1 <<Amayun uba̱ta̱ u ma̱ka̱pa̱ u azurufa u ta̱ lo

nu uba̱ta̱ u na a lapula zinariya.

2 Diga e iɗa i ɗa a̱ tsu tsura̱ rumu,

reve jeruweto rumushili diga a aatali.

3 Aza a na a zama atali e ikebe

a tsu yuwan ta̱ ulinga ne ekan a tawa irumbu,

tsura̱ a zami atali a na a̱ ri

a̱tsuma̱ e irumbu i pici.

4 A̱ tsu ka̱pa̱ ta̱ ure u na a̱a̱ kuru

utakatsuwu nu uba̱ta̱ u na a̱ ri na̱ nden,

uba̱ta̱ u na anana a vuma a gura dasa shi,

reve a̱ sa̱ga̱do amunga a̱ ta̱lyuwusa̱ a̱cipa̱.

5 Diga e iɗa i ɗa a̱ tsu tsura̱ ilyalya,

amma za̱la̱ va̱ yi

she damma akina a ɗa.

6 Atali a̱ yi, atali e ikebe a ɗa,

waru ma̱buta̱ ma̱ yi

a̱ tsu tsura̱ ta̱ pe zinariya.

7 Manunu ma na ma̱ tsu ka̱ɗa̱ inama

me reve ure u ndolo shi,

ko lyusu va ajimba fo

koto ene yi shi.

8 Inama yu una

koto a dasa ure'e shi.

Ko kamu koto kuru

nu ure'e shi.

9 Ama a̱ tsu ɓoso ta̱ atali ne ekere e le

a̱vu a vadala nkyun ya atali'i.

10 A tsu yuwan ta̱ re a̱tsuma̱ a atali,

waru esu e le e tse ene ta̱

cu'un vi ili isa'ani biti.

11 A̱ tsu gulu ta̱ esu a̱ mini

adama a putsaa le ne e yene,

tsura̱ a gbangaɗa ili i na i ri usokowu

o uta̱yi a alanga eteshe.

12 Agba te ɗa a̱a̱ tsura̱ ugbozu?

Te ɗa a̱a̱ tsura̱ urevu?

13 Ama e reve ulobonu wu ugbozu shi,

a̱a̱ tsura̱ yi o uvaɗi wa aza a wuma shi.>>

14 Mini ma̱ a̱ru'un ma damma ta̱, <<U ri a̱tsuma̱ a̱ va̱ shi,>>

a̱vu mala ma damma, <<U ri oɓolo na̱ mu shi.>>

15 <<Aa gura tsula yi na̱ zinariya shi,

waru makundatsu ma azurufa

maa gura tsupa ikebe ya̱ yi shi.

16 Aa gura tsula yi na̱ zinariya Ofi,

ko na̱ onis ko na̱ safaya atali e ikebe shi,

aa gura tsupa ikebe ya̱ yi shi.

17 Aa kurato ulobonu u zinariya ko ma̱suka̱ci

nu ulobonu wa̱ yi shi,

ko a kita'wan yi ni itana yi ikebe

i na a yuwain na̱ zinariya can shi.

18 A gura kurato aatali a̱ shili asa'ani

ko cu'un va aatali a na e ikanasa na̱ a̱yi shi,

adama a na ulobonu wu ugbozu

u la'a ta̱ ikebe ya atali asa'ani a safaya.

19 A kurato yi na aatali a tofa va Kush shi,

ko a tsula yi na̱ zinariya can shi.>>

20 <<Agba te ɗa a̱a̱ tsura̱ ugbozu?

Te ɗa a̱a̱ tsura̱ urevu?

21 O soko yi ta̱ e esu e ili i wuma suru,

a̱ ɓa̱ru yi ta̱ fo e ekere a̱ nnunu n tsu'yan.

22 Ukototosu nu ukwa̱ a ta dansa,

<Alabari a̱ yi a ɗa goon

tsu uwwai na atsuvu a̱ tsu.> >>

23 <<A̱sula̱ a ɗa goon e revei

ure a̱ tyo ya̱'a̱ yi,

waru a̱ yi ɗa a̱ nde'en u revei

uba̱ta̱ u na u ri.

24 Adama a na u te inda

hali a̱ tyo o ukosu wu uvaɗi

waru u te inda ili i na i ri

za̱la̱ va zuva va zuva suru.

25 Mantsa ma na A̱sula̱ a zuwai upepu u lapai

reve u zuwaa mala utyo.

26 Mantsa ma na u cayi iro'i udammu

oɓolo nu ure u na tsata tsa̱ kuru.

27 A̱vu we ene ugbozu

reve u ca ucuɗuwu wa̱ yi,

a̱vu u shuwa̱ yi,

reve u lyungwa̱ yi.

28 A̱vu u damma vuma,

ka̱lyuwa̱ nda, <Wovon wa̱ A̱sulazuva,

a̱yi ɗa ugbozu,

waru a suma mayan me iwuya

a̱yi ɗa urevu.> >>