Gênesis 9

1 Haho Mulungu wav’adosyaga Nowa haki’mo na v’aane ku' ku’yomba, "Muv’e na wu’v’yalwa wingi muno, mukingi’he, mukayokazye hangi' welelo. 2 Ndimu zyose zya mu welelo, vitundwa vingi' vyose vya ku’yu’mba ha igu’lya na nsi', nnoni zyose zya mu chelela, na nsonvi zyose zya mu nyanza ziku’musu’pi’la na ku’mogoha inywe. Zyose namupaga mu makono ginywe. 3 Ki’la ki’tundwa cha myu’ye ya wu’panga gi’si' ki’ku’v’a ki’liwa chinywe. Ki’ti' i’vyo namupile mimelo zya madu’tu', hu' vyene nu’mupa ni’vi vyose viv’e viliwa vinywe. 4 Ali’vi nyama ya wu’su’lu’le magazi ku’du' mwize mulye, ku’nguno wu’zuwu’ku wayo wu’li' mu magazi. 5 Nhana magazi ndagakoov’e ku' ki’la muntu' u’yo alamuwu’lage mwiye. Ndawu’koov’e wu’zuwu’ku ku’fuma ku' ki’la ki’tundwa na ki’la muntu' u’yo alite magazi ga muntu'.

6 U’yo alite magazi ga muntu',

na mwene magazi gakwe galitwe na muntu',

ku’nguno muntu' watundagwa ku' wikole wanne.

7 "Inywe gi’si' muv’e na wu’v’yalwa wingi muno, mukiv’yale, mwingi’he, mukayokazye welelo."

8 Haho Mulungu wav’awi’laga Nowa haki’mo na v’aane ati', 9 "Lingagi, gi’si' ene nu’ki’ndi’ka ilagano lyanne na inywe, na wu’v’yalwa winywe u’wo wu’lalonde, 10 na ki’la ki’tundwa i’cho mwali' muli’nacho: nnoni, mitugo, na vitundwa vyose i’vyo vyafumaga mu safina haki’mo na inywe, hangi' na ki’la ki’tundwa cha myu’ye ya wu’panga mu welelo. 11 Nu’ki’ndi’ka ilagano lyanne na inywe ati', nkasye nvizimangu’zye hangi' vitundwa vyose ku' nzi’la ya kamilamasenga. Yi’kasye yize hangi' kamilamasenga ya minzi' ya ku’yi’zimangu’zya welelo." 12 Hangi' Mulungu wayombaga ati', "Nu’tu’u’la itav’angwa lyanne mu malunde. Lyeni’li' hu' li’ku’v’a lu’manyi’lo lwa ilagano i’lo nu’ki’ndi’ka mugati' yanne na inywe, haki’mo na ki’la ki’tundwa cha myu’ye ya wu’panga i’cho ki’li' na inywe, mu wu’v’yalwa wose u’wo wu’lalonde. 13 Nalyo li’ku’v’a lu’manyi’lo lwa ilagano lyanne na welelo. 14 Yi’ku’v’a ki’la aho ndav’e nu’himbazya malunde ha igu’lya na welelo, na itav’angwa li’ligele mu malunde, 15 haho ndizu’ki’le ilagano lyanne na inywe, i’lo li’li' mugati' yanne na inywe, haki’mo na vitundwa vyose vya myu’ye ya wu’panga. Nhana kamilamasenga ya minzi' yi’kasye yize hangi' ku’zimangu’zya vitundwa vyose. 16 Aho li’lav’e li’li’fumi’i’la itav’angwa mu malunde, ndali’wone na kwizu’ki’la ilagano lya nhananhana mugati' yanne na vitundwa vyose vya muv’i’li' na myu’ye ya wu’panga mu welelo."

17 Hangi' Mulungu wamuwi’laga Nowa ati', "Lwenu’lu' hu' lu’manyi’lo lwa ilagano i’lo naki’ndi’kaga mugati' yanne na vitundwa vyose mu welelo."

Nowa na v’aane

18 V’ana v’amwa Nowa av’o v’afumaga mu safina v’av’age: Shemu, Yafeti na Hamu. Hamu hu' mwene wav’age ise wamwa Kanaani. 19 V’enav’a hu' v’ana v’adatu' v’amwa Nowa, na ku' v’enav’o v’antu' v’ingi’haga mu welelo. 20 Mweni’ki’li' Nowa wav’age muli’mi, wav’aga muntu' wa kwandya ku’hamba mizabibu. 21 Lu’siku' lu’mo, wanywaga malwa ga muzabibu, na wakolwaga. Haho walalaga du’u’hu' mu ihema. 22 Hamu, ise wamwa Kanaani, wayi’wonaga du’u’hu' yamwa ise, nawe wafumaga ha ibala na ku’v’awi’la v’aku’lu’ye Shemu na Yafeti ati' sav’o ali' du’u’hu'. 23 Ali’vi v’aku’lu’ye v’enav’o v’asolaga mwenda, na v’agu’dimaga ku' mapembo v’ose v’av’i’li', haho v’ayaga ki’nsengelenyuma, na v’amukumbi’laga sav’o, ku’no minso gav’o v’alingile ku’ngi' ki’gele ku’du' v’amuwoneele sav’o.

24 Nawe Nowa aho wakolokwaga ki’neneko, wizu’ki’laga na ku’manya gose ago mwane mudo wamuv’ezezyaga.

25 Haho wayombaga,

"Afwizi’i’lwe Kanaani!

Akav’e musese muhanya wa v’adu’gu’ye.

26 Akumu’kiwe Gu’ku' Mulungu, Mulungu wamwa Shemu.

Kanaani akav’e musese wamwa Shemu.

27 Mulungu amongezye Yafeti,*9:27 Lina "Yafeti" ku' Ki’ebulania nguno yayo "kongezya."

akav’e na wikalo wu’soga mugati' na makutu gamwa Shemu,

sumbwa Kanaani akav’e musese wakwe."

28 Yav’aga ku’fuma aho gamalaga minzi' ga kamilamasenga, Nowa wikalaga myaka zingi' magana adatu' na maku’mi atano. 29 Wikalo wakwe wose mu welelo, Nowa wikalaga myaka magana kenda na maku’mi atano, haho wagulalaga.