1 ମିସରନ୍‌ ଆସନ୍‌ ପୁର୍ବାଃତେବରନ୍‌ । ଗିୟ୍‌ବା, ପ୍ରବୁନ୍‌ ଆଲଜିର୍‌ରୟ୍‌ତେନ୍‌ ଆମେଗଲୋଙ୍‌ ଗଲେ ମିସର୍‌ ଡେସାନ୍‌ ଜିର୍ତାୟ୍‌; ଆରି. ଆ ମୁକାବାନ୍‌ ମିସରନ୍‌ ଆ କୋଙ୍‌ଡାୟ୍‌ଜି ତକର୍‌ତଜି ଆରି ମିସରନ୍‌ ଆ ଉଗର୍‌ଜି ଲେଏମ୍‌ତେ । 2 ଆରି, "ଞେନ୍‌ ମିସରଞ୍ଜିଆଡଙ୍‌ ଆନିଞ୍ଜିଡମ୍‌ ସରିନ୍‌ ଅବ୍‌ଜୁଜ୍ଜେତାୟ୍‌ଜି; ସିଲତ୍ତେ ଆନିଞ୍ଜି ଅଡ଼୍‌କୋଞ୍ଜି ରମ୍ମଙ୍‌ ରମ୍ମଙ୍‌ ଆବୋଞାଙନ୍‌ ଡ ଅଡ଼୍‌କୋଞ୍ଜି ରମ୍ମଙ୍‌ ରମ୍ମଙ୍‌ ଆତୟ୍‌ଲିସିଙ୍‌ମର୍‌ ଆବିରୋଦଲୋଙ୍‌ ଜୁଜ୍ଜେତଞ୍ଜି; ଗଡ଼ା ଗଡ଼ାନ୍‌ ଆ ବିରୁଦଲୋଙ୍‌, ରାଜ୍ୟ ରାଜ୍ୟନ୍‌ ଆ ବିରୁଦଲୋଙ୍‌ ଜୁଜ୍ଜେତଞ୍ଜି । 3 ଆରି, ମିସରନ୍‌ ଆପୁରାଡ଼ା ଆମଙ୍‌ଲୋଙଞ୍ଜି ଆରେତଜି ଆରି ଆଗନବ୍‌ରିବରଞ୍ଜି ଅନ୍ତମ୍‌ ଞେନ୍‌ ଅଃନେମେଆୟ୍‌; ସିଲତ୍ତେ ଆକୁଣ୍ଡାୟଞ୍ଜି, ଆରବୁମରନ୍‌, ପାଞ୍ଜିଗିୟ୍‌ମରନ୍‌ ଡ ତନେୟ୍‌ମରଞ୍ଜି ସାୟ୍‌ତଜି । 4 ଆରି ଞେନ୍‌ ମିସରଞ୍ଜିଆଡଙ୍‌ ଅବୟ୍‌ ଅଃନିର୍ସୋୟମ୍‌ଡାଏନ୍‌ ଆ ପ୍ରବୁ ଆସିଲୋଙ୍‌ ସୋରୋପ୍ପାୟ୍‌ତାୟ୍‌ ଆରି ଅବୟ୍‌ ଅଃନିର୍ସୋୟମ୍‌ଡାଏନ୍‌ ଆ ରାଜା ଆନିଞ୍ଜି ଆତୋଣ୍ତୁ ରାଜାଗଡ୍‌ତନ୍‌," କେନ୍‌ ଆତେ ପ୍ରବୁନ୍‌ ବର୍ତନେ । 5 ଆରି, ସମେଁୟ୍‌ଣ୍ଡ୍ରାନ୍‌ ଆ ଡାଆ ଅଞଡ୍‌ତେ ଆରି ଅଲଡାନ୍‌ ଅଲିସ୍ସା ପରୋଙ୍‌ତେ । 6 ଆରି, ଅଲଞ୍ଜି ଅଡ଼୍‌କୋନ୍‌ ସଅଡମ୍‌ ଡେତେ; ମିସରନ୍‌ ଆପ୍ନେପେଡା ଅଡ଼୍‌କୋନ୍‌ ସନ୍ନାଲେ ଅଞଡ୍‌ତେ; କୁରିଙନ୍‌ ଡ ଅଲଜିଙନ୍‌ ଅସର୍‌ତେ । 