1 N yuwan ta̱ akucunu ne esu a̱ va̱,

she n ka̱lyuwa̱ usheli na̱ maluwa wan.

2 Uda̱shiyi u ne ma̱a̱ tsura̱

diga uba̱ta̱ wa̱ A̱sula̱ a zuva?

Waru agadu a̱ ne ɗa ma̱a̱ tsura̱

diga uba̱ta̱ u Mogono me ili suru?

3 Amayun a̱tsuma̱lima̱ a̱ ta̱ riya̱a̱ za vi iwuya,

addama waru uba̱ta̱ a za na a yuwusan iwuya.

4 A̱sula̱ e reve ta̱ ili i na maa yuwusan,

waru u te keceshe udasu u va̱.

5 <<Nna̱ n shi n yuwan mmalu

a̱tsuma̱ o ulambu wa̱ a̱ɓula̱

reve n jika̱ adama m paala nanza,

6 lyawa A̱sula̱ o rito mu

ni ili yu uritosu u na u ri mejege,

u ta̱ gba reve a̱ɓula̱ a̱ va̱.

7 Nna ana a va a lyawa ure,

ko okolo a̱ va̱ a̱ kuru

maluwa me esu a̱ va̱,

ko gba ekere a̱ va̱ o o'wo idaba,

8 to, lyawa n sowo a̱tsuma̱lima̱ a̱ ca̱'a̱n

reve za ro lyuwa itana'a,

lyawa fo a̱ mula̱ itana

yu uɗuma̱ i va̱.

9 Nno okolo a̱ va̱ a yuwan

maluwa ma ka ro,

hali n 'ya̱wa̱ m pa'an o una̱ntsu

u moron ma̱ nden ma̱ va̱,

10 to, lyawa ka va̱

ira ishina i vali ro,

waru ali o ro o von na̱ a̱yi.

11 Adama a na ili i nda

a̱ba̱jini o unusu a ɗa,

na rawai a̱za̱ o uge'etosu e ge'eto.

12 Akina a ɗa na̱ a̱a̱ kulusa̱ hali u kototo,

u ta̱ kula̱to ili i na n cu'wa̱in suru.>>

13 Nna̱ n 'yuwan o poloo agbashi a̱ va̱ ali na̱ a̱ma̱ci atsuvu

a mantsa ma na a̱ ta̱wa̱yi na adanshi a aci a̱ va̱,

14 to, cine maa yuwan a mantsa ma na

A̱sula̱ a̱ 'yoyin adama u ge'eto?

U'usuwu u ne ɗa maa ca

a mantsa ma na u ta̱wa̱i

u yuwain yeci?

15 Ashe, a̱yi na u yuwan numu

a̱tsuma̱ o umatsutsun wa mma va̱

a̱yi ɗa u yuwan nle shi?

A̱yi ɗa u yuwan ntsu

a̱tsuma̱ o umatsutsun shi?

16 <<N kuɗa̱ a kamba alambi shi,

ko n zuwa ma̱runa̱ ma̱ shon shi,

17 ko n lyawa mkpa'an na ambulu

mantsa ma na maa lyuwusa ilyalya i va̱ shi,

18 e le a̱ muwun ɗaɗa mee e idanasa

mkpa'an cine dada tsu yuwan,

waru e idanasa nruna̱ a̱mu o ulobo.

19 Na̱ me ene nanza a̱ la̱nga̱

adama o ulambu wi itana,

ko za vu ulambu babu aapalutsu,

20 agba okolo a̱ yi a zuwaa mu aba'un shi,

ko wu uwwa sheshen

wu utugu wa̱ a̱punda̱ e ikyon i va̱ shi,

21 ko n 'ya̱sa̱n ukere u va̱

adama m paala makpa'an,

adama a na n ri nu ucira

uba̱ta̱ wu uge'etosu,

22 to, lyawa uvangaci u va̱ u foɗo

diga a̱ nlyungu n va̱,

lyawa ukere u va̱ u foɗo

diga a̱ a̱la̱ta̱ a̱ yi.

