1 ଗିୟ୍‌ବା, ପ୍ରବୁ, ସଦାପ୍ରବୁ ଜିରୁସାଲମନ୍‌ ଡ ଜିଉଦାନ୍‌ ସିଲଡ୍‌ ଡାଙ୍ଗୋନ୍‌ ଡ ତନଙ୍‌ସିଡାଙନ୍‌, ଆଗ୍ରାମ୍‌ଗାମ୍‌, ଜନୋମ୍‌ଜୋମନ୍‌ ଅନ୍ତମ୍‌ ଅଡ଼୍‌କୋନ୍‌ ଡାଙ୍ଗୋନ୍‌ ଡ ଡାଆନ୍‌ ଅନ୍ତମ୍‌ ଅଡ଼୍‌କୋନ୍‌ ତନଙ୍‌ସିଡାଙନ୍‌ ସବ୍‌ଙାୟ୍‌ତେ; 2 ବୋର୍ସାମରନ୍‌, ଅଲ୍‌ଜୁଜ୍ଜେମରନ୍‌; ପନ୍‌ସୁଆତିମରନ୍‌, ପୁର୍ବାଃତେବର୍ନେମରନ୍‌, କରମ୍ମାଗିୟ୍‌ମର୍‌, ପାପୁର୍‌ମର୍‌; 3 ପସାସ ସିପ୍ପାୟନ୍‌ ଆସୋଡ଼ା, ସୋଡ଼ାଗଡ୍‌ ମରନ୍‌, ମନ୍ତ୍ରିନ୍‌, ମନଙ୍‌ ତନ୍‌ଡ୍ରୁବ୍‌ମରନ୍‌ ଡ ମନଙ୍‌ କରମ୍ମାଗିୟ୍‌ମର୍‌ ସନବ୍‌ଙାଜନ୍‌ ଡେତେ । 4 "ଞେନ୍‌ ଡାଙ୍ଗଡ଼ାଞ୍ଜିଆଡଙ୍‌ ଆସୋଡ଼ାମରଞ୍ଜି ଏଏମ୍ମେତାୟ୍‌ ଆରି ପସିଜଞ୍ଜି ଆଉପ୍ରେଙ୍‌ଲୋଙଞ୍ଜି ସାସନତଜି । 5 ଆରି, ମନ୍‌ରାଞ୍ଜି ବମନ୍‌ରା ଆରି ବମନ୍‌ରା ବାତ୍ତେ ଡ ଡିଲେ ମନ୍‌ରା ତର୍ଡମ୍‌ ତୟ୍‌ଲିସିଙ୍‌ମରନ୍‌ ବାତ୍ତେ ଅଲ୍‌ବୁର୍ଡତଜି, ପସିଜନ୍‌ ପାପୁର୍‌ମରନ୍‌ ଆ ବିରୁଦଲୋଙ୍‌ ଆରି ଉଲୁମରନ୍‌ ସୋଡ଼ାଗଡ୍‌ମରନ୍‌ ଆ ବିରୁଦଲୋଙ୍‌ ଗର୍ବତନେ । 6 ଆନା ଆନା ବୋଞାଙନ୍‌ଆଡଙ୍‌ ଆପେୟନ୍‌ ଆ ସିଂଲୋଙ୍‌ ଞମ୍‌ଲେ ବର୍ତଞ୍ଜି, ସିନ୍‌ରିନମ୍‌ ଡକୋ, ଆମନ୍‌ ସାସନମର୍‌ଲେନ୍‌ ଡେଆ, ଆରି, କେନ୍‌ ଆନସେଡ୍‌ ରାଜ୍ୟନ୍‌ ଅସିଲୋଙ୍‌ନମ୍‌ ଡେଏତୋ; 7 ବନ୍‌ଡ ଆନିନ୍‌ ତି ଆଡିନ୍ନା ଅବ୍‌ସର୍ରଙ୍‌ଲନ୍‌ ବର୍ତନେ ଞେନ୍‌ ସନାୟ୍‌ସିମର୍‌ବେନ୍‌ ଅଃଡେଆୟ୍‌; ଇନିଆସନ୍‌ଗାମେଣ୍ତେନ୍‌ ଅସିଂଲୋଙ୍‌ଞେନ୍‌ ଜନୋମନ୍‌ ଡ ସିନ୍‌ରିନ୍‌ ଅବୟ୍‌ତଡ୍‌; ଆମ୍ୱେଞ୍ଜି ଞେନ୍‌ଆଡଙ୍‌ ମନ୍‌ରାଞ୍ଜି ଆ ସାସନମର୍‌ ଏଏମ୍ମେଡଙିୟ୍‌ ।" 8 ଇନିଆସନ୍‌ଗାମେଣ୍ତେନ୍‌ ଜିରୁସାଲମନ୍‌ ଉତୁତେ, ଆରି ଜିଉଦାନ୍‌ ଅସେଡେନ୍‌, ଆନିଞ୍ଜି ଇନି ଗାମ୍‌ତଜି ତି ଅନ୍ତମ୍‌ ଲୁମ୍‌ତଜି ତିଆତେ ପ୍ରବୁନ୍‌ ଆ ବିରୁଦଲୋଙ୍‌, ଆନିଞ୍ଜି ଆନିଞ୍ଜିଡମ୍‌ ଇସ୍ୱରନ୍‌ଆଡଙ୍‌ ଗବ୍‌ରୟ୍‌ମଡ୍‌ତଜି । 9 ଆନିଞ୍ଜି ଆବର୍ତଞ୍ଜି ଆବର୍ନେ ବାତ୍ତେ ଆବିରୁଦଲୋଙଞ୍ଜି ସାକିନ୍‌ ତିୟ୍‌ତେ । ଆରି ଆନିଞ୍ଜି ସଦୋମନ୍‌ ଆମନ୍‌ରାଜି ଅନ୍ତମ୍‌ ଆଇର୍ସେଞ୍ଜି ଅବ୍‌ରାଙ୍‌ଡାତଜି, ଆନିଞ୍ଜି କେନ୍‌ଆତେ ଅଃନବ୍‌ସସଏଜି । ଆନିଞ୍ଜି ଆନିଞ୍ଜିଡମ୍‌ ଗବ୍‌ଲୋତଞ୍ଜି । 10 ଆମ୍ୱେଞ୍ଜି ଡରମ୍ମମରନ୍‌ ଆବିସୟ୍‌ଲୋଙ୍‌ ବର୍ବା ଡ, ସୁକ୍କାତେ, ଇନିଆସନ୍‌ଗାମେଣ୍ତେନ୍‌ ଆନିଞ୍ଜି ତର୍ଡମ୍‌ ତର୍ଡମ୍‌ ଆକାବ୍ବାଡ଼ା ଜଅ ଞାଙ୍‌ତଜି । 11 ୟୋଙ୍‌ ପେଲ୍ଲାମରନ୍‌ ଆସନ୍‌ ବରନ୍ତଙନ୍‌ ଡେତେ ! ଇନିଆସନ୍‌ଗାମେଣ୍ତେନ୍‌ ଆସିନ୍‌ ବାତ୍ତେ ଆର୍‌ଲୁମେନ୍‌ ଆକାବ୍ବାଡ଼ା ଆ ପନବ୍‌ରଡ୍‌ ଆନିନ୍‌ଆଡଙ୍‌ ତନିୟନ୍‌ ଡେତେ । 12 ମନ୍‌ରାଞେଞ୍ଜି ଆବର୍ନେ ଗିୟ୍‌ଲାୟ୍‌ଡେନ୍‌, ପସିଜଞ୍ଜି ମନ୍‌ରାଞେଞ୍ଜି ଆ ଜୁରୁମର୍‌ଜି ଆରି ଆଇବଜଞ୍ଜି ଆଉପ୍ରେଙ୍‌ଲୋଙଞ୍ଜି ସାସନତଜି । ଏ ମନ୍‌ରାଞେଞ୍ଜି ତଙରନ୍‌ ଆନବ୍‌ତୁୟ୍‌ମର୍‌ଜି ଆମ୍ୱେନ୍‌ଆଡଙ୍‌ କଣ୍ତାୟ୍‌ତବେଞ୍ଜି ଆରି ତଙରନ୍‌ ଅବ୍‌ନାଡ଼ତବେଞ୍ଜି ଅବ୍‌ସେତବେଞ୍ଜି । 