1 ଇପ୍ରିଅମନ୍‌ ଆମନ୍‌ରାଜି ଆବନନୁଲ୍‌ ଡ ଦ୍ରାକ୍ୟାଡାଲୋଙନ୍‌ ଆରାରେଏଞ୍ଜି ଆମନ୍‌ରାଜି ଆନବ୍‌ସୋଡ଼ାନେ ଆ ରନୁବ୍ବବ୍‌, ଆରଜତେନ୍‌ ଆ ଗର୍ଡ ଆତୋଣ୍ତୁ `ଡକୋନ୍‌ ଆ ମନଙ୍‌ ତାର୍ବା ଆ ବ୍ରାଲ୍‌ଡଙ୍‌ତେନ୍‌ ଅନ୍ତମ୍‌, ଆନିନ୍‌ ଆ ମନଙ୍‌ ଗନୁଗୁ ପନେମେଙନ୍‌ ଆସନ୍‌ ୟୋଙ୍‌ ! 2 ଗିୟ୍‌ବା, ପ୍ରବୁନ୍‌ ଆମନ୍‌ରା ଅବୟ୍‌ନେ ବପ୍ପୁମରନ୍‌ ଡ ଏର୍‌ବନ୍ତଙନ୍‌ ଆମନ୍‌ରା ଡକୋ; ଆନିନ୍‌ ଆଡ଼େର୍‌ତିରନ୍‌ ଅନ୍ତମ୍‌, ବରନ୍ତଙନ୍‌ ଜଡ଼ିରିଙ୍ଗେତିରନ୍‌ ଅନ୍ତମ୍‌, ଡଡ୍ଡଡ୍‌ ଆଜିର୍ତାଞନ୍‌ ଆ ଗଗଡାନ୍‌ ଅନ୍ତମ୍‌ ଆସିନ୍‌ ବାତ୍ତେ ଲବଲୋଙନ୍‌ ସେଡ୍‌ତାୟ୍‌ । 3 ଇପ୍ରଇମନ୍‌ ଆ ବନ୍ନୁଲ୍‌ମରଞ୍ଜି ଆନବ୍‌ସୋଡ଼ାନେ ଆ ରନୁବ୍ବବ୍‌ ଅତାଲ୍‌ଜଙନ୍‌ ବାତ୍ତେ ଞନାଡାନ୍‌ ଡେତେ । 4 ଆରି ଆରଜତେନ୍‌ ଆ ଗର୍ଡ ଆତୋଣ୍ତୁ ଆ ଡରକୋତନେନ୍‌ ଆ ମନଙ୍‌ ତାର୍ବା ଆ ବ୍ରାଲ୍‌ଡଙ୍‌ତେନ୍‌ ଅନ୍ତମ୍‌, ଡାଗାଡାଇଙନ୍‌ ଆପର୍ତମ୍ମୁନ୍‌ ଆରଗୁର୍ତେନ୍‌ ଆ ଲୁଆ ଜଅ ଅନ୍ତମ୍‌ ଡେତେ; ଆନ୍ନିଙ୍‌ ଗିଜେନ୍‌ତୁମ୍‌ଡେନ୍‌ ଲରୋଡ୍‌ତେ ଆରି ଲଜୋମ୍‌ତେ ।

5 ତି ଆଡିନ୍ନା ବୋର୍ସାଡମନ୍‌ ପ୍ରବୁନ୍‌ ଲାଙ୍‌ଲେଡ୍‌ ଆମନ୍‌ରାଞ୍ଜି ଆସନ୍‌ ମନଙ୍‌ଡମନ୍‌ ଆ ରନୁବ୍ବବ୍‌ ଡ ଗନୁଗୁପନେମଙ୍‌ ଆ ରନୁବବ୍‌ ଅନ୍ତମ୍‌ ଡେତେ । 6 ଆରି ଆନିନ୍‌ ପନ୍‌ସୁଆତିନ୍‌ ଆସନ୍‌ ଆତ୍ରଙ୍କୁମ୍‌ତେନ୍‌ ଆମନ୍‌ରାଆଡଙ୍‌ ଅନବ୍‌ପନ୍‌ସୁଆତିନ୍‌ ଆ ପୁରାଡ଼ା ଡ ଅଙ୍ଗା ଆମନ୍‌ରାଜି ଗଡ଼ାନ୍‌ ଆଡୁଆରା ସିଲଡ୍‌ ଅଲ୍‌ଜୁଜ୍ଜେନ୍‌ ଆବ୍‌ୟର୍‌ତାଜି, ଆନିଞ୍ଜି ଆସନ୍‌ ବୋର୍ସାନ୍‌ ଅନ୍ତମ୍‌ ଡେତେ ।

