1 ପ୍ରବୁନ୍‌ ବର୍ତନେ, "ରେୟ୍‌ଲଙ୍‌ ଆରି ଅବ୍‌ସର୍ରଙ୍‌ଲନ୍‌ ଅପ୍ପୁଙ୍‌ବର୍‌ବା, ପନେଡନ୍‌ ଅନ୍ତମ୍‌ ସର୍ରଙ୍‌ନମ୍‌ ଅବ୍‌ସଡ୍ଡାଆ, ଆନିଞ୍ଜି ଏର୍‌ଡରମ୍ମ କାବ୍ବାଡ଼ାନ୍‌ ଆସନ୍‌ ମନ୍‌ରାଞେଞ୍ଜିଆଡଙ୍‌ ଡ ଜାକୁବନ୍‌ ଆକେଜ୍ଜାଜିଆଡଙ୍‌ ଆ ଇର୍ସେନ୍‌ ଆସନ୍‌ ଆନିଞ୍ଜି ଅବ୍‌ଜନାବାଜି । 2 ଡେଲୋଜନଙ୍‌ଡେନ୍‌ ଆନିଞ୍ଜି ଅଡ଼୍‌କୋ ଡିନ୍ନାନ୍‌ ଞେନ୍‌ଆଡଙ୍‌ ସାୟ୍‌ଡଙ୍‌ଲିୟ୍‌ଞ୍ଜି ଆରି ତଙର୍‌ଲେନ୍‌ ଆବର୍ନେ ଜନନାନ୍‌ ଆସନ୍‌ ସର୍ଡାଏଞ୍ଜି; ଅଙ୍ଗା ଆକେଜ୍ଜମର୍‌ଜି ଡରମ୍ମ କାବ୍ବାଡ଼ାନ୍‌ ଲୁମ୍‌ତଜି ଆରି ଇସ୍ୱରନ୍‌ ଆ ବନାଁୟ୍‌ବର୍‌ ଅଃନମ୍‌ରେଙେଜି, ଆନିଞ୍ଜି ଅନ୍ତମ୍‌ ଆନିଞ୍ଜି ଡରମ୍ମ ବନାୟ୍‌ବରନ୍‌ ଆବର୍ନେ ଞେନ୍‌ଆଡଙ୍‌ ବର୍ତିୟ୍‌ଞ୍ଜି ଆରି ଇସ୍ୱରନ୍‌ ଆମଙ୍‌ବା ଆୟର୍ନେ ଆସନ୍‌ ସର୍ଡାତଜି ।"

3 ଆନିଞ୍ଜି ବର୍ତଞ୍ଜି, ଇନ୍‌ଲେଞ୍ଜି ଇନିବା ଆନମ୍‌ତମ୍ବୋ ଇନିବା ଆମ୍ବେନ୍‌ ଏଗ୍ଗିଜେ ? ଇନ୍‌ଲେଞ୍ଜି ଇନିବା ତର୍ଡମ୍‌ ତର୍ଡମ୍‌ ଆପରାନ୍ନା ଅବ୍‌ଡଣ୍ଡାୟ୍‌ ତବୋ ଇନିବା ଆମ୍ବେନ୍‌ ଏଃନିୟମେ ? ଗିୟ୍‌ବା, ଆନମ୍‌ନାଇଙନ୍‌ ଆମ୍ବେନ୍‌ ତର୍ଡମ୍‌ ଏରାମ୍ମୁୟ୍‌ ଡକୋନେନ୍‌ ଆସନ୍‌ ଏଏର୍‌ତେ ଏଗୋୟ୍‌ତେ ଆରି ଅବ୍ବୋର୍ସାଲନ୍‌ ଏକାବ୍ବାଡ଼ାତନେ । 4 ଗିୟ୍‌ବା, ଆମ୍ବେଞ୍ଜି ଗୋଡ଼େନ୍‌, ଅଲ୍‌ତିଡନ୍‌ ଡ ଏପେଲ୍ଲାତନ୍‌ ଆରି ତର୍ଡମ୍‌ କୁମ୍‌କୁମ୍‌ସିଲଡ୍‌ ଆମ୍ବେନ୍‌ ଏଲ୍‌ତିତେ । ଆମ୍ବେନ୍‌ ଏଇଃୟମ୍‌ତେ ଡ ଏନ୍ନେଲେ ଏଆନମ୍‌ଲନାୟ୍‌ ଡେନ୍‌ ଇସ୍ୱରନ୍‌ ପାର୍ତନାଲେନ୍‌ ଅମ୍‌ଡଙ୍‌ତେ ଏଗାମ୍‌ତେ ପଙ୍‌ ? 5 ଇନି ମନ୍‌ରାନ୍‌ ଆପରାନ୍ନା ଡନଣ୍ଡାୟନ୍‌ ଆସନ୍‌ ଏନ୍ନେଗନ୍‌ ଆନମ୍‌ନେ ଞେନ୍‌ ଏଃଗବ୍‌ରିଲାୟ୍‌ ପଙ୍‌ ? କୁରିଙ୍‌ଜିଙନ୍‌ ଅନ୍ତମ୍‌ ଅବବନ୍‌ ବବ୍‌ରୁମ୍‌ତେ, ଆରି ଲୁଲ୍ଲୁଡନ୍‌ ଆସନ୍‌ ଅକାକାବନ୍‌ ଡ କୋମାବନ୍‌ ଜାୟ୍‌ତାନ୍‌ ବେଲ୍‌ବା । କେନ୍‌ ଆନମ୍‌ନେ ପଙ୍‌ ପ୍ରବୁନ୍‌ ଜାତେଗାମ୍‌ଲେ ଏଇଃୟମ୍‌ତେ ?

