ବାବିଲନ୍ ଆ ପନବ୍ରଡ୍
1 ଆମୋସନ୍ ଆ ଡାଙ୍ଗାଡ଼ାଅନ୍ ଜିସାୟନ୍, ବାବିଲନ୍ ଆସନ୍ ଆ ତନାଲ୍ମଡ୍ କେନ୍ । 2 ଆମ୍ୱେଞ୍ଜି ଅରାନୁବ୍ତଡନ୍ ଆବରୁ ଆତୁଣ୍ତୋ ପତକାନ୍ ତବ୍ନଙ୍ବା, ମନ୍ରାଞ୍ଜି ଆସନ୍ ଆକ୍ରାନ୍ ବାବ୍ବାବ୍ବା, ତାରିଆୟ୍ବା, ଆନିଞ୍ଜି ସୋଡ଼ାମରଞ୍ଜି ଆ ଗଡ଼ା ଆଡୁଆରାଲୋଙ୍ ଗନେତଜି । 3 ଞେନ୍ ମଡ଼ିର୍ମର୍ଞେଞ୍ଜିଆଡଙ୍ ବାଁୟ୍ଲାଜି, ଓଓ, ବନ୍ଡ୍ରାବ୍ଞେନ୍ ଆଗନଡେଲ୍ ଆସନ୍ ସିପ୍ପାୟ୍ଞେଞ୍ଜିଆଡଙ୍, ଆଗରାମ୍ଗାମ୍, ଅଙ୍ଗା ଆମନ୍ରାଜି ସର୍ଡାନ୍ ବାତ୍ତେ ଗନୁଗୁ ପନେମେଙ୍ ଏମ୍ମେତିଁୟ୍ଞ୍ଜି ଞେନ୍ ଆନିଞ୍ଜିଆଡଙ୍ ଓଡ୍ଡେଲାୟ୍ । 4 ବରୁରେଙନ୍ ଜବ୍ର ଗୋଗୋୟ୍ ମନ୍ରାନ୍ ଆସରଙ୍ ଅନ୍ତମ୍ ସଡ୍ଡାତେ ! କେଜ୍ଜାଞ୍ଜି ଡ ରାଜାଞ୍ଜି ଆରୁକୁତଞ୍ଜି ଆସରଙ୍ ଆସନଡ୍ଡା ସଡ୍ଡାତେ ! ପ୍ରବୁନ୍ ଅଲ୍ଜୁଜେନ୍ ଆସନ୍ ସିପ୍ପାୟନ୍ ରୁକୁତେ । 5 ଆନିଞ୍ଜି, ଆଗରାମ୍ଗାମ୍, ପ୍ରବୁନ୍ ଡ ଆ ବନ୍ଡ୍ରାବନ୍ ଅତିଆରନ୍ ଅନ୍ତମ୍ ଅଡ଼୍କୋନ୍ ଡେସାନ୍ ସନବ୍ଙାଜନ୍ ଆସନ୍ ସଙାୟ୍ ଡେସାନ୍ ସିଲଡ୍, ରୁଆଙନ୍ ଆତନୁଞିୟ୍ ସିଲଡ୍ ଜିର୍ତାଜି । 6 ଆମ୍ୱେଞ୍ଜି ୟେୟେଡାନାବା; ଇନିଆସନ୍ଗାମେଣ୍ତେନ୍ ପ୍ରବୁନ୍ ଆଡିନ୍ନା ତୁୟାଲାୟ୍; ବୋର୍ସାଡମନ୍ ଆ ପ୍ରବୁ ଆମଙ୍ ସିଲଡ୍ ଗାବ୍ୟାର୍ରିଙନ୍ ଅନ୍ତମ୍ ତିଆତେ ଜିର୍ତାୟ୍ । 7 ତିଆସନ୍ ଅଡ଼୍କୋନ୍ ଆସି ବପ୍ପୁ ତଡ୍ ଡେତେ ଆରି ଡିଲେ ମନ୍ରାନ୍ ଆଉଗର୍ ଲମେଡନ୍ ଅନ୍ତମ୍ ଲେଏମ୍ତେ; 8 ଆରି, ଆନିଞ୍ଜି ବତଙ୍ତଜି; ସତିଡ୍ସମୟ୍ ଡ ବତାନ୍ ଆନିଞ୍ଜିଆଡଙ୍ ଡେତଜି; ଆନିଞ୍ଜି କୋକୋଡନ୍ବଜନ୍ ଅନ୍ତମ୍ ବତାତଜି; ଆନିଞ୍ଜି ତର୍ଡମ୍ ଆ ବିସୟଲୋଙ୍ ସାନ୍ନି ଡେତଜି; ଆମୁକାଞ୍ଜି ଆଉଲାଙ୍ତୋଡନ୍ ଅନ୍ତମ୍ ଡତଜି । 