13 ପ୍ରବୁନ୍‌ ପନ୍‌ସୁଆତିନ୍‌ ଆସନ୍‌ ତନଙ୍‌ତଜି, କେଜ୍ଜାମରଞ୍ଜି ଆପନ୍‌ସୁଆତି ଆସନ୍‌ ଅବ୍‌ଜାଡାଲନ୍‌ । 14 ପ୍ରବୁନ୍‌ ଆପାପୁର୍‌ମରଞ୍ଜି ଡ ସୋଡ଼ାମରଞ୍ଜି ସରିନ୍‌ ପନ୍‌ସୁଆତିଲୋଙନ୍‌ ଡକୋତଞ୍ଜି; ଆମ୍ୱେଞ୍ଜି ମା ଦ୍ରାକ୍ୟାକୋତ୍ତାନ୍‌ ଏଜୋମ୍‌ତେ; ଡୋଲେୟ୍‌ମରଞ୍ଜି ଆମଙ୍‌ସିଲଡ୍‌ ଜୁରୁ ଜିନିସନ୍‌ ଅସିଙ୍‌ଲୋଙ୍‌ବେନ୍‌ ଡକୋ; 15 ଆମ୍ୱେଞ୍ଜି ମନ୍‌ରାଞେଞ୍ଜିଆଡଙ୍‌ ଏଞାଡାତେ ଆରି ଡୋଲେୟ୍‌ମରନ୍‌ ଆ ତଅଡ୍‌ ପରାନ୍‌ସାତ୍ତିନ୍‌ ଏମ୍ମେତେ, ପ୍ରବୁ, ପାଙ୍‌ଲଙ୍‌ବର୍‌ମରଞ୍ଜି ଆ ସଦାପ୍ରବୁ କେନ୍‌ ଆବର୍ନେ ବର୍ତନେ । 16 ଆରି ପ୍ରବୁନ୍‌ ବର୍ତନେ, ଜିରୁସାଲମନ୍‌ ଆଇବୟ୍‌ଜି ମାଡ କଙ୍କ୍ରିଜି, ଆନିଞ୍ଜି ତର୍ଡମ୍‌ ତର୍ଡମ୍‌ ମାଙ୍ଗୋଲେ ଲେଙ୍‌ଲନ୍‌ ଲେଙ୍‌ଲନ୍‌ ତଙିୟ୍‌ତଞ୍ଜି । ଆନିଞ୍ଜି ଇଡ୍‌ମଡ୍‌ତଜି; ତେତ୍ତେନ୍‌ ତେତ୍ତେନ୍‌ ଞାତଞ୍ଜି ଆରି ଆଜଙ୍‌ରେଙଞ୍ଜି ପାଟିନ୍‌*3:16 ଗୋଙ୍‌ସାନ୍‌ ୟଡ଼ିଙ୍‌ଲେକାୟ୍‌ ସଡ୍ଡାତେ । 17 ତିଆସନ୍‌ ପ୍ରବୁନ୍‌ ସିଓନନ୍‌ ଆଡାଙ୍ଗଡ଼ିଜି ଆବବ୍‌ ଅବ୍‌ନମ୍ପସୁତଜି ଆରି ଆନିଞ୍ଜିଆଡଙ୍‌ ଅବ୍‌ଡାଗଡ଼ି ଡାଲେ ଅମ୍‌ରେଙେଞ୍ଜି । 