1 A yuwan ta̱ vuma ro na a̱ tsu ɗe Ayuba, u da̱na̱ ta̱ na̱ nden a̱tsuma̱ e iɗa ya̱ Uz, a̱yi vuma na o soɗuwoo ma̱tsa̱n ɗa za na a uwwusa wovon wa̱ A̱sula̱. A̱yi vuma va̱ a̱ɓula̱ ɗa, za vu uvotowun wu ugbozu, waru u ta 'yuwusan mayan ma̱ cu'un vi iwuya biti. 2 U da̱na̱ ta̱ ne esheli a ta'atsu no olobo e cindere. 3 U da̱na̱ ta̱ ni ikyon ukpakukupa ucindere (7,000), na arakumi ukpakukupa uta'atsu (3,000), ni inan ukpakukupa (1,000), na̱ a̱na̱wun o nloli ukpakuton (500). Waru u da̱na̱ ta̱ na agbashi a̱ a̱bunda̱ lon. A̱tsuma̱ e iɗa ya asana suru za lo na la'a niyi utsuru shi.

4 Olobo a Ayuba a tsu yuwan ta̱ a̱buki ugeru ugeru a̱tsuma̱ a 'wa le, waru a tsu banu ta̱ a̱za̱ e le a̱ esheli'i tsura̱ a lyuwa o sowo oɓolo ne le. 5 Mantsa ma na rana va̱ a̱buki'i kotoi suru, Ayuba tsu 'yon ta̱ na̱ wasasa, cina o koto a̱buki'i, tsura̱ u ca ikucci vu uka̱mba̱tosu u muwun ma̱ yi cece. Ne ɗa u tsu yuwusan kuci, adama a na u ta majiyan, <<U ta gura o'wo za ta̱ a̱tsuma̱ a̱ muwu'un u yuwan unusu, ko wuntsaa e isula ta̱ A̱sula̱ a̱tsuma̱ a majiyan me le.>>

6 Urana u ro, nlingata ma̱ A̱sula̱ n ta̱wa̱ ta̱ n roco aciyele uba̱ta̱ wa̱ A̱sulazuva, reve Mekerenkesu fo ma̱ ta̱wa̱ oɓolo ne le. 7 Reve A̱sulazuva ece yi, <<A̱ te gba vu uta̱i?>>

Reve u usu yi, <<N te e igaru, na̱ n 'ya̱wi na̱ n ka̱mbi, e igaru a̱tsuma̱ o uvaɗi tsura̱ mee ene ili i na yaa farasa.>>

8 Reve A̱sulazuva ece yi, <<Ko vu gura ta̱ idana na aagbashi a̱ va̱ Ayuba? Vuma va̱ a̱ɓula̱ lo, no o soɗuwoo ma̱tsa̱n tsa̱ yi a̱tsuma̱ o uvaɗi shi. U ta uwwusa wovon u va̱, agba u 'yuwan ta̱ cu'un vi iwuya biti.>>

9 Reve Mekerenkesu ma̱ usu A̱sulazuva u damma, <<Pere ɗa Ayuba a uwwusa wovon wa̱ A̱sula̱ shi! 10 U ta uwwusa wovon wa̱ wu a na vu yuwaan niyi mapari, a̱yi na̱ limatan va̱ yi suru. Oɓolo ni ili i na u ri na̱ yi suru. Waru vu zuwaa ta̱ ili i na waa yuwusan suru aba'un, reve fo vu ca yi iliyamunga ya̱ a̱bunda̱ lon i na i rawai a na o shiton iɗa i nda suru. 11 Amma na̱ shi a damma vu ta kakasa yi ni ili yu ukere u na u ri na̱ yi gogo, to, u shi ta̱ o uta̱ gayin wi isula wu alanga eteshe!>>

12 A̱vu A̱sulazuva a damma Mekerenkesu, <<To, u yuwan ta̱, ili i na u ri na̱ yi suru u ta̱ ekere a̱ wu, amma a̱ yi aciya̱yi, she vu ju'wa̱n yi wan.>> Ɗaɗa Mekerenkesu ma̱ ka̱ra̱i.

13 Urana u ro, muwun ma Ayuba n da̱na̱ ta̱ a yuwusan a̱buki, a lyuwusa no osowi o u'wa wu zakpara le. 14 A̱vu malingata ma Ayuba ma̱ ta̱wa̱ uba̱ta̱ wa̱ yi ni ilaɗi u damma, <<A̱tsu e iluma ni inan, waru nloli n da̱na̱ ta̱ lo fo zuzu na̱ a̱tsu a alyuna, 15 babu urevu, reve aza a Sabiya a̱ riya̱a̱ tsu nu uta̱, reve e iva̱ ina'an na̱ nloli'i suru, a̱vu o una agbashi a̱ wu suru. A̱mu ɗa a̱ nde'en n la'ai, ɗaɗa n ta̱wa̱i n damma wu.>>

16 Babu na u kotoi adanshi, reve aagbashi o ro a̱ ta̱wisa̱ a̱vu u damma, <<Tsata tsa lapa ta̱ ikyon ya̱ wu oɓolo na̱ aza a aguɓa e le suru, a̱mu ɗa a̱ nde'en n la'ai, ɗaɗa n ta̱wa̱i n damma wu.>>

17 A̱yi a̱tsuma̱ a adanshi, a̱vu aagbashi o ro a̱ ta̱wisa̱ reve u damma, <<Oɓolo a̱za̱ a̱ nga̱la̱la̱i a ta'atsu aza a Kaldiya a̱ riya̱a̱ tsu ta̱, reve a usa tsu arakumi suru, a̱vu waru o una agbashi'i suru. A̱mu ɗa a̱ nde'en n la'ai, ɗaɗa n ta̱wa̱i n damma wu.>>

18 Kafu u koto adanshi, reve aagbashi o ro a uwisa, a̱vu u damma, <<Olobo ne esheli a̱ wu a̱ da̱na̱ ta̱ a yuwusan a̱buki a lyuwusa no osowi o u'wa wu zakpara le, 19 a̱vu upepu u ro u keɓe diga o ogozo, a gamusa pasu na̱shi vu u'wa'a a mantsa ma̱ ta̱. A̱vu u'wa'a u ra̱moo na̱ muwu'un, reve a̱ kuwa̱ suru nle. A̱mu a̱ nde'en ɗa n la'ai, ɗaɗa n ta̱wa̱i n damma wu.>>

20 Ana Ayuba uwwai ili i ndolo suru, reve u 'yon a̱vu wu kara a̱tugu a̱ yi adama a̱ a̱tsumola̱ngu, reve u puna a̱nji a̱yi. Reve u riya̱ nu urewesu wa̱ yi a̱ tyo we e iɗa, 21 adansa,

<<Ataɓu a ɗa a matsan numu,

waru ataɓu a ɗa ma̱a̱ ka̱mba̱.

A̱sulazuva a ɗa a cayi

waru a̱ yi ɗa u tarai.

Lyawa Aala a̱ A̱sulazuva a̱a̱ tsura̱ ica!>>

22 A̱tsuma̱ e ili i nda suru, Ayuba yuwan unusu shi, waru u tawaa A̱sula̱ shi.