1 ତି ସିଲଡ୍‌ଲ୍ଲନ୍‌ ଜିସିନ୍‌ ଆ ଗଣ୍ତି ସିଲଡ୍‌ ଅବୟ୍‌ କେଣ୍ତାର୍‌ତେ ଆରି ଆ ମୁଡ଼ନ୍‌ ସିଲଡ୍‌ ଅବୟ୍‌ କେଣ୍ତାରନ୍‌ ଡୁଙ୍‌ଲନ୍‌ ଜଅନ୍‌ ଜଅତେ । 2 ଆରି ପ୍ରବୁନ୍‌ ଆ ପୁରାଡ଼ା, ଗିଆନ ଡ ଅନିୟମ୍‌ ପୁରାଡ଼ାନ୍‌, ଅନିୟମ୍‌ ଡ ରନପ୍ତି ପୁରାଡ଼ାନ୍‌, ବୁଡ୍ଡିନ୍‌ ଡ ପ୍ରବୁନ୍‌ ଆମନାନ୍ନେ ପୁରାଡ଼ା ଆମଙନ୍‌ ଡକୋତନେ; 3 ପ୍ରବୁନ୍‌ ଆବିସୟ ଆ ବନ୍ତଙ୍‌ଲୋଙ୍‌ ଆନିନ୍‌ ସର୍ଡାତନେ; ଆରି, ଆନିନ୍‌ ଆ ଗନିୟ୍‌ଗିଜନ୍‌ ଅନ୍ତମ୍‌ ଅପନ୍‌ସୁଆତିଏ, ଅଡ଼େ ଅନମ୍‌ଡଙନ୍‌ ବାତ୍ତେ ଅପନ୍‌ସୁଆତିଏ, 4 ବନ୍‌ଡ ଆନିନ୍‌ ଡରମ୍ମଲୋଙନ୍‌ ଡୋଲୟ୍‌ମରଞ୍ଜିଆଡଙ୍‌ ପନ୍‌ସୁଆତିତେ ଆରି ପୁର୍ତିନ୍‌ ଆ ଲଗଡ୍‌ ବୁଡ୍ଡିମରଞ୍ଜି ଆସନ୍‌ ପନ୍‌ସୁଆତିଲୋଙନ୍‌ କେଞ୍‌ତେ; ଆରି, ଆନିନ୍‌ ତଅଡନ୍‌ ଆ ଡାଙ୍ଗୋ ବାତ୍ତେ ପୁର୍ତିନ୍‌ଆଡଙ୍‌ ତିଡ୍‌ତେ ଡ ଆଉସାଲ୍‌ତମନ୍‌ ଆ ତନଙ୍‌ୟମ୍‌ ବାତ୍ତେ ଇର୍ସେମରଞ୍ଜିଆଡଙ୍‌ ରବ୍ବୁତେ । 5 ଡରମ୍ମନ୍‌ ଆ କିଣ୍ଡୁବ୍‌ଲୋଙନ୍‌ ଆ ରନେଡ୍ଡୁବ୍‌ ଡ ଡର୍ନେଡମନ୍‌ ଆ କିଣ୍ଡୁବନ୍‌ ଆ ରନେଡ୍ଡୁବ୍‌ ଡଙ୍‌ନେ ଡେତେ । 6 ଆରି କେଣ୍ତୁଆକିଡନ୍‌ ଆଅନ୍‌ମେନନ୍‌ ସରିନ୍‌ ଡକୋତନେ ଡ ସୋଡ଼ାକିଡନ୍‌ ଆଅନ୍‌ମେଡନ୍‌ ସରିନ୍‌ ଲୁଡ୍‌ତେ; ଆଅନ୍‌ତାଙନ୍‌ ଡାମ୍ୱଡ଼ା ସିଅଁକିଡନ୍‌ ଡ ଜେଲ୍‌ଜେଲ୍‌ ଜନ୍ତୁଜି ସରିନ୍‌ ମାୟ୍‌ଲନ୍‌ ଡକୋତଞ୍ଜି; ଆରି ଅବୟ୍‌ ସନ୍ନାସିଜନ୍‌ ଆନିଞ୍ଜିଆଡଙ୍‌ ତୁର୍‌ତେ । 