ଅସୋୟ୍‌ ପାଙ୍‌ଲେ ଞରଡ୍‌ଞନେତେ ଆରି ତି ଆତେ ସୟ୍‌ଲେ ରୁଟିନ୍‌ତୁବ୍‌ଲେ ଜିମ୍‌ତେ; ଆରି ଅବୟ୍‌ ସନୁମନ୍‌ ତୁବ୍‌ଲେ ପୁର୍‌ତେ ଆରି ଅବୟ୍‌ କୋଙ୍‌ଣ୍ତାଜନ୍‌ ତୁବ୍‌ଲେ ଆମ୍ମୁକାବାଲୋଙନ୍‌ ତୁଡୁମ୍‌ଲେ ଲୋମ୍‌ତେ । 16 ତିଲୋଙନ୍‌ ଆବବନ୍ତା ତଗୋଲୋଙନ୍‌ ଆରି ବବନ୍ତା ଜେଲୁଲୋଙନ୍‌ ବାଲ୍ଲେ ଆଜନୁମ୍‌ ଆସନ୍‌ ଡ ଜେଲୁନ୍‌ ଡିଙ୍‌ଲେ ଆନିନ୍ ଜୁମ୍‌ଲେ ବୋଓତେ, ଆରି ଞେନ୍‌ ତଗୋଲୋଙନ୍‌ ଡକୋଲନ୍‌ ଉନ୍‌ରୁଲିୟ୍‌, ଞେନ୍‌ ତଗୋନ୍‌ ଗିୟ୍‌ଲାୟ୍‌ । 17 ଆରି ବଡେୟ୍‌ଡେୟ୍‌ ପାଙ୍‌ଲେ କୋଙ୍‌ଣ୍ତା ସନୁମନ୍‌ ତୁବ୍‌ତେ, ଆସନୁମନ୍‌ ଆନିନ୍‌ମା ତୁବ୍‌ତେ, ଆମ୍ମୁକାଲୋଙନ୍‌ ତୁଡୁମ୍‌ଲେ ପୁର୍ରତେ କି ଆମଙ୍‌ବାନ୍‌ ପ୍ରାର୍ତନାଲନ୍‌ ବର୍ରତନ୍‌, ସନୁମ୍‌ଞେନ୍‌ ଆମନଙ୍‌ ତିଆସନ୍‌ ଞେନ୍‌ ଡୋବିଁୟ୍‌ । 18 ଆନିଞ୍ଜି ଜନାଜି ତଡ୍‌ କି ଅଡ୍‌ନିୟ୍‌ମେଜି ଇନିଆନଗାମେଣ୍ତେନ୍‌ ଆନିଞ୍ଜି ଗିୟ୍‌ଲେ ଅଃରପ୍ତିଏଜି, କେନ୍‌ ଆସନ୍‌ ଆମଡଞ୍ଜି ଡ ଆନିଞ୍ଜି ଏଙ୍ଗଲେ ଗନ୍‌ଲୁଡ୍‌ଲେ ଅଃରପ୍ତିଏଜି କେନ୍‌ ଆସନ୍‌ ଆନିଞ୍ଜି ଆଉଗରଞ୍ଜି ରବ୍‌ଡୋଏନ୍‌ । 19 ଏଙ୍ଗାଲେ ଆନିଞ୍ଜି ମନ୍ନେଲେ ଅଃର୍ରପ୍ତିଏଜି କି ବର୍ରନ୍‌ ଅଃର୍ରପ୍ତିଏଜି ଆନିଞ୍ଜି ବୁଡ଼ିଜିତଡ୍‌, ତିଲୋଙ୍‌ ବପାଲ୍‌ପାଲ୍‌ ପାଙ୍‌ଲେ ତଗୋଲୋଙନ୍‌ ସୟ୍‌ଲାୟ୍‌ ମସିନ୍‌ସୟ୍‌ଲେ ତେତ୍ତେ ରୁଟିନ୍‌ ତୁବ୍‌ଲାୟ୍‌ କି ଜେଲିନ୍‌ ବାଲ୍ଲେ ଜୁମ୍‌ଲାୟ୍‌, ତେତ୍ତେ ବପାଲ୍‌ପାଲ୍‌ପାଙ୍‌ଲେ ପରାନ୍‌ସାତ୍ତିନ୍‌ ଆଜନବ୍‌ ତୁବ୍‌ଲାୟ୍‌ ଞେନ୍‌ ବଡେୟ୍‌ଡୟ୍‌ ଅର୍ରାନ୍‌ ପାଙ୍‌ଲେ ଅଲୋମ୍‌ଲାୟ୍‌ ପଙ୍‌ ? ବଡେୟ୍‌ଡୟ ଅର୍ରାନ୍‌ ପାଙ୍‌ଲେ ଞେନ୍‌ ଅତୁଡ଼ୁମାୟ୍‌ ପଙ୍‌ ? 20 ଆନିନ୍‌ କୋମାବନ୍‌ ଜୋମ୍‌ତେ, ଆନିନ୍‌ ଆପ୍ରାନାନ୍‌ ଏଙ୍ଗାଲେ ଡୋବ୍‌ଲେ ଅଃର୍ରପ୍ତିଏ ଅଡ଼େ ଅର୍ଜଡୋମ୍‌ସିଗଡ୍‌ଞେନ୍‌ ଇନି ଡକୋ ତିଆତେ କଣ୍ତାୟ୍‌ତଡ୍‌ ଗାମ୍‌ଲେ ବର୍ରନ୍‌ ଅଃର୍ରପ୍ତିଏ ? ତିଆସନ୍‌ କଣ୍ତାୟ୍‌ବର୍ରନେଞ୍ଜି ଆନିନ୍‌ଆଡଙ୍‌ ଅବ୍ବାଡ଼ତେ ।

21 ଏ ଜାକୁବ, ଇସ୍ରାଏଲ ଆମ୍ୱେଞ୍ଜି କେନ୍‌ ଆବର୍ରନେ ଅମ୍‌ଡଙ୍‌ବା ଇନିଆସନଗାମେଣ୍ତେନ୍‌ କମ୍ୱାରିଞେନ୍‌ ଆମ୍ୱେନ୍‌; ଞେନ୍‌ ଆମ୍ୱେନ୍‌ ତୁବ୍‌ଲବେନ୍‌ କମ୍ୱାରିଞେନ୍‌ ଆମ୍ୱେନ୍‌ ଏ ଇସ୍ରାଏଲ ଞେନ୍‌ ଆମ୍ୱେନ୍‌ ଅଃକରୋଡାଇଁୟ୍‌ । 22 ଅଡ଼୍‌କୋନ୍‌ ଇର୍ସେବେନ୍‌ ପୁୟ୍‌ଡାନ୍‌ ଅନ୍ତମ୍‌ ଲୋଙଡ୍‌ ଆଜାଡ଼ିନ୍‌, ଅଡ଼୍‌କୋନ୍‌ ମେଗନ୍‌ ଅନ୍ତମ୍‌ ଆଇର୍ସେ କେମାତବେନ୍‌, ଅମଙ୍‌ଞେନ୍‌ ୟର୍ରନାୟ୍‌ବା ଇନିଆସନ୍‌ଗାମେଣ୍ତେନ୍‌ ଞେନ୍‌ ଉର୍‌ତବେନ୍‌ । 23 ଏ ରୁଆଙନ୍‌ କନନ୍‌ ନାବା ଇନିଆସନ୍‌ଗାମେଣ୍ଡେନ୍‌ କେନ୍‌ ଆକାବାଡ଼ା ଲୁମ୍‌ତେ, ଏ ପୁର୍ତିନ୍‌ ଆଜାୟ୍‌ତା ଆମନ୍‌ରାଜି ଗୋଗୋୟ୍‌ ସର୍ରଡାନାବା, ବରୁନ୍‌ ଡ କିନ୍‌ରେଙନ୍‌ ଜାୟ୍‌ତାନ୍‌ ଆରାଜି ସୋଡ଼୍‌ସର୍ରଙନ୍‌ ବାତ୍ତେ କନ୍‌ବା ଇନିଆସନ୍‌ଗାମେଣ୍ଡେନ୍‌ ଜାକୁବନ୍‌ ଡ ଇସ୍ରାଏଲନ୍‌ ଆନୁର୍‌ ଆସନ୍‌ ସନେନ୍‌ସେନନ୍‌ ତୁବେନ୍‌ । 