ତିକ୍କିଆଓୟୋଙ୍ ଆ ରାଜା
1 ବନ୍ଡ ପୁର୍ବାନ୍ ଅଙ୍ଗା ଆ ଡେସା ବିକ୍କଡ଼ନ୍ ଡକୋଏନ୍, ତିଆତେ ଲୋଙଡ୍ଲେ ଆରି ଅଃଡ୍ଡକୋଏ । ପୁର୍ବାନ୍ ଆଡିଡ୍ ଆନିନ୍ ସବୁଲୁନ୍ ଡ ନପ୍ତାଲି ଡେସାନ୍ଆଡଙ୍ ଗନବ୍ରୟ୍ଡାନ୍ ଏମ୍ମେଏଞ୍ଜି, ବନ୍ଡ ତିକ୍କିଆଓୟୋଙ୍ ଆଡିଡ୍ ଆନିନ୍ ସମେଁୟ୍ଣ୍ଡ୍ରାନ୍ ଆରେଙ୍ ଆତୁୟା ଡ ଜର୍ଦନ ଅଲନ୍ ଆମିୟ୍ତାଲ୍ ଆକେଜ୍ଜାଜି ଗାଲିଲିନ୍ଆଡଙ୍ ମାନ୍ନେତଜି । 2 ଅଙ୍ଗା ଆକେଜ୍ଜା ଲୋଙଡ୍ଲୋଙନ୍ ତଙିୟ୍ଲଞ୍ଜି, ଆନିଞ୍ଜି ସୋଡ଼ା ସନ୍ନାଆରନ୍ ଗିଜେଞ୍ଜି; ଅଙ୍ଗା ଆମନ୍ରାଜି ରନବୁନ୍ ଆ ଲୋଙଡ୍ ଡେସାଲୋଙ୍ ଡକୋଲଞ୍ଜି, ଆମଙ୍ବାଞ୍ଜି ସନାଆରନ୍ ତୋରାଡ୍ତେ । 3 ଆମନ୍ ତି ଆଡେସା ଆମନ୍ରାଞ୍ଜିଆଡଙ୍ ଜବ୍ର ମନ୍ରା ଏମ୍ମେଲେ ଆସର୍ଡାଞ୍ଜି ଅବ୍ଗୋଗୋଜେନ୍; ଆନିଞ୍ଜି ଗଡ୍ଗଡ୍ନେ ବେଡ଼ାଇଙନ୍ ଆସର୍ଡା ଅନ୍ତମ୍ ସର୍ଡାତଞ୍ଜି, ଆରି ଜୁରୁ ଜିନିସନ୍ ଅଃବନ୍ତାଇଞନ୍ ଅନ୍ତମ୍ ଜବ୍ର ସର୍ଡାତଞ୍ଜି । 4 ଇନିଆସନ୍ଗାମେଣ୍ତେନ୍ ମିଦିଅନନ୍ ଆଡିନ୍ନା ଏଙ୍ଗାଲେ, ତି ଅନ୍ତମ୍ ଆମନ୍ ଆବିଡ଼ାରନ୍ ଅନ୍ତମ୍ ରାଙଞନ୍ ଡ ଆ ତାରଙନ୍ ଆବୁଡ଼ାର୍, ଆ ଜନୁରୁମରଞ୍ଜି ଆଡଣ୍ତ ଲବ୍ଗଡେନ୍ । 5 ଇନିଆସନ୍ଗାମେଣ୍ତେନ୍ ଅଲ୍ଜୁଜ୍ଜେଲୋଙନ୍ ଆରଲ୍ଜୁଜ୍ଜେତେଞ୍ଜି ଆସିପ୍ପାୟ୍ଜି ଆପାଣ୍ତୋୟ୍ଜି ଡ ମିଞାମନ୍ ଆଜାବ୍ଜାବନ୍ ଆସିନ୍ରିଜି ଅଡ଼୍କୋନ୍ ତଗୋନ୍ ଆସନ୍ ସରୟ୍ତୋଡ୍ଡଙନ୍ ଅନ୍ତମ୍ ଡେତେ । 6 ଇନିଆସନ୍ଗାମେଣ୍ତେନ୍ ଇନ୍ଲେଞ୍ଜି ଆସନ୍ ଅବୟ୍ ପସିଜନ୍ କନୋଡନ୍ ଡେଏନ୍, ଇନ୍ଲେଞ୍ଜି ଆସନ୍ ଅବୟ୍ ଓବ୍ବାସିଜନ୍ ତନିୟନ୍ ଡେଏନ୍ ଆରି ଆ ତାରଙ୍ଲୋଙନ୍ ସାସନନ୍ ଆବୁଡ଼ାର୍ ତନିୟନ୍ ଡେତେ; ଆରି ଆଞୁମନ୍ ସାରାନ୍ନିଆନ୍, ମନ୍ତ୍ରି, ବୋର୍ସା ଇସ୍ୱର, ଆଏଡ଼ର୍ ଆ ପ୍ପେୟ୍, ସୟୁ ରାଜାନ୍ ଡେତେ ।