6 ଏନ୍ନେଗନ୍‌ ଆନମ୍‌ନେ ଞେନ୍‌ ଅଡ୍‌ସେଡାଲାୟ୍‌, ପେଲ୍ଲାଡମନ୍‌ ଅନ୍ତମ୍‌ ଆଜନିବାନ୍‌ ଉୟ୍‌ବା, ରାଙଙ୍‌ଲୋଙନ୍‌ ଆଜନିବାଡ୍‌ ଉର୍‌ବା ଆରି ଗୋଡ଼େନ୍‌ ଆରମ୍‌ଡୁଙ୍‌ତାଞଞ୍ଜି ଆମନ୍‌ରାଜିଆଡଙ୍‌ ଉମ୍‌ରେଙ୍‌ବାଜି, ଆରି ଅଡ଼୍‌କୋନ୍‌ ଆ ରାଙଙ୍‌ ଲବ୍‌ଗଡ୍‌ବା । 7 ଆଡୋଲେୟ୍‌ମରନ୍‌ଆଡଙ୍‌ ଜନୋମନ୍‌ ବାନ୍ତେବା, ଅସିଙ୍‌ତଡନ୍‌ ଡ ଡୋଲେୟ୍‌ମରଞ୍ଜିଆଡଙ୍‌ ଅସିଙ୍‌ବେନ୍‌ ଓରୋଙ୍‌ବା, ସିନ୍‌ରିତଡନ୍‌ ଆମନ୍‌ରାଆଡଙ୍‌ ସିନ୍‌ରିନ୍‌ ଅବ୍‌ଜିଜିବା ଆରି ତର୍ଡମ୍‌ କୁଲମ୍‌ମର୍‌ବେଞ୍ଜିଆଡଙ୍‌ ସନାୟ୍‌ସିନ୍‌ ଆନମ୍‌ନେନ୍‌ ଆସନ୍‌ ଏଅସାଡଙ୍‌ତେ । 8 ଏନ୍ନେଲେ ଏଲୁମେନ୍‌ଣ୍ଡେନ୍‌ ଆଡ୍ରୁଙ୍‌ୟୋଙ୍‌ତାଞନ୍‌ ଡୋତ୍ତାନ୍‌ ଆସନାଆର୍‌ ଅନ୍ତମ୍‌ ଡେତବେନ୍‌, ଆରି ପନାରାବେନ୍‌ ଲମନଙ୍‌ତବେନ୍‌ । ଆମନ୍‌ଆଡଙ୍‌ ଡନୋବନ୍‌ ଆସନ୍‌ ଅଡ଼୍‌କୋ ଡିନ୍ନାନ୍‌ ଞେନ୍‌ ଆମ୍ବେଞ୍ଜି ସରିନ୍‌ ଡକୋତନାୟ୍‌; ଆରି ଞେନ୍‌ ଆମ୍ବେଞ୍ଜି ସରିନ୍‌ ଡକୋଲନାୟ୍‌ଡେନ୍‌ ଅଡ଼େଙ୍ଗା ଜାକିଁୟ୍‌ଡେନ୍‌ ଡନୋବନ୍‌ ଏଞାଙ୍‌ତେ । 9 ତିଆଡିଡ୍‌ ଆମ୍ବେନ୍‌ ଏଓଡ୍ଡେତେ ଆରି ପ୍ରବୁନ୍‌ ଜାଲଙ୍‌ତବେନ୍‌; ଆମ୍ବେନ୍‌ ଏୟେତେ ଆରି ଆନିନ୍‌ ଗାମ୍‌ତେ ଞେନ୍‌ ତେନ୍ନେ ଡକୋ । ଅମଙ୍‌ଲୋଙ୍‌ବେନ ସିଲଡ୍‌ ଆମ୍ବେନ୍‌ ରାଙଙନ୍‌ ଏଉୟ୍‌ତେ ଆରି ଅଣ୍ଡେର୍‌ସିବେନ୍‌ ଅବ୍‌ତୁୟ୍‌ଲେ ପରାନ୍‌ସାତ୍ତିନ୍‌ ଆବର୍ନେ ଏବର୍ତନେ । 