1 Reve Ayuba usu u damma,

2 <<Polo atsuvu ulobonu, a adanshi a̱ va̱,

lyawa a̱yi nda wo o'wo

ucasu wa adanshi uba̱ta̱ u va̱.

3 I yuwan ankuri na̱ a̱mu,

i lyawa n yuwan adanshi,

reve na̱ n koto adanshi

i lyuwa elime nu ulamu u ɗu.

4 Adanshi a̱ va̱ vuma ɗa maa yuwusaan?

Adama a̱ nye ma̱a̱ kuɗa̱ a yuwan ankuri?

5 Ka̱lyuwa̱ numu,

ashe ili ya nda u rawa ɗu

a na yaa lamba ili i na yaa damma shi?

U rawa a na ya̱a̱ guza̱ una̱ u ɗu

adama a̱bunda̱ asalama shi?

6 Na̱ n cuwan ni ili i nda,

wovon u tsu reme mu ta̱,

reve lipu va̱ reme meje'en.

7 <<Adama a̱ nye a̱za̱ e iwuya

a tsu jima na̱ wuma,

a kutsa, reve a̱ da̱shishi ulyuwu we elime?

8 Muwun n le na̱ muwun n tsukaya n le

n tsu kungwa ta̱ esu e le.

9 'Wa le ta̱ nden gbaga,

waru babu ili i na yaa ca le wovon,

waru A̱sula̱ a tsu ca le oforo shi.

10 Inan e le a ta matsan babu a̱tyo,

a ta matsan babu usa̱n.

11 A tsu lyawa ta̱ muwun n kekeꞌen n le

mu uta̱ uro tso oɓolo e ikyon,

a̱ tsu da̱na̱ ta̱ e ilaɗi a tsu'yan.

12 A̱ tsu da̱na̱ ta̱ e ishipa

na̱ muganga ni ikumburu.

A tsu yuwusan ta̱ ma̱za̱nga̱

na uwwa mesun ma gbala.

13 A tsu yuwan ta̱ wuma u le na asuvu nden,

reve a̱ kuwa̱ kpen babu a̱tsuma̱lima̱.

14 Agba e le ɗa aza a na a tsu damma A̱sula̱,

<Buwa tsu ure!

Tsu ri na̱ maluwa ma na

tsee reve re va̱ wu shi.

15 Zane ɗa Mogono me Ili Suru,

hali na tsaa yuwaan yi a̱ga̱nda̱?

Uda̱shiwu u ne tsa̱a̱ tsura̱

na̱ tsu yuwan avasa a̱ tyo ya̱ a̱ yi?>

16 Agba a̱yi ɗa nda,

utsuru u le u ri e ekere e le shi.

Adama o ndolo ili i bura mu

na̱ a̱sa̱la̱ a̱za̱ e iwuya shi!

17 <<Na̱ ne suru vee ene ta̱ ɗe

a̱za̱ e iwuya a̱ kuwa̱i go'o?

Mantsa ma̱ ne ma ɗa

a̱tsuma̱lima̱ a tsu cina le?

Akunda ne ɗa A̱sula̱ a ca nle

a̱tsuma̱ o upan wa̱ yi?

18 Mantsa ma̱ ne ɗa upepu u tsu pura̱ le

tsa̱ tsu'yuwa̱?

Mantsa ma̱ ne ɗa lipa̱ tsa̱ pura̱ le tso owopo?>>

19 <<To, agba a̱yi ɗa nda i dammai,

<A̱sula̱ a tsu ca ta̱ muwun oforo

adama o unusu u nan dada le.>

Oꞌo A̱sula̱ a̱ tsu ge'eto ta̱ a̱za̱ o unusu,

waru u roco u yuwan ta̱ ne adama o unusu u le!

20 Lyawa za vi iwuya ene

ukototosu wa̱ yi ne esu a̱yi,

lyawa u sowo upan u

Mogono me Ili Suru.

21 A mantsa ma na rana vu

za vi iwuya kotoi

nye bura niyi na̱ mawwa mo uyo'o

ma limatan va̱ yi.

22 A ta gura roco A̱sula̱ urevu u ɗa?

A na wo o'woi a̱yi ɗa we ge'eto

aza a na la'ai tsugbain suru?

23 Vuma tsu kuwa̱ ta̱ a̱yi gbaga va̱ yi,

a̱tsuma̱ a asuvu nden,

24 u kuwa̱ agba u ramba shi,

waru etele a̱ yi ubuwu ugbamu.

25 Amma za ro tsu kuwa̱ ta̱

a̱tsuma̱ a̱ a̱tsumola̱ngu,

koto u peɗe ili i na a̱ tsu ɗe uyo'o shi.

26 Suru nle ili i ta̱ i ɗa,

a̱ ta̱ kuwa̱ a̱vu a̱ ciɗo le,

reve azun a tama le.

27 <<Amayun, n reve ta̱ ifoɓi i ɗu,

nu ugbozu u ɗu na yaa

yuwusan tsushu'un na̱ mu.

28 I damma ta̱,

<Gogo gba te ɗa u'wa u vuma gbai'in?

Waru te ɗa oogodo a na

za vi iwuya shi na̱ nden?>

29 Ashe ye ece aza a mmalu o ure shi?

Waru i usu ili i na a dammai shi?

30 O una̱ wu udammu u le,

a tsu lyawa ta̱ za vi iwuya

o urana wa̱ a̱tsuma̱lima̱,

waru a̱ tsu wawa ta̱ za vi iwuya

a̱tsuma̱ o urana wu upan wa̱ A̱sula̱.

31 Zane ɗa aa gura ɓara

za vi iwuya esu ne esu?

Waru zane aa gura tsupa yi

adama e ili i na waa yuwusan?

32 A mantsa ma na a tara niyi a̱ tyo a aason,

a ta ca yi tsugbain,

reve a zuwaa yi za vi ipiri.

33 Ama na̱ a̱bunda̱ a̱ ta̱ da̱na̱

uba̱ta̱ wa̱ a̱ciɗa̱ a̱ yi,

waru a̱ ta̱ da̱na̱ ugeru

elime na̱ a̱ca̱pa̱,

waru aaso'on a ta raba a̱ yi.

34 <<Gogo cine tsa ɗa ucasu

wa adanshi e pere a̱ ɗu

oo voton mu okolo?

Agba suru ili i na yu uta̱i

o una̱ u ɗu epen ɗa!>>