7 ଆରି ଆୟୋଙ୍‌ତାଙନ୍‌ ଡ କମ୍ୱୁଡନ୍‌ ଜୋମ୍‌ଜୋମ୍‌ତଞ୍ଜି; ଆଅନଞ୍ଜି ଅଡ଼୍‌କୋନ୍‌ ମାୟ୍‌ଲନ୍‌ ଲୁଡ୍‌ତଜି; ଆରି ସିଅଁକିଡନ୍‌ ତାଙ୍‌ଲେୟନ୍‌ ଅନ୍ତମ୍‌ ଅଲାମନ୍‌ ଜୋମ୍‌ତେ । 8 ଆରି ରେସାସିଜନ୍‌ ବିସଜଡନ୍‌ ଆଡଲ୍ଲିବା ଅଣ୍ତିତନ୍‌ ଆରି ଆରମ୍‌ରେଙ୍‌ମେତନ୍‌ ଆପସିୟ୍‌ ଜାଆଡନ୍‌ ଆଡଲ୍ଲିଲୋଙ୍‌ ଆସିନ୍‌ ଡକ୍କୋତେ । 9 ଆନିଞ୍ଜି ମଡ଼ିର୍‌ ବରୁଲୋଙ୍‌ଞେନ୍‌ ଅନ୍ନିଙ୍‌ ଆଡ୍ରକୋନେଲୋଙ୍‌ ସଙ୍ଗତ୍ତାନ୍‌ ଅଡ଼େ ରନବ୍ବୁନ୍‌ ଅଃଡ୍ଡକୋଏ; ଇନିଆସନ୍‌ଗାମେଣ୍ତେନ୍‌ ସମେଁୟ୍‌ଣ୍ତ୍ରାଲୋଙନ୍‌ ଡାଆନ୍‌ ଏଙ୍ଗାଲେ ଆବରିୟ୍‌, ଏତ୍ତେଲେ ପୁର୍ତିଲୋଙନ୍‌ ପ୍ରବୁନ୍‌ ଆଗିଆନ୍‌ ବରିୟ୍‌ଡେତେ ।

10 ଆରି ତି ଆଡିଡ୍‌ କେଜ୍ଜାଞ୍ଜି ଆପତକା ଅନ୍ତମ୍‌ ଆତନୁବ୍‌ ଜିସିନ୍‌ ଆମୁଡ଼ମର୍‌, ତରଙ୍‌ଆନ୍ନା ଡେସାମରଞ୍ଜି ଆନିନ୍‌ଆଡଙ୍‌ ସାୟ୍‌ଡଙ୍‌ତଜି; ଆରି ଆ ଲୋଲୋନେ ଡରକୋନେନ୍‌ ଗନୁଗୁ ପନେମେଙନ୍‌ ଡେତେ । 11 ଆରି, ତି ଆଡିନ୍ନା ପ୍ରବୁନ୍‌ ଅସୋୟ୍‌ ଆମନ୍‌ରାଞ୍ଜିଆଡଙ୍‌ ଅସୁରନ୍‌, ମିସରନ୍‌, ଡ ପତ୍ରୋସନ୍‌, କୁସନ୍‌, ଏଲମ୍‌, ସିନିଅନ୍‌ ଡ ଅମାତନ୍‌ ଡ ମଡ୍ଡି ସମେଁୟ୍‌ଣ୍ଡ୍ରାନ୍‌ ଆମନ୍‌ରାଜି ଉର୍ରେ ଆପନାଙ୍‌ ଆସନ୍‌ ଅନବ୍‌ବାଗୁ ତର ତେକ୍କେସିତନ୍‌ । 