10 ଆମ୍ବେନ୍‌ ଆଡୋଲେୟ୍‌ମରନ୍‌ ଜନୋମନ୍‌ ତିୟ୍‌ବା ଆରି ଡୁକମରନ୍‌ ଆପରାନ୍ନା ଅବ୍‌ସର୍ଡାବା, ଏତ୍ତେଲ୍‌ଡେନ୍‌ ଆଲୋଙଡ୍‌ରେଙନ୍‌ ସନାଆର୍‌ବେନ୍‌ ରାଙ୍‌ଡାତେ ଆରି ଲନୋଙଡ୍‌ବେନ୍‌ ତମ୍ମାବ୍‌ ଆସନାଆର୍‌ ଅନ୍ତମ୍‌ ଡେତେ । 11 ପ୍ରବୁନ୍‌ ଅଡ଼୍‌କୋ ଡିନ୍ନାନ୍‌ ଆମ୍ବେନ୍‌ଆଡଙ୍‌ ତଙରନ୍‌ ଅବ୍‌ତୁୟ୍‌ତବେନ୍‌ ଆରି ଆରିଙ୍‌ରିଙ୍‌ରେଙନ୍‌ ପରାନ୍ନାବେନ୍‌ ଅବ୍‌ସର୍ଡାତେ । ଅଜାଙ୍‌ବେଞ୍ଜି ରବ୍‌ଡୋତେ ଆରି ଆମ୍ବେନ୍‌ ଡାଆନ୍‌ ଆର୍ରୁଡାତେଞ୍ଜି ଆକୋତ୍ତା ଡ ଡାଆନ୍‌ ଅଃନଞଡେନ୍‌ ଆ ଡୁଙ୍‌ଡମ୍‌ନେଡାନ୍‌ ଅନ୍ତମ୍‌ ଡେତେ । 12 ଆର୍ରିଡ଼ାଙେନ୍‌ ଗଡ଼ାତାଲନ୍‌ ମନ୍‌ରାବେଞ୍ଜି ବାର୍‌ତୁବ୍‌ତଜି ଆରି ଆପାପୁରନ୍‌ ଜିମ୍ମି ଅବ୍‌ଡୋତଜି, ଆମ୍ବେଞ୍ଜି ଆରିଡ଼ାଙ୍‌ କିନ୍ତାଲନ୍‌ ଆତନ୍‌ରୁବ୍‌ମର୍‌ଜି, ଆରସେଡେନ୍‌ ଆସିଂଜି ଡ ତଙରନ୍‌ ବନାର୍‌ତୁବନ୍‌ ଗାମ୍‌ଲେ ଜନାତଜି ।

13 ଆମ୍ବେନ୍‌ ଲୋଲୋନେ ଡିନ୍ନାନ୍‌ ଆମ୍ବେନ୍‌ ମଡ଼ିର୍‌ ଗାମ୍‌ଲେ ଏଇଃୟମେନ୍‌ଡେନ୍‌ ତିଆଡିନ୍ନା ଇସ୍ସୁମ୍‌ବେନ୍‌ ବାତ୍ତେ ଏଲୁମ୍‌ଡଙ୍‌, ପ୍ରବୁନ୍‌ ମଡ଼ିର୍‌ ଡିନ୍ନାନ୍‌ ମନାନ୍ନେନ୍‌ ଡିନ୍ନା ଗାମ୍‌ଲେ ଏବର୍ରନ୍‌ଡେନ୍‌ ତିଆଡିଡ୍‌ ତର୍ଡମ୍‌ କାବ୍ବାଡ଼ାନ୍‌, ବନୁଲେନ୍‌ ଅଡ଼େ କଡାଡ଼ିଲନ୍‌ ଏର୍‌ଡକୋନେନ୍‌ ଲୋଲୋନେ ଡିନ୍ନାନ୍‌ ମାନ୍ନେବା । 14 ଇନିଆସନ୍‌ଗାମେଣ୍ଡେନ୍‌ ପ୍ରବୁନ୍‌ କେନ୍‌ ଆବର୍ନେ ବର୍ରନେ, ଆମ୍ବେନ୍‌ ପ୍ରବୁନ୍‌ ଆମଙ୍‌ ଏସର୍ଡାତନ୍‌ । ଞେନ୍‌ ସମ୍ପରା ପୁର୍ତିଲୋଙନ୍‌ ଆମନ୍‌ଆଡଙ୍‌ ମାନ୍ନେତମ୍‌ଜି, ଆପ୍ପେୟ୍‌ବେନ୍‌ ଜାକୁବନ୍‌, ତରିୟ୍‌ଲାଞନ୍‌ ଆଲବ ଆମ୍ବେନ୍‌ ଏଞାଙ୍‌ତେ* ।