1 ତି ଆଡିନ୍ନା ଜିଉଦା ଡେସାଲୋଙ୍‌ କେନ୍‌ ଆକନନ୍‌ କନ୍‌ତଜି; ରଡୋ ଗଡ଼ାନ୍‌ ଇନ୍‌ଲେଞ୍ଜିଆତେ ଅବୟ୍‌ ଡକୋ; ଇସ୍ୱରନ୍‌ ଅନୁରନ୍‌ ତେତ୍ତେ ଆ ଗଡ଼ା ଆ କିନ୍ତାଲ୍‌ନ୍‌ ଅନ୍ତମ୍‌ ଆରି ଜନିନୟ୍‌ ରଡୋ କିନ୍ତାଲନ୍‌ ଅନ୍ତମ୍‌ ଏମ୍ମେତେତେ । 2 ଏଙ୍ଗାଲେ ଆଜାଡ଼ିନ୍‌ ଆ ମନାନ୍ନେ ଡରମ୍ମ କେଜ୍ଜାନ୍‌ ରପ୍ତି ଗନ୍ତେ, ତିଆସନ୍‌ ଆମ୍ୱେଞ୍ଜି ଗଡ଼ାନ୍‌ ଆସନଙ୍‌ ଅଡ଼୍‌କୋନ୍‌ ରୋସାଡ୍‌ବା । 3 ଆନା ଆମନ୍‌ ଅମଙ୍‌ଲୋଙ୍‌ନମ୍‌ ଗରି ଡକୋତେ, ଆନିନ୍‌ଆଡଙ୍‌ ଆମନ୍‌ ଏରାମ୍ମୁୟ୍‌ ଡକ୍କୋତେ; ଇନିଆସନ୍‌ଗାମେଣ୍ତେନ୍‌ ଆନିନ୍‌ ଅମଙ୍‌ଲୋଙ୍‌ନମ୍‌ ଆସାତନେ । 4 ଆମ୍ୱେଞ୍ଜି ଆଏଡ଼ର୍‌ ପ୍ରବୁନ୍‌ ଆମଙ୍‌ବା ଡର୍ନାବା ; ଇନିଆସନ୍‌ଗାମେଣ୍ତେନ୍‌ ପ୍ରବୁନ୍‌ ଜିଓବାନ୍‌ ଆଏଡ଼ର୍‌ ଅରେଙନ୍‌ ଅନ୍ତମ୍‌ ଡକୋ । 5 ଆରିଆନାଜି ଗର୍ବତଞ୍ଜି ଆନିଞ୍ଜିଆଡଙ୍‌ ଅନବ୍‌ସାନ୍ନାନ୍‌ ଡେତଜି; ରଡୋ ଗଡ଼ାନ୍‌ଆଡଙ୍‌ ଅବ୍‌ସେଡ୍‌ତ; ଆନିନ୍‌ ତିଆତେ ଅବ୍‌ଜାୟ୍‌ତାଲେ ଲବଲୋଙନ୍‌ ଅବ୍‌ମାୟ୍‌ମାୟ୍‌ତେ; ଆନିନ୍‌ଆଡଙ୍‌ ଆରଡ଼ିସଲ୍‌ଲୋଙନ୍‌ ଅଃମାୟ୍‌ମାୟ୍‌ତେ । 6 ଅତାଲ୍‌ଜଙନ୍‌ ତିଆତେ ଞାଡାତେ; ଡୋଲେୟ୍‌ମରଞ୍ଜି ଆତାଲ୍‌ଜଙ୍‌ ଡ କରାର୍‌କାରମ୍‌ଡାନ୍‌ ଆମନ୍‌ରାଜି ପାଡ୍‌ଜଙ୍‌ଲେ ତିଆତେ ଞାଡାତଜି । 7 ଡରମ୍ମମରନ୍‌ ଆ ତଙର୍‌ ବିଙୟ୍‌; ଆମନ୍‌ ଆଜାଡ଼ିମର୍‌, ଆମନ୍‌ ଡରମ୍ମମରନ୍‌ ଆ ତଙର୍‌ ଅବ୍‌ତୁୟ୍‌ତେ । 8 ଏ ସଦାପ୍ରବୁ, ଇନ୍‌ଲେଞ୍ଜି ପନ୍‌ସୁଆତି ତଙର୍‌ଲୋଙ୍‌ନମ୍‌ ଆମନ୍‌ଆଡଙ୍‌ ଆଜଗ୍ଗେ ଏଡକୋତନାୟ୍‌; ଅଞୁମ୍‌ନମ୍‌ ଡ ମନନ୍ନେନମ୍‌ ଆରମ୍ମଡ୍‌ ପୁରାଡ଼ାଲେନ୍‌ ଅରାସାନେନ୍‌ ଡକୋ । 