1 ଡୋନା, ଅବ୍ସାଆରା, ଇନିଆସନ୍ଗାମେଣ୍ତେନ୍ ସନାଆର୍ନମ୍ ଅଡ଼ୋଲାୟ୍ ଆରି ପ୍ରବୁନ୍ ଆ ଗନୁଗୁ ପନେମେଙ୍ ଆମଙ୍ବାନମ୍ ଅନବ୍ସାଆରନ୍ ଡେତେ । 2 ଗିଜା, ଲୋଙଡନ୍ ପୁର୍ତିନ୍ଆଡଙ୍ ଡ ମାଡ ଲୋଙଡନ୍ ମନ୍ରାଞ୍ଜିଆଡଙ୍ ୟୁମ୍ତେ; ବନ୍ଡ ପ୍ରବୁନ୍ ଅମଙ୍ବାନମ୍ ଅନବ୍ସାଆରନ୍ ଡେତେ ଆରି ଆ ଗନୁଗୁ ପନେମେଙନ୍ ଅମଙ୍ବାନମ୍ ଅବ୍ଗିୟ୍ତାତେ । 3 ଆରି, ବଡେସାବାଜି ସନାଆର୍ନମ୍ ଆମଙ୍ବା ଡ ରାଜାଞ୍ଜି ଡରୁଙ୍ୟୋଙ୍ ସନାଆର୍ ଅମଙ୍ବାନମ୍ ଜିର୍ତାଜି ।
4 ଆମନ୍ ଅବ୍ୟର୍ୟର୍ ଗିଜା, ଆନିଞ୍ଜି ଅଡ଼୍କୋଞ୍ଜି ରୁକ୍କୁଲନ୍ ଅମଙ୍ବାନମ୍ ଜିର୍ତାଜି; ଡାଙ୍ଗାଡ଼ାଅନ୍ନମ୍ଜି ସଙାୟ୍ ସିଲଡ୍ ଜିର୍ତାଜି ଆରି ଡାଙ୍ଗଡ଼ିଅନ୍ନମଜି ଆ ତାରଙ୍ଲୋଙଞ୍ଜି ବୋୟ୍ଲେ ଅନୋରୋଙନ୍ ଡେତଜି ।
5 ତିଆଡିଡ୍ ଆମନ୍ ତିଆତେ ଗିୟ୍ଲେ ତରାଡ୍ତମ୍ ଆରି ଉଗ୍ଗର୍ନମ୍ ପଲୁଲଗୋ ଡେତେ ଆରି ସର୍ଡାତେ; ଇନିଆସନ୍ଗାମେଣ୍ତେନ୍ ସମେଁୟ୍ଣ୍ଡ୍ରାନ୍ ଆ ଜିନିସଜି ଅମଙ୍ବାବେନ୍ ଅନାବ୍ଡିଡନ୍ ଡେତେ, ବଡେସାବାଜି ଆନର୍ଜେ ଅମଙ୍ବାନମ୍ ଜିର୍ତାୟ୍ ।
6 ଗୋଗୋୟ୍ ଓଟନ୍, ମିଦିଅନ୍ ଡ ଅଇପାନ୍ ଅପୁଡ୍ଆଜିର୍ତେନ୍-ଆ ଓଟ, ଆମନ୍ଆଡଙ୍ ରୁବ୍ତଜି; ତି ଅଡ଼୍କୋନ୍ ସିବା ଡେସାନ୍ ସିଲଡ୍ ଜିର୍ତାଜି; ଆନିଞ୍ଜି ସୁନାନ୍, କୁନ୍ଦୁରୁନ୍ ପାଙ୍ତାଜି ଆରି ପ୍ରବୁନ୍ ଆ ସନେଙ୍କେନ୍ ଅପ୍ପୁଙ୍ବର୍ତେ । 7 କେଦାରନ୍ ଆ ଗୋସାମେନ୍ ଅଡ଼୍କୋନ୍ ଅମଙ୍ବାନମ୍ ଏବ୍ରୁକୁତାୟ୍, ନବାୟୁତନ୍ ଆ ମେଣ୍ତାଜି ଆମନ୍ଆଡଙ୍ ସାକେତମ୍ଞ୍ଜି; ଆନିଞ୍ଜି ମଅଁୟ୍ଡାଲେ ତନମ୍ପେଲ୍ଞେନ୍ ଆତୋଣ୍ତୋ ଜିର୍ତାଜି, ଆରି ଞେନ୍ ଗନୁଗୁ ପନେମେଙ୍ ଅନ୍ତମ୍ ସରେବାସିଙ୍ଞେନ୍ ଅବ୍ଗୁଗୁତାୟ୍ ।