7 ନିଡ଼ ଅଲନ୍‌ ଆତୁୟା, ନିଡ଼ ଅନେଙ୍‌ଅଲନ୍‌ ଆପଡ଼ିଆ ଅଡ଼୍‌କୋନ୍‌ ଆରି ନିଡ଼ ଅଲନ୍‌ ଆତୁୟାରେଙ୍‌ ଇନିଜି ବନୁଡନ୍‌ ଡେତେ, ତି ଅଡ଼୍‌କୋନ୍‌ ଅସର୍‌ଡାଲେ ପାଙ୍‌ରିଙ୍‌ତେ ଆରି ଇନ୍ନିଙ୍‌ ଅଃଡ୍ଡକୋଏ । 8 ୟମ୍‌ୟମରଞ୍ଜି ଡ ଅଙ୍ଗା ଆମନ୍‌ରାଜି ନିଡ଼ ଅଲଲୋଙନ୍‌ ତୋର୍‌ୟତଞ୍ଜି ଆନିଞ୍ଜି ଅଡ଼୍‌କୋଞ୍ଜି ୟେୟେଡାତଞ୍ଜି, ଆରି ଅଙ୍ଗା ଆମନ୍‌ରାଜି ଡାଆଲୋଙନ୍‌ ଜାଲନ୍‌ ସେଡ୍‌ତଜି, ଆନିଞ୍ଜି ମୁସୁକା ଡେତଜି । 9 ଆରି ଅଙ୍ଗା ଆମନ୍‌ରାଜି ମନଙ୍‌ କୁରିଙନ୍‌ ବାତ୍ତେ ସପ୍ପାନ୍‌ ତୁବ୍‌ତଜି ଆରି ଅଙ୍ଗା ଆମନ୍‌ରାଜି ଜେଏକାବନ୍‌ ତାଞ୍‌ତଜି ଆନିଞ୍ଜି ଗରୟ୍‌ତଜି । 10 ଆରି ଆ ସୋଣ୍ତାଙଞ୍ଜି ଅଡ଼୍‌କୋନ୍‌ ଲନବ୍‌ଗଡନ୍‌ ଡେତେ, ଆବ୍ରଡିତଞ୍ଜି ଆମନ୍‌ରାଜି ଅଡ଼୍‌କୋନ୍‌ ଆପ୍ରାନ୍ନାଲୋଙ୍‌ ଡୁକ୍କତଞ୍ଜି । 11 ସୋୟନନ୍‌ ଆସୋଡ଼ାମର୍‌ଜି ଆଉଲ୍ଲୁଜି; ପାରୋନ୍‌ ଆଗିଆନମର୍‌ଜି ଆ ଞଙ୍‌ଞଙ୍‌ବର୍‌ଜି ଏର୍‌ବୁଡ୍ଡି ଞନଙନ୍‌ ତିୟ୍‌ତଜି; ପାରୋନ୍‌ଆଡଙ୍‌ ଆମ୍ୱେଞ୍ଜି ଏଙ୍ଗାଲେ ଏବର୍ତେ, ଞେନ୍‌ ଜନନ୍ନାମରଞ୍ଜି ଆଡାଙ୍ଗାଡ଼ାଅନ୍‌, ପାପୁର୍‌ ରାଜାଞ୍ଜି ଆଅନ୍‌ ? 12 ତିଡେନ୍‌ ଗିଆନମର୍‌ବେଞ୍ଜି ଅଡ଼େଙ୍ଗାଜି ? ଆନିଞ୍ଜି ନମିୟ୍‌ଞେନ୍‌ ଆମ୍ୱେଞ୍ଜିଆଡଙ୍‌ ଅବ୍‌ଜନାବେନ୍ତୁଜି ଆରି ପ୍ରବୁନ୍‌ ମିସରନ୍‌ ଆବର୍ନେଲୋଙ୍‌ ଇନି ଞଙ୍‌ଞଙେନ୍‌, ତିଆତେ ଆନିଞ୍ଜି ଜନାଏତଜି । 13 ସୋୟନନ୍‌ ଆସୋଡ଼ାମର୍‌ଜି ଉଲ୍ଲୁଏଞ୍ଜି, ନୋପରନ୍‌ ଆସୋଡ଼ାମର୍‌ଜି ବତଙାଜେଞ୍ଜି; ଅଙ୍ଗା ଆମନ୍‌ରାଜି ମିସରନ୍‌ ଆକେଜ୍ଜାମର୍‌ଜି କୁନେଅରନ୍‌ ଅନ୍ତମ୍‌, ଆନିଞ୍ଜି ମିସରନ୍‌ଆଡଙ୍‌ ଆଡିଡ୍‌ ତଙର୍‌ଗଡ୍‌ ଆପ୍ପାୟ୍‌ତଜି । 