18 ବଡିନ୍ନା ଜିର୍ତାୟ୍‌ ଅଙ୍ଗା ଆଡିଡ୍‌ ଜିରୁସାଲମନ୍‌ ଆଇବୟ୍‌ଜି ଅଙ୍ଗା ଜିନିସଜି ଆସନ୍‌ କଙ୍କ୍ରିତଞ୍ଜି, ଇସ୍ୱରନ୍‌ ଆମଞ୍ଜି ସିଲଡ୍‌ ତି ଅଡ଼୍‌କୋନ୍‌ ତବ୍‌ଲେ ପାଙ୍‌ତେ, ଗୋଙ୍‌ସାନ୍‌, ୟୁମ୍‌ରାମ୍‌ନେନ୍‌, ଚନ୍ଦ୍ରାରନ୍‌, 19 ଅଲୁଡ୍‌ଲୋଙନ୍‌ ଆରନୁରୁଜି, କାନ୍‌ସନ୍‌, ୟରୁମ୍‌ରାମ୍‌ନେନ୍‌; 20 ଆ ମତାମଣି, କାଡ୍ଡୁନ୍‌, ଜନିଡୁବନ୍‌, ଲଙିଡ୍‌ମେନ୍‌ ଆଡ୍ରକୋ, ଡଙରାନ୍‌; 21 ଏନ୍‌ସିନ୍‌, ଜୋଡ଼ୁର୍‌ମୁଜନ୍‌; 22 ମନଙ୍‌ଡମନ୍‌ ଆସିନ୍‌ରି, ଡଅଙନ୍‌ ଆନବ୍‌ସସ ସିନ୍‌ରି, ମାଟନ୍‌, ଗାଞ୍ଜିଆନ୍‌; 23 ଡନପଡ଼ାନ୍‌, ଲମନ୍‌କାବନ୍‌, ରନେବ୍‌ବବନ୍‌ ଡ ୟନୁମ୍‌ରାମ୍‌କାବନ୍‌ ତବ୍‌ଲେ ସେଡ୍‌ତଜି । 24 ସିଲତ୍ତେ ଲଙିଡ୍‌ ଜନବନ୍‌ ଆପାଲ୍‌ତେଙ୍‌ ଗୁର୍ଡାନ୍‌ ଆସନଅ, ଜନିଡୁବନ୍‌ ଆପାଲ୍‌ତେଙ୍‌ ଲୁଆଡନ୍‌, ତରମ୍‌ତମ୍‌ ମନଙ୍‌ ସାର୍‌ସାରୁନ୍‌ ଆପାଲ୍‌ତେଙ୍‌ ଅନବ୍‌ଡାଗଡ଼ିନ୍‌ ଡ ଡଅଙନ୍‌ ଆନବ୍‌ସସ ଆ ସିନ୍‌ରି ଆପାଲ୍‌ତେଙ୍‌ କାଙରାଲୁଡନ୍‌ ବାତ୍ତେ ଆତୁବ୍‌ତୁବନ୍‌ ଆଜରିଜିନେ, ମନନଙନ୍‌ ଆପାଲ୍‌ତେଙ୍‌ ଜୁମ୍‌ତୋଡ୍‌ ସିନନ୍‌ ଡେତେ । 25 ଓବାମରଞ୍ଜି କଡ଼ିବନ୍‌ ବାତ୍ତେ ଆର୍‌ନବୁଲୋଙ୍‌ ଡ ବପ୍ପୁ ସିପ୍ପାୟ୍‌ବେଞ୍ଜି ଜୁଜ୍ଜେଲୋଙନ୍‌ ଗୁରୁଡ୍ଡେତଜି । 26 ସିଓନ ଗଡ଼ା ଗରନ୍ନେନ୍‌ ଅଡ଼୍‌କୋନ୍‌ ୟେୟେଡାନ୍‌, ଇଃୟମ୍‌ଇଃୟମ୍‌ଲେ ୟେୟେଡାତଞ୍ଜି ଆରି ଆନିନ୍‌ କିତୁଡ୍‌ଡାଲେ ଲବଲୋଙନ୍‌ ତଙ୍କୁମ୍‌ତେ ।