7 ବନ୍‌ଡ କେନ୍‌ ଆନିଞ୍ଜି ମା ଦ୍ରାକ୍ୟାଡାନ୍‌ ବାତ୍ତେ କଣ୍ତାୟ୍‌ଡମ୍‌ତଞ୍ଜି ଆରି ଗାସାଲନ୍‌ ବାତ୍ତେ ମନଙ୍‌ତଡନ୍‌ ଆ ତଙର୍‌ଗଡ୍‌ ଜିର୍ତଜି; ରାଓଡ଼ାନ୍‌ ଡ ପୁର୍ବାଃତେବର୍‌ମରନ୍‌ ଗାସାଲନ୍‌ ବାତ୍ତେ କଣ୍ତାୟ୍‌ଡମ୍‌ତଞ୍ଜି, ଦ୍ରାକ୍ୟାଡାନ୍‌ ଆନିଞ୍ଜିଆଡଙ୍‌ ଅବ୍‌ସଡେଞ୍ଜି, ଗାସାଲନ୍‌ ବାତ୍ତେ ମନଙ୍‌ତଡନ୍‌ ଆ ତଙର୍‌ଗଡ୍‌ ଜିରେଞ୍ଜି; ଆନିଞ୍ଜି ତନାଲ୍‌ମଡ୍‌ଲୋଙନ୍‌ କଣ୍ତାୟ୍‌ଡମ୍‌ତଞ୍ଜି, ପନ୍‌ସୁଆତିଲୋଙନ୍‌ ତୁଡ୍ଡୁବ୍‌ତଜି । 8 ଇନିଆସନ୍‌ଗାମେଣ୍ତେନ୍‌, ଅଡ଼୍‌କୋ ମେଜରେଙନ୍‌ ବନେଜନ୍‌ ତୁମ୍‌ ଆବରିୟ୍‌, ତେତ୍ତେ ଇନ୍ନିଙ୍‌ ମଡ଼ିର୍‌ ଡରକୋନେନ୍‌ ଅବୟ୍‌ତଡ୍‌ ।

9 ଆନିନ୍‌ ଆନାଆଡଙ୍‌ ଗିଆନ ଞନଙନ୍‌ ତିୟେ ଆନିନ୍‌ ଆନାଆଡଙ୍‌ ବର୍ନେଞ୍ଜି ବୁଜ୍ଜାୟେ, ମେମେନ୍‌ଆନୁମ୍‌ରେଙ୍‌ ଡ ମେମେନ୍‌ ଆରୁମ୍‌ରେଙନ୍‌ ଆପସିୟ୍‌ଆଡଙ୍‌ ପଙ୍‌ ? 10 ଇନିଆସନ୍‌ଗାମେଣ୍ତେନ୍‌, କେନ୍‌ ତ ବନାଁୟ୍‌ବରନ୍‌ ଆତୋଣ୍ତୁ ବନାଁୟ୍‌ବରନ୍‌, ବନାଁୟ୍‌ବରନ୍‌ ଆତୋଣ୍ତୁ ବନାଁୟ୍‌ବରନ୍‌; ଅନସଜନ୍‌ ଆତୋଣ୍ତୁ ଅନସଜନ୍‌, ଅନସଜନ୍‌ ଆତୋଣ୍ତୁ ଅନସଜନ୍‌; ତେନ୍ନେ ଅସୋୟ୍‌, ତେତ୍ତେ ଅସୋୟ୍‌ ।

11 ବନ୍‌ଡ ପ୍ରବୁନ୍‌ ବଡେସାବାୟ୍‌ ଆଉସାଲ୍‌ତମ୍‌ ବରନ୍‌ ଡ ଆନ୍ନା ଲଙ୍‌ଲଙନ୍‌ ବାତ୍ତେ କେନ୍‌ ଆମନ୍‌ରାଜିଆଡଙ୍‌ ବର୍ନେନ୍‌ ବର୍ତନେ । 12 ଆନିନ୍‌ ଆନିଞ୍ଜିଆଡଙ୍‌ ବରେନ୍‌, "କେନ୍‌ ଲୋଲୋନେ ଡିନ୍ନାନ୍‌ ଆମ୍ୱେଞ୍ଜି ମନଙ୍ଗାମରଞ୍ଜିଆଡଙ୍‌ ବନ୍‌ଲୋଲୋନେତଜି, ଆରି କେନ୍‌ ତ ଲୋଲୋନେନ୍‌," ବନ୍‌ଡ ଆନିଞ୍ଜି ଅନମ୍‌ଡଙନ୍‌ ଆସନ୍‌ ଅଃନଡ଼େଲଜି । 