8 ମେଗନ୍ ଅନ୍ତମ୍ ତର୍ଡମ୍ ତର୍ଡମ୍ ଆସିଙ୍ଲୋଙଞ୍ଜି ଆରେଙ୍ଡାତନ୍ ଆ କୁକୁରଞ୍ଜି ଅନ୍ତମ୍ ଏଙ୍ଲେ ଆଜିର୍ତାଞଞ୍ଜି କେନ୍ ଆନିଞ୍ଜି, ଆନା ? 9 ଆଜାଡ଼ିନ୍ ମଡ୍ଡି ସମେଁୟ୍ଣ୍ଡ୍ରାନ୍ ଡକୋନ୍ ଆମନ୍ରାଜି ଞେନ୍ଆଡଙ୍ ଜଗ୍ଗେତିୟ୍ଞ୍ଜି, ଆରି ତର୍ସିସନ୍ ଆଜାଜ୍ଜ ଆମ୍ମୁଙ୍ଲନ୍ ରମ୍ମଙ୍ ରମ୍ମଙ୍ ସରିନ୍ ଆରୁପାଞ୍ଜି ଡ ସୁନାନ୍ ପାଙ୍ଲେ, ଅଅନ୍ନମ୍ଜିଆଡଙ୍ ସଙାୟ୍ ସିଲଡ୍ ଓରୋଙ୍ତାଜି, ଇସ୍ୱରବେନ୍ ପ୍ରବୁନ୍ ଆଞୁମ୍ ଆସନ୍ ଡ ଇସ୍ରାଏଲନ୍ ଆ ଇସ୍ୱର ଆସନ୍ ଜିର୍ତାଜି, ଇନିଆସନ୍ଗାମେଣ୍ତେନ୍ ଆନିନ୍ ଆମ୍ୱେନ୍ଆଡଙ୍ ଅବ୍ଗୁଗୁଲବେନ୍ । 10 ଆରି, ବଡେସାବାୟ୍ଜି ଗଡ଼ା ତାଲ୍ବେନ୍ ତୁବ୍ତଜି ଡ ଆ ରାଜାଞ୍ଜି ଆମ୍ୱେନ୍ଆଡଙ୍ ସାକେତଜି; ଇନିଆସନ୍ଗାମେଣ୍ତେନ୍ ବନ୍ରାବ୍ଡମ୍ଞେନ୍ ବାତ୍ତେ ଆମ୍ୱେଞ୍ଜିଆଡଙ୍ ତିଡ୍ଲବେନ୍, ବନ୍ଡ ସନୁୟମ୍ନମ୍ ବାତ୍ତେ ଆମ୍ୱେଞ୍ଜିଆଡଙ୍ ଞେନ୍ କାନକାରମ୍ ଗାମ୍ଲବେନ୍ ।
11 ବଡେସାବାଜି ଆନର୍ଜେ ସରିନ୍ ଡ ଆ ରାଜାଞ୍ଜି ବଣ୍ତିଲେ ଏଙ୍ଗାଲେ ଅମଙ୍ବାବେନ୍ ଅନୋରୋଙନ୍ ଡେତଜି, ତିଆସନ୍ ଗଡ଼ାବେନ୍ ଆଗରନ୍ନେ ଅଡ଼୍କୋନ୍ ଆଏଡ଼ର୍ ଆରୋସାଡ୍ ଡକୋତନ୍, ତମ୍ୱା ତଗଲ୍ ତି ଅଡ଼୍କୋନ୍ ଅନିଙଡନ୍ ଅଃଡେଏ ।
12 ଇନିଆସନ୍ଗାମେଣ୍ଡେନ୍ ଅଙ୍ଗା ଡେସା ଡ ରାଜ୍ୟ ଆମ୍ବଞ୍ଜିଆଡଙ୍ ଅଃସାକେଲବେଞ୍ଜି ଡେନ୍, ତିଆତେ ଅସେଡ୍ତେ, ଓଓ, ତି ଆଡେସା ଅଡ଼୍କୋନ୍ ମେଡ୍ରନ୍ ଅନବ୍ସେଡନ୍ ଡେତେ ।
