1 <<Agba a̱yi ɗa nda, esu a̱ va̱

ene ta̱ ili ya nda suru,

atsuvu a̱ va̱ fo a uwwa ta̱,

a̱vu e reve ni ili i nda suru.

2 Ili i na i revei, a̱mu fo n revei ta̱,

i la'a mu ni ili shi.

3 Amma a̱mu n ciga ta̱ n yuwan adanshi

na̱ Mogono me Ili Suru,

n ciga ta̱ n yuwan nronuloi

ma adanshi a̱ va̱ na̱ A̱sula̱.

4 Amma a̱ɗu gba i la̱nga̱ ta̱ ne epen,

suru n ɗu i ta̱ tsa̱ a̱za̱

o ucasu wa̱ a̱guma̱ e pere.

5 U shi ta la'aa ɗu i rungwa̱ kpen,

a̱ shi ta a tara ɗu a̱za̱ o ugbozu.

6 Vu uwwa mu gogo,

n ta̱ ta̱wa̱ na adanshi a̱ va̱,

reve vu polo atsuvu

e ipati yu una̱ u va̱.

7 Nye i zuwai yaa yuwusan epen?

I ta majiyan ma na

epen a̱ ɗu a ta kamba A̱sula̱ ɗa?

8 Ucigu wo okolo a̱ ɗu a ɗa yaa yuwusan,

ko ne ɗa shi?

I to o ucina̱ wa̱ A̱sula̱ ɗa?

I ta̱ da̱na̱ o ucina̱ wa̱ A̱sula̱

mantsa ma na a̱ ta̱wa̱to

numu uba̱ta̱ o uge'etosu?

9 Nna̱ A̱sula̱ e petelyuwe ɗu ulobonu,

u ta cina ili ya̱ a̱ɓula̱ o ro

a̱tsuma̱ a̱ɗu ɗa?

Ko i ta amajiyan ma na

ya gura luluma̱ A̱sula̱

cine vuma tsu luluma̱ za va̱ yi?

10 Ko na wo o'woi i sokoyi

ili i na i ri okolo a̱ ɗu,

na̱ ne suru u ta ɓara ɗu.

11 Tsugbain tsa̱ yi

tsa ta da'waton ɗu,

waru wovon wa̱ yi

u ta̱ reme ɗu.

12 Idanshi yu urevu u ɗu,

udammu we pere u ɗa,

u'usuwu wa adanshi a̱ ɗu

a̱ ta̱ tsu ukari u na a suwai na̱ ci'in,

za na ri nu ucira shi.

13 <<Rungwa̱i kpen,

lyawa numu n yuwan adanshi,

lyawa ili i na ya cina mu suru

u cina mu.

14 Ufoɓu u ɗa n ri na ma tara

wuma u va̱ e ekere a̱ va̱.

15 Agba a̱yi ɗa nda mu uta̱yi

okolo suru suru!

Ko na̱ shi A̱sula̱ a̱ ta̱ o una mu,

to, a̱yi ɗa nye?

Amma na̱ ne suru, n ta tara

adanshi a̱ va̱ a̱ tyo a̱ ma̱ka̱ka̱n ma̱ yi.

16 Tsundolo tsa ɗa wo o'wo mu iwawi,

a na wo o'woi za na a uwwusa

wovon wa̱ A̱sula̱ shi,

wa gura 'ya̱wa̱ a̱ ma̱ka̱ka̱n ma̱ yi shi.

17 <<Uwwai, idanshi i va̱ ulobonu,

reve i polo atsuvu a adanshi

a na maa yuwan.

18 Agba a̱yi ɗa nda n foɓoi

adanshi a̱ va̱ na maa damma,

n reve ta̱ na aa damma n ri nu unusu shi.

19 Zane ɗa ri lo a̱ ta̱wa̱a̱

na adanshi a aci a̱ va̱?

Nna̱ a̱ ta̱ tsura̱, to,

n ta̱ kuwa̱ kpen.

20 <<Ili i re ɗa goon ma patishi ya̱'a̱ wu,

adama she n soko aciya̱va̱

diga o urewesu wa̱ wu wan.

21 Lyawa vu tawa ukere

wa̱ wu diga uba̱ta̱ u va̱,

she vu lyawa wovon wa̱ wu,

wu da̱'waton mu wan.

22 <<She vu ɗe mu,

waru n ta̱ usu,

ko vu lyawa mu,

n fara yuwan adanshi,

reve vu usu mu.

23 Iwuya na̱ nusu va̱ aza yan a ɗa?

Lyawa mu n reve ni iwuya i va̱

na̱ nusu va̱ suru.

24 <<Nye i zuwai vu soko

numu urewesu wa̱ wu,

nye i zuwai vu tara numu

tsa ma'yuwatan ma̱ wu?

25 Vu ta da'waton mu,

a̱mu na n ri tsa̱ a̱vu'un

a na upepu u tsu ivula̱?

Ko na̱ shi vaa saɓa mu,

a̱mu na n ri tsi iceke yu u'yewu

i na upepu u tsu pura̱?

26 A̱vu ɗa vu ɗanai ili yo okono

na̱ a̱bunda̱ a aci a̱ va̱,

vu zuwa mu ta̱ n gasa oforo

a̱ nusu tsulolobo tsa̱ a̱ va̱.

27 Vu nla̱ ta̱ ana a̱ va̱ na akani,

vu zuwa ta̱ esu e re wuma u va̱ suru,

hali fo nu uba̱ta̱ u na

apata ana a̱ va̱ aa dasa suru,

vu zuwaa yi ta̱ utyo.

28 Tsu ndolo tsa ɗa n la̱nga̱i

tsi ili i na i shamai,

tsu utugu u na aran a tamai.>>