1 <<Amma gogo, a̱vu Ayuba

vu usu vu uwwa adanshi a̱ va̱,

vu polo atsuvu suru

e idanshi i na maa damma.

2 A̱yi ɗa nda, m kpa̱tu'wa̱ ta̱ una̱ u va̱,

una̱ u va̱ u ta yuwan adanshi.

3 Idanshi i na n cigai n damma,

amayun a ɗa a na ri o okolo a̱ va̱,

waru ili i na n cigai n damma

amayun a ɗa.

4 Ruhu va̱ A̱sula̱ ɗa yuwan numu,

waru wivuwun u Mogono me Ili Suru ɗa

caa numu wuma.

5 Vu usu mu na̱ vaa gura,

vu foɓo ili i na vaa damma mu

na va̱a̱ ta̱wa̱a̱ a̱ ma̱ka̱ka̱n ma̱ va̱.

6 Ka̱lyuwa̱, a̱mu na̱ a̱vu

ili i ta̱ i ɗa e ekere a̱ A̱sula̱,

a̱tsu ama e re,

diga o olo'o a ɗa a yuwan ntsu.

7 Adama o ndolo, she vu da'wan

adama a̱ va̱ wan,

ili i na maa damma wu,

waa la'a ucira wa̱ wu shi.

8 <<Amayun, mu uwwa ta̱

adanshi a na vu yuwain,

waru mu uwwa ta̱ suru

ili i na vu zunguyi.

9 Vu damma ta̱, <N ta̱ cece babu unusu,

n ta̱ cece n ri nu unusu u ro shi.

10 Vu damma ta̱,

A̱sula̱ a kari wu ta̱ ana,

reve u tara wu

ma'yuwatan ma̱ yi.

11 Wunla̱ ta̱ ana a̱ va̱ na akani,

reve u zuwa esu a̱ yi a mmalu n va̱ suru.> >>

12 <<Amma a̱tsuma̱ e ili i nda

vu yuwan mejege shi,

adama a na A̱sula̱ a la'a ta̱

vaɗilima̱ suru tsugbain.

13 Nye i zuwai vaa yuwusan

mawasan na̱ A̱sula̱ na vu dammai,

u usu ko adanshi a̱ ta̱ a̱ wu shi?

14 Adama a na A̱sula̱ a tsu yuwan ta̱ adanshi uta̱,

waru u da̱shi yuwisan,

agba vaɗilima̱ tsu zuwa atsuvu shi.

15 U tsu revetyo ta̱ vuma a̱tsuma̱ a alavu

na̱ a̱tsuma̱ a alavu alavu,

a mantsa ma na nlavu mu ume

n tsu pura̱ vaɗilima̱,

a mantsa ma na a̱ ri

a alavu a̱ a̱ga̱da̱ e le.

16 U tsu kpa̱tu'wa̱ ta̱ atsuvu a vaɗilima̱

a̱vu u ca le wovon na̱ tsuɓari tsa̱ a̱ yi,

17 adama u vadala le a lyawa

ili i na aa yuwusan,

reve waru u putsaa le na aciyogbamu.

18 U tsu geshe le ta̱ na̱ a̱ 'ya̱wa̱ aason,

reve u putsaa wuma u le

diga o ukototosu u matsun me pe'eni.

19 A tsu ca ta̱ vuma a̱tsuma̱lima̱

o usa̱n a̱ a̱ga̱da̱ a̱ yi

na̱ mɓa̱la̱ a̱tsuma̱ e etele a̱ yi.

20 Hali na wuma wa̱ yi

waa 'yuwan ilyalya,

nu uyo'o wi ilyalya biti,

u tsu 'yuwain ta̱.

21 Lipu va̱ yi ramba ta̱ suru,

reve etele a̱ yi a na a̱ shi tse ene shi,

gogo o uta̱ a alanga.

22 Wuma wa̱ yi u te sheɓerusu

a rawusa zuzu na aason,

wuma wa̱ yi u ta̱ e ekere o ukwa̱.

23 A damma malingata ma̱ A̱sula̱ ma̱ ta̱ lo

za na tsi isawaan wu e memere,

za ta̱ a̱tsuma̱ o ukpakukupa (1,000),

za na a damma vuma ili i na

i ri mejege e ekere a̱ yi,

24 u roco yi isa'ani u damma,

<Wawa yi she u zura̱ a̱ cipa̱ a aason wan,

adama a na n tsura̱ ta̱

ili i na maa atsupa o una̱ wa̱ yi.>

25 Lipu va̱ yi ta̱ ka̱mba̱ tsu ulobo,

u ta̱ ka̱mba̱ she damma

mantsa ma na u da̱na̱i o tsulolobo tsa̱ yi.

26 Ɗaɗa vuma'a wa yuwan avasa uba̱ta̱ wa̱ A̱sula̱,

reve gba u usu yi.

U rawa elime a̱ yi na̱ ma̱za̱nga̱,

A̱sula̱ a̱ ta̱ ka̱mbuwa̱a̱ vuma'a na̱ a̱ɓula̱ a̱ yi.

27 Vuma'a u ta cana ishipa

a̱ ma̱ka̱ka̱n ma ama u damma,

<N yuwan ta̱ unusu,

n yuwan mejege shi,

agba e ge'eto mu adama o unusu'u shi.

28 A̱sula̱ a tsupaa ta̱ wuma u va̱,

adama n cipa̱ a̱ tyo aason wan,

wuma u va̱ u te ene ekan.> >>

29 <<A̱sula̱ a yuwan ta̱ ili i nda suru,

toto ure, hali gba uta'atsu,

e ekere a vaɗilima̱,

30 adama u ka̱mba̱to wuma wa̱ yi diga aason,

adama wi ikana yi ne ekan a wuma.

31 Ayuba, polo atsuvu, vu uwwa mu,

vu rungwa̱ kpen,

n ta yuwan adanshi.

32 Na̱ vu ri na adanshi o ro,

to, vu usu mu,

vu yuwan adanshi,

adama a na n ciga ta̱ n roco

alanga eteshe vu ri nu unusu shi.

33 Agba na̱ ne ɗa shi,

she vu rungwa̱,

vu poloo mu atsuvu,

a̱mu gba n to roco wu ugbozu.>>