13 ତିଆସନ୍‌ ଏଙ୍ଗାଲେ ଆନିଞ୍ଜି ଜିର୍ରେ କିଣ୍ଡୋଙ୍‌ଗଡ୍‌ ଅକୁଡ୍‌ଲ୍ଲେ ଲଗଡ୍‌ତଜି, ଜନ୍ତାଲୋଙନ୍‌ ଅସେଡ୍‌ତଜି ଆରି ବନଣ୍ତିନ୍‌ ଡେତଜି । ପ୍ରବୁନ୍‌ ଆ ବର୍ନେ ଆନିଞ୍ଜି ଆସନ୍‌ ବନାଁୟ୍‌ବରନ୍‌ ଆତୋଣ୍ତୁ ବନାଁୟ୍‌ବରନ୍‌, ବନାଁୟ୍‌ବରନ୍‌ ଆତୋଣ୍ତୁ ବନାଁୟ୍‌ବରନ୍‌; ଅନସଜନ୍‌ ଆତୋଣ୍ତୁ ଅନସଜନ୍‌, ଅନସଜନ୍‌ ଆତୋଣ୍ତୁ ଅନସଜନ୍‌; ତେନ୍ନେ ଅସୋୟ୍‌, ତେତ୍ତେ ଅସୋୟ୍‌ ।

14 ତିଆସନ୍‌ ଏ ଜିରୁସାଲମ୍‌ଲୋଙ୍‌ ଆଡ୍ରକୋତଞ୍ଜି ଆମନ୍‌ରାଜିଆଡଙ୍‌ ଆସାସନ୍‌ମରନ୍‌ ଆନିଣ୍ତୟ୍‌ମର୍‌ଜି, ଆମ୍ୱେଞ୍ଜି ପ୍ରବୁନ୍‌ ଆବର୍ନେ ଅମ୍‌ଡଙ୍‌ବା; 15 ଆମ୍ୱେଞ୍ଜି ଏବର୍ରନେ, ଇନ୍‌ଲେଞ୍ଜି ରନବୁନ୍‌ ସରିନ୍‌ ଅନଗଡନ୍‌ ଏଡକ୍କୋଲାୟ୍‌ ଆରି ପାତାଡ଼ନ୍‌ ସରିନ୍‌ ଏଲ୍‌ସିବ୍‌ଡେୟ୍‌ବର୍ରାୟ୍‌; ତିଆସନ୍‌ ରିଙ୍ଗେତିରନ୍‌ ଅନ୍ତମ୍‌ ସାମକାନ୍‌ ଆରଡ଼ୋତାଞନ୍‌ ଆଡିଡ୍‌ ତିଆତେ ଅମଙ୍‌ଲେନ୍‌ ଅଃନ୍ନଡ଼ୋଆୟ୍‌; ଇନିଆସନ୍‌ଗାମେଣ୍ତେନ୍‌ ଇନ୍‌ଲେଞ୍ଜି ପାତିଆନ୍‌ ଲରଡ୍‌ନେଲେନ୍‌ ଏଏମ୍ମେଆୟ୍‌ ଆରି କନଣ୍ତାୟନ୍‌ ଆଜାୟ୍‌ତା ଇନ୍‌ଲେଞ୍ଜିଆଡଙ୍‌ ସରନେଲେନ୍‌ । 16 ତିଆସନ୍‌ ପ୍ରବୁ ପ୍ରବୁନ୍‌ କେନ୍‌ ଆ ବର୍ନେ ବର୍ତନେ, "ଗିୟ୍‌ବା, ଞେନ୍‌ ଜିମ୍ମିନ୍‌ ଆସନ୍‌ ସିଓନଲୋଙ୍‌ ଅବୟ୍‌ ଅରେଙନ୍‌, ଆ ଅଲ୍ଲେ ଅରେଙନ୍‌, ରଡୋ ଜିମ୍ମିନ୍‌ ଅନ୍ତମ୍‌ ମାଡ ମଡ଼ଗା କୁନେଅରନ୍‌ ତମ୍ମିୟ୍‌ଲାୟ୍‌; ଆନା ଡର୍ତନେ, ଆନିନ୍‌ ରବ୍‌ଡୋଲନ୍‌ ଡକୋତନେ । 