13 ଲିବାନୋନନ୍ ଆ ଗନୁଗୁ ପନେମେଙ୍ ଅମଙ୍ବାବେନ୍ ଜିର୍ତାୟ୍, ଦେବଦାରୁ, ତିଦର, ତାସୁର ଅରାନୁବନ୍ ରୁକ୍କୁଲନ୍ ମଡ଼ିର୍ ଡରକୋନେଞେନ୍ ଗନୁଗୁ ପନେମେଙ୍ ଆନେମ୍ମେ ଆସନ୍ ଜିର୍ତାଜି, ଆରି ଞେନ୍ ତାଲ୍ଜଙ୍ଞେନ୍ ଆଡ୍ରକୋଲୋଙ୍ ଅବ୍ଗୁଗୁତାୟ୍ । 14 ଆରି, ଅଙ୍ଗା ଆମନ୍ରାଜି ଆମ୍ୱେନ୍ଆଡଙ୍ ଡଣ୍ତାୟ୍ଲବେଞ୍ଜି, ଆଅନଞ୍ଜି ଅବ୍ସନ୍ନାଡମ୍ଲନ୍ ଅମଙ୍ବାବେନ୍ ଜିର୍ତାଜି ଆରି ଅଙ୍ଗା ଆମନ୍ରାଜି ଆମ୍ୱେନ୍ଆଡଙ୍ ଏଡ଼ୁର୍ମଡ୍ଲବେଞ୍ଜି, ଆନିଞ୍ଜି ଅଡ଼୍କୋଞ୍ଜି ତାଲ୍ଜଙ୍ବାବେନ୍ ଇୟ୍ତାୟ୍ ଲୋମ୍ବେଞ୍ଜି; ଆରି ଆନିଞ୍ଜି ଆମ୍ୱେନ୍ଆଡଙ୍ ପ୍ରବୁନ୍ ଆଗଡ଼ା, ଇସ୍ରାଏଲନ୍ ଆ ଇସ୍ୱର ସିଓନ ଗାମ୍ଲେ ମାନ୍ନେତବେଞ୍ଜି । 15 ଆମନ୍ ଆ ଆମ୍ଡୁଙ୍ ଡ ଏଡ଼ୁର୍ମଡ୍ଡାନ୍ ଆଡ୍ରେଲମନ୍ ଆସନ୍ ଅମଙ୍ଗଡ୍ନବ୍ ଆନ୍ନିଙ୍ ଅଃଜିର୍ରଜି, ତିଆପାଲ୍ତେଙ୍ ଞେନ୍ ଆମନ୍ଆଡଙ୍ ଆଏଡ଼ର୍ ଆସନ୍ ସର୍ଡାନ୍ ଆଡ୍ରକୋନେ ଏମ୍ମେତମ୍ ଆରି ଅବ୍ସୋଡ଼ାତମ୍ । 16 ଏଙ୍ଗାଲେ ଅବୟ୍ ଅୟୋଙନ୍ ଆ ଅନନ୍ଆଡଙ୍ ମେମେତେ ଆନ୍ନା ଡେସାମରଞ୍ଜି ଡ ରାଜାଞ୍ଜି ଆମ୍ବେନ୍ଆଡଙ୍ ଜୁବାୟ୍ତବେଞ୍ଜି । ଞେନ୍ ପ୍ରବୁ, ଅନୁର୍ମର୍ବେନ୍ ଆରି ଡନୋବ୍ମର୍ବେନ୍, ଜାକୁବନ୍ ଆବୋର୍ସାମର୍ ଗାମ୍ଲେ କେନ୍ଆତେ ଆମ୍ବେନ୍ ଜନାତବେନ୍ ।