9 ତଗଲନ୍‌ ଆଡିଡ୍‌ ପରାନ୍ନଞେନ୍‌ ବାତ୍ତେ ଆମନ୍‌ଆଡଙ୍‌ ଆସାଲନ୍‌ ଡକୋଲନାୟ୍‌; ଓଓ, ଞେନ୍‌ ପୁରାଡ଼ାଞେନ୍‌ ବାତ୍ତେ ଆମନ୍‌ଆଡଙ୍‌ ସାୟ୍‌ଡଙ୍‌ତମ୍‌; ଇନିଆସନ୍‌ଗାମେଣ୍ତେନ୍‌ ପୁର୍ତିଲୋଙନ୍‌ ସାସନନମ୍‌ ଅଡ଼୍‌କୋନ୍‌ ଗିୟ୍‌ତାଏଣ୍ଡେନ୍‌ ପୁର୍ତିନ୍‌ ଆଡ୍ରକୋତଞ୍ଜି ଆମନ୍‌ରାଜି ଡରମ୍ମନ୍‌ ଞଙ୍‌ତଞ୍ଜି । 10 ପେଲ୍ଲାମରନ୍‌ ସନାୟୁମନ୍‌ ଞାଙେନ୍‌ ଜନଙ୍‌ଡେନ୍‌ ଆନିନ୍‌ ଡରମ୍ମନ୍‌ ଅଃଞଙ୍‌ନେ; ଲନଗଡ୍‌ ଡେସାଲୋଙନ୍‌ ଆନିନ୍‌ ଇର୍ସେନ୍‌ ଲୁମ୍‌ତେ ଆରି ପ୍ରବୁନ୍‌ ଆ ଗନୁଗୁଆପନେମେଙ୍‌ ଅଃଗିଜେ । 11 ଏ ସଦାପ୍ରବୁ ଅସିନମ୍‌ ଆତେକ୍କେ ଡକୋ, ଡେଲୋଜନଙ୍‌ଡେନ୍‌ ଆନିଞ୍ଜି ତିଆତେ ଅଃଗିଜେଜି, ବନ୍‌ଡ ମନ୍‌ରାନମ୍‌ଞ୍ଜି ଆସନ୍‌ ଅନୁୟୁବ୍‌ନମ୍‌ ଆନିଞ୍ଜି ଗିୟ୍‌ତଜି ଆରି ଗରୟ୍‌ତଜି; ଓଓ, ତଗୋନ୍‌ ବନେରାମର୍‌ନମ୍‌ଞ୍ଜିଆଡଙ୍‌ ଜୋମ୍‌ତୋଡ୍‌ତେ । 12 ଏ ସଦାପ୍ରବୁ, ଆମନ୍‌ ଞେନ୍‌ ଆସନ୍‌ ସନୟୁନ୍‌ ଗବ୍‌ରିତେ; ଇନିଆସନ୍‌ଗାମେଣ୍ତେନ୍‌ ଆମନ୍‌ ଇନ୍‌ଲେଞ୍ଜି ଆସନ୍‌ ଅଡ଼୍‌କୋ କାବ୍ବାଡ଼ାଲନ୍‌ ଗବ୍‌ଡେଲ୍ଲେ ଲୁମ୍‌ତେ । 13 ଏ ସଦାପ୍ରବୁ, ଇସ୍ୱରଲେନ୍‌, ଆମନ୍‌ ଉମ୍‌ରେଙ୍‌ଲେ ଆନ୍ନା ମରଞ୍ଜି ଇନ୍‌ଲେଞ୍ଜିଆଡଙ୍‌ ସାସନେଞ୍ଜି, ବନ୍‌ଡ ଆମନ୍‌ ଆସନ୍‌ ଇନ୍‌ଲେଞ୍ଜି ଅଞୁମ୍‌ନମ୍‌ ଏସେଙ୍କେତାୟ୍‌ । 14 ଆନିଞ୍ଜି ରବୁଏଞ୍ଜି, ଆନିଞ୍ଜି ଆରି ଅଃନମେଞେଜି; ଆନିଞ୍ଜି ରବୁଏଞ୍ଜି, ଆନିଞ୍ଜି ଅଃଡ୍ଡୋନେଜି; ତିଆସନ୍‌ ଆମନ୍‌ ଆନିଞ୍ଜିଆଡଙ୍‌ ପବ୍‌ରଡ୍‌ଲେ ରବ୍ବୁଏଞ୍ଜି ଆରି ଆନିଞ୍ଜିଆଡଙ୍‌ ଅଃମନେଏଜି । 15 ଆମନ୍‌ କେନ୍‌ ଆଡେସା ଆମନ୍‌ରାଜିଆଡଙ୍‌ ଅବ୍‌ଗୋଗୋଜେଞ୍ଜି, ଏ ସଦାପ୍ରବୁ, ଆମନ୍‌ କେନ୍‌ ଆଡେସା ଆମନ୍‌ରାଜିଆଡଙ୍‌ ଅବ୍‌ଗୋଗୋଜେଞ୍ଜି; ଆମନ୍‌ ଗନୁଗୁ ପନେମେଙ୍‌ ଞାଙେନ୍‌; ଆମନ୍‌ ଡେସାନ୍‌ ଆସଣ୍ତି ଅଡ଼୍‌କୋନ୍‌ ଅବ୍‌ଲାଆଙେନ୍‌ । 