Gênesis 46

1 Hohene Izilaeli wawu’kaga ku’ya ku' nsi' ya Misili haki’mo na v’antu' v’akwe na vintu' vyakwe vyose. Aho wafikaga ku' Beeli-sheba, wafumyaga ki’taambo cha ku’si’nza ku' Mulungu wamwa Isaka ise.

2 Mulungu wayombaga na Izilaeli wu’ziku' ki’ti' ndoti, wamwitanaga, "Yakobo, Yakobo!" Nawe witawu’kaga, "Kalame! Ene aha." 3 Mulungu wamuwi’laga ati', "Ene ni' Mulungu, Mulungu wamwa so. Ku’du' wogohe ku’ya ku' nsi' ya Misili, ku’nguno ndaku’v’ezye ev’e ku’v’a nsi' nhanya kwenu’ko. 4 Ene nku’ya haki’mo nanho kwenu’ko ku' nsi' ya Misili, nhana nanne ndaku’su’v’ye ku' Kanaani. Lu’siku' lwa ku’gulala kwako, Yosefu alaku’kumbi’le minso gako."

5 Haho Yakobo wawu’kaga ku’fuma ku' Beeli-sheba. V’aane v’amusolaga sav’o, v’ana v’av’o v’ado v’ado haki’mo na v’aki' v’av’o, v’av’atu’u’laga mu mikokoteni i’zyo zyatu’mi’ziv’agwa na Falao ki’gele ziv’asombe. 6 V’asolaga mitugo na nsawo zyose i’zyo v’asangwa v’akwav’ile mu nsi' ya Kanaani, nawe Yakobo haki’mo na v’av’yalwa wakwe v’ose v’asami’laga ku' Misili. 7 Wav’asolaga v’aane v’a ki’gosya na v’a ki’ki’ma, haki’mo na v’izu’ku’lu' v’akwe v’ose. I’vi hu' vyene wawu’kaga na wu’v’yalwa wakwe wose, wav’ayanaga ku' Misili.

8 Aga hu' mina ga wu’v’yalwa wamwa Izilaeli, ku' lina li’ngi' Yakobo, av’o v’ayaga ku' Misili:

Lubeni ali' mwana wakwe wa mbele, 9 na v’ana v’akwe v’a ki’gosya v’av’age: Hanoki, Palu, Heziloni na Kalimi.

10 V’ana v’a ki’gosya v’amwa Simiyoni v’av’age: Yemueli, Yamini, Ohadi, Yakini, Sohali na Shauli, u’yo wa ku’v’yalwa na muki’ma Mukanaani.

11 V’ana v’a ki’gosya v’amwa Lawi v’av’age: Gelesoni, Kohati na Melali.

12 V’ana v’a ki’gosya v’amwa Yuda v’av’age: Eli, Onani, Shela, Pelezi na Zela. Ali’vi Eli na Onani v’asangwa v’agulali’lile ku' nsi' ya Kanaani.

V’ana v’a ki’gosya v’amwa Pelezi v’av’age: Heziloni na Hamuli.

13 V’ana v’a ki’gosya v’amwa Isakali v’av’age: Tola, Puv’a, Yashubu na Shimuloni.

14 V’ana v’a ki’gosya v’amwa Sebuloni v’av’age: Seledi, Eloni na Yaleeli.

15 V’enav’o hu' v’ana v’a ki’gosya v’amwa Yakobo av’o wamuv’yali’laga Leya mu nsi' ya Padani-alamu. Na mwane wa ki’ki’ma Dina, nawe wav’yali’lagwa kwenu’ko. V’ana na v’izu’ku’lu' v’akwe v’ose v’av’age v’afikile maku’mi adatu' na v’adatu'.

16 V’ana v’a ki’gosya v’amwa Gadi v’av’age: Sifioni, Hagi, Shuni, Eziboni, Eli, Alodi na Aleli.

17 V’ana v’a ki’gosya v’amwa Asheli v’av’age: Imna, Ishva, Ishvi, Belia na Sela ilu’mbu' lyav’o.

V’ana v’a ki’gosya v’amwa Belia v’av’age: Hebeli na Malikieli.