12 ଆରି ଆନିନ୍‌ କେଜ୍ଜାଞ୍ଜି ଆସନ୍‌ ଅବୟ୍‌ ପତକାନ୍‌ ତବ୍‌ନଙ୍‌ତେ ଆରି ପୁର୍ତିନ୍‌ ଉଞ୍ଜିକୁନେ ସିଲଡ୍‌ ଇସ୍ରାଏଲନ୍‌ ଆଗ୍ରଙ୍‌ତିଜେଞ୍ଜି ଆମନ୍‌ରାଜିଆଡଙ୍‌ ରୁକ୍କୁତେ ଡ ଜିଉଦାନ୍‌ ପିରିଙ୍‌ପାଡାନ୍‌ ଆମନ୍‌ରାଜିଆଡଙ୍‌ ତର୍ତୁମ୍‌ତେ । 13 ଆରି, ଇପ୍ରିଅମନ୍‌ ଆ ଇସ୍କତ୍ତା ସଙାୟ୍‌ତେ ଡ ଜିଉଦାନ୍‌ଆଡଙ୍‌ ଆ ଡରଣ୍ତାୟେଞ୍ଜି ଆମନ୍‌ରାଜି ରସମ୍‌ତଜି; ଇପ୍ରିଅମନ୍‌ ଜିଉଦାନ୍‌ଆଡଙ୍‌ ଅଃନିସ୍କତାଏ ଆରି ଜିଉଦାନ୍‌ ଇପ୍ରିଅମନ୍‌ଆଡଙ୍‌ ଅଃଡଣ୍ତାୟେ । 14 ଆରି, ଆନିଞ୍ଜି ବରୁବ୍‌ୟୋଙ୍‌ଗଡ୍‌ ପଲେସ୍ଟିଅଞ୍ଜି ଆତାରଙ୍‌ ଆତୋଣ୍ତୁ ଏଙ୍‌ତଜି; ଆନିଞ୍ଜି ରୁକ୍କୁଲନ୍‌ ଡରୁଙ୍‌ୟୋଙ୍‌ ଡେସାବାଜି ଆଅଞ୍ଜି ଆଜିନିସ ଜୁରୁତଜି; ଆନିଞ୍ଜି ଇଦୋମନ୍‌ ଡ ମୋୟାବନ୍‌ ଆମନ୍‌ରାଜିଆଡଙ୍‌ ଅବ୍‌ଲନେତଜି ଆରି ଆମୋନନ୍‌ ଆମନ୍‌ରାଜି ଆବର୍ନେଞ୍ଜି ମାନ୍ନେତଜି । 15 ଆରି ପ୍ରବୁନ୍‌ ମିସ୍ରିଅ ଡେସାନ୍‌ ଆ ସମେଁୟ୍‌ଣ୍ଡ୍ରାନ୍‌ ଆଲାଙ୍‌ ଅଡ଼୍‌କୋନ୍‌ ଅବ୍‌ସର୍‌ତେ ଆରି ତ୍ତଗୋ ରିଙ୍ଗେନ୍‌ ବାତ୍ତେ ପରାତ ଅଲନ୍‌ ଆତୋଣ୍ତୁ ଆସିନ୍‌ ୟୁତେ, ଆରି ଆନିନ୍‌ଆଡଙ୍‌ ତିଡ୍‌ଲେ ସାତଟା ଆପନେଡାନ୍‌ ଏମ୍ମେତେ ଡ ମନ୍‌ରାଞ୍ଜିଆଡଙ୍‌ ଆସର୍‌ ତଙର୍‌ଗଡ୍‌ ଅବ୍‌ତଙିୟ୍‌ତଜି । 16 ମିସର୍‌ ଡେସାନ୍‌ ସିଲଡ୍‌ ଡୁଙ୍‌ଲନ୍‌ ଆଜିର୍ରାଞଞ୍ଜି ଆଡିଡ୍‌ ଏଙ୍ଗାଲେ ଇସ୍ରାଏଲନ୍‌ ଆମନ୍‌ରାଜି ଆସନ୍‌ ଅବୟ୍‌ ତଙରନ୍‌ ଡେଏନ୍‌, ତି ଅନ୍ତମ୍‌ ଆନିନ୍‌ ଆତନଲ୍‌ମରଞ୍ଜି ଆସନ୍‌ ଅସୁରନ୍‌ ସିଲଡ୍‌ ଅବୟ୍‌ ଲାଆଙ୍‌ ତଙରନ୍‌ ଡେତେ ।