1 Reve A̱sulazuva a yuwan adanshi na̱ Ayuba a̱tsuma̱ a̱ lipa̱, u damma,

2 <<Zane ɗa gba,

a̱a̱ lungususa̱ a̱sa̱la̱ a̱ va̱

na adanshi a vanvama?

3 Yuwan gbakala tsa vali,

n ta yuwan wu yeci,

a̱vu vu usu mu.

4 Te ɗa vu shi a mantsa ma na

n varai ikyun yu uvaɗi?

Damma mu, na̱ vu reve ta̱.

5 Zane ɗa ronoi utyo wa̱ yi?

Amayun vu reve ta̱!

Zane ɗa gba rito niyi

na amunga o uritosu?

A̱vu vu reve ta̱?

6 A̱ nye i ɗa a̱ shuwa̱i ikyun ya̱ yi?

Waru zane ɗa shuwa̱i

atali asa'ani o usaa wa̱ yi?

7 Na italyo'o i wasasa i yuwain ishipa,

reve nlingata ma̱ A̱sula̱ suru

n 'ya̱sa̱n uɗyo u ma̱za̱nga̱.>>

8 <<Zane ɗa katsuyi na̱ntsu mala

mantsa ma na u gamai

tsa̱ ba̱ba̱ diga a̱ a̱tsuma̱?

9 Ana n yuwayin eleshe a̱tugu,

a̱vu mu palai ni irumbu i da̱n,

10 ana n zuwaa niyi utyo

reve n zuwaa yi na̱ntsu na̱ katsuwata,

11 a̱vu n damma,

<Utyo u na vaa rawa ɗa nda,

va̱a̱ ka̱ra̱ shi.

Pa ɗa ikeɗu i mini

ya̱ wu yee isawan.> >>

12 <<Ayuba, hali na vu ri,

vu zuwa ta̱ ɗe usana u tawa,

ko vu zuwa uba̱ta̱ u na

ekan o usana o uta̱?

13 Adama u reme utyo wu uvaɗi,

a̱vu a̱ za̱ka̱tsa̱ a̱za̱ e iwuya

o uta̱ pe a̱tsuma̱ a̱ yi?

14 Ne ekan o urana o uta̱,

iroci yi iɗa i tsu vadala ta̱

cine iroci i tsu vadala

ili i na a ma'ain no olo'o,

oroci a̱ yi a̱ tsu uta̱ ta̱ a alanga eteshe

cine vu revei utugu.

15 Ne ekan o urana o uta̱

a̱za̱ e iwuya a tsu lamba ta̱ irumbu i le,

mantsa ma na a̱ 'ya̱sa̱in ekere e le

a̱ tsu kuɗa le ta̱.

16 <<Vu uwa ta̱ ɗe a̱tsuma̱

e esu a̱ mini a mala?

Vu yuwan ta̱ ɗe mmalu

a̱ a̱ru'un a mala?

17 O roco wu ta̱ ɗe na̱ntsu vu ukwa̱?

Ko ve ene ta̱ ɗe na̱ntsu

vu uba̱ta̱ wu nden ma̱ a̱kwa̱kwa̱?

18 Ko vu reve ta̱ washin wu utyo wu uvaɗi?

Damma mu, na̱ vu reve ta̱ ili i nda suru!>>

19 <<Te ɗa ure a̱ tyo

uba̱ta̱ wu nden we ekan?

Waru a̱ te ɗa uba̱ta̱

wu nden wi irumbu?

20 Vu ta gura tara le a̱ tyo

ba̱ta̱ a̱ nden n le?

Vu ta gura reve ure

a̱ tyo a 'wa le?

21 A̱ yene ya̱ wu, vu reve ta̱?

Mantsa ma na a yuwan n le

a matsan wu ta̱ ɗe?

Waru aa'wan a̱ wu a yan?>>

22 <<Vee ene ta̱ ɗe mpon ma atayan?

Ko vu uwa ta̱ ɗe o mpon mi izuwa ma atayan?

23 N soko le ta̱

adama a mantsa ma̱ a̱tsuma̱lima̱,

adama a rana vu nla̱ngi na̱ rana vu uvon.

24 Te ɗa ure a̱ tyo

uba̱ta̱ u na urana u tsu ɓa̱tsa̱?

Ko uba̱ta̱ u na upepu wa asana

u tsu lapusa uba̱ta̱ biti?

25 <<Zane ɗa ɓatsai ure wi iro'i,

nu ure u na imaɗatsu

na̱ tsata a̱ kuru?

26 Zane ɗa ta̱wa̱i ni iro'i

e iɗa i na i ri babu za,

a̱ a̱tsumona a na vuma ri shi?

27 Zane ɗa sowotoi iɗa yu u'yewu

i na i ri na̱ mini shi,

hali u zuwa anlya o uta̱ pe?

28 <<Iro'i i ta̱ na̱ dada?

Zane ɗa matsain a'iza?

29 O umatsutsun wa̱ zane ɗa atayan o uta̱i?

Waru zane ɗa matsain uta̱nu wu ucira?

30 Mini ma̱ kutsa̱ ta̱ ugbamu tsa aatali,

waru mala ma̱ kutsa̱.

31 <<Vu ta gura nla̱ italyo'o akani?

Ko vu ba̱ɗa̱ amunga e italyo'o,

moton na̱ muwun ma̱ yi

meten na̱ musa̱n na̱ mozomu?

32 Vu ta gura rono italyo'o

yu upasu wu ugana

i na a̱ tsu ɗe Biya

na̱ muwun ma̱ yi aɗanga?

33 Vu reve ta̱ wila̱ wa zuva?

Ko vu ta gura damma ili i na

i bura nle nu uvaɗi?>>

34 <<Vu ta gura ɓara eleshe,

adama o ro'o mini ma̱ a̱bunda̱

hali a pala wu?>>

35 Vu ta gura lyungu imaɗatsu na̱ tsata a̱ ka̱ra̱,

a̱vu a damma wu, <<A̱tsu ɗa nda?>>

36 Zane ɗa cayi okolo ugbozu,

ko zane ɗa tsu ca majiyan ma sa'ani?*

37 A̱ ta̱ tsura̱ za vu ugbozu

u na a gura kece eleshe?

Ko u gura za̱nluwa̱

akani a̱ mini ma zuva,

38 mantsa ma na ma̱buta̱ mo ɓolotoi,

reve u kutsa̱ uba̱ta̱ uta̱ ugbamu?

39 <<Vu ta gura zamiya kamu

ili i na waa tama,

ko vu ta gura cuwa̱ton ikamu

i na a uwwusa ambulu,

40 a mantsa ma na a̱ ri nven

a̱tsuma̱ a̱ a̱ba̱nu e le,

ko a̱ ri uvawun e ipiri

o upa'atan u le?

41 Zane ɗa tsu zamiya aakakan

ili i na waa lyuwa,

mantsa ma na muwun ma̱ yi

n showen yi A̱sula̱,

na̱ a̱ 'ya̱wi na̱ a̱ ka̱mbi

adama e izami yi ilyalya?>>