14 ପ୍ରବୁନ୍‌ ମିସରନ୍‌ ସିଲଡ୍‌ ବନ୍ତଙନ୍‌ ଆପୁରାଡ଼ା ମାୟ୍‌ମାୟେନ୍‌; ଆରି, ଆବନ୍‌ନୁଲ୍‌ମରନ୍‌ ଏଙ୍ଗାଲେ ଆବରେୟ୍‌ଲୋଙ୍‌ତେନ୍‌ ଅବ୍‌ଡମ୍‌ତନେ, ତି ଅନ୍ତମ୍‌ ଆନିଞ୍ଜି ମିସରନ୍‌ଆଡଙ୍‌ ଡିଲେ ଆ କାବ୍ବାଡ଼ାଲୋଙନ୍‌ ଆଡିଡ୍‌ ତଙର୍‌ଗଡ୍‌ ଅବ୍‌ତଙିୟେଞ୍ଜି । 15 ଆରି, ଅବବ୍‌ ଅଡ଼େ ଆଲାନ୍‌, ଅଡ଼େ ସିଣ୍ଡିନ୍‌ ଆକମ୍ବା ଅଡ଼େ ଡାଆଜିଙନ୍‌ ଇନି ଲୁମ୍‌ଲେ ରପ୍ତିତେ, କେନ୍‌ ଅନ୍ତମ୍‌ ଇନ୍ନିଙ୍‌ ଆକାବ୍ବାଡ଼ା ମିସରନ୍‌ ଆସନ୍‌ ଲନୁମନ୍‌ ଅଃଡ୍ଡେଏ ।

16 ତି ଆଡିନ୍ନା ମିସରନ୍‌ ଆଇବଜନ୍‌ ଅନ୍ତମ୍‌ ବତଙ୍‌ତଜି, ଆରି ପ୍ରବୁନ୍‌ ଆମଙ୍‌ବାଞ୍ଜି ଅଙ୍ଗା ଆସି ଅବ୍‌ୟୁନେତେ, ଆସିଞ୍ଜି ଆୟୁରୁତନ୍‌ ଆସନ୍‌ ଆନିନ୍‌ ତକର୍ତେ ଆରି ବତଙ୍‌ତେ । 17 ଆରି, ମିସରଞ୍ଜି ଆସନ୍‌ ଜିଉଦା ଡେସାନ୍‌ ଆବନନ୍ତଙ୍‌ଡାଗୋ ଡେତେ; ମିସରଞ୍ଜି ଆ ବିରୁଦଲୋଙ୍‌ ପ୍ରବୁନ୍‌ ଆଗନବ୍‌ରି ବରନ୍‌ ଆସନ୍‌ ଡିଲେ ମନ୍‌ରାନ୍‌ଆଡଙ୍‌ ଜିଉଦାନ୍‌ ଆଞୁମ୍‌ ବନରନ୍‌ ଡେତେ, ଆନିନ୍‌ ବତଙ୍‌ତେ । 18 ତି ଆଡିନ୍ନା ମିସର୍‌ ଡେସାଲୋଙ୍‌ ମନ୍‌ଲୟ୍‌ ଗଡ଼ାନ୍‌ କିନାନିଅନ୍‌ ଆ ଲଙ୍‌ଲଙ୍‌ ଡେତଜି ଆରି ପ୍ରବୁନ୍‌ ଆଞୁମ୍‌ଲୋଙ୍‌ ପର୍ମାଡ଼ାତଞ୍ଜି, ଅବୟ୍‌ ଗଡ଼ାନ୍‌ ଅସନେଡ୍‌ ଗଡ଼ା ଗାମ୍‌ଲେ ଅନୋଡେନ୍‌ ଡେତେ । 19 ତି ଆଡିନ୍ନା ମିସର୍‌ ଡେସାନ୍‌ ଆପୁରୁ ଡରକୋନେଲୋଙନ୍‌ ପ୍ରବୁନ୍‌ ଆସନ୍‌ ଅବୟ୍‌ ତନମ୍ପିଲନ୍‌ ଡେତେ ଆରି ଆ ସଣ୍ତିବାନ୍‌ ପ୍ରବୁନ୍‌ ଆସନ୍‌ ଅବୟ୍‌ ସୋଣ୍ତାଙନ୍‌ ତନୁବନ୍‌ ଡେତେ । 