9 ଗିୟ୍ବା, ଡେସାନ୍ ଆନବ୍ଗୁରୁଡେନ୍ ଡ ତେତ୍ତେ ସିଲଡ୍ ଇର୍ସେମରଞ୍ଜିଆଡଙ୍ ଅନବ୍ମୋସାନ୍ ଆସନ୍ ପ୍ରବୁନ୍ ଆ ଡିନ୍ନା ବରନ୍ତଙ୍ଡାନ୍; ବଡ୍ରାବନ୍ ଡ ଜବ୍ର ବଡ୍ରାବନ୍ ମାୟ୍ଲନ୍ ଜିର୍ତାୟ୍ । 10 ଇନିଆସନ୍ଗାମେଣ୍ତେନ୍ ରୁଆଙନ୍ ଆ ତୁତୁୟ୍ଜି ଡ ଆସୁଙ୍କରାଜି ଅଃନବ୍ ସାଆରେ; ଓୟୋଙନ୍ ଆଡ୍ରୁଙ୍ତନାଞନ୍ ଆଡିଡ୍ ଲୋଙଡ୍ତେ ଆରି ଆଙ୍ଗାଜନ୍ ଆସନାଆର୍ ଅଃତରାଡେ । 11 ଞେନ୍ ପୁର୍ତିନ୍ ଆ ଇର୍ସେ ଆସନ୍ ପୁର୍ତିନ୍ଆଡଙ୍ ପବ୍ରଡ୍ତାୟ୍ ଡ ପେଲ୍ଲାମରଞ୍ଜି ଆ ଇର୍ସେ ଆସନ୍ ଆନିଞ୍ଜିଆଡଙ୍ ପବ୍ରଡ୍ତାୟ୍ । ଞେନ୍ କଙ୍କ୍ରିମରଞ୍ଜି ଆ କଙ୍କ୍ରି ଅବ୍ନାନ୍ନାତାୟ୍ ଡ ବରନ୍ତଙ୍ଡାନ୍ ଆମନ୍ରାଜି ଆଗର୍ବ ଅବ୍ଜାୟ୍ତାତାୟ୍ । 12 ଞେନ୍ ମନଙ୍ ସୁନ୍ନାନ୍ ଆପାଲ୍ତେଙ୍ ପୁର୍ତିନ୍ଆଡଙ୍ ଡ ଓପିରନ୍ ମଡ଼ିର୍ ସୁନ୍ନାନ୍ ଆପାଲ୍ତେଙ୍ ମନ୍ରାନ୍ଆଡଙ୍ ଅବ୍ସୋଡ଼ାବା । 13 ତିଆସନ୍ ଞେନ୍ ରୁଆଙନ୍ଆଡଙ୍ ଅବ୍ୟୁର୍ନେତାୟ୍, ଆରି ପ୍ରବୁନ୍ ଆବନ୍ରାବ୍ ଡ ଆଡୁଡୁତୋଡ୍ଗନ୍ ଆବନ୍ରାବ୍ ଡିନାଇଙନ୍ ପୁର୍ତିନ୍ ଆଡ୍ରକୋନେନ୍ ସିଲଡ୍ ଡେତନ୍ନେ । 14 ସିଲତ୍ତେ କେନ୍ ଅନ୍ତମ୍ ଡେତେ ଡ, ଗନଙନ୍ ଆଡ୍ରେତେନ୍ ଆଲବ୍ ଅନ୍ତମ୍ ଡ ତୁର୍ମେଡ୍ମର୍ତଡନ୍ ଆମେଣ୍ତା ଅନ୍ତମ୍ ଡିଲେ ମନ୍ରାନ୍ ରମ୍ମଙ୍ ରମ୍ମଙ୍ ଆକେଜ୍ଜା ୟର୍ତନାଜି ଆରି ଅଡ଼୍କୋମନ୍ରାନ୍ ରମ୍ମଙ୍ ରମ୍ମଙ୍ ଆଡେସା ଜିର୍ତଜି । 15 ଅନ୍ନିଙ୍ ଆମନ୍ରାଆଡଙ୍ ରନବାଙନ୍ ଡେଏନ୍ ଡେନ୍, ଆନିନ୍ଆଡଙ୍ ରନବ୍ବୁନ୍ ଡେତେ ଆରି ଅନ୍ନିଙ୍ ଆମନ୍ରାଆଡଙ୍ ଞନମନ୍ ଡେଏଣ୍ଡେନ୍, ଆନିନ୍ କଡ଼ିବନ୍ ବାତ୍ତେ ରନବ୍ବୁନ୍ ଡେତେ । 