17 ଆରି ଆଜାଡ଼ି ପନ୍‌ସୁଆତି ତନରେଡ୍‌ ଲୁଆଡନ୍‌ ଆ ଜନଙ୍‌ ଆରି ଡରମ୍ମ ଓଡ଼ୋମନ୍‌ ବାତ୍ତେ ଏଜଙ୍‌ତାୟ୍‌; ଆରି ଆଡ଼େର୍‌ତିରନ୍‌ ପାତ୍ୟାବରନ୍‌ ଆର୍‌ଲୋଲୋନେନ୍‌ ଅନ୍ତମ୍‌ ଅନବ୍‌ସେଡନ୍‌ଡେତେ ଆରି ଗଗଡାନ୍‌ ଆସ୍ରତନ୍‌ ଆଡ୍ରକୋନେ ଏବ୍ବୁବ୍‌ଡାତେ । 18 ଆରି ରନବୁନ୍‌ ବାତ୍ତେ ଅନଗଡ୍‌ବେଞ୍ଜି ଅଡ଼୍‌କୋନ୍‌ ସନବ୍‌ଞାଜନ୍‌ ଡେତେ ଆରି ପାତାଡ଼ନ୍‌ ସରିନ୍‌ ସଣ୍ତିବେନ୍‌ ଗରିଲେ ଅଃଡକୋଏ; ରିଙ୍ଗେତିରନ୍‌ ଅନ୍ତମ୍‌ ସାମକାନ୍‌ ଆରଡ଼ୋତାଞନ୍‌ ଆଡିଡ୍‌ ଆମ୍ୱେଞ୍ଜି ତିବାତେ ଞନାଡାନ୍‌ ଡେତବେନ୍‌ । 19 ତିଆତେ ଡିଅଙ୍‌ତର ଅଡ଼ୋତାୟ୍‌, ଡିୟ୍‌ତେତର ଆମ୍ୱେଞ୍ଜିଆଡଙ୍‌ ଞମ୍‌ତବେନ୍‌; ଇନିଆସନ୍‌ଗାମେଣ୍ତେନ୍‌ ଡୋତାନ୍‌ଆଡଙ୍‌ ଡୋତାନ୍‌, ତମ୍ୱାନ୍‌ ଡ ତଗଲନ୍‌ ତିଆତେ ଅଡ଼ୋତାୟ୍‌; ଆରି, ତି ଆବର୍ନେ ଏଜନାଏଣ୍ଡେନ୍‌ ବରନ୍ତଙନ୍‌ ଡେତେ । 20 ଇନିଆସନ୍‌ଗାମେଣ୍ତେନ୍‌, ଆନିନ୍‌ଡମ୍‌ ଅଙ୍‌ନେନ୍‌ ଆସନ୍‌ ମନ୍‌ରାନ୍‌ ଆରଲୁଡ୍‌ଲୁଡ୍‌ ଡୋୟ୍‌ନା ଆରି ଆନିନ୍‌ଡମନ୍‌ ଗରୁସାୟ୍‌ନେନ୍‌ ଆସନ୍‌ ସିନ୍‌ରିନ୍‌ ରକୋଡ୍‌ । 21 ଇନିଆସନ୍‌ଗାମେଣ୍ତେନ୍‌ ପ୍ରବୁନ୍‌ ଆବନ୍‌ଡ୍ରାବନ୍‌, ବରତଙ୍‌ଡାନ୍‌ ଆ ବନ୍‌ଡ୍ରାବନ୍‌ ଆଲନୁମନ୍‌, ଆନିନ୍‌ ଆ ଆବନ୍‌ଡ୍ରାବନ୍‌ ଆ ଲନୁମନ୍‌ ଆଗନବ୍‌ଡେଲ୍‌ ଆସନ୍‌, ପରାସିମ ଆ ବରୁଲୋଙ୍‌ ଏଙ୍ଗାଲେ ଆନିନ୍‌ ଡୋଲନେ, ତିଅନ୍ତମ୍‌ ଆନିନ୍‌ ଡୋତନେ, ଗିବିଓନନ୍‌ ଆ ଜାୟ୍‌ତା ବସେଙ୍‌ଲୋଙ୍‌ ଏଙ୍ଗାଲେ ଆନିନ୍‌ ବେବାରଲନ୍‌, ତିଅନ୍ତମ୍‌ ଆନିନ୍‌ ବେବାରତନେ ।

22 ତିଆସନ୍‌ ନମି ଆମ୍ୱେଞ୍ଜି ନିଣ୍ତୟ୍‌ମର୍‌ ଡେଡଙ୍‌ବେନ୍‌ ତଡ୍‌, ତିକ୍କି ଜନିବାବେନ୍‌ ରଡୋଏତୋ; ଇନିଆସନ୍‌ଗାମେଣ୍ତେନ୍‌ ପ୍ରବୁନ୍‌ ବୋର୍ସାଡମନ୍‌ ଆ ପ୍ରବୁନ୍‌ ଆମଙ୍‌ ସିଲଡ୍‌ ସମ୍ପରା ପୁର୍ତିନ୍‌ ଅନାନ୍ନାନ୍‌ ଆସନ୍‌ ଗନବ୍‌ରିବରନ୍‌ ଞେନ୍‌ ଅମ୍‌ଡଙ୍‌ଲାୟ୍‌ ।

