1 A̱vu Ayuba lyuwa elime na adanshi, u damma,

2 <<N kucina ta̱ na̱ A̱sula̱ o oɓolo a̱ a̱soja a zuva,

za na 'yuwain a yuwaan mu uge'etosu wa amayun,

n kucina ta̱ na̱ Mogono me Ili Suru,

za na ta̱wa̱a̱ numu na̱ a̱tsumola̱ngu a na n ri pe,

3 na u dammai, nna̱ n ri wuma,

waru na̱ wivuwun wa̱ A̱sula̱ a̱ ri pe a̱tsuma̱ a̱ va̱,

4 una̱ u va̱ waa yuwan adanshi e epen shi,

waru elentsu a̱ va̱ aa yuwan

adanshi a̱ wulumu shi.

5 A̱sula̱ a para, na ma̱a̱ usu

i ta̱ na̱ mejege,

hali n kuwa̱,

ma̱a̱ kuɗa̱ ee isawan

a̱tsuma̱ a amayun a̱ va̱ shi.

6 N te isawan a̱tsuma̱ a̱ɓula̱ a̱ va̱,

ma̱a̱ bula̱ shi.

Hali na n ri wuma

koto okolo a̱ va̱,

a ca mu wono shi.>>

7 <<Lyawa ma'yuwatan ma̱ va̱

mo sowo a̱tsuma̱lima̱

una̱ta̱ na̱ za vi iwuya,

za na waru 'yoyin tsushu'un na̱ a̱mu

lyawa o kototo yi

tsa za vu ulambu wa̱ a̱ɓula̱!

8 Cu'un vu uzuwu wo okolo a̱ ne a ɗa

za na revei A̱sula̱ shi ri na̱ a̱yi,

a mantsa ma na A̱sula̱

o kototo niyi u tawai wuma wa̱ yi?

9 Mantsa ma na a̱tsuma̱lima̱ a̱ ta̱wa̱ niyi

A̱sula̱ a ta uwwa mesun ma̱ yi ɗa?

10 U ta uwwa uyo'o a̱tsuma̱ o Mogono me Ili Suru?

U ta gura ɗe aala A̱sula̱ mantsa suru?

11 N to roco ɗu aɗa o ucira wa̱ A̱sula̱,

moo soko ure u Mogono me Ili Suru shi.

12 Yee ene ta̱ ili i nda na aciya̱ɗu suru,

nye i zuwai yaa yuwusan

adanshi a vanvama tsunda?>>

13 <<A̱yi nda, a̱yi ɗa akunda

a̱za̱ e iwuya diga uba̱ta̱ wa̱ A̱sula̱,

agadu a ɗa na aza a na e tse ene

iliyali yi za shi a̱ ushi

diga uba̱ta̱ u Mogono me Ili Suru.

14 Ko na̱ shi u ri na̱ muwun a̱bunda̱,

a zuwa le ta̱ na̱ a̱ kuwa̱

a̱tsuma̱ o ure u matsun me pe'eni.

Waru ugundo wa̱ yi wa̱a̱ tsura̱

ilyalya i na aa lyuwa a̱ cuwa̱n shi.

15 Muwun nna n la'ai,

a̱tsuma̱lima̱ a ɗa o una le,

nruna̱ n muwu'un a yuwan mesun ma̱ a̱tsumola̱ngu

adama o ukwisa̱ u le shi.

16 Ko na̱ shi u ɓoloto azurufa tsa aganga a̱ wuyun,

reve waru u ɓoloto a̱tugu tso oɓolo a̱ ci'in,

17 u to ɓoloto ili i nda,

amma za va̱ a̱ɓula̱ ɗa oto le,

a̱vu za na ri nu unusu shi

ne'eshen azurufa va̱ yi.

18 U'wa u na za vi iwuya suwai

ta̱ tsu uɗavu u manata,

tso mo oogodo ma za vi ipiri.

19 Za vi iwuya to von

a̱tsuma̱ o utsuru wa̱ yi,

amma nda a̱ tyo elime

wa̱a̱ da̱na̱ ne shi,

kafu u kpa̱tu'wa̱ esu a̱ yi

utsuru'u u ka̱ra̱ ta̱ ɗe.

20 Wovon u ta lyuwa aci a̱ yi

tsa̱ mini ma̱ a̱bunda̱,

a̱tsuma̱ ayin a̱ta̱

upepu u ta̱ pura̱ yi.

21 Upepu wa asana u ta̱ pura̱i a̱ ka̱ra̱,

reve u tawa yi uba̱ta̱ wu nden ma̱ yi.

22 U ta̱ vuta̱la̱ yi babu ene iliyali,

ko na̱ shi u yuwan ukadu u na wa suma,

diga e ekere a̱ yi,

23 za suru ta ɓasa ekere

reve u cira yi

hali u 'yon u lyawa uba̱ta̱'a̱.>>