20 ଆରି, ମିସର୍‌ ଡେସାଲୋଙ୍‌ ପ୍ରବୁନ୍‌ ଆରମ୍ମଡ୍‌ ଡ ସାକି ଅନ୍ତମ୍‌ ଡେତେ; ଇନିଆସନ୍‌ଗାମେଣ୍ତେନ୍‌ ଅରିର୍ସୋୟମ୍‌ଡାନ୍‌ ଆନେମ୍ମେମର୍‌ଜି ଆସନ୍‌ ଆନିଞ୍ଜି ପ୍ରବୁନ୍‌ ଆମଙ୍‌ବା ୟେୟେଡାତଞ୍ଜି, ସିଲଡ୍‌ତ୍ତେ ଆନିନ୍‌ ବୟ୍‌ନେ ଅନୁର୍‌ମରନ୍‌ ଡ ଡନୋବ୍‌ମରନ୍‌ ଆପ୍ପାୟ୍‌ତେ ଡ ଆନିନ୍‌ ଆନିଞ୍ଜିଆଡଙ୍‌ ଡୋବ୍‌ତେ । 21 ଆରି ମିସରନ୍‌ଆଡଙ୍‌ ପ୍ରବୁନ୍‌ ଆ ସନେକୁଲ୍‌ ତନିୟନ୍‌ ଡେତେ ଆରି ତି ଆଡିନ୍ନା ମିସରଞ୍ଜି ପ୍ରବୁନ୍‌ଆଡଙ୍‌ ଜନାତଜି; ଆରି ଆନିଞ୍ଜି ଅନମଙନ୍‌ ଡ ଆନମଙ୍‌ ତିୟ୍‌ଲେ ସେନ୍‌ପୁର୍‌ତଜି ଆରି ପ୍ରବୁନ୍‌ ଆମଙ୍‌ବା ବାସାଲନ୍‌ ତିଆତେ ତିୟ୍‌ତଜି । 22 ଆରି, ପ୍ରବୁନ୍‌ ମିସରନ୍‌ଆଡଙ୍‌ ତିଡ୍‌ତ୍ତେ, ତିଡ୍‌ତ୍ତେ ଆରି ମବ୍‌ନଙ୍‌ତେ; ଆରି, ଆନିଞ୍ଜି ପ୍ରବୁନ୍‌ ଆମଙ୍‌ବା ୟର୍ତନାଜି, ସିଲତ୍ତେ ଆନିନ୍‌ ଆକାକୁର୍ତିଞ୍ଜି ଅମ୍‌ଡଙ୍‌ଡାଲେ ଆନିଞ୍ଜିଆଡଙ୍‌ ମବ୍‌ନଙ୍‌ତେ । 23 ତି ଆଡିନ୍ନା ମିସରନ୍‌ ସିଲଡ୍‌ ଅସୁରନ୍‌ ଅବୟ୍‌ ରୋତ୍ତନ୍‌ ତନୁବନ୍‌ ଡେତେ, ସିଲତ୍ତେ ଅସୁରବାୟ୍‌ଜି ମିସରନ୍‌ ଡ ମିସରବାଜି ଅସୁରନ୍‌ ତଙିୟ୍‌ତଞ୍ଜି; ଆରି ମିସରବାଜି ଅସୁରବାୟ୍‌ଜି ସରିନ୍‌ ସେନ୍‌ପୁର୍‌ତଞ୍ଜି । 24 ତି ଆଡିନ୍ନା ଇସ୍ରାଏଲନ୍‌, ମିସର୍‌ ଡ ଅସୁରନ୍‌ ସରିନ୍‌ କେନ୍‌ ୟାଗି ଡେସାନ୍‌ ଏମ୍ମେଲନ୍‌ ପୁର୍ତିଲୋଙନ୍‌ ଆସିର୍ବାଦନ୍‌ ଞାଙ୍‌ତଜି । 25 ଇନିଆସନ୍‌ଗାମେଣ୍ତେନ୍‌ ପ୍ରବୁନ୍‌ ଆନିଞ୍ଜିଆଡଙ୍‌ ଆସିର୍ବାଦଏନ୍‌, "ମନ୍‌ରାଞେନ୍‌ ମିସର୍‌, ଅସିଡମ୍‌ଞେନ୍‌ କାବ୍ବାଡ଼ା ଅସୁରନ୍‌ ଡ ଇସ୍ରାଏଲନ୍‌ ଡନେଞେନ୍‌ ଆସିର୍ବାଦନ୍‌ ଡେତେ ।"