17 ଞେନ୍ ପିତ୍ତଡ଼ନ୍ ଆପାଲ୍ତେଙ୍ ସୁନାନ୍ ଆରି ଲଆଙନ୍ ଆପାଲ୍ତେନ୍ ରୁପ୍ପାନ୍, ଅରାନ୍ ଆପାଲ୍ତେଙ୍ ପିତ୍ତଡ଼ନ୍ ଆରି ଅରେଙନ୍ ଆପାଲ୍ତେଙ୍ ଲଆଙନ୍ ଏପାଙ୍ତାୟ୍; ଆରି ଞେନ୍ ସାସନ ଇଙ୍ନମ୍ ସୟୁନ୍ ଡ ଡରମ୍ମଡମନ୍ ଆମ୍ବେଞ୍ଜିଆଡଙ୍ ସାସନତବେନ୍ । 18 ଡେସାଲୋଙ୍ବେନ୍ ସଙ୍ଗତା ବରନ୍ ଡ ସଣ୍ଡିଲୋଙ୍ବେନ୍ ମନୋସ୍ସାନ୍ ଡ ଅନବ୍ସେଡ୍ ବରନ୍ ଆରି ଏନ୍ନମ୍ଡଙେ; ବନ୍ଡ ଆମ୍ବେନ୍ ତର୍ଡମ୍ ଗଡ଼ାତାଲ୍ବେନ୍ ଆଞୁମ୍ ଡ ଡୁଆରାଞ୍ଜି ଆଞୁମ୍ ଅଡ଼୍କୋନ୍ ସନେଙ୍କେନ୍ ଗାମ୍ଲେ ଏଓଡେତେ । 19 ତିଆଡିନ୍ନା ଓୟୋଙନ୍ ଆମ୍ବେଞ୍ଜି ଅଃନବ୍ସାଆର୍ବେନ୍ ଆରି ଆମ୍ବେଞ୍ଜି ଆସନ୍ ଆଙ୍ଗାଜନ୍ ଅଃନବ୍ସାର୍ବେନ୍; ବନ୍ଡ ପ୍ରବୁନ୍ ଆମ୍ବେନ୍ ଆସନ୍ ଆଏଡ଼ର୍ ଆସନାର୍ ଡ ଇସ୍ୱରବେନ୍ ଗନୁଗୁବେନ୍ ଅନ୍ତମ୍ ଡେତେ । 20 ଓୟୋଙ୍ବେନ୍ ଅଃଡୁଙ୍ୟୋଙାୟ୍ ଆରି ଆଙ୍ଗାଜନ ଆନିନ୍ଡମ୍ ଅଃସଙାଜେ; ଇନିଆସନ୍ଗାମେଣ୍ଡେନ୍ ଆଏଡ଼ର୍ ଆମ୍ବେନ୍ ଆସନ୍ ପ୍ରବୁନ୍ ସନାରନ୍ ଅନ୍ତମ୍ ଡେତେ ଆରି ୟେୟେଡାବେନ୍ ଆଡିନ୍ନା ଆରି ଅଃଡ୍ଡକୋଏ । 21 ମନ୍ବେଞ୍ଜି ଅଡ଼୍କୋନ୍ ଡରମ୍ମମର୍ ଡେତଜି, ଆଏଡ଼ର୍ ଆସନ୍ ଆନିଞ୍ଜି ଡେସାନ୍ ଆ ସଡ଼ୋନାନେନ୍ ଞାଙ୍ତଜି, ଆନିଞ୍ଜି ଗନୁଗୁପନେମେଙ୍ଲେନ୍ ଆସନ୍ ଞେନ୍ ଗରୁଲାଞନ୍ ଆକେଣ୍ଡାର୍ ଡ ଅସିଞେନ୍ ବାତ୍ତେ ଲରୁମ୍ଲାଞନ୍ ଅନ୍ତମ୍ ଡେତଜି । 22 ଆନା ସନ୍ନା ଆନିନ୍ ଗୋଗୋୟ୍ଡମ୍ ଡେତଜି ଆରି ଆନା ଅଡ଼୍କୋନ୍ ସିଲଡ୍ ସାନ୍ନା ଆନିନ୍ ସୋଡ଼ା କେଜ୍ଜାମର୍ ଡେତଜି; ଞେନ୍ ପ୍ରବୁ ସମାନ୍ ବେଡ଼ାନ୍ କେନ୍ଆତ ଅବ୍ଗଟେତାୟ୍ ।
/images/a/Tcg2NiV7ce24OT6kCIQGR)
/images/a/qHG3xNP8jqR-HqIiucz0L)