1 <<Vu reve ta̱ mantsa ma na

igeve i tsu matsan?

Vu gura ta̱ reve cine meshon ma tsu matsan?

2 Vu ta gura kece ko woto a yan ɗa

a tsu yuwan kafu a matsan?

Vu reve ta̱ mantsa ma na a tsu matsan?

3 Vu reve ta̱ mantsa me e teri e le,

na amantsa ma na a matsan muwun n le,

na amantsa ma na o kotoi

mamatsan ma̱ muwun n le?

4 Muwun n le n tsu kungwa ta̱

a agalaci a̱ a̱tsumona,

reve a yuwan ucira.

A tsu yuwan ta̱ mmalu n le,

agba a̱ tsu a̱ ka̱mba̱

uba̱ta̱ wi mma i le shi.

5 <<Zane ɗa lyawai mololi mo una u ka̱ra̱ fa̱a̱n?

Zane ɗa ba̱ɗa̱i amunga a̱ yi u suma?

6 Zana n ka̱mba̱toi a̱tsumona

wo o'wo u'wa wa̱ yi,

ni iɗa ya akpaɗi yo o'wo

uba̱ta̱ a̱ nda̱na̱ta̱ ma̱ yi?

7 U tsu yuwaan ta̱ a̱gidi'ya̱ a̱ lyuci ulamu,

u tsu da'wan na̱ yisali

yi za na aa zuwusai ulinga shi.

8 Nsasan n ɗa uba̱ta̱ wa alyuna a̱ yi,

ɗe ɗa u tsu zami

cu'un vi ili yu uta̱nu biti.

9 <<Yanci i ta̱ usu u yuwaan wu tsugbashi?

U ta̱ usu wa asa o ukungulu wa̱ wu?

10 Vu ta gura nla̱ yi na amunga a̱ keɗu?

Ko u ta̱ a̱ ka̱tsa̱ uɓaa wa̱ wu?

11 Vu ta zuwaa yi ucira

adama a̱ a̱bunda̱ o ucira

u na u ri na̱ a̱ yi?

Ko vu ta lyawaa yi ulinga?

12 Vu ta zuwaa yi ucira

u ta̱wa̱a̱ wu ni ishina o u'wa,

a̱vu u ɓoloto le uba̱ta̱ wo osoroto?

13 <<Azamina a̱ tsu 'ya̱sa̱n ta̱

evelu a̱ yi adama a̱ ma̱za̱nga̱,

agba a kurato le

ne evelu a aashamuwa shi.

14 Azamina a tsu zuwa ta̱

okowo a̱ yi e iɗa,

adama u lyawa iɗa'a i suɗato le.

15 U tsi icina ta̱ a na za ro ta

gura dasa le reve o oɓoso,

waru u ta gura o o'wo

nama vu una ro dadasa le.

16 U tsu roco ta̱ muwun ma̱ yi

a ahali a awuya

she damma muwun ma̱ yi n ɗa shi.

Ko na̱ shi a̱tsuma̱lima̱ a̱ yi,

uba̱ta̱ u limatan wo o'wo pere

u damaton yi shi.

17 Adama a na A̱sula̱ a 'yasan yi ta̱ nu ugbozu

waru u ca yi urevu shi.

18 Amma a mantsa ma na

u zaranai ni ilaɗi,

u tsu zo'oso ta̱ do

na̱ za na kumba niyi.

19 <<A̱vu ɗa vu cayi do ucira wa̱ yi?

A̱vu ɗa vu palai yinlu ya̱ yi

ne eleme o uga'an?

20 A̱vu ɗa vu zuwa niyi

tsu'yan tsa apapari?

Ucira u wivuwun wa̱ yi

u tsu ca ta̱ wovon.

21 U tsu yuwan ta̱ uvaɗu

a uwwusa uyo'o wu ucira wa̱ yi,

u tsu uwa ta̱ uba̱ta̱ o uvon babu wovon.

22 Wovon ili yi izo'oshi i ɗa uba̱ta̱ wa̱ yi,

waru ili i tsu damaton yi shi,

u tsu rono na̱ a̱ca̱pa̱

diga a matsun me pe'eni shi.

23 Ujin u tsu jinga̱ɗa̱sa̱ ta̱ zuzu na̱ a̱yi,

ni ibata ni iliya

a̱ ma̱ka̱ra̱ elime a̱ yi.

24 U tsu da̱na̱ ta̱ a maluwa

na̱ meje'en ma̱ lipu adama de u suma,

u tsi isawan kpen a mantsa ma na

wu uwwai mesun ma aavana shi.

25 Mantsa ma na e ivula̱i aavana

u tsu damma ta̱, <Ulobono ta̱!>

U tsu uwwa ta̱ ebetsu o uvon diga alanga,

ni ilama i nan yali yu uvon

na̱ yisali yu uvon i le.>>

26 <<Nu ugbozu wa̱ wu u ɗa

aajimba a tsu 'yawan zuva,

u bece evelu a̱ yi u saɓa uyagi?

27 Nu udammu wa̱ wu u ɗa

a̱a̱kuru a tsu 'yawan zuva,

a̱vu u ɗava yikinda ya̱ yi,

zuva masasan ma gbain?

28 Zuva va aatali a ɗa

u tsu da̱na̱ na ayin

ɗe ɗa u tsu yuwan yikinda ya̱ yi,

wungu wa aatali a ɗa

upa'atan wu ucira wa̱ yi.

29 Diga ɗe ɗa u tse ene ili i na waa lyuwa,

esu a̱ yi e tse e ene ta̱ ili diga a alanga.

30 Muwun ma̱ yi n tsu shiva̱ ta̱ mpasa,

waru uba̱ta̱ u na o unai nama suru

ɗe ɗa aa cina yi.>>