18 V’enav’o hu' v’ana v’a ki’gosya v’amwa Yakobo av’o wamuv’yali’laga Zilipa, u’yo Labani ndi' wamupa mwaniki' wakwe Leya av’e muzya wakwe. V’ana na v’izu’ku’lu' v’akwe v’ose v’av’age v’afikile iku’mi na mukaga.

19 Lahele wamuv’yali’laga Yakobo v’ana v’a ki’gosya v’av’i’li': Yosefu na Benyamini.

20 U’ko ku' Misili, Asenati, mwaniki' wamwa Potifela, u’yo wav’age Muhozya wa kaya ya Oni, wamuv’yali’laga Yosefu v’ana v’a ki’gosya v’av’i’li': Manase na Ifulaimu.

21 V’ana v’a ki’gosya v’amwa Benyamini v’av’age: Bela, Bekeli, Ashibeli, Gela, Nemani, Ehi, Loshi, Mupimu, Hupimu na Alidi.

22 V’enav’o hu' v’ana v’a ki’gosya na v’izu’ku’lu' av’o Lahele wamuv’yali’laga Yakobo. V’av’age iku’mi na v’ane.

23 Mwana wa ki’gosya wamwa Dani witanagwe Hushimu.

24 V’ana v’a ki’gosya v’amwa Nafutali v’av’age: Yaseeli, Guni, Yeseli na Shilemu.

25 V’enav’o hu' v’ana v’a ki’gosya v’amwa Yakobo av’o wamuv’yali’laga Biliha, u’yo Labani ndi' wamupa mwaniki' wakwe Lahele av’e muzya wakwe. V’ana v’ose haki’mo na v’izu’ku’lu' v’av’age mupungati'.

26 V’enav’a v’ose hu' v’av’yalwa av’o Yakobo ndi' wasama nav’o ku’ya ku' nsi' ya Misili. V’av’age maku’mi mukaga na mukaga, ku’leka lu’v’alo lwa v’akamwana v’akwe. 27 Haki’mo na v’ana v’av’i’li' v’amwa Yosefu, av’o v’av’yali’lagwa ku' nsi' ya Misili, lu’v’alo lwa wu’du’gu' wose wamwa Yakobo, av’o v’ingi’laga ku' nsi' ya Misili, v’av’age maku’mi mupungati'.

28 Hohene Yakobo wamutongezyaga Yuda ku’mwa Yosefu, ki’gele av’alagi’le nzi’la ya ku’ya ku' lwandi' lwa Gosheni. Haho v’afikaga kwenu’ko. 29 Yosefu waliinaga mukokoteni gwakwe gwa ku’kweswa na falasi, wayaga ku’kamusu’mbi’la ise kwenu’ko ku' Gosheni. Aho wamufiki’laga, wamuwungati’laga na wali’laga ku' itungo ilihu.

30 Izilaeli wamuwi’laga Yosefu ati', "Ninga nfwe itungo li’li' yi’li' visoga du', ku’nguno nawu’wonaga wu’syu' wako na u’li’zuwu’ka."

31 Yosefu wav’awi’laga v’adu’gu’ye na v’antu' v’ose v’a mu lu’go lwamwa ise ati', "Nku’ya nkamuwi’le Falao ati', v’adu’gu' v’anne na v’antu' v’ose v’a mu lu’go lwamwa v’av’a av’o v’av’age ku' nsi' ya Kanaani, v’izaga ku' wanne. 32 Hangi' nku’muwi’la ati', v’adu’gu' v’enav’a v’asav’i v’a mitugo. V’izaga na ng’ombe, nkolo, mbu’li, na vintu' vyav’o vyose. 33 U’lu' Falao wamwitana na ku’muwu’zya ati', ‘Muli’mo gwinywe ki'?’ 34 Inywe musu’v’ye ati', ‘Iswe v’akumba v’ako ku’li' v’asav’i v’a mitugo ku’fuma wu’yanda wiswe mpaka walelo, ki’ti' v’agu’ku' v’iswe i’vyo v’av’ezyage.’ Muyombe vyeni’vyo ki’gele muzumi’ziwe kwikala ku' lwandi' lwa Gosheni, ku’nguno V’amisili v’av’agayile muno v’adi’mi v’a nkolo."