16 ଏ ସଦାପ୍ରବୁ, ଡରଣ୍ଡାଞେଞ୍ଜି ଆଡିଡ୍‌ ଆନିଞ୍ଜି ଆମନ୍‌ଆଡଙ୍‌ ସାୟ୍‌ଡଙ୍‌ତମ୍‌ଜି, ଆନିଞ୍ଜିଆଡଙ୍‌ ଡରଣ୍ଡାଞେଞ୍ଜି ଆଡିନ୍‌ ଆନିଞ୍ଜି ପାର୍ତନାତଞ୍ଜି । 17 ପାଙ୍ଗୁରନ୍‌ବଜନ୍‌ ଆକୋଡ୍‌କୋଡ୍‌ ଡିନ୍ନା ଆତ୍ରୁୟାୟ୍‌ତେନ୍‌ ଆଡିଡ୍‌ ଏଙ୍ଗାଲେ ସତିଡ୍‌ସମୟ୍‌ ଡେତେ ଆରି ବତାନ୍‌ ବାତ୍ତେ ୟେୟେଡାତନେ, ତି ଅନ୍ତମ୍‌ ଏ ସଦାପ୍ରବୁ, ଇନ୍‌ଲେଞ୍ଜି ଅମଙ୍‌ବାନମ୍‌ ଏବ୍‌ଡମ୍‌ଲୟାନ୍‌ । 18 ଇନ୍‌ଲେଞ୍ଜି ତିଲ୍‌କୋଡ୍‌ଲଲେନ୍‌, ଇନ୍‌ଲେଞ୍ଜି ସତିଡ୍‌ସମୟ୍‌ ଡେଲଲେନ୍‌ ବନ୍‌ଡ ରିଙ୍ଗେନ୍‌ ଏକୋଡ୍‌ଲାୟ୍‌; ଇନ୍‌ଲେଞ୍ଜି ଡେସାନ୍‌ ଆଡନୋବ୍‌ ଆସନ୍‌ କାବ୍ବାଡ଼ାନ୍‌ ଏଲୁମ୍‌ଲାୟ୍‌; ଅଡ଼େ ପୁର୍ତିନ୍‌ ଆମନ୍‌ରାଜି ଅନ୍‌ରଙ୍‌ କୋଡେଜି । 19 ଆରବୁମର୍‌ନମ୍‌ଜି ଅମେଙ୍‌ତଜି; ମରାଞେନ୍‌ ଅଡ଼୍‌କୋନ୍‌ ଡୋତଞ୍ଜି । ଏ ଆରଡ଼ିସଲ୍‌ଲୋଙନ୍‌ ଆମନ୍‌ରାଜି,* ଆମ୍ୱେଞ୍ଜି ଡୋଲନ୍‌ କନନ୍‌ନାବା; ଇନିଆସନ୍‌ଗାମେଣ୍ତେନ୍‌ ସସିରାଡାନମ୍‌ ଅଗାବନ୍‌ ଆ ସସିରା ଅନ୍ତମ୍‌ ଆରି ଆରବୁମରଞ୍ଜିଆଡଙ୍‌ ଅବ୍‌ଡୋତେ ।

20 ଏ ମନ୍‌ରାଞେଞ୍ଜି, ଜିରାୟ୍‌ବା, ଆମ୍ୱେନ୍‌ ଅମସିଙନ୍‌ ଗନ୍‌ଲନ୍‌ ସନଙଞ୍ଜି ଇଙଡ୍‌ବା; ବନ୍‌ଡ୍ରାବନ୍‌ ଅନ୍‌ରଙ୍‌ ସୟୁଏନ୍‌ ଜାୟ୍‌ ଅସୋୟ୍‌ ସମୟ୍‌ ଆସନ୍‌ ଆମ୍ୱେନ୍‌ଡମ୍‌ ସନାବା । 21 ଇନିଆସନ୍‌ଗାମେଣ୍ତେନ୍‌ ଗିୟ୍‌ବା ପ୍ରବୁନ୍‌ ପୁର୍ତିନ୍‌ ଆମନ୍‌ରାଜି ଡୋସା ଆସନ୍‌ ଆନିଞ୍ଜିଆଡଙ୍‌ ଆ ପନବ୍‌ରଡ୍‌ ଆସନ୍‌ ଡରକୋନେନ୍‌ ସିଲଡ୍‌ ଡୁଙ୍‌ଲନ୍‌ ଜିର୍ତାୟ୍‌; ପୁର୍ତିନ୍‌ ଆର୍ରବୁଏନ୍‌ ଆମନ୍‌ରାଜିଆଡଙ୍‌ ଆରି ଅଃନବ୍‌ସସଏ ଆରି ଆନିନ୍‌ ଆମଡ୍ଡିଲୋଙନ୍‌ ଆଗଲୋନ୍‌ ଆମିଞାମ୍‌ ଅବ୍‌ରାଙ୍‌ଡାତେ ।