24 ଅନୁର୍‌ମର୍‌ ଇସ୍ୱରବରନ୍‌ କମ୍ପୋଲୋଙନ୍‌ ସିଲଡ୍‌ ଆନାଗଡ଼େଲବେନ୍‌ କେନ୍‌ ଆତେ ବର୍ତନ୍‌; ଅଡ଼୍‌କୋନ୍‌ ଆକାବାଡ଼ା ଏଲୁମ୍‌ତାୟ୍‌ ରୁଆଙନ୍‌ ଡ ପୁର୍ତିନ୍‌ ଅଡ଼୍‌କୋରେଙନ୍‌ ଅସିଞେନ୍‌ବାତ୍ତେ ଉର୍ରାତାୟ୍‌ ଞେନ୍‌ ଅନ୍ତମ୍‌ ଆନା ? 25 ଞେନ୍‌ କଣ୍ତାମର୍ରଞ୍ଜି ଆବର୍ରନେ ଅବ୍‌ଗୁରୁଡେତାୟ୍‌ ଡ ତାଲସିନ୍‌ ଅର୍ରତୁୟ୍‌ତଙଞ୍ଜି ଆମରାଜି ଡ ତନେୟ୍‌ମର୍ରଞ୍ଜି ପାଗଲଅମ୍ମେତାୟ୍‌, ବୁଡ଼ିମର୍ରଞ୍ଜି ଅବ୍‌କିନ୍‌ଣ୍ତୋଙ୍‌ତାଜି କି ବୁଡିମର୍ରଞ୍ଜି ଆବୁଡ଼ି ପେଲ୍ଲା ଏମ୍ମେତାୟ୍‌ । 26 କମ୍ଵରିଞେନ୍‌ ଆବର୍ରନେ ଗବ୍‌ରିତାୟ୍‌ ଡ କବରପାଙ୍‌ମର୍ରଞ୍ଜି ଇନି ଗାମ୍‌ତଜି ତି ଅତ୍ତେ ଡେତେ; ଞେନ୍‌ ଜିରୁସାଲମନ୍‌ ଡ ଜିଉଦାନ୍‌ ଗଡ଼ାନ୍‌ ଆମନ୍‌ରାଞ୍ଜି ବର୍ତଞ୍ଜି, ଆରି ମନ୍‌ରାଞ୍ଜି ତେତ୍ତେ ଡକୋତଞ୍ଜି, ଅଡ଼େ ତି ଅଡ଼୍‌କୋରେଙନ୍‌ ଆରି ଅବ୍‌ସେଡ୍‌ତାୟ୍‌ । 27 ଆବ ବର୍ରନେନ୍‌ ବାତ୍ତେ ସମେଙଁଡ୍ରାନ୍‌ ଆଡାନ୍‌ ଅବ୍‌ଞତାୟ୍; ଆରି ଅଲ୍‌ଡାନ୍‌ଜି ଅଡ଼୍‌କୋନ୍‌ ଅବ୍‌ଞତାୟ୍‌, 28 ଞେନ୍‌ କୋରସନ୍‌ ଆବର୍ରେନ ବର୍ତନାୟ୍‌, ତୁର୍‌ମେଡ୍‌ମର୍‌ ଞେନ୍‌ ଇନିଗାମ୍‌ତାୟ୍‌ ତିଆତେ ଲୁମ୍‌ତେ; ଆନିନ୍‌ ଜିରୁସାଲମନ୍‌ ଆବିସୟ୍‌ ବର୍ତନ୍‌, ତିଆତେ ବାର୍ରତବ୍‌ତନ୍‌ କି ଜିମିତାଲନ୍‌ ତନୁବ୍‌ନ ଡେତେ ।