23 Adama a na mu uwwa ta̱ wovon

wa̱ a̱tsuma̱lima̱ diga uba̱ta̱ wa̱ A̱sula̱,

adama a tsugbain tsa̱ yi

n kuɗa̱ na ma yuwan ne shi.>>

24 <<Koto n rito zuwa okolo a̱ va̱

e ekere a zinariya shi,

ko shi n damma zinariya can,

a̱yi ɗa u ucira u va̱ shi.

25 Koto n rito yuwan ma̱za̱nga̱

adama a̱bunda̱ o utsuru u va̱ shi,

ko adama a̱bunda̱ e ili i na

ukere u va̱ u ɓolotoi shi.

26 Koto n rito ca urana tsugbain

adama e ekan ya̱ yi shi,

ko woto u na u ri a mmalu

a̱tsuma̱ o ulobonu wa̱ yi shi,

27 Koto n lyawa maluwa me eka'an

u lyungwa̱ okolo a̱ va̱ usokowu shi,

ko n kingyo adama a casu le tsugbain shi.

28 To, a̱yi nda fo u to o'wo

unusu u na ee ge'eto,

mayan tsunda to o'wo ulambu wa̱ a̱ɓula̱

e ekere a̱ A̱sula̱ za na ri zuva.>>

29 <<Koto n rito yuwan ma̱za̱nga̱

adama a na a̱tsuma̱lima̱ a cinai

ma'yuwatan ma̱ va̱ shi,

ko n lapa ma̱ka̱ka̱n

adama a na addama a cina niyi shi.

30 Koto n rito lyawa una̱ u va̱

u yuwan unusu,

a̱tsuma̱ o ure u na

n yuwaan niyi una̱ shi.

31 Ko ama a na a̱ ri o u'wa u va̱

babu za na a damma,

<Ndeɗe nanza na kuɗa̱i a̱ cuwa̱n shi.>

32 Agba koto n rito lyawa

mocin von o ure shi,

waru n lyawa ta̱ una̱ntsu wu u'wa u va̱

ukpa̱tu'u adama aza a mmalu.

33 N soko unusu u va̱

cine ama o ro a tsu yuwan shi,

ko n soko unusu u va̱

o okolo a̱ va̱ shi.

34 Mu uwwa wovon wo oɓolo a ama shi,

ko mu uwwa wono uba̱ta̱ wu mmaci n va̱ shi,

hali na wa zuwa mu n rungwa̱ kpaku,

n kuɗa̱ o uta̱ a alanga.>>

35 Na̱ shi a damma n ta̱ na̱

za na o polo atsuvu e idanshi i va̱,

n shi ta a zuwa ukere

e ili i na n dammai,

lyawa Mogono me Ili suru ma̱a̱ usu mu.

Lyawa za na a̱ ta̱wa̱ na adanshi a aci a̱ va̱

ta̱wa̱ na̱ a̱ yi uɗanu!

36 Na̱ shi a damma ne ɗa,

n shi ta a tanu unusu u va̱ o uvangaci u va̱,

a̱vu shi moo o oto yi aaci

tso okokolo o lyuwu wa aci.

37 N shi ta̱ ee kecee A̱sula̱ suru

ili i na n yuwain,

tsa mawun mo mogono

reve n ta̱wa̱ n ca yi.

38 <<Na̱ shi a damma n usa ta̱ uɗuma̱ u na maa cimbusa

diga o ukere wu za vi ili,

39 ko shi n rito lyuwa limatan va̱ yi

babu na n tsupai,

ko mo o'wo za na ta̱wa̱i nu ufaru u na

za vu uɗuma̱'a̱ kuwa̱i,

40 o una̱ u ndolo, lyawa awanda o uta̱

o una̱ u yitabo,

anlya waru o una̱

wo oroci a yitabo.>>

Lo ɗa adanshi a Ayuba o kotoi.