16 ଆ ପସିଜଞ୍ଜି ଆତେମଡଞ୍ଜି ତନୋବ୍ଡାନ୍ ଡେତେ; ଆସିଙଞ୍ଜି ଜନୁରୁନ୍ ଡେତେ ଆରି ଆଡୁକ୍ରିଞ୍ଜି ବଡଗାଁୟ୍ ଞମ୍ଲେ ଲନୁଡନ୍ ଡେତଜି । 17 ଗିୟ୍ବା, ଞେନ୍ ଆବିରୁଦଲୋଙଞ୍ଜି ମାଦିୟଞ୍ଜିଆଡଙ୍ ତିରିଆୟ୍ତାଜି, ଆନିଞ୍ଜି ରୁପାନ୍ ଅଃନାଙାଙେଜି କି ସୁନ୍ନାନ୍ ଆନିଞ୍ଜି ଅଃମଅଁୟେଜି । 18 ଆଞଙାଞ୍ଜି ବେଣ୍ତିଆସିଜଞ୍ଜିଆଡଙ୍ ତୋବ୍ଡାତେ ଆରି ଆନିଞ୍ଜି ପାଙ୍ଗୁରନ୍ସିଜଞ୍ଜି ଆଡଙ୍ ଅଃନିର୍ସୁୟମ୍ଡାଏଜି, ପସିଞ୍ଜିଆଡଙ୍ ଆନିଞ୍ଜି ଅଃକାନକାରମ୍ଡାଏଜି । 19 ଆରି ରାଜ୍ୟନ୍ ଅଡ଼୍କୋନ୍ ଆ ଗନୁଗୁ ଅନ୍ତମ୍ ଡ କଲ୍ଦିଅଞ୍ଜି ଆନବ୍ସୋଡ଼ାଡମ୍ନେ ଆମନନଙନ୍ ଅନ୍ତମ୍ ବାବିଲନ୍, ତିଆତେ ଇସ୍ୱରନ୍ ବାତ୍ତେ ପନୁୟନ୍ ଆଡ୍ରେନ୍ ଆ ସଦୋମନ୍ ଡ ଅମୋରାନ୍ ଅନ୍ତମ୍ ଡେତେ । 20 ତିଆତେ ମନ୍ରାନ୍ ଆଡ୍ରକୋନେ ଅଃଡ୍ଡେଏ, ଆସନକୋଡ୍ ସନକୋଡ୍ ଆପସିୟ୍ ଆନ୍ନିଙ୍ ତେତ୍ତେ ଡକୋଲନ୍ ଅଃରପ୍ତିଏଜି; ଅଡ଼େ ତୁର୍ମେନ୍ମରଞ୍ଜି ରମ୍ମଙ୍ ରମ୍ମଙ୍ ଆମଣ୍ତା ତିତେତ୍ତେ ଅଃନବ୍ଲୁଲୁଡେଜି । 21 ବନ୍ଡ କିନ୍ରେଙ୍ ଜନ୍ତୁଜି13:21 ବୋଡ଼ାଞ୍ଜି ତି ଆଡ୍ରକୋନେଲୋଙ୍ ଲୁଡ୍ତଜି ଆରି ଆସିଙଞ୍ଜି ବନାବ୍ବାବ୍ ଜନ୍ତୁଜି ବରିୟ୍ତଜି; କିନ୍ତୋଜଞ୍ଜି ତିତେତ୍ତେ ଡକୋତଞ୍ଜି ଆରି କିମେଡଞ୍ଜି ତେତ୍ତେ ତଙ୍ସେଙ୍ତଞ୍ଜି । 22 ଆରି ବଲିଆଞ୍ଜି ଆବୁଲେଙ୍ଲୋଙଞ୍ଜି ଡ ବୋଡ଼ାଞ୍ଜି ସର୍ଡାନେ ଆସିଙ୍ଲୋଙଞ୍ଜି ବାବ୍ବାବ୍ତଜି; ବାବିଲୋନ୍ ଆବେଡ଼ା ତୁୟାଲାୟ୍ ଡ ଆ ଡିନ୍ନାନ୍ ଅଡ଼୍କୋନ୍ ଅସଙ୍ଗାଜେ ।
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)