23 ଞେନ୍‌ ଇନି ଗାମ୍‌ତାୟ୍‌ ଆମ୍ୱେଞ୍ଜି ବର୍ନେଞେନ୍‌ ଅମ୍‌ଡଙ୍‌ବା; ଡାଲୁଡ୍‌ଲେ ବର୍ନେଞେନ୍‌ ଅମ୍‌ଡଙ୍‌ବା । 24 ଅର୍ରମରନ୍‌ ଜମ୍ମଲନ୍‌ ଆବନୁଡ୍‌ ଆସନ୍‌ ଇନି ଡିତାନ୍‌ ଅର୍ରତନ୍‌ ଆରି ଡିତାନ୍‌ ଓରାଲେ ଆବସେଙନ୍‌ ଆଲବ ଅବ୍‌ପାଗାତେ । 25 ଆନିନ୍‌ ଇନି ଲବନ୍‌ ଗବ୍‌ରିଲେ ୟଗାଜିରାନ୍‌ ଅଃବୁରେ ଆରି ଜିରାନ୍‌ ଅବ୍ବୁଡେ, ଆରି ଡାଡ଼ିଜଙ୍‌ ଗମ୍ମନ୍‌, ଜବନ୍‌ ଡ ଅନେଙ୍‌ ବସେଙ୍‌ଲୋଙନ୍‌ ଇନି କମ୍ୱୁଜନ୍‌ ଅବ୍ବୁଡେ । 26 ଇନିଆସନ୍‌ଗାମେଣ୍ତେନ୍‌ ଆ ଇସ୍ୱରନ୍‌ ଆନିନ୍‌ଆଡଙ୍‌ ଞଙ୍‌ଞଙ୍‌ତଜି ଆରି ଆନିନ୍‌ ଆନିନ୍‌ଆଡଙ୍‌ ଞଙ୍‌ତଜି । 27 ଇନିଆସନ୍‌ଗାମେଣ୍ତେନ୍‌ ୟଗାଜିରାନ୍‌ ଇନ୍ନିଙ୍‌ ଅସୁବ୍‌ ଞନମ୍‌ରମନ୍‌ ବାତ୍ତେ ଅନଲେନନ୍‌ ଅଃଡେଏ, ଅଡ଼େ ଜିରାନ୍‌ ଆତୋଣ୍ତୁ ଅରବ୍‌ଞାଅରନ୍‌ ବାତ୍ତେ ଅଃନବ୍‌ଞାଏଜି; ବନ୍‌ଡ ୟଗାଜିରାନ୍‌ ଡାଙ୍ଗୋନ୍‌ ଡ ଜିରାନ୍‌ ତେଙ୍ଗାନ୍‌ ବାତ୍ତେ ତିଡ୍‌ତନେ । 28 ରୁଟିନ୍‌ ଆତ୍ରୁବ୍‌ତବନ୍‌ ଆଗଲେଜବନ୍‌ ରିଡ୍‌ତବୋ ଇନିଆସନ୍‌ଗାମେଣ୍ଡେନ୍‌ ଆନିନ୍‌ ଅଡ଼୍‌କୋ ଡିନାନ୍‌ ତିଆତେ ଅଃସଡେ ଆରି ତିଆତେ ସଗଡ଼ା ଗୁଡ଼ିଜଙନ୍‌ ଡ କୁର୍ତାଞ୍ଜି ତିଆତେ ବିର୍‌ବିରାୟ୍‌ତଜି, ଏଲେଜାକିଁୟ୍‌ଡେନ୍‌ ଆଇନ୍‌ ତିଆତେ ଅଃରିଡେ । 29 କେନ୍‌ଆତେ ମା ବୋର୍ସଡମନ୍‌ ପ୍ରବୁନ୍‌ ଆମଙ୍‌ସିଲଡ୍‌ ଡେତେ, ଆନିନ୍‌ ଆ ଞନଙ୍‌ଞଙ୍‌ବରନ୍‌ ସରାନ୍ନିଡାନ୍‌ ଆରି ଗିଆନଲୋଙନ୍‌ ସୋଡ଼ା ।